လံာ်မးသဲ 8
8
ယ့ၣ်ၡူးမၤဘျါက့ၤပှၤဘၣ်တၢ်ဆါအၢတဂၤ
(မၢ်. ၁:၄၀-၄၅; လူၤ. ၅:၁၂-၁၆)
1ဖဲယ့ၣ်ၡူးဟဲက့ၤလီၤလၢတၢ်လူၢ်ဒီခိၣ်န့ၣ်, ပှၤဂီၢ်မုၢ်ဖးဒိၣ်ပိာ်ထီၣ်အခံလီၤ. 2တုၤနုၤတစု, ပှၤဘၣ်တၢ်ဆါအၢတဂၤဟဲဆူအအိၣ်, ချံးခီၣ်တီၤလီၤလၢအမဲာ်ညါဒီးစံးဘၣ်အီၤ, “ကစၢ်ဧၢ, နသးမ့ၢ်အိၣ်ဒီးနမၤကဆှီထီၣ်က့ၤယၤသ့လီၤ.”
3ယ့ၣ်ၡူးယူာ်ဃီၤအစု, ထိးဘၣ်အီၤဒီးစံး, “ယသးအိၣ်လီၤ. ကဆှီထီၣ်က့ၤနဲတက့ၢ်.” တဘျီဃီအတၢ်ဆါအၢန့ၣ်ဘျါက့ၤဝဲလီၤ. 4ယ့ၣ်ၡူးစံးဘၣ်အီၤ, “ပလီၢ်နသးဒ်သိးနသုတဟးဒုးသ့ၣ်ညါပှၤနီတဂၤလၢ တၢ်ဂ့ၢ်အံၤတဂ့ၤ. လဲၤလိၤလိၤဆူပှၤလုၢ်တၢ်အခိၣ်အအိၣ်ဒီးဒုးနဲၣ် နသးလၢအီၤ, ဝံၤလုၢ်ထီၣ်တၢ်လုၢ်ဒ်စီၤမိၤၡ့မၤလိာ်ဝဲအသိး လၢအကကဲထီၣ်တၢ်အုၣ်အသးလၢပှၤကိးဂၤဒဲးအမဲာ်ညါလၢနဘျါက့ၤ လံအဂီၢ်န့ၣ်တက့ၢ်.”
ယ့ၣ်ၡူးမၤဘျါက့ၤရိမ့ၤအသုးခိၣ် အခ့အပှၤတဂၤ
(လူၤ. ၇:၁-၁၀)
5ဖဲယ့ၣ်ၡူးလဲၤနုာ်လီၤဝဲဆူဝ့ၢ်ကပ့းရနီၣ်အခါ, ရိမ့ၤအသုးဖိတကယၤအခိၣ်တဂၤဟဲသဂၢၢ်အီၤဒီးဃ့ တၢ်မၤစၢၤလၢအအိၣ်ဒီးစံးဝဲ, 6“ကစၢ်ဧၢ, ယခ့ယပှၤတဂၤဆါဝဲဒီးအိၣ်မံလီၤဝဲလၢအလီၢ်မံခိၣ်လၢဟံၣ် လီၤ. အဝဲဟူးဂဲၤတန့ၢ်ဘၣ် ဒီးတူၢ်ဘၣ်တၢ်နးမးလီၤ.”
7ယ့ၣ်ၡူးစံးဘၣ်အီၤ, “ယကလဲၤဒီးမၤဘျါအီၤလီၤ.”
8ဘၣ်ဆၣ်ဒီးသုးခိၣ်စံးဝဲ, “ကစၢ်ဧၢယတကြၢးတဘၣ်လၢ နကဟဲနုာ်ဆူယဟံၣ်ပူၤအဂီၢ်ဘၣ်. ထဲခါလီၤနကလုၢ်တဘီဒီးယခ့ယပှၤကအိၣ်ဆူၣ်ထီၣ်က့ၤလီၤ. 9အဂ့ၢ်ဒ်အံၤ, ယဲယမ့ၢ်ပှၤတဂၤလၢအအိၣ်လၢပှၤအလီၢ်အလၤ ဒိၣ်န့ၢ်ယၤတဖၣ်အဖီလာ်ဒီးယအိၣ်ဒီးပှၤသုးဖိလၢယဖီလာ်တဖၣ်လီၤ. ယစံးဘၣ်အဝဲတဂၤ, ‘လဲၤတက့ၢ်’ ဒီးလဲၤဝဲလီၤ. ယစံးဘၣ်အဂၤတဂၤ, ‘ဟဲတက့ၢ်’ ဒီးဟဲဝဲလီၤ. ယစံးဘၣ်ယကုၢ်ယပှၤတဂၤ, ‘မၤတၢ်အံၤတက့ၢ်’ ဒီးမၤဝဲလီၤ.”
