Matio 3
3
Jọn Mengisaraḅọ Ḅe Ḍuko Tamụnọ Ḅẹrẹ Mị
(Mak 1.1-8; Luk 3.1-18; Jọn 1.19-28)
1Anịsịkị mị ḅụ Jọn Mengisaraḅọ ḅe, Judia onwun ele ogbo ḅie ḅomẹ se sakị Tamụnọ ḅẹrẹ mị nwọ ḍukomẹ. 2Ọ̀ nwọ ḅẹmẹ, “Ómine ọ́mịna sima ḅụ vinpịkị,” “anịatịḅị soḅie Amanyanakiri mị anị kpekisam!” 3Aịzaya ịkịankoroḅọ ḅe Jọn ḅe ḅụ ḅẹrẹ ḍukoarị sịkị ọ̀ nwọ ḅẹmẹ,
“Gbọrịḅọ onwun ele ogbo mị ḅie olokuaḅẹ,
‘Ateli karakarama Nyanaḅọ Ḅe pịrị,
gonogono ateli mịẹ Ọ̀ pịrị Ọ̀ ḅọrọ!’”
4Ike asụn nama ichuka ini nwọse ḅụchụaye mịẹ Jọn ḅe pịrịmẹ se nama oju apụra ḅirikunye ọ̀ nwọse ò ḅirikunmẹ, ọ̀ pịkị igurube na ḅẹịn na se fịye mịẹ fịmẹ. 5Tomoni Jerusalẹm ḅie wẹrị ọ̀ damaḅomẹ, bebe Judia sẹ mị ḅie na, pịkị Jọdan Tọrụ mị kelema koro nyọ angapụ mamgba na. 6Ini inia sima ḍukopakụmamẹ, se ọ̀ Jọdan mị ḅie mengi se ini saramẹ.
7Jọn ḅe tọn-a Farisiapụ na, Sadusiapụ na mengisara gose ọ̀ damaḅoarị ọkụ nwọ ọrị sịkị, ọ̀ nwọse ini ḅẹmẹ, “Ómine oruwu ogbo—tụḅọ ḍuko ọ́ pịrị na ómine ineda ḅo-ẹ tọn àrị Tamụnọ ịganị mị ḅie mangịsoḅịa? 8Ọ́mịna sima ḅụ ọ́ ḅarasinsam nwọ ḅẹ ye ọ́ nwọ mị-ẹ. 9Se ó koroma ma na ómine ineda ịganị mị ḅụ mangịsoḅịa, Ebraham ḅe ọ́mịna ḅieju-ḍaḅọ-ẹ gose. À ḍuko ọ́ pịrịaḅẹ na, Tamụnọ Ḅe ori ineda ma ḍụparịma ọkị se, àrị se awọ mịẹ Ebraham ḅe pịrịḅịa! 10Apala mị ini anị karakaramasam kunoma ḅụ wẹrị chịnma nwọ pẹlẹ gbinḅịa ẹrẹchị, iḅi chịnmgbọlụ chụaka chịn goyegoye ini anị pẹlẹ se fịnị ḅie gbin chuḅịa. 11À mengi seni ọ́ saramẹ, se ḍiepakụma na ó siḅụ pịkịsam, ọkụma ị̀ya ọḅụju ḅo ḅịa ḅọ ḅe Fịafịa Tẹmẹ Ḅe na fịnị na Ọ̀ nwọse mengi se ọ́ saraḅịa. Ọ̀ ḅakama opusọ ị̀ nẹngịmẹ, oria akpakama deki sọnị ị̀ ḅụgbẹịnkẹ. 12Oria yesẹlẹ ọgụ Ori na omi-ẹ, Ò se ịpịamgba mgbọlụma nwọ sẹlẹḅịa. Ori Oria ịpịamgbama koḅirima oria fịye koko nyọ mị ḅie chụaḅịa, se osirosiroḅama nwọ dọkịmaḅịa ngịsị bin ẹka fịnị mị ḅie.”
Jizọs Ḅe Mengisara Mị
(Mak 1.9-11; Luk 3.21-22)
13Anịsịkị mị ḅụ Jizọs Ḅe Galili ḅie so Jọdan mị nwọ mun mẹ, Jọn ḅe mengi se Ọ̀ saraḅịaye gose. 14Ọkụma Jọn ḅe ḅụkụrọma ḍọkịmẹ Jizọs ḅe Ò kuḅie ḍinma. Jọn ḅe nwọ ḅẹmẹ, “Ị́rị́ anị mengi se ị̀ sara gbẹịnye-ẹ, ọkụma ị̀rị̀ re mị Ị́ damaḅoye-ẹ!”
15Ọkụma Jizọs Ḅe nwọse ọ̀ pẹkẹrẹmẹ, “Ye anị pa mịọkụ ọkọ sime, anịatịḅị mịn mị ḅụ wa ḅọrọ Tamụnọ Ḅe ḅiarịye mamgba nwọ mịẹ ḅeinmaḅịa.” Jọn ḅe anị ḅụ ḅerenimẹ.
16Ò mengi mị se Jizọs Ḅe sara so kirikiri, Jizọs Ḅe mengi mị ḅie iwo pakaḅomẹ. Anịsịkị so ḅọkọ mị finji Ọ̀ pịrịmẹ, se Tamụnọ Tẹmẹ Ḅe okuku ḅara seni ideri ḅo Oria ọgọnọ chịẹ ọkụ Ọ̀ nwọ ọrịmẹ. 17Anị pụkọ soḅie nwọ ḅẹye-ẹ, “Ḅe anị Ị̀ ḅụ yela Tọkụ Ḅe-ẹ, Oria mịẹye opuma Ị̀ ḅụḅẹlẹmẹ.”
Currently Selected:
Matio 3: OBTP
Highlight
Share
Copy
Want to have your highlights saved across all your devices? Sign up or sign in
The Bible Society of Nigeria