MALEKO 8
8
Ko Fagai ne Iesu a te Fa Afe
(Mata 15.32-39)
1E se leva mai tua ifo o te mea nei, kae toe o'mai ki a ia a te vaitino e tokouke. Ko seai ne mea e 'kai ei latou, tela kalaga atu ei a Iesu ki ona soko ke o'mai ki a ia, ana muna: 2“Au ko oko i te alofa ki tino konei, i te mea ne 'nofo tasi nei tatou i aso e tolu kae e seai ne meakai mo olotou 'kai. 3Kafai e uga atu ne au ke olo kae se fagai ne au latou, ka mata'po, i te mea a nisi o latou e 'mao a koga ne o'mai ei.” 4Ne fai mai ona soko ki a ia, “Ko fea mo koga i te koga lavaki tenei e mafai ei ne se tino o maua ne meakai, e lava 'lei mo fagai a tino konei?” 5Ne fesili atu a Iesu, “E fia otou falaoa?” Ne tali mai latou, “E fitu falaoa.”
6Ne fakatonu atu ne ia tino ke 'nofo ki lalo. Tela, puke atu ei a ia ki falaoa e fitu, ko fakafetai ki te Atua, ko tofitofi ne ia kae tuku atu ki ona soko ke tufatufa atu ki te vaitino. Ne fai eiloa pena ne te kau soko. 7E isi foki ne olotou tama ika mu'tana. Ne fakafetai atu foki Iesu ki te Atua mō mea konei, kae fakatonu foki ki soko ke tufatufa atu. 8Ne 'kai a tino katoa kae ne ma'kona 'lei eiloa. A te aofaki o tino ne i kona, kaati e tusa mo te fa afe. 9Ne 'fao ne te kau soko a tapola e fitu mai toega meakai. Ne uga atu ne Iesu a tino ke olo, 10kae sopo fakavave eiloa ki luga i te poti mo ona soko, kae olo ki te fenua ko Talamanuta.
Ko Fakatagi atu a Falesaio ki a Iesu ke Fai ne ia se Vavega
(Mata 16.1-4)
11 #
Mata 12.38; Luka 11.16 Ne o'mai nisi Falesaio, kamata eiloa o fakakinau latou ki a Iesu. Ne ma'nako o malei a ia, tela fakamolemole atu ei latou ki a ia ke fai ake se vavega o tofotofo a ia. 12#Mata 12.39; Luka 11.29Ne manava fi'ta Iesu kae fai atu ki a latou, “Ai a kautama o aso nei e ma'nako ei ki se vavega? E tonu, au e fai atu ki a koutou, e seai lele se vavega e fai mo te kautama tenei!” 13Ne tuku ne ia latou, toe sopo ki luga i te poti, kae toe foki atu ki te sua feitu o te namo.
Ko te Mea Faka'fete a Falesaio mo Helota
(Mata 16.5-12)
14Ne puli i soko o aumai ke tai uke olotou falaoa, kae tasi faeloa te lotou falaoa ne ave ne latou i te poti. 15#Luka 12.1Muna a Iesu, “Ke fakaeteete koutou mai te mea faka'fete a Falesaio mo Helota.” 16Ne fai'pati ia latou ake eiloa, olotou muna: “Ne fai ana pati kona i te mea e seai ne o'tou falaoa.” 17Ne iloa ne Iesu olotou muna ne fai, tela fai atu ei ki a latou, “Ai a e fai'pati ei koutou e uiga ki te seai ne otou falaoa? E seki malamalama eiloa koutou? E pena eiloa te 'numi otou mafaufau? 18#Iele 5.21; Eseki 12.2; Male 4.12E isi ne otou mata, tela la, e 'tau o matea ne koutou. E isi ne otou taliga, tela la, e 'tau o lagona ne koutou. E se masaua ne koutou 19i te tofitofiga ne au a te lima falaoa mō te lima afe tino? E fia a tapola ne 'fao ne koutou ki toega meakai?” Ne tali mai latou, “E sefululua.” 20Ne toe fai atu a Iesu, “I taku tofitofiga o falaoa e fitu mō tino e fa afe, e fia la tapola ne 'fao ne koutou ki toega meakai?” Ne tali mai latou, “E fitu.” 21Ne toe tali atu a Iesu, “E a, e seki malama'lama eiloa koutou?”
