MATAIO 28
28
Ko te Toetu o Iesu
(Male 16.1-10; Luka 24.1-12; Ioa 20.1-10)
1Ko teka atu a te Sapati, ka ko mapa mai te ata ao o te aso muamua o te vaiaso, ne olo atu ei a Malia te Makatala mo te sua Malia ki te tanuga. 2Ne poko fakavave mai eiloa te mafuie i mo taimi kona; me ne fanaifo a te agelu a te Aliki mai te lagi, kae ne fakatakafili ne ia keatea a te fatu kae sagasaga i ei. 3A tena foitino e pela eiloa mo se mainaga o te uila, ka ko ona gatu e 'kena pakipaki eiloa e pela mo se kiona. 4Ko oko eiloa i te ma'taku o sotia e leoleo i kona, tela ne pole'pole ei latou; ko te mea eiloa ko fai pela mo ne tino 'mate.
5Ne fai atu a te agelu ki fafine, “Sa mataku koutou; me e iloa ne au ia koutou e salasala ki a Iesu tela ne fakasataulo. 6E galo i konei, ka ko toetu; e pela eiloa mo ana muna. O'mai o kilo'kilo ki te koga ne takato ei a ia. 7Olo fakavave nei o taku atu ki ona soko: ‘Ko toetu a ia mai te mate, ka ko mua atu nei ia koutou ki Kalilaia; ka fetaui ei koutou mo ia i kona.’ Ke masaua taku muna ne fai atu ki a koutou.” 8Tela, tuku fakavave eiloa ne laua a te tanuga mo te ma'taku mo te fiafia lasi foki, kae 'tele atu ki soko o Iesu.
9Kae 'poi eiloa me ko fakafetaui laua ne Iesu, fai atu ei ki a laua, “Ke ia koulua te filemu!” Ne o'mai laua ki a ia kae puke ki ona vae kae tapuaki atu ki a ia. 10Ne muna atu a Iesu ki a laua, “Sa mataku! Olo o taku atu ki oku taina ke olo ki Kalilaia, me e fetaui matou i kona.”
Ko te Tala a Sotia ne Leoleo i te Tanuga
11Ka koi olo atu a fafine i te auala, a nisi sotia kola ne leoleo i te tanuga ne olo ki te fa'kai kae taku atu ki faitaulaga sili a mea katoa kola ne 'tupu. 12Ne fono fakatasi a faitaulaga sili mo toeaina, fai ei te lotou fuafuaga; kae ne tuku atu ne latou ki sotia a tupe e uke, 13mo te fakatonuga ki a latou penei, “Fai atu ki tino i soko o Iesu ne o'mai i te po o kaisoa tena foitino ka koi 'moe koutou. 14Kafai foki e lagona ne te kovana a te tala tena, e fakatalitonu ne matou ki a ia; ko seai ei se mea e tupu ki a koutou.” 15Ne puke ne sotia kona a te tupe, kae fai ne latou a te mea ne fakatonu atu ke fai. Ne salalau atu a te tala ki tino Iutaia katoa ke oko mai ki aso nei.
Ko Fakaasi atu a Iesu ki Ona Soko
(Male 16.14-18; Luka 24.36-49; Ioa 20.19-23; Galu 1.6-8)
16 #
Mata 26.32; Male 14.28 Ne olo atu a te tinoagafulu mo te tokotasi soko ki te mauga i Kalilaia, tela ne fai atu ei a Iesu ke olo ki ei. 17I te laveaga ne latou a ia, tapuaki atu ei latou ki a ia, ka ko nisi tino o latou ne fakalotolotolua. 18Ne fakapilipili atu a Iesu ki a latou kae fai atu, “Ko oti ne tuku mai ki a au a te pule katoa i te lagi mo te lalolagi. 19#Galu 1.8 Tela la, olo atu koutou ki fenua katoa ke fai a tino i ei mo oku soko; papatiso foki latou i te igoa o te Tamana, te Tama mo te Agaga Tapu. 20Akoako atu foki latou ke faka'logo ki mea katoa kola ne fakatonu atu ne au ki a koutou. Kiloke! Au e fakatasi faeloa mo koutou, ke oko eiloa ki te gataga o te lalolagi.”
Currently Selected:
MATAIO 28: Tusi Tapu
Highlight
Share
Copy
Want to have your highlights saved across all your devices? Sign up or sign in
Tuvalu Revised Bible © Bible Society in the South Pacific