ZEKHARIAH 5
5
Laizial Leng Muhnak
1Ka zohleh ten huih lakah laizial leng mu ing. 2Vancungmi in, “Imu nge cim?” tin a dot ten, “Huih lakah laizial a leeng mi mu ing a, mah laizial cu tong sawm nih sau in, tong sawm pek hi tin donleh ing.”
3Mahten ka nelah, “Hi laizial humah hi ngam hempoh ah a heng tukmi tamsiatnak cu ngatsa in um hi. Mai khatah hi ngam pen nguca hempoh vawkthong tawk haw tuk, tin ngan hi; a langlamah tamsiatnak tuah zolthu sontu hempoh vang vawkthong hi haw tuk hi tin ngan hi. 4Cungnungbel Topa in, mahmi tamsiatnak cu keimah in hahtul tung a, nguca tei innkua le tamsiat tuah zolthu sontu tei innkua venghawng ah heng tuk hi. Mah tamsiatnak cu a innkua hawah cam tuk a, siatsuah khawng tuk tin,” ti hi.
Bawm Sungah Numei Muhnak
5Vancungmi cu langlehin, “Zo in! Thildang pa khat heng tuk tin,” ti hi.
6“Ihum?” tin dong ing. Amah in, “Bawm pa khat hi a, mah bawm cu leihum buppi i sualnak i limlaknak,” ti hi.
7Mah bawmsin cu suan tuah bawlmi hi. Ka zoh leng sungin, a sin cu hongin, a sungah numei pa khat khungleng hi!
8Vancungmi in, “Hi numei cu phatngawlnak ai-awhtu tin ti hi. Mah numei cu bawm sungah nemcihin, a sin cu sinleh haw hi. 9Ka zoh leng sungin, vaca ha bang, huham neizet mi, numei pa nih cu keima lamah a leng mu ing. Bawm cu lentul pih hawta hi.
10Vancungmi cu, “Ilai lamah hawhpih haw tuk him?” tin dong ing.
11Amuh ten, “Babilon ah hawhpih haw tuk a, mahlai ah a ca in, biakinn sahsak haw tuk hi. Mah biakinn a sak ceng haw ten bawm cu biak tukin koih haw tuk tin hilh hi.”
Currently Selected:
ZEKHARIAH 5: NBF1
Highlight
Share
Copy
Want to have your highlights saved across all your devices? Sign up or sign in
Ngawm Bible © Bible Society of Myanmar, 2014.