MATTHAI 15
15
Pupa Tei Thuzilhmi
(Mk 7:1-13)
1Farasi khenkhat le Daan zilhtu khenkhatte cu Jerusalem pen Jesuh lakah hung haw in, 2“Itakaw na nungzuitu ten a pupa tei zilhmi daan a palcat haw? An a eih haw laihngawlin, a daan bangin khut som haw ma him!” tin ti haw hi.
3Jesuh in, “Mah ahi tale ita noh ten nangmu thuzilhmi bek zui in, Pathian i thukham saw palcat si uh si? 4Pathian in, ‘Na nu le na pa upat un,’ tin ti hi. ‘A nu hihen, a pa hihen, a sonsiatu cu thah hi tuk hi,’ tin ti hi.#Suah 20:12; 21:17; Thiam 20:9; Daan 5:16; 5Mahnaven nohte na zilh uhmi cu: mi pa kha khat a nu maw, a pa maw bopnak tuk thil a neihmi khi, hihi cu Pathian ta hi a titale, 6a nu hihen a pa hihen bop kul lehma toh tin ti uh ci. Mahti bangin nangmu thuzilh cu zui uh ci a, Pathian i thukham lehlam imah simsial ma uh ci. 7Mi ultungte! Profet Isaiah i nangmu cungcang thu a ngatmi man tatak hi? A ngatmite cu;
8‘Himi ten a kambek tuah
keimah upatin,
a lungmu ngangai haw cu
kei tuah kangzet hi.#Isa 29:13;
9Mihing tei bawlcopmi daan cu
Pathian i piakmi daan bangin
a zilh haw hangin keimah
a bia li haw hei in,
nemcuamnak nei ma hi,’ tin
Pathian in hilh hi,” tin ti hi.#Isa 29:13;
Mihing A Nintiktu Na
(Mk 7:14-23)
10Jesuh in mi tampi samin, “Ngai unna, thei un! 11Mihing a nintiktu cu a kam sungah a tummi na hi ngawlin, a kam pen a tulmi in nintik saw hi,” ti hi.
12A nungzuitute a lakah hung haw in, “Na otmi in Farasi mite a thin haw natik ci tih hi thei cim?” tin ti haw hi.
13Jesuh in, “Vancungah a ummi ka Pa i phut ngawlmi kung cu bawhvawk tuk hi. 14A muhte hangin noksak hahtik pahsuh un hi! Amuhte cu hotu mitcaw hi haw a; mitcaw in mitcaw lam a pui tale a pa nih haw in khuk sungah caksuk haw tuk hi,” ti hi.#Lk 6:39;
15Peter in, “Mahtin na otmi cu a ciangno in hilh hemin,” ti hi. 16Jesuh in amuh tei lakah, “Midangte sangin cip saw deuh cuang ma si uh si le! 17Theithei ma uh cim? Mihing tei kam sung pen a tummi hempoh cu a hapumah hengin, mahceng ten pumpi pawleu lamah tulvawk hi. 18Mahnaven a kam pen a tulmi cu a lungmu sung pen a tulmi a hih hangin mahmi in mihing nintik hi.#Mt 12:34; 19Itahim titale mi a thattiktu nupa sualnak a bawltiktu, a dang thil sual a bawltiktu le mi a ngucatiktu zolthu sontiktu misiatiktu, a sonsiatiktu ngaihsut sesuak hempoh cu a lungmu sung pen tul mite hi. 20Hite hin mihing nintik hi. Mahnaven an eih laih ngawlin khutsom ngawlnakin mi nintik kha ma,” ti hi.
Numei Nu i Upnak
(Mk 7:24-30)
21Jesuh cu mahlai pen tulin, Taiar le Sidon khua el ngamah hawh hi. 22Mahlai ngam a ummi Kanaan numei nu pa khat Jesuh lakah hungin, “David Capa, hehpihin hi, ka canu cu khawhuai ten khalsia in amthongin um hi,” tin, a kapthahin kun hi.
23Mahnaven Jesuh in kam khat hei don ma hi. A nungzuitute hung haw in, “Hi nu hi hawlvawkin! mi zui tittet noksak hah leita,” tin Jesuh lakah ngen haw hi.
24Jesuh in, “Israel tuu pai tei ca bekin hahmi ing,” ti hi.
25Mah numei nu cu Jesuh ke bulah bokin, “Topa hehpih zazal pohin hi!” ti hi.
26Jesuh in, “Naupang tei an eih tuk laksakin, uico piak tuk kha ma hi,” tin don hi.
27Numei nu in, “Topa, na tihmi cu a manmi hi. Mahnaven bawi tei cabuai pen a cakmi an thial cu uico tei eihdan poh si,” tin don hi.
28Jesuh in, “Nang cu a nase zetmi upnak neitu numei ci. Na deihmi cu bawlsak hi tuk ci,” ti hi. Mahlai takin, a canu cu dam hi.
Jesuh In Mi tampi Damtik
29Jesuh cu mahlai pen tulin Galilee tuinim mawk zui in hawh hi. Mualhumah kaito in khung hi. 30Mipi ten amah cu zuan haw in; Kebai, mitcaw, awnthei ngawl, tizawng le tina tampi pui in, Jesuh ke bulah koih haw a, Jesuh in, a venghawng haw in damtik khawng hi. 31Awnthei ngawl ten awnthei, khutzawng kezawng ten dam, kebai ten ciahthei in, mitcaw ten khua amuhleh haw khi mipi ten amuh haw ten lamdang sazet haw in Israel Pathian cu thangphat haw hi.
Mi Thawng Li An Vak
(Mk 8:1-10)
32Jesuh in, a nungzuitute cu samin, “Hi mite hi ka lakah ni thum sung um zo haw toh a, an eih tuk imah a neih haw ngawl hangin hehpihzet ing. An dota ngawlin, a pin haw tuk awi mang hi, lampi ah tamsawl khawng haw tuk,” ti hi.
33Nungzuitu ten, “Mihing hi zong vaknak tukin hi ngamveng sung pen ilai an heng a lak tuk uh?” tin ti haw hi.
34Jesuh in, “Cangho izong nei uh cim?” tin dong hi. “Amuh ten cangho salih le ngasa neuno ten dawm um hi,” tin don haw hi.
35Jesuh in mipite cu lei ah khungtik hi. 36Mahten cangho salih le ngasa dawmno cu la in Pathian nelah lungdam thu a hilh celh ten botkekin, a nungzuitu tei lakah pia hi. A nungzuitute in mipi tei lakah sem haw hi. 37A venghawng haw ei in, khamzet haw hi. A khambang haw cu nungzuitu ten hulawmleh haw a, bawm salih dim hi. 38A eitute cu numei le naupang sial khak ngawlin pasal tiptep thawng li haw hi.
39Mah nungten Jesuh in mipite cu pintikin, amah cu hawmkuang sungah khungin Magadan ngamah hawh hi.
Currently Selected:
MATTHAI 15: NBF1
Highlight
Share
Copy
Want to have your highlights saved across all your devices? Sign up or sign in
Ngawm Bible © Bible Society of Myanmar, 2014.