UMÁTIYU 4
4
Ojámá kú Ujísɔ̄si ipú ígbíli
(Umák 1.12-13; Ulúk 4.1-13)
1 #
Uhíb 2.18; 4.15 Alelékwū Ihɔ ā lɛ Ujísɔ̄si bī nyɔ̄ ipú ígbíli ká ebilíi kóō já ɔ̄ má. 2Anɔ́ɔ eko nōó lɛ okónu gwū ɛ̄cī ofɛpa, kwu otú kwu ɛnɔ ā, ɛmiyɛ gbɔɔ́ ō ŋmó ɔ̄ igbīhāajɛ. 3Anɔ́ɔ ebilíi wā ɛgiyí nū gaá da ɔ́ kahíníī, “Ɔ́dāŋ́ ka awɔ wɛ Ɔyínɔ̄nyīlɔ kú Ɔwɔicō á, da aɛ́cɔ̄ nēe bá nyā kéē le pīya igbō.” 4#Obla 8.3Amáŋ ó tóohi kahíníī, “É lɛ ɔ́ tá ipú ɔkpíihɔ kahíníī, ‘Ó wɛ igbō ōfōōnū nɛ̄ ɔ̄cɛ í lé le yēeyī ā ŋ́, Amáŋ ó cɛgbá ɛlā dóódu nōo ŋmá okónu kú Ɔwɔicō ā.’”
5Anɔ́ɔ ebilíi kwú ɔ̄ ú nyɔ̄ Ujerúsālɛm, nōo wɛ igelī otīihɔ ā á. Ó kwú ɔ̄ ú ce ɛga nōo licō fíyɛ́ dúú kú Agblīihɔ-nɛ̄hi āa. 6#Aíjē 91.11,12Ebilíi da ɔ́ kahíníī, “Ɔ́dāŋ́ ka a wɛ ɔyínɔ̄nyīlɔ kú Ɔwɔicō á, le ómblí tá gajɛ ohígbū keé tɛɛtɛ lɛ tá tāajɛ ipú ɔkpíihɔ kahíníī, ‘Ɔwɔicō géē je ɔ́da lɛ aálelékwū-ōtɛ̄hɔ̄ kú nū lɛyíkwu uwɔ. É géē bī uwɔ ce abɔ̄ kú uwā, cɛ́ɛ́ ká ā híīī lɛ ikpó kú uwɔ gbo ɛcɔ̄ ŋ́.’” 7#Obla 6.16Ujísɔ̄si tá ɔ̄ ohi kahíníī, “É lɛ ɔ́ tá táajɛ kahíníī, “Ā híīī yá Óndú ā, nōo wɛ Ɔwɔicō kú uwɔ ā ojámá ŋ́.’” 8Igbɔhá, ebilíi ā kwú ɔ̄ ú ga icō ɛfu olicō nɛ̄hi éyi. Anɔ́ɔ ó le odúúdú aájɔ̄ɔ̄cɛ́ kú ɛcɛ mɛ́mla agbénú kú uwā mafú lɛ ɔ́. 9Anɔ́ɔ ó da ɔ́ kahíníī, “Odúúdú ɔdā nēe bá ā, n géē kpó uwā gā uwɔ, ɔ́dāŋ ka a lɛ okwúukwu kwajɛ gā um, lɛ ɛ̄gbā gbā um.” 10#Obla 6.13Anɔ́ɔ Ujísɔ̄si da ɔ́ kahíníī, “Nyɛ̄ɛ̄ ŋmá amānyā, Usétan! Ohígbū keé lɛ ɔ́ tátāajɛ ipú ɔkpíihɔ̄ kahíníī, ‘Gbā Óndú ā, nōo wɛ Ɔwɔicō kú uwɔ ā ɛ̄gbā.
Anú ōfōōfūnū nɛ̄ a géē gbā ɔ̄ ɛ̄gbā á.’” 11Anɔ́ɔ alelékwū obɔ̄bí ā habɔ̄ ɔ̄ tá á. Ɔkwɔɔkwu ɔ́ɔmā, alelékwū-ōtɛ̄hɔ̄ wā gaá gbɔɔ́ ō yá ɛgbā kú nū lɛ ɔ́.
Ujísɔ̄si yɔ̄ Ukapánɔm ipú Ugálīli
(Umák 1.14,15; Ulúk 4.14,31)
12 #
Umát 14.3; Umák 6.17; Ulúk 3.19,20 É le Ujɔ́ni kwú tá agbá. Eko nɛ̄ Ujísɔ̄si le pó ā, ó nyɛ̄ɛ̄ ŋmá Ujudíya le tá Ugálīli. 13#Ujɔ́n 2.12Amáŋ ikɔɔkɔ nōó í klá Unásārēt ā, ó nyɛ̄ɛ̄ gaá lā ajɛ kú Ukapánɔm, nōo yɔ̄ okónu ísu, ipú ajɛ kú Usébūlɔn mɛ́mla Unáfutāli āa. 14Ɛ̄nyā yá kú ɛlā nɛ̄ Ayisáya, ɔ̄comɛ́ɛbɛ ā, ka ā kóō le yá jīla. Ó kahíníī,
15 #
Ayis 9.1,2 “Ajɛ kú Usébūlɔn mɛ́mla Unáfutāli,
ɔwɛ nōo yɛ ga ísu, nōo yɔ̄ abɔ̄ ɔhá
kú ísu kú Újɔ́dan ā.
