MATAIO 26
26
Ko te Pulepulega Masei ke Tamate a Iesu
(Male 14.1-2; Luka 22.1-2; Ioa 11.45-53)
1I te otiga ne akoako atu ne Iesu a mea katoa konei, faipati atu ei ki ona soko, 2#Eso 12.1-27 “Ko iloa ne koutou e toe lua mai aso kae fai te Paseka, ko fakasataulo ei au te Tama a te Tagata.”
3Ne maopoopo fakatasi a faitaulaga sili mo toeaina o Iutaia i te fale o te Faitaulaga Pule ko Kaiafa, 4kae ne fai'pati ke puke 'funa ne latou a Iesu o tamate. 5Kae ne fai ake latou pela, “E se 'tau mo tatou o fai a te mea tenei i te taimi o te Paseka, i te mea mana tupu ei se fakalavelave i te fenua.”
Ko te Milimiliga o Iesu ki te Sinu i Petania
(Male 14.3-9; Ioa 12.1-8)
6Ka koi nofo a Iesu i te fale o Simona te lepela i Petania, 7#Luka 7.37,38 ne vau a te fafine ki a ia mo te fagu sausau manogi kae 'togi 'mafa. Ne 'ligi ne ia ki te ulu o Iesu ka koi kai a ia. 8Ne ita ona soko i te laveaga ne latou a te mea tenei, olotou muna, “Ai a ko fakamaumau ei a te mea tena? 9A te sausau tena, e mafai o fakatau atu ke maua mai ei se tupe lasi, ko tuku atu ei ma tino ma'tiva!” 10Ne iloa ne Iesu a te mea tena, tela fai atu ei a ia, “Se a te mea e fakalavelave fua ei koutou ki te fafine? Se mea gali mo te 'lei ko fai ne ia mō oku. 11#Teu 15.11 E 'nofo koutou mo tino ma'tiva i aso katoa, ka ko au e se 'nofo mo koutou. 12I te 'ligiga o te sausau tenei ki toku foitino, ne fai ne ia a te mea tenei e fakatoka ei au mō toku tanuga. 13Au e faipati tonu atu ki a koutou, so se koga e folafola atu ki ei a te tala 'lei i te lalolagi, e fai mo fakamanatuga ki tino a tena mea ne fai.”
Ko Loto a Iuta ke Fakalata ne ia a Iesu
(Male 14.10-11; Luka 22.3-6)
14A te sua tino o te tinoagafulu mo te tokolua e igoa ki a Iuta te Isikaliota, ne fano ki Faitaulaga Sili, 15#Saka 11.12 kae fai atu, “Se a toku 'togi manafai e fakalata ne au a Iesu ki a koutou?” Tela, faitau atu ei ne latou e tolusefulu tupe siliva, tuku atu ei ki a ia. 16Mai i te taimi tenei, ne salasala ei ne ia se avanoa 'lei e fakalata ei ne ia a Iesu.
Ko 'Kai Fakatasi a Iesu mo Ona Soko i te 'Kaiga o te Paseka
(Male 14.12-21; Luka 22.7-14,21-23; Ioa 13.21-30)
17I te aso muamua o te 'Kaiga o Falaoa se Fakafete, ne o'mai a soko o Iesu o fesili mai ki a ia, “Tefea a te koga e loto koe ki ei, ke olo matou o fakatoka te 'kaiga o te Paseka mo koe?” 18Ne fai atu a ia ki a latou, “Olo atu ki te fa'kai, me e isi te tagata i ei, fai la ki a ia, ‘Muna a te Faiakoga, ko pili mai toku taimi; e fai ei ne au a te 'kaiga o te Paseka fakatasi mo oku soko i tou fale.”’ 19Ne fai eiloa ne ona soko tena fakatonuga, fakatoka ei ne latou a te 'kaiga o te Paseka i kona.
20I te okoga ki te afiafi, 'kai ei a Iesu mo ona soko. 21Ka koi 'kai latou, ne fai atu a Iesu, “Au e fai atu ki a koutou, e isi se tino o koutou e fakalata ne ia a Au.” 22Ne 'poi latou, kamata ei latou takitokotasi o fesili ki a Iesu penei, “Te Aliki, e a, ko au?” 23#Sala 41.9Ne tali atu a Iesu, “A te tino tela e tuku fakatasi o ma lima ki te tisi, ko ia tena e fakalata ne ia a au. 24E mate eiloa au te Tama a te Tagata e pela mo muna a te Tusi, kae kalofa eiloa i te tino tela e fakalata ne ia a te Tama a te Tagata! Kaati e sili moi se fanau mai a ia ki te lalolagi!” 25Ne faipati mai a Iuta te fakalata, “Te Faiakoga, e a, ko au?” Muna a Iesu, “Tena eiloa ne fai mai ne koe.”
