Mat'fey 10
10
İsusi İz c'ək'p'i p'as's'e şagirdə tapşuruğ tast'un
(Mrk'. 3:13-19; 6:7-13; Luk'. 6:12-16; 9:1-6; 10:1-12)
1İsusen İz c'ək'p'i p'as's'e şagirdə İz t'ǒğǒl k'alpi şot'oğo murdar urufxo c'evksuni saal hər cürə azarxo q'a q'ač'urxo q'olaybsuni ext'iyəre tadi. 2İzi ap'ost'olxo #10:2 ap'ost'olxo - me əyit "yaq'abakiyo" upsune bakala me p'as's'e şagird moroxey: samciyo P'yot'r s'i tadeśi Simon q'a iz viçi Andrey, Zavdayi ğar İak'ov q'a iz viçi İoan, 3Filip' q'a Varfolomey, T'omas q'a naloggirbal Mat'fey, Halfay ğar İak'ov q'a Tadday. 4Kənançi #10:4 Kənançi - rimluğoy hari İsraili loxol kalaluğbsuni əleyinə bakalt'oğo tadeśi s'i. Simon saal İsusa xəyanətbi İuda İsk'ariot'.
5İsusen me p'as's'e tana metər tapşuruğxo tadine yaq'a badi: «Buxačuğo nu çalxalt'oğoy t'ǒğǒl ma takinan, samariyaluğoyal sal sa şəhəre ma bakinan. 6Süft'ə İsraili azuk'i iz yaq'a aç̌esp'i eğelxoy t'ǒğǒl takinan. 7Ef tağala ganxo "göye padçağluğ ı̌šalayinşakene" pi car sakanan. 8Azarit'oğo q'olaybanan, p'urit'oğo běyinbanan, yara baft'it'oğo pakbanan, murdar urufxo c'evk'anan. Hik'k'al tadinut' haq'it'u, hik'k'al haq'inut'al tadanan. 9Və̌xun nə q'ızıl, nə gümüş, nəəl mis təngə ma ext'anan. 10Yaq'eynak' nə toray, nə badalbseynak' sa paltar, nə torok'al, nəəl çombağ ma ext'anan. Şot'aynak' ki, əşp'alo sa tapan šumsuz tene mandon. #10:10 1 K'or. 9:14; 1 T'im. 5:18
11Sa şəhəre nəəl ayize bağat'an xavar haq'i avabakanan, t'iya hörmət'lu amdar şunesa, t'et'iin c'eri tağamin şot'ay k'oya mandanan. 12K'oya bağat'an k'ojin amdarxo "xeyirq'an baki" upanan. 13Əgər k'oj layiğesa, ef tadi xeyir-bərəkət t'e kojin loxol bakale; layiğ tenesa, ef tadi xeyir-bərəkət və̌x qaybakale. 14Şiin və̌x nu q'abulbi ef uk'alt'oğoval nu ǔmǔxlaxayin, t'e k'oyaxun nəəl şəhərexun c'eğat'an ef turmoğoy tozal śap't'anan. #10:14 Ap'ost'. 13:51 15Və̌x düzinəz nex: Axırınci ğine Sodomi q'a Gomorray hal t'e şəhəri halaxun suuk' bakale. #10:7-15 Luk'. 10:4-12 #10:15 Burq. 19:24-28; Mat'. 11:24
İsusi bač'anexun taysuni toy
(Mrk'. 13:9-12; Luk'. 21:12-17)
16Mone, q'uziğo canavarxoy boş yaq'abala k'inək'ez və̌x yaq'absa. Şot'aynak'al dizik' k'inək' müdrik, göyərçin k'inək'əl saf bakanan. #10:16 Luk'. 10:3 17Amdarxoxun və̌x běğanan, şot'aynak' ki, şot'oğon və̌x divanbali běš c'evk'i sinagogxoy boş tatarlayinşalt'un. 18Və̌x Za görə kalaluğbalxoy q'a padçağxoy běš eçalt'un, və̌nal şot'oğoynak' q'a Buxačuğo nu çalxalt'oğoynak' Bez barada exlətp'i şahidluğbalnan. 19Şot'oğon və̌x divanbala gala eçat'an, t'et'iya ef hetər upsuni nəəl k'ə upsuni fikirə ma zapanan. Upsun lazım bakalorox və̌x hat'e vədinest'a tadeğale, 20şot'aynak' ki, əyitk'alo və̌n tenan bakal, ef boş bakala ef Bavay Urufen və̌x əyitp'est'ale. #10:19-20 Luk'. 12:11-12 21Viçen viçə, bavan əylə besp'est'ale. Əylux bava-nanay ç̌oyel çurpi şot'oğo bisuna yaq'abi bakalt'un. #10:21 Mrk'. 13:12; Luk'. 21:16 22Efi Bezi şagirdxo baksuna görə bitot'in və̌x nifrətbalt'un. Ama axıral śirik' portp'alo çark'eğale. #10:22 Mat'. 