Ugálīli, ɛga nɛ̄ ācɛ aílɔ́wá lā ā.”
16Ācɛ nēe bá ipú ínōbīya bɛ̄ɛka ācɛ nōo bá ajoodobū ā, lɛ onyatá nɛ̄ Ɔwɔicō bī wā ā má bɛ̄ɛka ɔlá nōo ī fíyáajɛ ā ɛɛ́. Ɔlá ɔ́ɔmā géē fíyáajɛ klá uwá nááná nēé lā ɛga nōo bɔ̄bí bɛ̄ɛka ajodobū kú ɔlékwū ā.
Ujísɔ̄si gbɔɔ́ ō kɛlā Ɔwɔicō
(Umák 1.14-15; Ulúk 4.14-15)
17 #
Umát 3.2
Ŋmá eko ɔ́ɔmā Ujísɔ̄si gbɔɔ́ ō tɔ́ɔna kahíníī, “Aá lɛ odo kú aá pīyabɔ̄, ohígbū ka ajɔ̄ɔ̄cɛ́ kú ɔkpáncō le kwu ajaajɛ ɛɛ́.”
Ujísɔ̄si fu ayíkpó kú nū ká aflɛ́yí ā
(Umák 1.16-20; Ulúk 5.1-11)
18Abɔ̄ ó yɔ̄ gē yāwu okónu ísu kú Ugálīli ā, ó má ayínɛ́ nɔ̄nyīlɔ ɛpa, Usáyímɔ̄ni nēé hī ka Upíta ā, mɛ́mla ɔyínɛ́ nū Ándru. É bá gē tá ɛ́yá kú uwā tū ipú enyi, ohígbū ka uwá wɛ ācokwɛ́béenyi. 19Anɔ́ɔ ó da uwá kahíníī, “Aá yɛce um, n géē je aá pīya ācɛ nēe í kwú ācɛ bɛ̄ɛka ɛ́gɛ́nɛ̄ ācɛ gē kwú ɛbéenyi ā.” 20Ɔkwɔkwu ɔ́ɔmā, é habɔ̄ ɛ́yá kú uwā tá, anɔ́ɔ é yɛce ɔ́ á. 21Abɔ̄ ó nyɛ̄ɛ̄ ŋmá abɔ̄ ā, ó má ayínɛ́ nɔ̄nyīlɔ ɛpa ɔhá, Ujémīsi, ɔyí Usébēdi mɛ́mla ɔyínɛ́ nū, Ujɔ́ni. Uwá mɛ́mla Usébēdi, ádā uwā bá ipú ɔ́kɔ yɔ̄ gē tá ɛ́yá kú uwā tū. Ó le uwá hīīgwú. 22Anɔ́ɔ ɔkwɔɔkwu ɔ́ɔmā é habɔ̄ ɔ́kɔ ā mɛ́mla ádā uwā tá, gaá yɛce ɔ́ á.
Ujísɔ̄si yɛ klla yúklɔ́ ipú Ugálīli
(Ulúk 6.17-19)
23 #
Umát 9.35; Umák 1.39 Ujísɔ̄si yɔ̄ gē yɛ ɛjɛ̄ɛ̄jī Ugálīli, yɔ̄ gē nwɛ̄lā ipú aɛ́gogbɔ̄ɔkɔ kú uwā, yɔ̄ gē kā ɔ̄kōolɔhi kú ajɔ̄ɔ̄cɛ́ ā. Ó klla hɛ́ ācodoōcē ɛdɔ ɛyɛ́ɛyɛ́yí tá. 24Abɔ̄ ó le lɛ āa odúúdú ajɛ kú Usiríya le ofu kú nū pó. Anɔ́ɔ uwá bī odúúdú ācodoōcē gé lɛ ɔ́, ācɛ nēe lɛ ōcē ɛyɛ́ɛyɛ́yí, ācɛ nɛ̄ iyē gē fu uwā, ācɛ nēe yɔ̄ abɔ̄ aálelékwū obɔ̄bí, ācɛ nɛ̄ ajikpáakpáa gē yá uwā, mɛ́mla ācɛ nɛ̄ iyē kú uwā le ŋmó. Anɔ́ɔ Ujísɔ̄si le odúúdú uwā hɛ́tá á. 25Ɛwa nɛ̄hi yɛce ɔ́ ŋmá Ugálīli mɛ́mla aígelī igwó nēé hī ka Udekapɔ́lis ā. É klla ŋmá Ujerúsālɛm mɛ́mla Ujudíya mɛ́mla ogbeé kú Ujɔ́dan ā.
Currently Selected:
UMÁTIYU 4: IFBCL
Highlight
Share
Copy
Want to have your highlights saved across all your devices? Sign up or sign in