MATTHAI 9
9
Jesuh In Khut le Ke Zawngpa Damtik
(Mk 2:1-12; Lk 5:17-26)
1Jesuh cu hawmkuang sungah tumin, tuinim ngalkhat lam a, ama khua Kapernaum ah kikleh hi. 2Mi khenkhat ten khut le ke zawngpa cu a zaunak tuah Jesuh lakah zawng haw hi. Jesuh in, upnak a neihdan haw a muh ten khut le ke zawngpa i lakah, “Ka capa, lau viang pahsun. Na sualnak cu ngaihdam hi zo hi,” ti hi.
3Daan zilhtu khenkhat ten, “Hi pa hi Pathian nautatin awn hi,” tin amu sungah son li haw hi.
4Mahtin a ngaihsut haw cu Jesuh in thei in, “Itakaw hitih bang thilpha ngawl na ngaihsut lih uh? 5‘Na sualnak cu ngaihdam hi zo,’ tin maw, ‘Tho inna, hawhin,’ tih kaw a baih saw? 6Mihing Capa in leihumah misual ngaihdam theihnak thunei hi, tih hi nangmu mai ah langtik tung,” tin ti in, khut le ke zawngpa i lakah, “Tho inna, na zauphah la in, na innah pinin,” ti hi.
7Khut le kezawngpa cu tho in, a innah pin hi. 8Mahmi cu mipi in amuh haw ten lamdangsa sihin, hitih bang thuneihnak hi mihing lakah a piak hangin Pathian min thangphat haw hi.
Jesuh In Matthai Sam
(Mk 2:13-17; Lk 5:27-32)
9Jesuh cu mahlai mun pen tulin a hawhlih laih takin, siahkhonpa pa khat Matthai a tih haw mi, a zung sung a, khungleng cu mu in, “Keimah zui in,” tin ti hi.
Matthai cu tho in Jesuh zui hi.
10Jesuh cu Matthai i innah an ei in, a khun leng laih takin siahkhontu dang tampi le misual hi tin mitei sitmi ten Jesuh le a nungzuitute cu an eih pih haw hi.#Lk 15:1-2; 11Farasi khenkhat ten mahmi cu amuh haw ten a nungzuitu tei lakah, “Na Sazapa uhin itakaw hitih bang misualte tuah an a eih langkhat haw?” tin dong haw hi.
12Jesuh in, mah thute a zak ten amuh tei lakah, “Midam ten sibawi kin haw ma, tinate bekin kin haw hi. 13Hawh unna, nganhingin biakpiak kul mang, mi hehpihnak lungmu hi ka deih, tin Lai Thiangtho i a tih nuammi sullam ngaisungta un. Midikte sam tukin hung mang, misualte sam tukin hung ing,” ti hi.#Mt 12:7; Hos 6:6;
An Cannak Thu
(Mk 2:18-22; Lk 5:33-39)
14Jesuh lakah tuiphumnak petu Johan i nungzuitu hungin, “Keimuh le Farasi miten ancang mek nave ung, itakaw na nungzuitute ancang awng haw ma si?” tin dong haw hi.
15Jesuh in, “Mopuainak a sam mite cu mopa i um sungin, itin kaw thasia in, a um haw tuk? Thasia in um haw tukma hi! Mahnaven amuh tei lak pen mopa laknak hun hengleh tuk a, mah hun ten an cangleh haw tuk laih hi.
16“Kuamah in puan lun balkekmi humah puanthakin dah awng haw ma hi; itahim titale dahnak puanthak cu conin, angki a balkekmi cu zal dedeuh tuk hi. 17Mahti bang lelengin kuamah in savun thawl lun sungah sabittui thak thun awng haw ma hi; a thun haw tale savun thawl cu kehin sia thong tuk hi. Mah hangin sabittui thak cu savun thawl thak sungah a thun haw tale siatnak imah um ngawlin a pa nih haw in pha kawm tuk,” ti hi.
