MATTHAI 17
17
Jesuh Meltheknak
(Mk 9:2-13; Lk 9:28-36)
1Ni luk nungten Jesuh in Peter, James le a nau Johan cu mual sangpi humah kaipihin, amuh bek um haw hi.#2Pet 1:17-18; 2A mitmuh loli haw in Jesuh a melthekin, a mai cu ni bangin vakin, a puante cu midet thei tianin ngo hi. 3Mahlai ah nungzuitu pa thum ten Moses le Elijah cu Jesuh tuah thuson kawm li in mu haw hi. 4Peter in, “Topa hilai a um uh hi nopzet hi. Lem na titale ngiahbuk pa thumin sa tung; pa khat cu nangma ca, pa khat cu Moses i ca le pa khat cu Elijah ca,” tin ti hi.
5Mahtin a otlih laih takin a de zetmi meingo in tuamin, meingo sung pen aw pa khatin, “Hi pa hi ka ih zetmi ka Capa hi; A humah ka lungkim mahtak ing, a thu na ngai un,” ti hi.#Pian 22:2; Daan 18:15; Saam 2:7; Isa 42:1; Mt 3:17; 12:18; Mk 1:11; Lk 3:22;
6Mahmi aw cu nungzuitu ten a zak haw ten lau leita in, lei ah bok haw hi. 7Jesuh cu hungin? “Tho un, lau pahsuh un,” tin ti hi. 8Mahten zoto haw a, Jesuh bek umlam mu haw hi.
9Mualhum pen a tolhsukleh haw ten Jesuh in, “Hi na muh uhmi hi Mihing Capa thihnak pen thawhtik a hih laklawh kuamah hilh pahsuh un,” tin cel zetin cah hi.
10Jesuh cu nungzuitu ten, “Itakaw Daan zilhtu ten Elijah heng masa tuk a tih haw?” tin dong haw hi.#Mal 4:5;
11Jesuh in, “Elijah cu hung masa tatak tuk a, ihempoh tuangtim khawng tuk hi. 12Mahnaven nohte hilh ing. Elijah cu heng zo naven miten akua him tih a theih haw ngawl hangin a nuamtawk haw in bawlsia haw hi. Mahti bangbok lengin Mihing Capa vang cu bawlsia bok haw tuk,” ti hi.#Mt 11:14;
13Mahten a nungzuitu ten a hilhmi hi tuiphum Johan i cungcang hi, tih theiciang haw hi.
Jesuh In Khawhuai Khalhsiat Damtik
(Mk 9:14-29; Lk 9:37-43)
14Mipi tei lakah a kihleh haw ten mi pa khat cu Jesuh lakah hungin, a mai ah khukdinin, 15“Topa, ka capa hi hehpih zalin hi. Thihtun nei in, a nat a pat ten lungapnak ngangai hi; mei sung le tui sungte ah lum lehcet thong hi. 16Na nungzuitu tei lakah hunpih naveng damtik thei haw ma,” ti hi.
17Jesuh in, “Maw upnak nei ngawl mikhialte! Itik tian kaw nangmuh ka umpih hih tuk? Ituk tian kaw ka ngah hih tuk? Naupang pa cu ka lakah pui un,” ti hi. 18Jesuh in khawhuai cu tul tukin thu a piak ten naupang pa i sung pen tul hi; mahten naupang pa cu dam hi.
19Nungzuitute cu kuamah i theih ngawlin Jesuh lakah hawhin, “Itakaw kohten khawhuai ka hawlvawk theih uh ngawl?” tin dong haw hi.
20Jesuh in, “Na upnak uh a dawm leita hangin hi. Thungai in hilh ing. Ankam ci tia upnak na nei uh tale, ‘Hih mual hi, hilai pen thawnin, na ti uh tale thawn tuk hi,’ tin ti hi.#Mt 21:21; Mk 11:23; 1Kor 13:2; 21Thungetnak le an cannak tuah bekin hawlvawk thei,” ti hi.
Jesuh In A Thih Tuk Thuhilh Leh
(Mk 9:30-32; Lk 9:43-45)
22Nungzuitute cu a venghawng haw in Galilee ah a tawhdun khawm haw ten Jesuh in amuh tei lakah, “Mihing Capa hi mihing tei khutah piakin um tuk a, that haw tuk hi. 23Mahnaven ni thum nungten tholeh tuk hi,” tin hilh hi.
Nungzuitute cu thasiazet haw hi.
Biakinn Siah Piaknak
24Jesuh le a nungzuitute cu Kapernaum khua a hen haw ten Biakinn siahkhontute cu Peter lakah hungin, “Na Sazapa uhin biakinn siah pia awng maw?” tin dong haw hi.#Suah 30:13; 38:26;
25Peter in, “Pia awng ing,” tin ti hi. Peter cu inn sungah a tum ten Jesuh in otpih masa in, “Simon itin ngaisung cim? Hi leihum kumpipa tei lakah ngamdang pen thil luhtum pih man, mahma tale siah a piatu akua kaw, ngamsung miten maw, ngamdangmi in kaw?” tin dong hi.
26Peter in, “Ngamdang miten,” tin don hi.
Jesuh in, “Pha, mah ahi tale ngamsungmi in piak kulma tihnak si maw! 27Mahnaven hi tei thinuk tuk cu deih mang hi. Mah hangin tuinimah hawh inna ngasa sio in hi. Na awh masabel ngasa i kam sungah nangmah le keima ca in Biakinn siah piak tuk tangka mu tuk ci. Mahmi cu la inna, pia in,” tin ti hi.
Currently Selected:
MATTHAI 17: NBF1
Highlight
Share
Copy
Want to have your highlights saved across all your devices? Sign up or sign in
Ngawm Bible © Bible Society of Myanmar, 2014.