10တုၤယ့ၣ်ၡူးနၢ်ဟူတၢ်အံၤဒီး, ကမၢကမၣ်ဝဲဒီးစံးဘၣ်ပှၤလၢအပိာ်အခံတဖၣ်, “ယတဲသုတၢ်မ့ၢ်တၢ်တီလီၤ. ယတထံၣ်န့ၢ်ပှၤအိၣ်ဒီးတၢ်နာ်ဒ်အံၤအသိးလၢကီၢ်အံၣ်စရ့လး အပူၤနီတဂၤဘၣ်. 11ယစံးဘၣ်သု, ဖဲမူခိၣ်ဘီမုၢ်အမူးဖးဒိၣ်ဘၣ်ဝဲန့ၣ်, ပှၤအါဒံအါဂၤကဟဲဝဲလၢ မုၢ်ထီၣ်ဒီးမုၢ်နုာ်ဒီးဆ့ၣ်နီၤအီၣ်သကိးတၢ်ဒီးစီၤအၤဘြၤဟၣ်, စီၤအံၤစဲးဒီးစီၤယၤကိာ်တဖၣ်လီၤ. 12ဘၣ်ဆၣ်ဘီမုၢ်အဖိတဖၣ်န့ၣ်, ယွၤကတ့ၢ်လီၤကွံာ်အီၤဆူတၢ်ချၢလၢတၢ်ခံးကျါ, ဖဲတၢ်ဟီၣ်တၢ်ယၢၤဒီးတၢ်မဲအ့ၣ်စဃံးအိၣ်ဝဲန့ၣ်လီၤ.” 13ယ့ၣ်ၡူးစံးဘၣ်ပှၤသုးဖိတကယၤအခိၣ်, “က့ၤဆူနဟံၣ်တက့ၢ်. ဒီးဒ်နနာ်တၢ်အသိးန့ၣ်ကဘၣ်တၢ်မၤလၢပှဲၤလၢနဂီၢ်လီၤ.”
ဒီးသုးခိၣ်အဝဲန့ၣ်အခ့အပှၤန့ၣ်ဘျါက့ၤဝဲတကတီၢ်ဃီဖဲန့ၣ် လီၤ.
ယ့ၣ်ၡူးမၤဘျါက့ၤပှၤအါဒံအါဂၤ
(မၢ်. ၁:၂၉-၃၄; လူၤ. ၄:၃၈-၄၁)
14ယ့ၣ်ၡူးလဲၤဝဲဆူစီၤပ့းတရူးအဟံၣ်ဒီးဖဲန့ၣ်ထံၣ်ဘၣ်ဝဲစီၤပ့းတရူး အမံၤပှၢ်ပိာ်မုၣ်တဂၤအလိၤကိၢ်ဒီးအိၣ်မံလီၤလၢလီၢ်မံခိၣ်န့ၣ်လီၤ. 15အဝဲထိးဘၣ်ပိာ်မုၣ်န့ၣ်အစု, ဒီးတၢ်လိၤကိၢ်န့ၣ်ဘျါက့ၤဝဲဒီး အဝဲဒၣ်ဆၢထၢၣ်မၤတၢ်အခ့အပှၤအတၢ်မၤလၢအဂီၢ်လီၤ.
16တုၤမုၢ်ဟါလီၤဒီး, ပှၤဟဲဆှၢန့ၢ်ယ့ၣ်ၡူးလၢပှၤအါဒံအါဂၤလၢတၢ်နါဒိးအီၤ တဖၣ်လီၤ. ယ့ၣ်ၡူးဟီထီၣ်ကွံာ်သးအအၢတဖၣ်လၢအကလုၢ်တဘီ ဒီးမၤဘျါက့ၤပှၤဆူးပှၤဆါခဲလၢာ်လီၤ. 17တၢ်အံၤယ့ၣ်ၡူးမၤဝဲဒ်သိးတၢ်လၢဝံယၡါယၤစံးတ့ၢ်ဝဲ, “အဝဲဟံးထီၣ်ကွံာ်ပတၢ်ဆိးက့မံနီၤတဖၣ်ဒီးစိာ်ထီၣ်ကွံာ် ပတၢ်ဆူးတၢ်ဆါတဖၣ်” ကလၢထီၣ်ပှဲၤထီၣ်ဝဲအဂီၢ်လီၤ(ၡါ. ၅၃:၄).