Bawi Canu le Jesuh Puan Zentu Numei Nu
(Mk 5:21-43; Lk 8:40-56)
18Jesuh in thu a hilh lih laihtakin Judah mi lak pen bawi pa khat cu a nelah hungin khuk a din celh ten, “Tuno in ka canu thi ta hi. Mahnaven, nangmah hungin, a humah na khut na nga ahin nungleh tuk,” ti hi.
19Mah hangin Jesuh cu tho in, a nungzuitute tuah mahpa cu zui haw hi.
20Mahlai takin, numei nu pa khat kum sawm le kum nih sung thi tul natnak a thuaktu cu Jesuh i nunglam pen hungin, a puancep mawkno cu zen hi.
21“A puancepno beek ka zen thei ahin dam tung,” tin ngaisung hi.
22Jesuh cu nunglam a hek ten numei nu cu mu hi. “Ka canu, lau pahsun! Na upnakin damtik zo,” ti hi. Mahbek ten numei nu cu dam paih hi.
23Jesuh cu Judah mi bawi upa i inn sung a hen ten thi ngalin, khuang le daak tumtute le mihing lung cecu in um li cu a muh ten, 24“Na venghawng uhin tul khawng hem un! Hi naupang nu cu thi ma hi, a hihbu hi,” tin a tih ten nuihsan khawng haw hi. 25Mahnaven mite a tul khawng ceng haw ten Jesuh cu naupangnu i umnak khansungah tumin, a khut a zen bek ten naupangnu cu thoto hi. 26Mah thu cu a elkim ngamsung hempoh ah thang khawng hi.
Jesuh In Mitcaw Pa Nih Khua Mutik
27Jesuh cu mahlai mun pen tulin a hawhlih laihtakin, mitcaw pa nih ten hil haw in, “David Capa, hehpih pohin hi,” tin au haw hi. 28Jesuh cu inn sungah tumin, mitcaw pa nihte cu hungin a nelah, “Keimah in damtik thei tuk tin um uh cim?” tin dong hi.
Amuh ten, “Topa um ung,” tin ti haw hi.
29Jesuh in, a mit haw zenin, “Na upnak uh bangin cang tahen,” ti in, 30khua muleh thei haw hi. Jesuh in, amu lakah, “Hi thu hi kuamah i lakah hilh pahsuh un,” tin thupia hi.
31Mahnaven hawh tul haw a, Jesuh i thu cu mah khua elkim khua hempoh ah than haw hi.
Jesuh In Awnthei Ngawlmi Awntik
32Mipite innah a pin lih haw laihtakin midang ten a sungah khawhuai a tummi pa khat cu Jesuh lakah hunpih haw hi. 33A sung a khawhuai a hawlvawk sak celh bek ten mahpa cu awnleh thei in, mi hempoh ten lamdangsa khawng haw hi. “Israel mi lakah hitih bang hi mu awng ma laih hung,” tin ti haw hi.
34Mahnaven Farasi ten, “Khawhuai hawlvawk theihnak huham cu khawhuai bawi in, a lakah pia hi,” tin ti haw hi.#Mt 10:25; 12:24; Mk 3:22; Lk 11:15;
Jesuh In Mipite Hehpih
35Jesuh cu khualzinin khuapi le khua neu ah pal pepel hi. A pumkhawm inn hawah thuzilhin, Vancung Uknak Thuthangpha hilhin natnak a phunkim a neite damtik pepel hi.#Mt 4:23; Mk 1:39; Lk 4:44; 36Mipi amuh ten cingtu nei ngawl tuuhon bangin nuncim le vansangin, a um haw hangin hehpihzet hi.#Mipum 27:17; 1Kum 22:17; 2Khang 18:16; Ezk 34:5; Zek 10:2; Mk 6:34; 37Mah hangin a nungzuitu tei lakah, “Ankung cop tuk tampi um naven a cawmtu tukmi dawmno haw hi.#Lk 10:2; 38Mah hangin ankung cop tuk neitu Topa i lakah ankung cawmtu mihing tampi hah tukin thungen un,” ti hi.
Currently Selected:
MATTHAI 9: NBF1
Highlight
Share
Copy
Want to have your highlights saved across all your devices? Sign up or sign in
Ngawm Bible © Bible Society of Myanmar, 2014.