MATTHAI 12
12
Sabbath Thu Dotnak
(Mk 2:23-28; Lk 6:1-5)
1Mahnung a ngei ngawlin Sabbath ni-in, Jesuh cu sangvut lo sung tawnin hawh hi. A nungzuitute a ngilkial haw hangin sangvutte zutin, a cang khi ei haw hi.#Daan 23:25; 2Mahmi cu Farasi ten amuh haw ten Jesuh lakah, “Zo hemin, Sabbath ni-in hitih bang a bawl haw hi Daan palcat haw hi,” tin ti haw hi.
3Jesuh in, “David le a ngualcam a ngil a kial haw laih khin David in, i bawl him tih khi sialkha awng ma uh cim?#1Sam 21:1-6; 4David cu Pathian inn sungah tumin, Pathian lakah a piakmi cangho cu a ngualcamte tuah a eih haw khi! Mahtin a eih haw mi cu Daan i awi ngawlmi hi, itahim titale mah cangho cu thiampi bek i eih theihmi cangho hi.#Thiam 24:9; 5Mah i humah Sabbath sial ten Biakinn sungah thiampi ten Sabbath daan palcat leleng haw tih khi Moses Daan sungah sialkha awng ma uh cim maw? Mahnaven misual tin ngaisung awng haw ma hi.#Mipum 28:9-10; 6Thungai in hilh ing; hilai munah Biakinn sangin a ngeng saw um hi. 7Lai Thiangtho in, ‘Nganhing tuah biakpiaknak hi ngawlin hehpihnak saw deih ing,’ tin a tihmi hi a sullam thei le uh ci, a sual ngawl mite khi sual uh ci, tin ti tukma nave uhcin hi.#Mt 9:13; Hos 6:6; 8Itahim titale Mihing Capa cu Sabbath uktu,” tin don hi.
Khut Zawng Pa
(Mk 3:16; Lk 6:6-16)
9Jesuh cu mahlai pen hawhin, pumkhawm inn sungah tum hi. 10Mahlai ah khut zawngpa pa khat le Jesuh sualnawn nuam mite vang um bok haw in, “Sabbath ni-in tina damtik hi a Daan uhin deih maw?” tin dong haw hi.
11Jesuh in, “Tehkipnakin nangmu lak pen mi pa khatin, a tuu pa khat Sabbath ni-in khuk thukpi sungah a caksuk bang ahin pholhsuah ngawlin maw a um tuk?#Lk 14:5; 12Mihing cu tuu sangin a let tampi in sunglawi saw hi. Mah hangin Sabbath ni-in thilpha bawl cu a Daan uh i phalmi hi,” ti hi. 13Khut zawngpa i lakah, “Na khut zak hemin,” ti hi.
A khut cu zakin, a langlam khut bangin damleh hi. 14Farasi mite ten Jesuh thah theihnak tukbuk thusiam khawm haw hi.
Pathian Tenmi Nadektu
15Jesuh in, a sual zei nuam haw tih a zak ten mahlai pen tul hi. Mihonpi ten zui pepel haw a, tina hempoh damtikin, 16ama thu le la cu kuamah i lakah son tuk ngawlin thupia hi. 17Hitih bangin a tihnak cu profet Isaiah i kam pen Pathian in:
18“Ka tenmi ka nadektu pa cu
hilai hah um,
Ka ihmi le a humah
ka lungdam zetmi hi.
A humah ka Hawvang koih tung a,
Ka thukhennak cu
mi phun hempoh tei lakah
than tung.#Isa 42:1-4;
19Mi thu a el litu le
a au litu vang hi tukma hi.
Lampi ah nging zetin
thuhilh tukma hi.
20Mi zawngkhal tei lakah
a lungmu nemin,
bawmtu nei ngawl tei lakah
hehpihnak nei tuk hi.
Diknak khi nehtu a hihtik laklawh
hantiam tuk hi.
21Mi hempoh ten a humah
muansannak nei haw tuk hi,”
tin, a tihmi a kimnak tukin hi.
Jesuh le Beelzabul
(Mk 3:20; Lk 11:14-23)
22Jesuh lakah khawhuai tei khalhsiatnak hangin a mitcaw mi le a awnthei ngawlpa pa khat hunpih haw hi. Jesuh in, a damtik hangin awnleh thei in, khua muleh thei hi. 23Mihonpi ten lamdangsa mahtakin, “Hi pa hi David Capa ngai nantih maw?” tin ti haw hi.
24Mah thu cu Farasi miten a zak haw ten, “Khawhuai a hawlvawk theihnak cu khawhuai bawi Beelzabul in huham a piak hangin hi,” tin ti haw hi.#Mt 9:34; 10:25;
25A lungmu sung hawah a ngaihsut haw mi cu Jesuh in, a theih ten amuh tei lakah, “I lai ngam hei ah hihen khendunin, mah le mah a dodunmi cu ngei phat haw tukma hi. Khuapi hei hihen, innkua hei hihen, khendunin mah le mah a dodunmi cu khenkek khawng haw tuk hi. 26Mahti bang lengin Satan in, Satan cu a hawlvawk tale amah le mah dodun a hih hangin itin kaw a ngam cu a kho theih tuk? 27Noh ten, “Khawhuai a hawlvawk theihnak cu Beelzabul in huham a piak hangin hi” tin ti uh ci. Mahti bang ahi tale nangmuh zuitu tei lakah khawhuai hawlvawk theihnak huham cu akua in kaw a pia? Nangmuh a zuitu tei bawlmi lala in, khial uh ci tihmi langtik hi. 28Khawhuai hawlvawk theihnak huham piatu cu Beelzabul hi ma hi, Pathian i Hawvang hi. Mahti bang a hih hangin Vancung Uknak cu nangmu lakah heng zo tihnak hi.