ပှၤလၢအသါကပိာ်ယ့ၣ်ၡူးအခံတဖၣ်
(လူၤ. ၉:၅၇-၆၂)
18တုၤယ့ၣ်ၡူးထံၣ်ဘၣ်ပှၤဂီၢ်မုၢ်ဖးဒိၣ်အိၣ်ဝးတရံးအီၤဒီး, အဝဲမၢအပျဲၢ်တဖၣ်လဲၤခီဃီၤဆူပီၣ်လဲၣ်အဝၢ်ဘးခီန့ၣ်လီၤ. 19ပှၤသ့တၢ်ဘူၣ်တၢ်ဘါအတၢ်သိၣ်တၢ်သီတဂၤဟဲဆူအအိၣ်ဒီးစံး, “သရၣ်ဧၢ, ယအိၣ်ကတဲာ်ကတီၤယသးလၢယကလဲၤဒီးနၤ ဖဲနလဲၤတၢ်တပူၤလၢ်လၢ်န့ၣ်လီၤ.”
20ယ့ၣ်ၡူးစံးဆၢအီၤဒီးစံး, “ထွံၣ်မံၤတဖၣ်အိၣ်ဒီးအပူၤဒီးထိၣ်လၢတၢ်ဖးဖီတဖၣ်အိၣ်ဒီးအသွံတဖၣ်လီၤ. ဘၣ်ဆၣ်ဒီးပှၤကညီဖိခွါအံၤထဲအကပာ်လီၤအခိၣ်ဒၣ်လဲာ်တၢ်လီၢ် တအိၣ်ဘၣ်.”
21ပှၤအဂၤတဂၤလၢအပိာ်ယ့ၣ်ၡူးအခံစံးဝဲ, “ကစၢ်ဧၢ, ပျဲဆိယၤဒ်သိးယကက့ၤခူၣ်လီၤယပၢ်အဂီၢ်န့ၣ်တက့ၢ်.”
22ယ့ၣ်ၡူးစံးဆၢအီၤ, “ဟဲဒီးကဲဘၣ်ယပျဲၢ်ယဘီၣ်တက့ၢ်. ပျဲပှၤအသံတဖၣ်ခူၣ်လီၤအပှၤသံဒၣ်ဝဲတက့ၢ်.”
ယ့ၣ်ၡူးဒုးအိၣ်ဂၢၢ်ကလံၤမုၢ်
(မၢ်. ၄:၃၅-၄၁; လူၤ. ၈:၂၂-၂၅)
23ယ့ၣ်ၡူးလဲၤနုာ်ဝဲဆူချံတဘ့ၣ်အပူၤဒီးအပျဲၢ်အဘီၣ်တဖၣ်လဲၤနုာ် သကိးဒီးအီၤလီၤ. 24သတူၢ်ကလာ်ကလံၤမုၢ်တွၤဖးဒိၣ်လီၤဘၣ်လၢပီၣ်လဲၣ်န့ၣ် ဒီးချံန့ၣ်ဘၣ်တၢ်လုၣ်ဘၢအီၤလၢလပီတဖၣ်ဒီးဘူးတ့ၢ်လၢ အကလီၤဘျၢလီၤ. ဘၣ်ဆၣ်ယ့ၣ်ၡူးမံဘၣ်အသးလီၤ. 25အပျဲၢ်အဘီၣ်တဖၣ်လဲၤဆူအအိၣ်, ကိးပၢၢ်ထီၣ်အီၤဒီးစံး, “ကစၢ်ဧၢ, မၤစၢၤပှၤတက့ၢ်. ပကသံလီၤ.”
26ယ့ၣ်ၡူးစံးဆၢအဝဲသ့ၣ်, “ဘၣ်မနုၤလၢသုဘၣ်ပျံၤတၢ်ထဲန့ၣ် ညါလဲၣ်. သုတၢ်နာ်စှၤမးလဲၣ်.” ဝံၤအဝဲဂဲၤဆၢထၢၣ်ဒူကလံၤဒီးလပီအလိၤ, ဒီးကလံၤအိၣ်က့ၤမးဝဲဂၢၢ်တပၢၢ်လီၤ.