Ko te 'Kaiga a te Aliki
(Male 14.22-26; Luka 22.15-20; 1Koli 11.23-25)
26Ka koi 'kai eiloa latou, ne puke ne Iesu a te falaoa, kae fai te fakafetai, ko tofitofi ne ia, kae tufa atu ki ona soko, ana muna, “Puke, 'kai, ko toku foitino tenei.” 27Ne puke foki ne ia a te ipu, kae fai te fakafetai, tuku atu ei ki a latou, ana muna, “Inu katoa koutou ki ei; 28#Eso 24.8; Iele 31.31-34 me ko toku toto tenei o te feagaiga, tela ne maligi mo te tokoukega e fakamagalo ei agasala. 29Au e fai atu ki a koutou, e se toe inu eiloa au ki te uaina tenei ke oko ki te aso e inu ei au ki te uaina fou fakatasi mo koutou i te Malo o toku Tamana.” 30I te otiga ne usu te lotou pese, olo atu ei latou ki te mauga o Olive.
Ko 'Valo ne Iesu te Fakafiti o Petelu
(Male 14.27-31; Luka 22.31-34; Ioa 13.36-38)
31 #
Saka 13.7
Fakamuli ake, ne fai atu a Iesu ki a latou, “I te po eiloa tenei, a koutou katoa e 'tele keatea kae tiaki au, me ne fai mai te Tusi, ‘E tamate ne te Atua te tausi mamoe, ko mafuta valevale ei te lafu mamoe.’ 32#Mata 28.16 Kafai ko toetu au, e mua atu au ia koutou ki Kalilaia.” 33Ne faipati mai Petelu ki a Iesu, “E ui eiloa e tiaki koe ne latou konei, kae se mafai eiloa ne au o tiaki koe.” 34Ne fai atu a Iesu ki a ia, “Au e fai tonu atu ki a koe; i te po eiloa tenei, ka koi tuai o 'tagi a moa, e fakafiti fakatolu mai koe ki a au.” 35Ne muna mai Petelu ki a ia, “Kafai eiloa e 'tau mo au o mate fakatasi mo koe, e se mafai eiloa au o fakafiti ki a koe!” Ne pena katoa eiloa a pati a ona soko.
Ko 'Talo Iesu i Ketesemane
(Male 14.32-42; Luka 22.39-46)
36Fakamuli ifo, ne olo atu a Iesu mo ona soko ki te koga e igoa ki a Ketesemane, fai atu ei a ia ki a latou, “'Nofo i konei kae ke fano mua au o 'talo i te koga tela.” 37Ne ave ne ia Petelu mo tama tagata a Sepetaio e tokolua. Ne fanoanoa lasi a ia kae fi'ta. 38Tela, fai atu ei a ia ki a latou, “Toe momea eiloa kae mate au i toku fanoanoa. 'Nofo i konei ke alaala tasi tatou.” 39Ne fanatu a ia ke tai 'mao atu, totuli kae punou ifo ki lalo o 'talo, “Toku Tamana, kafai e mafai ne koe, ave keatea te ipu tenei mai ia au; ke se fai la toku loto ka ko tou loto.”
40Ne toe foki mai a ia ki soko e tokotolu, maua mai ei latou e 'moe. Fai atu ei a Iesu ki a Petelu, “E se mafai eiloa ne koutou ke 'pula tasi tatou i se itula? 41Sa 'moe kae 'talo, i te mea ma oko mai fakaosoosoga ki a koutou. E manako ki ei te loto, ka ko te foitino ko vaivai.”
42Ne toe fano keatea a Iesu i te fakalua o 'talo penei, “Toku Tamana, kafai ko se mafai ne koe o ave keatea a te ipu tenei ka ke inu eiloa au i ei, ke fai la tou loto.” 43Ne toe foki mai foki a ia, maua mai ei ne ia ona soko e 'moe; ko se maua eiloa ne latou o 'pula olotou mata.
44Ne toetuku foki ne Iesu latou kae fano o 'talo i te fakatolu, fai atu foki ne ia a muna mau eiloa kona. 45Ne toe foki mai a ia ki ona soko, kae fai mai ki a latou, “A koutou nei koi 'moe eiloa kae fakamalo'lo? Kiloke! Ko pili mai nei ki te taimi e fakalata ei au te Tama a te Tagata ki lima o tino agasala. 46'Tu ki luga, ke na olo tatou. Kiloke, tenei te tino e fakalata ne ia a au!”
