ZEKHARIAH 8
8
Jerusalem Tundinnak Tuk Topa i Thutepnak
1Cungnungbel Topa i thu cu Zekhariah nelah hi bangin heng hi. 2“Jerusalem mite, ka ihnak cu thuk zetin, Jerusalem khuapi ka bop nuam leita hangin a ngal tei humah ka thinuk ing. 3Kikleh tung a, ka khuapi thiangtho Jerusalem ah um tung. Muantak khuapi tin thei haw tuk a, Cungnungbel Topa i mual cu mual thiangtho tin sam haw tuk hi. 4Thiangkhut khunin, a hawhmi pitek le putekte vang khuapi sung a, mipi tangkhopnakah khung hiahhuahleh haw tuk hi. 5Khuapi sunglam tuanah naupang numei le panote cu lungdam thatui zetin ummaileh li haw tuk hi.
6“Ka hilhmi cu hi miphun sung pen a tangmi tei ca in, a cangthei ngawl bang tuk hi, mahnaven keima ca in, thil cangthei ngawl kha ma hi. 7Ka mihingte a kaih kheknak haw ngam pen keimah in humhim tung. 8Nisuahnak lam le nitumnak lam pen pui kikleh tung a, Jerusalem ah umleh haw tuk hi. Amuh cu ka mihing hi haw tuk a, keimah cu amu Pathian hi tung; muantakzet le dikcang zetin uk tung hi.
9“Ngalhannak nei un! Biakinn dinleh tukin a patphut haw laihin, profet tei otmi awnkam cu atu-in zaleh uh ci. 10Mahlai ngawlin, kuamah in mihing hei hihen, ngannung hei hihen nadek tukin cialdun thei haw ma. Ngal nei in, humhimnak nei viang haw ma hi. Mi pa khat le pa khat ngaldun tukin keimah in tokpil li ing. 11Mahnaven atu-in, hi ngam sungah a tang calamte cu a phundangin zo ing. 12Lungmuang zetin anci cing thei haw tuk toh hi. A sabit kung haw in, a ngah, ngah tuk a, leipi in, an suaktikin, nguah tampi zutuk hi. Ka miphun sung pen a tang calam tei humah hi bangin muicu pia tung hi. 13Judah mi le Israel mite! Ni dang laih cu ngamdang mite pa khat le pa khat a tamdun haw ten Judah le Israel tei humah a hengmi siatnak cu na hum uhah heng bok hen tin, tamdun haw hi. Mahnaven keimah in pan suak tung a, ngamdang ten Judah le Israel tei co mi muicu cu co ngah bokin, tin pa khat le pa khat tidun li haw tuk hi. Mah hangin ngalhang unna, imah lau pahsuh un,” ti hi.
14Cungnungbel Topa in, “Na pu le pa uhten, ka thin a uktik haw ten, a siatnak haw tuk cu tumtah ing a, khelleh ngawlin ka tupmi cu dek suak ing. 15Mahnaven atu-in, Jerusalem le Judah mite muicu pia tukin tumtah ing. Mah hangin imah lau pahsuh un! 16Hi bangin dek saw un: Pa khat le pa khat na otpihdun uhten thuman son un. Thukhennak mun pen thudik suaktik unna; lemdaihnak le dikcangnak suaktik saw un hi.#Efe 4:25; 17Midang tei siatnak tukin thu ngaisung pahsuh un. A man ngawlmi tetti dekin, tamsiatnak bawl pahsuh un. Zolthu bawlcawmnak le midang siatnak bawl cu ngaimawhzet ing.”
18Cungnungbel Topa i thu cu Zekhariah nelah hi bangin heng hi: 19“Ha li ha, ha nga ha, ha salih ha le ha sawm ha ten a bawl lehcet haw mi an cannak cu Judah tei ca in, lungdam thatuinak puai in cang tuk toh hi. Thuman le lemdaihnak cu deih un,” ti hi.
20Cungnungbel Topa in, “Khua tampi pen mi tampi Jerusalem ah a hun haw tuk hun cu heng awndiak zo hi.” 21Khuapi pa khat pen a hungmi ten khuapi dang pen a hungmi tei nelah, “Cungnungbel Topa bia tuk hung a, muicu ngen tuk ka hih uh hangin keimu lakah tel bok un, ti haw tuk hi. 22Mihing tampi le miphun ngilzette cu Jerusalem ah hung haw tuk a, Cungnungbel Topa bia in le a muicu co tukin thungen haw tuk hi. 23Judah mi pa khat nelah ngamdangmi sawm khat hungin, ‘Na nuncak khuasaknak sungah um nuam bok ung, itahim titale Pathian cu na nelah um tih thei zo ung, tin ti haw tuk hi.’ ”
Currently Selected:
ZEKHARIAH 8: NBF1
Highlight
Share
Copy
Want to have your highlights saved across all your devices? Sign up or sign in
Ngawm Bible © Bible Society of Myanmar, 2014.