1 Timoteo 3
3
Vitxumbꞌal qꞌuꞌl soꞌok qꞌesalail
1Tiira ibꞌoꞌqꞌol qꞌu yol tzaꞌ: —Abꞌil aꞌ nitachva qꞌesalail xoꞌl qꞌu niman tetz u Jesuus, bꞌaꞌnla aqꞌon nititzꞌa atziꞌ.— 2Pek loqꞌ ministeer tiira bꞌaꞌn itxumbꞌal u qꞌesala tziꞌ, ech paat yeꞌxhkam tiꞌ saelk iqꞌii. Maꞌl koꞌn tixoj atile. Kꞌujlebꞌal kꞌuꞌl itxumbꞌal. Ilel chit ibꞌanax qꞌu kam niꞌaneꞌ. Jik vibꞌanoneꞌ. Aqꞌol ivatbꞌal aanima. Utz techal ichusuneꞌ. 3Yitꞌ qꞌabꞌareella aanima koj. Yitꞌ chokol chꞌaꞌo koj. Yitꞌ achvan koj ok iatz kam aas subꞌuꞌm isaꞌ tiꞌ. Yitꞌ yeꞌk koj inooebꞌal tiꞌ itxꞌakax puaj. Pek jik koꞌxh itxumbꞌal. Nitoksa paas xoꞌl aanima. 4Nitxꞌol tiqꞌol qꞌu kam tu tatibꞌal. Jik atil qꞌul ikꞌaol imeꞌal jaqꞌ imantaar, tinujul ninimaneꞌ. 5Tan oj yeꞌ nitxꞌol tiqꞌol qꞌu kam tu tatibꞌal, ¿aꞌ tzik sitxꞌol tiqꞌol qꞌu niman tetz u Jesuus? 6Yitꞌ anal koj akꞌ tiꞌ inimal u Jesuus. Tan bꞌaꞌn siꞌaneꞌ aas sakuꞌ tu paav tu tꞌeꞌsil tiꞌ u tijleꞌm. Echaꞌ vaꞌl isaꞌ u txꞌiꞌliꞌinaj. 7Ministeer bꞌaꞌn talchu xoꞌl qꞌu aanima majte qꞌuꞌl yitꞌ niman koj tetz u Jesuus. Ech yeꞌk seꞌel iqꞌii utz, yeꞌk sakuꞌ tu vaꞌl isaꞌ u txꞌiꞌliꞌinaj.#3.2-7 Choktaj U Tito 1.6-9.
Vitxumbꞌal qꞌuꞌl soꞌok diaakonoil
8Echat koꞌxh qꞌu diaakono majte. Echen bꞌaꞌn itxumbꞌal, inujul siꞌaneꞌ. Yitꞌ kaꞌl koj tel iyol. Yitꞌ qꞌabꞌareella aanima koj. Utz yitꞌ achvan koj ok iatz kam aas subꞌuꞌm isaꞌ tiꞌ. 9Tii tatin tu vinujul u chusbꞌal vaꞌl nikunima vaꞌl anal nitootzajil tu u bꞌaꞌnla chusbꞌal. Nojchit tinachbꞌal siꞌan vinujul. 10Loqꞌ aatz yeꞌsaj tok tu diaakonoil, bꞌaxal nal siꞌilax inujul bꞌaꞌnil, yetz kam tiꞌ niyolpika aas saꞌeesalk iqꞌii. Oj bꞌaꞌn, ech nal soꞌoki.
11Echat koꞌxh qꞌu ixoj diaakonisa majte. Echen jikom itxumbꞌal. Bꞌanol inujul. Yitꞌ chulin yol koj. Pek kꞌujlebꞌal kꞌuꞌl tiꞌ qꞌu kam kajayil.
12Maꞌl koꞌn tixoj qꞌu diaakono saꞌatini. Sitxꞌol tiqꞌol qꞌul initxaꞌa tuchꞌ qꞌu kam tu tatibꞌal. 13Tan aatz qꞌuꞌl niꞌxhitxꞌol ibꞌanax u taqꞌon tu diaakonoil, saoksal iqꞌii tiꞌ. Utz saꞌtereꞌnkꞌujeꞌ ikꞌuꞌl tiꞌ u Tioxh tu u bꞌaꞌnla chusbꞌal kꞌatz u Cristo Jesuus.
U taltu u Pablo kam tokeꞌitzꞌibꞌa u uꞌ tzaꞌ
14Kꞌuxh nivitzꞌa saꞌnaloponin tzaxeꞌ, nuntzꞌibꞌa opon talax see kam saꞌaneꞌ. 15Ech oj labꞌatz voponeꞌ, ootzaj tekuꞌen kaniꞌch iveet qꞌu kam saꞌan xoꞌl qꞌu nachol tetz u itzꞌlich Tioxh. Ayaꞌ vitenam u Tioxh, vixeꞌal qꞌu kam inujul, vaꞌl txakbꞌaꞌn tetz vijikomal. 16Tiira sibꞌ tokebꞌal vitxumbꞌal u Tioxh vaꞌl yeꞌich ootzajimal tiꞌ u okchil kꞌatza. Tan echaꞌ vaꞌl nitaleꞌ tzaꞌ:
Vettaqꞌ bꞌens tibꞌ aanima u Tioxh qiꞌ.
Aqꞌax bꞌens bꞌaꞌn tiqꞌaqꞌal u Tioxhla Espiiritu majte.
Ilax u qꞌaavtitzꞌpebꞌal tu qꞌu aanjel.
Paxsal itziiul xoꞌl qꞌu puera aanima.
Nimal tu qꞌu aanima tu u vatz amlika txꞌavaꞌ.
Utz ech tek bꞌenjeꞌ tu Amlika tu
vitechalil u Tioxh.#3.16 Aatz qꞌu yol tziꞌ, kamal iyolil maꞌl u bꞌitzal ootzajimich tu qꞌu niman tetz u Jesuus titiempo u Pablo.
Currently Selected:
1 Timoteo 3: ixlSJC
Highlight
Share
Copy
Want to have your highlights saved across all your devices? Sign up or sign in
© 2001, Wycliffe Bible Translators, Inc. All rights reserved.