ỌMWỤ ỌDADA 33
33
IJekọbụ bala Ịsọ Ta awụlẹ
1Ụka ká iJekọbụ juwa jẹ ịnyịnyịịnyị, ọ chẹhị kaka yẹ Ịsọ bala alẹng angị ohu ine (400) nyamwụ bwu ẹga ọlụrụ lẹ, iJekọbụ a chị anyị nyamwụ wuu ebwo ọọ-lajị nyọlẹ kọ juwa ju uhi lẹlẹ. Ọ chaa ebwo ha iLiya bala iRichẹlụ bala anyị ịlata nyaa imiiye. 2IJekọbụ tụ ịhụ-anchẹ imiiye nyamwụ da ịlahị bala anyị nyaa. Ọ ya iLiya bala anyị nyamwụ ji baa ba iRichẹlụ bala iJosẹfụ ọnyị nyamwụ a jẹkpẹ nyaa kpá wuu lẹlẹ. 3Ụka kị juwa jẹ ịnyịnyịịnyị lẹ, iJekọbụ ayịdang a naa ịlahị ji lẹlẹ. Ahyaahị ká iJekọbụ chẹhị kaka yẹ Ịsọ, ọ juwa hiri egbeju kpẹẹ ha Ịsọ lala ụka irwiye ene kọọ pwụ ẹga nyamwụ.
4Ma, ahyaahị ká Ịsọ chẹhị kaka yẹ iJekọbụ, ọ rụnyẹ rụnyẹ kele kaka wu iJekọbụ ba ajẹ juwa jwoo ọnụ. Ọọwa lẹ, ịwa angị imimiiye a juwa jida ju awụlẹ lẹlẹ. 5Ụka ká Ịsọ yẹ anyang ịwẹ bala anyị nyaa kị juwa ba iJekọbụ, ọ tọọ wo yẹkẹẹ, “Oowo anyị a tị́ wẹẹ?” Ụka ọọwa, iJekọbụ wẹ byoo yẹkẹẹ, “Ayịbam, anyị ịlẹ ká Ohe Oluhye ọlọnahị ya ham am ọnchẹ nyang a wẹ lẹ.”
6Ụka ọọwa, ịhụ-anchẹ imiiye nya iJekọbụ warị wẹ ẹga nya Ịsọ, juwa hirikpẹẹ họọ ịnyịnyị. 7ILiya bala anyị nyamwụ anyị kele kaka hirikpẹẹ ha Ịsọ ịnyịnyị. Ọọwa lẹ, iRichẹlụ bala iJosẹfụ ọnyị nyamwụ a kele kaka hirikpẹẹ ha Ịsọ ku ẹkpẹ-ẹkpẹ lẹlẹ. 8Ụka ọọwa, Ịsọ tọ iJekọbụ ịtọ yẹkẹẹ, “Iru nya iyo ịlẹpwa ịwẹ wuu tị́ ri nya oyina?” IJekọbụ wẹ byoo yẹkẹẹ, “Ị ri ijwo kam juwa jwo hang, ahụ ayịbam.” 9Ịsọ wẹ byoo yẹkẹẹ, “A nwụ ịlọng kaka. Ang nya ịlọm am ọlẹ kam la lẹẹ lẹ, ọ wụm ẹpwụ lẹ. Kpa ịnyang ụ-ụwa mẹ, ẹnwa.” 10Ụka ọọwa, iJekọbụ wẹ byi Ịsọ yẹkẹẹ, “Ehe, Ịsọ ayịbam, a ya ịnyị ka, adam. Ó-ri ká la ẹhị okpunyi ẹ-ẹga nyam lẹ aalẹ, a ye ọhaha nyam ọlẹ mẹ, chajị ọlẹ kam yẹng wẹ lẹ, a lam lala Ohe Oluhye ayịdang Ọngọlẹ ká kpa ọnahị nyamwụ yem wẹ la ọkịlẹtụ ookpokpo lẹ. 11Chuchuu adam, m bịlẹng nya ịlẹhị-ịlẹhị ká ka ye ang ịlẹ him ụ-ụbwọ pyii lẹ, chajị Ohe Oluhye wahị kụrụm lụmẹ lẹ, m la ang ọlẹ kọ ka nwam juwa wẹẹ.” Ụka ká iJekọbụ juwa bịlẹ Ịsọ nya ịlẹhị-ịlẹhị lẹ, Ịsọ a ye hyoo ụ-ụbwọ lẹlẹ.