27ပှၤကိးဂၤဒဲးကမၢကမၣ်ဝဲဒီးစံး, “ပှၤအံၤမ့ၢ်ပှၤဒ်လဲၣ်တဂၤလဲၣ်. ကလံၤဒီးလပီတဖၣ်ဒၣ်လဲာ် စူၢ်အကလုၢ်လီၤ.”
ယ့ၣ်ၡူးမၤဘျါက့ၤပှၤခံဂၤလၢတၢ်နါဒိးအီၤ
(မၢ်. ၅:၁-၂၀; လူၤ. ၈:၂၆-၃၉)
28တုၤယ့ၣ်ၡူးလဲၤတုၤဝဲဆူကီၢ်ကဒါရၤလၢအအိၣ်လၢပီၣ်လဲၣ်အဝၢ် ဘးခီဒီးပှၤခံဂၤဟဲထီၣ်လၢတၢ်သွၣ်ခိၣ်အပူၤဒီးသဂၢၢ်အီၤလီၤ. ပှၤခံဂၤအံၤတၢ်နါဒိးအီၤလီၤပျံၤဒိၣ်မးတုၤဒၣ်လဲာ်ပှၤလဲၤတၢ်လၢကျဲ အဝဲန့ၣ်တဘူၣ်နီတဂၤဘၣ်. 29တုၤအထံၣ်ယ့ၣ်ၡူးတဘျီဃီ အဝဲသ့ၣ်ကိးပသူထီၣ်ဒီးစံး, “ကစၢ်ယွၤအဖိခွါနၤဧၢ, နဘၣ်ဃးဒီးပှၤဒ်လဲၣ်. မ့ၢ်နဟဲလၢနကစံၣ်ညီၣ်မၤနးမၤဖှီၣ်ပှၤ တချုးလၢတၢ်အဆၢကတီၢ်ဘၣ်ဝဲန့ၣ်ဧါ.”
30ဖဲတၢ်လီၢ်တယံၤတဘူးဒီးအဝဲသ့ၣ်အိၣ်ဝဲအလီၢ်န့ၣ်, ထိးတဖုအီၣ်အဆၣ်လီၤ. 31လၢတၢ်န့ၣ်အဃိ, တၢ်နါတဖၣ်ဃ့ကညးယ့ၣ်ၡူးဒီးစံး, “နမ့ၢ်ဟီထီၣ်ကွံာ်ပှၤဒီးဒုးလဲၤနုာ်ပှၤဆူထိးတဖုန့ၣ်အပူၤတက့ၢ်.”
32ယ့ၣ်ၡူးစံးဘၣ်အဝဲသ့ၣ်, “လဲၤတက့ၢ်.” ဒီးအဝဲသ့ၣ်ဟးထီၣ်ကွံာ်လၢအလိၤဒီးလဲၤဝဲဆူထိးတဖၣ်န့ၣ်အပူၤလီၤ. ထိးဒီဖုဃ့ၢ်သဖှိဆူကၢၢ်ပၤနံၤလၢအလီၤဘံယိာ်မးဆူပီၣ်လဲၣ် အပူၤဒီးလီၤအုးသံဝဲခဲလၢာ်လီၤ.
33ပှၤလၢအကွၢ်ထွဲထိးတဖုန့ၣ်က့ၤဃ့ၢ်ဆူဝ့ၢ်ပူၤဒီးစံးဘၣ်တဲဘၣ် တၢ်ဂ့ၢ်အံၤခဲလၢာ် ဒီးတၢ်လၢအမၤအသးဒီးပှၤခံဂၤလၢတၢ်နါဒိးအီၤ အဂ့ၢ်န့ၣ်လီၤ. 34ပှၤဝ့ၢ်ဖိဒီဝ့ၢ်ညါဟဲထီၣ်လၢအဝ့ၢ်ပူၤဒီးသဂၢၢ်ယ့ၣ်ၡူးလီၤ. တုၤအဝဲသ့ၣ်ထံၣ်အီၤဒီး, ဃ့ကညးအီၤဒ်သိးအကဟးထီၣ်ကွံာ်လၢအဝဲသ့ၣ်အကီၢ်ပူၤန့ၣ်လီၤ.
Currently Selected:
လံာ်မးသဲ 8: KSWC
Highlight
Share
Copy
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.