Ko Faka'lei ne Iesu a te Tino Kivi i Petesaita
22Ne o'mai latou ki Petesaita, kae aumai ne nisi tino a te tino kivi ki a Iesu, kae fakamolemole atu ke puke atu a ia ki ei. 23Ne puke atu a Iesu ki te lima o te tino kivi kae takitaki atu ki tua o te fa'kai. I te otiga ne savale atu ki mata o te tino kivi, fakaeke atu ei a ona lima ki luga i a ia kae fai atu penei, “E matea ne koe se mea?” 24Ne kilokilo saale a te tino tena kae fai ake, “E matea ne au a tino, kae e pela eiloa me ne lakau e sasale saale.” 25Ne toe fakapatele atu ona lima ki luga i mata o te kivi. Ne kilokilo saale a te tino tena, ko matea 'lei ne ia a mea. 26Ne uga atu ne Iesu ke foki ki tona fale mo te fakatonuga tenei, “Sa toe foki atu ki te fa'kai.”
Ko te Mau a Petelu e Uiga ki a Iesu
(Mata 16.13-20; Luka 9.18-21)
27Ne olo Iesu mo ona soko ki fa'kai ko Kaisaleia Filipi. I te lotou auala, ne fesili atu a Iesu ki a latou, “Taku mai me se a te manatu o tino me ko oi au?” 28#Male 6.14,15; Luka 9.7,8 Ne tali mai latou, “A nisi tino ne fai mai me ia koe ko Ioane te Papatiso, ka ko nisi ne fai mai me ko Elia, ka ko nisi ne fai mai me se tino mai te kau pelofeta.” 29#Ioa 6.68,69 Kae ne fesili atu ki ona soko, “Kae pefea koutou? Se a te otou mau me ko oi au?” Ne tali mai Petelu, “A koe ko te Keliso.” 30Tela, fakatonu atu ne Iesu latou ke se taku atu ki se tino me ko oi a ia.
Ko Faipati a Iesu e Uiga ki Ona Puapuaga mo Tona Mate
(Mata 16.21-28; Luka 9.22-27)
31Tela, kamata eiloa a Iesu o akoako atu ki ona soko: “Ka ko au te Tama a te Tagata e puapuagatia masei, kae 'teke foki ne toeaina, faitaulaga sili mo faiakoga o te Tulafono. Ka tamate au, kae ka toetu mai au i te mate i te tolu o aso.” 32Ne fakamalamalama faka'lei ne ia a te mea nei ki a latou. Tela, takitaki ei a ia ne Petelu ke tai 'mao mai te kau soko, kae 'vao atu ne ia ke mo a e fai'pati pena. 33Ne kilo Iesu ki tua i ona soko kae 'vao ne ia Petelu, ana muna, “Fano keatea e Satani mai i a au. A ou mafaufauga ne mafaufauga faka-te-tagata, kae se ne mafaufauga faka-te-Atua!”
34 #
Mata 10.38; Luka 14.27 Ne kalaga atu Iesu ki te vaitino mo ona soko ke o'mai ki a ia, kae fai atu, “So se tino e manako o tautali mai ia au, e 'tau o se mafaufau ki a ia, kae amo tena sataulo ko tautali mai ei i a au. 35#Mata 10.39; Luka 17.33; Ioa 12.25Ko te tino e fia fakasao ne ia a tona ola mo ia ake eiloa, e se maua ne ia; ka ko te tino e fakamaumau ne ia a tona ola ona ko au, mo te tala 'lei, e maua ne ia. 36E isi se aoga ki te tino manafai e maua ne ia te lalolagi katoa, kae tela la e maumau fua i ei a tona ola? E seai lele eiloa! 37E seai se mea e avatu ne se tino ke toe maua mai tona ola. 38Tela la, kafai ko te tino e taema i a au mo aku akoakoga i te kautama se talitonu mo te masei tenei, ka taema foki au te Tama a te Tagata manafai e vau au i te 'malu o toku Tamana mo agelu tapu.”
Currently Selected:
MALEKO 8: Tusi Tapu
Highlight
Share
Copy
Want to have your highlights saved across all your devices? Sign up or sign in
Tuvalu Revised Bible © Bible Society in the South Pacific