29“Mi ngilzet pa i innsung a ummi vante a laksak nuamtu cu mah inn neitu mi ngilzetpa cu khau tuah khih masa ma tale a inn keuletin, a van laksak thei haw tukma hi. Amah a ken ceng bek haw ten a vante lonsak thei haw tuk laih hi.
30“Keima lamah a tang ngawltu cu keimah dodaltu haw hi. A cawm bawm ngawltu cu a khenkehtiktu haw hi.#Mk 9:40; 31Thungai in hilh ing, mihing ten iti bang sualnak a bawl haw hei in hihen, iti bang awn sia a awn li haw hei in ngaihthiam theih hi. 32Mihing Capa a sonsiatu cu ngaihthiam theih hi tuk hi. Mahnaven Hawvang Thiangtho a sonsiatu cu atu khangah hei hihen, mailam khangah hei hihen ngaihthiam hi haw tukma hi.#Lk 12:10;
Thingkung le A Ngah
(Lk 6:43-45)
33“Thing ngah pha a ngah theihnak tukin thingkung a dam masa tuk kul hi. Thingkung ngi na ngawl na nei tale, a ngahsia tuk hi. Thingkung cu a ngah pen theihtheih hi.#Mt 7:20; Lk 6:44; 34Noh ngul hinte mi ngilo na hih uh hangin itin him awnkam pha na ot theih tuk uh? Kam in, lungmu sung a ummi bangin awn tul hi.#Mt 3:7; 23:33; Lk 3:7; Mt 15:18; Lk 6:45; 35Mipha in thilpha a khawlmi sung pen thilpha suaktik naven mipha ngawlin thilpha ngawl a khawl sung pen thilpha ngawl suaktik hi.
36“Thungai in hilh ing hi; kua hei hihen ngalling ngawlin a otmi cu Thukhen Ni ten ita mahti bangin awn kaw, tin a hilhciangleh kul tuk hi. 37Nangma awn lengin, nangmah le nangmah thukhen tuk,” ti hi.
Nalamdang Bawltik Haw
(Mk 8:11-12; Lk 11:29-32)
38Daan zilhtu khenkhatte le Farasi khenkhat ten, “Sazapa, nalamdang pa khat keimu mitmuhin bawl le ci deih ung,” tin ti haw hi.#Mt 16:1; Mk 8:11; Lk 11:16;
39Jesuh in, “Tu hun a, mihingte hi mipha ngawl le Pathian lau ngawlte thong si uh ci? Nalamdang bawl tuk maw natik uh? Bawl tuk mang, profet Jonah i nalamdang tih sial ngawl thasiahhuai nalamdang a dang mu tukma uh ci.#Mt 16:4; Mk 8:12; 40Jonah cu ngasa pum sungah ni thum le zan thum a um bangin Mihing Capa vang cu lei sungah ni thum le zan thum um bok tuk hi.#Jn 1:17; 41Thukhennak Ni ten Nineveh khuate dingin mawhsiat haw tuk hi, itahim titale Jonah i thuhilhmi a zak haw ten sualsik haw hi. Thungai in hilh ing. Jonah sangin a ngeng saw hilai ah um hi.#Jn 3:5; 42Thukhennak Ni ten Sheba kumpinu dingin mawhsiat tuk hi, itahim titale kumpipa Solomon i cihnak thei nuamin lam khawlapi pen hung hi. Thungai in hilh ing. Solomon sangin a ngeng saw hilai ah um hi.#1Kum 10:1-10; 2Khang 9:1-12;
Hawvang Sia Kik Leh
(Lk 11:24-26)
43“Hawvang sia cu mi pa khat sung pen a tul ten ngamko sungah colhnak zei in vak kawkawi hi. Mahnaven colhnak tuk amuh ngawl ten, 44ka zamsa mi ka innah kikleh tung, tin ngaisung hi. Mah hangin kikleh ngangai in, a inn cu tong hilhialin le phiahsa siuhseuhin mu hi. 45Mahten tulleh hihin, amah sangin a sesuak saw mi hawvang salihte cu zawmin, mah innah tumpih hi, mahten mahpa cu a masa sangin sehuai saw hi. Mahti bangin tulaih khang mipha ngawl tei humah heng tuk ti hi.”
Jesuh i Nu le Naute
(Mk 3:31-35; Lk 8:19-21)
46Jesuh cu mipi tei lakah a otlih laih takin amah tawk nuamin, a nu le a naute pualamah ding haw hi. 47Mahlai ah a umbokmi pa khatin, “Na nu le na naute pualeu lamah ding leng haw, nangmah otpih nuam haw bang um ven,” tin hilh hi.
48Jesuh in, “Akua kaw ka nu? Akua kaw ka naute?” tin, a tih ceng ten, 49a nungzuitute kawkin, “Zo un! Hilai hah ka nu le ka naute um haw hi. 50Kua hei hihen vancungah a ummi ka Pa i deihnak bang a bawltu hempoh cu ka u le nau, ka celnu le ka nute haw hi,” tin don hi.
Currently Selected:
MATTHAI 12: NBF1
Highlight
Share
Copy
Want to have your highlights saved across all your devices? Sign up or sign in
Ngawm Bible © Bible Society of Myanmar, 2014.