12Ụka ọọwa, Ịsọ byi iJekọbụ yẹkẹẹ, “Anụ kẹwẹ kam kpanụ ụ-ụgbẹyị kahị rụ ka ẹpwa mẹ.” 13IJekọbụ wẹ byi Ịsọ yẹkẹẹ, “A wụ ẹjẹ koo, ayịbam. Yẹ mẹ, anjwo ichiche a lẹẹ kam kpa lẹ, anyị nya ịna bala anyị nya ịmwụ ịlẹ kị juwa kpa ẹmẹ nyẹ wẹẹ lụmẹ kam kpa jam ịnyịnyị. Chajị nya ọọwa lẹ, ọ́ chịla ká ẹdịyẹ nyam ọlẹ ka la kwaakwaa kpong-kpong ka. Ó-ri ịnyị ka aalẹ, anyị nya iyo ịwẹ ka gụm gbu wuu ụ-ụgbẹyị. 14Lẹ, ayịbam, ahụ ayịdang a rụ ji ịlahị nyahị mẹ. M ka jẹ dụmwọ-dụmwọ jaabwọ ká iyo ịlẹ bala anjwo ka jẹ-ẹ jẹ kaka ba myị gbee kahị ka tọng ụ-ụwa ọ-ọpyị nya ala ịSẹyii lẹ, adam.”
15Ụka ọọwa, Ịsọ yẹkẹẹ, “Ó-ri ịnyị lẹ aalẹ, ba kam tụụbwọ hi angịhyẹ nya angịnyị nyam kịịwa a kpanụ chị mẹ.” IJekọbụ wẹ byoo yẹkẹẹ, “Ọọwa-á baba kaka, adam. Ayịbam, yẹ mẹ. Ẹhị okpunyi ọlẹ ká la wẹ ẹ-ẹga nyam lẹ, ọ wum ẹpwụ lẹ. Lẹ, ba kọ la jaabwọ kam ya wẹ mẹ, ị́ị nya ẹla ka.” 16Ịnyị lẹ, Ịsọ bala angịnyị nyamwụ a yegiri ẹnụ ọọwa, juwa rụ kele ka ọpyị nya ịSẹyii lẹlẹ. 17Ma, iJekọbụ yegiri bwu ẹgẹwẹ ka ẹga ọlẹ kị wụrụ iSukotu. Ọ nwụ́ ẹpwang ha ịlọmwụ ụ-ụwa. Ọ myịmyị nwụ́ ẹpwang kụrụ iyo ịlẹpwa nyamwụ ụ-ụwa ịnyịnyị. Ịnyị a du kị wụrụ ẹga ọọwa iSukotu lẹ.
18Ịnyị lẹ, iJekọbụ a nya bwu ọpyị nya ịPadan-aram lokpunyi pwụ epweji nya iChekem ọlẹ kọ juwa ọ-ọpyị nya iKenan lẹlẹ. Ịnyị lẹ, ọ da ọdọdẹpwa nya ebe nya ọdụ ha ịlọmwụ bala anjwo nyamwụ u-ugumẹ nya epweji nya iChekem lẹlẹ. 19IJekọbụ ra ọpyị olugumẹ nya iChekem ọlẹ kị nọ ẹpwa wẹ bwu ẹpwụtụbwọ nya anyị nya ịHamọ ọlẹ kọ ri adịda nya iChekem. IChekem ọwẹ a ri adịda ogogo nya alepweji nya iChekem ọwẹ lẹ. IJekọbụ ra ọpyị ọọwa lokpoko onyoowuru ohu ookpokpo (100) chiriri. 20IJekọbụ me ogidi ha Ohe Oluhye ụ-ụwa. Ọ wụrụ ẹnyị nya ẹga ọọwa, Ẹlẹlohe Isirẹlụ. Etu nyamwụ ri “Ohe Oluhye a ri Ohe Oluhye nya ala Isirẹlụ lẹ.”
Currently Selected:
ỌMWỤ ỌDADA 33: IBNO
Highlight
Share
Copy
Want to have your highlights saved across all your devices? Sign up or sign in
Igede Bible © The Bible Society of Nigeria, 2019.