HAGGAI 2
2
Biakinn Thak Mawidan
1Mah kum ha salih ha, ni sawm nih le ni khat ni-in, Topa i awn cu Haggai nelah hengleh hi. 2Haggai cu Judah ngamuktu bawi Zerubbabel, Thiampi Sang Joshua le mipi nelah thuhilhtik hi. 3“Amasa Biakinn khi iti zahin mawi hum, nangmu lakah a theitu pa khat bek um uh cim? Atu-in, iti bangin mu uh cim? Atu ata hi cu imah hi nge ma si,” tin tituk uh ci.#Ezr 3:12; 4Mahnaven kuamah in thasia pahsuh un. Nadek un, na nel uhah keimah um ing. 5Izipt pen na taitul uh laihin nangmu nelah umpih leleng tung tin, thukam ing. Atu vang nangmu nelah umpih tung hi, mah hangin lau pahsuh un.#Suah 29:45-46;
6“A ngei ngawlin van le lei buppi le tuipite cu hing dudum tung hi.#Heb 12:26; 7Miphun hempoh vawk khawng tung, a sum haw le a lo le lamte cu hilai ah keng haw tuk hi; mahten hi Biakinn cu hauhnak tuah dim tuk hi. 8Leihum sui le ngun hempoh cu kata hi haw hi. 9Biakinn thak cu a lun sangin nase saw tuk, a munah ka mihingte khantohnak le lungdaihnak pia tung,” tin ti hi. Cungnungbel Topa in hilh zo hi.
10Darias in kumpi a deh kum nihnak ha kuah ha, ni sawm nih le ni li ni-in, Cungnungbel Topa in profet Haggai nelah thu hilhleh hi. 11“Thiampi tei nelah hitin thu dong tehin: 12Tehkipnakin, mi pa kha khatin, biakpiaknak a piakmi sa thiangtho sung pen a khenkhat la in, a puan tuah zialcihin hawhpih hen hi. Mah a puan tuah cangho maw, an huan sa maw, sabittui maw, olif sathau maw, mah ahimata an phun kha khat maw a tawngkha tale, mah a tawh khakmi an cu an thiangtho in cang ni maw?” tin ti hi. Mahtibang a dot ten thiampi ten, “Cang tukma hi,” tin ti haw hi.
13Haggai in, “Tehkipnakin, mi pa kha khatin mithi a zen hangin mi nawngkai in cang hi. A humlamah ka sonmi ante hi a zen bang ahin, ante cu a nawngkai in cang ni maw?” tin dong hi. Thiampi ten, “Cang tuk hi,” tin ti haw hi.#Mipum 19:11-22;
14Haggai in, “Topa in, mi nawngkai pa khat i zenmi an cu an nawngkai in, a can bangin hi ngamsung mihingte le a cin haw mi ankung humah vangin hi bok tuk hi; mah hangin biaklandawh humah a piak haw mi na hempoh cu a nawngkai mi in cang khawng tin hilh hi.”
Topa In, Muicu Pia Tuk Thutiam
15 Topa in, “Nangmu hum a hengmi thu hi theitum ma uh cim? Biakinn na sakleh laihngawl sung uh cu, 16na lo an uh seu sawm nih suak tukin muang nave uhcin, seu sawm bek ngah uh ci. Bulpi sung pen sabittui pung sawm nga ngah tukin muang nave uhcin pung sawm nih bek ngah uh ci. 17Na cinmi hempoh uh siatsuahtu tukin a nase zetmi huihpi le nial hah ing, mahnaven sikkik nuam cuang ma uh ci. 18Tu sun hi cu ha kuah ha, ni sawm nih le ni li ni hi in, Biakinn bulphuh nadeh a celh ni haw hi. Atu pepanin thu a heng tukmi hi pha zetin zo in hi. 19Cang umleh ngawltohin, sabit ngah, theipi ngah le olif ngahte a umleh ngawl toh vangin, atu pepanin muicu pia tung,” ti hi.
Zerubbabel Nelah Topa i Thutiamnak
20Mah ni sawm nih le ni li ni, ha kuah ha in, Topa i awn cu Haggai nelah a vei nihnak heng hi. 21Judah ngamuktu bawi Zerubbabel nelah hi bangin hilhtik hi. “A ngei ngawlin lei le van cu hing dudut tung. 22A ngam uknakte vawksak khawngin, a ngilnakte botik khawng tung hi. Cipuhleng le a mawngtute cu linglet khawng tung hi. Cipuhte cu thi in, a hum khungtute cu pa khat le pa khat thatdun haw tuk hi. 23Mah ni ten ka nadektu Zerubbabel, nangmah cu ka mitei ngamuktu in bawl tung hi. Sathau ka thihmi pa hi ci.” Cungnungbel Topa in hilh hi.
Currently Selected:
HAGGAI 2: NBF1
Highlight
Share
Copy
Want to have your highlights saved across all your devices? Sign up or sign in
Ngawm Bible © Bible Society of Myanmar, 2014.