24:9,13 23Və̌x sa şəhərexun şəp'eğat'an, t'iyə̌mint'u t'it'anan. Şot'aynak' ki, və̌x düzinəz nex: və̌n İsraili şəhərmoğo hələ tarapi çark'inut Amdari Ğar eğale. 24Nə şagird iz məəliməxun, nəəl nökər iz ağaxun ala tene. #10:24 Luk'. 6:40; İoan. 13:16; 15:20 25Şagirdə iz məəliməllarik', nökərəl iz ağallarik' baksun bəse. Ef zənden k'ojin q'ončuğo Baal-Zevult'un #10:25 Baal-Zevul - şeytani s'i. nexesa, içuxun sa k'oya bakalt'oğo k'ət'un uk'on? #10:25 Mat'. 9:34; 12:24; Mrk'. 3:22; Luk'. 11:15
Və̌x hik'k'al bes nu bakalt'oğoxun ma q'ı̌banan
(Luk'. 12:2-9)
26Metərluğen, şot'oğoxun ma q'ǐbanan. Şot'aynak' ki, t'etər c'ap' sa şey tene bu ki, şot'ay ç̌o nu qayeğane nəəl t'etər c'əp'k'in sa şey tene bu ki, şo qavuna nu c'eğane. #10:26 Mrk'. 4:22; Luk'. 8:17 27Zu və̌x bayinq'una pit'oğo ğene işiğen exlətp'anan, ef ǔmǔğoy tume şip'c'ə pit'oğo laśi ǔğǔlxun car sakanan. 28Efi bədənə əfçibi, ama elmoğo haq'es nu bakalt'oğoxun ma q'ǐbanan. Ham elmoğo, hamal bədənə cəhənnəme əfçibes bakala Buxačuğoxun q'ǐbanan. 29Sa mə̌yin köpi tene p'ə̌ çovali toy? Ama şot'oğoy saycoval ef Bavay icaza bakinut oq'a tene biton. 30Ef isə lap biin popurxoval bǒq'ə̌leśene. 31Şot'aynak'al ma q'ǐbanan, ef ga Buxačuğoy piyes t'e bǒq'ə̌lpi çark'es nu bakala çovalxoxun gele alane.
32Amdarxoy běš Za çalxalt'u Zuval göynul bakala Bez Bavay běš çalxoz. 33Amdarxoy běš Zaxun ç̌o taradalt'uxun isə, Zuval göynul bakala Bez Bavay běš ç̌o taradoz. #10:33 2 T'im. 2:12
İsusa layiğ baksun
(Luk'. 12:51-53; 14:26-27)
34Ma fikirbanan ki, me dünyəne şip'luğ eşt'eynak'ez hare. Zu şip'luğ təə, cöybseynak' q'ılıncez eçere. 35Zu harezu ki,
"ğara iz bavaxun,
xuyərə iz nanaxun,
binal iz q'aynakoxun cöybaz.
36İçuxun sa k'ojin boş bakalt'oğoxun düşmən bakale amdar". #10:35-36 Mik'. 7:6
37İz bava nəəl iz nana Zaxun gele çureğalo Za layiğ tene. İz ğara nəəl iz xuyərə Zaxun gele çureğaloval Za layiğ tene. 38Bez bač'anexun eysun çureğalt'in, iz xaça ext'i eğalane. T'e vədəne şo Za layiğ bakes bakon. #10:38 Mat'. 16:24; Mrk'. 8:34; Luk'. 9:23 39İz elmoğo efsun çureğalt'in şot'o aç̌esp'ale, Bez dərden iz elmoğo aç̌esp'alt'in isə şot'o efale. #10:39 Mat'. 16:25; Mrk'. 8:35; Luk'. 9:24; 17:33; İoan. 12:25
40Və̌x q'abulbalt'in Zane q'abulbsa, Za q'abulbalt'inal Za Yaq'abit'une q'abulbsa. #10:40 Mrk'. 9:36-37; Luk'. 9:47-48; 10:16; İoan. 13:20 41Xavareçala şot'ay xavareçal baksuna görə q'abulbalt'u tadeğala payal sa xavareçala tadeğala payaxun bakale. Düzgünt'u şot'ay düzgün baksuna görə q'abulbalt'ay payal düzgünt'u tadeğala payaxun bakale. 42Və̌x düzinəz nex: Bezi şagirdxoy sunt'u şot'ay Bezi bač'anexun eysuna görə lap sa cam çax xe tadalt'inal iz bit'ay əvəzə ak'ale». #10:42 Mrk'. 9:41
Currently Selected:
Mat'fey 10: udi
Highlight
Share
Copy
Want to have your highlights saved across all your devices? Sign up or sign in
© Translation Services International Ltd.