Ko Puke Fakapagota a Iesu
(Male 14.43-50; Luka 22.47-53; Ioa 18.3-12)
47Ka koi faipati atu eiloa a Iesu, kae oko mai mo Iuta, ko te sua tino o te tinoagafulu mo te tokolua. Ne o'mai fakatasi mo tino e tokouke, e puke mai olotou pelu mo olotou pago. Ne uga mai latou ne faitaulaga sili mo toeaina Iutaia. 48Ne fakaasi atu ne te tino fakalata a te fakailoga ki a latou: “A te tino tela e sogi au ki ei, ko ia eiloa tena e ma'nako a koutou ki ei. Ke puke la ne koutou a ia!” 49I te okomaiga a Iuta, ne vau tonu eiloa a ia ki a Iesu kae fai mai, “Talofa te Faiakoga!” Sogi atu ei a ia ki a ia. 50Ne fai atu a Iesu ki a ia, “Taugasoa, ke vave o na fai te mea ne vau ei koe o fai.”#26.50: Taugasoa, ke vave na fai te mea ne vau ei koe o fai io me Taugasoa, ka i a ne vau ei koe ki konei?
Ne o'mai ei a tino o puke fakapagota a Iesu. 51A te sua tino ne fakatasi mo Iesu ne tata ne ia tena pelu, kae 'kati ne ia te taliga o te tavini a te Faitaulaga Pule, motu ei keatea tena taliga. 52Ne fai atu a Iesu ki a ia, “Tuku tau pelu ki tena sifi; me ko latou katoa kola e fakaaoga te pelu, e 'mate foki i te pelu. 53E se iloa ne koe me mafai ne au o fakatagi atu ki toku Tamana mō se fesoasoani, kae e uga fakavave mai ei ne ia ki a au ne sotia agelu e sili atu i te fitu sefululua afe? 54Kae e mafai la pefea o fakataunu a muna a te Tusi, tela ne fai mai me e 'tau eiloa o fai penei?”
55 #
Luka 19.47; 21.37 Ne faipati atu foki a Iesu ki te vaitino, “E o'mai koutou mo pelu mo pago o puke au e pela mo se tino fao mea? I aso katoa ne nofo ei au i te Fale Tapu o akoako atu, kae ne seki o'mai koutou o puke au. 56Kae ne 'tupu a mea katoa konei, ko te mea ke fakataunu ei a muna i Tusi a pelofeta.”
Fakamuli ifo, ne tiaki a ia ne soko katoa, kae 'tele keatea.
Ko Iesu i Mua o te Fono
(Male 14.53-65; Luka 22.54-55,63-71; Ioa 18.13-14,19-24)
57A latou kola ne puke ne latou a Iesu, ne takitaki atu ne latou a ia ki a Kaiafa te Faitaulaga Pule, ka ko leva ne maopoopo i kona a faiakoga o te Tulafono mo toeaina. 58Ne tautali 'mao atu a Petelu ke oko ki te lotoa o te Faitaulaga Pule, ulu ei a ia ki loto kae 'nofo fakatasi mo pulisimani ke iloa ne ia te ikuga. 59A faitaulaga sili mo te Fono katoa, ko taumafai nei o salasala ne molimau se tonu e uiga ki a Iesu ko te mea ke tamate ne latou a ia. 60Kae ne seki maua ne latou, e ui eiloa me ne tokouke a tino molimau fakaloiloi ne 'tu mai ki mua. Fakamuli ake ne o'mai a te tokolua o molimau fakaloiloi, 61#Ioa 2.19 a la muna, “Ne fai mai a te tino tenei, ‘E mafai ne au o lepe te Fale Tapu o te Atua, kae toe fakatu ne au i aso e tolu.”’
62Ne tu ake ki luga a te Faitaulaga Pule, kae fai mai ki a Iesu, “E seai sau tali e fai mai e uiga mo te mau a tino konei e uiga ki a koe?” 63Ka ko Iesu ne se faipati eiloa. Muna a te Faitaulaga Pule ki a ia, “Au e fai atu ki a koe i te igoa o te Atua ola, ke tauto mai koe me ko koe ko te Keliso te Tama a te Atua?” 64#Tani 7.13 Ne tali atu a Iesu ki a ia, “Tena eiloa ne fai mai ne koe. Au e fai atu ki a koutou katoa, fakamuli ifo e matea ne koutou te Tama a te Tagata e nofo i te feitu fakaatamai o te Tino tela e o ia te mana katoa, e vau foki a ia i kaumana o te lagi!” 65#Levi 24.16 I kona eiloa, ne 'sae ne te Faitaulaga Pule ona gatu, kae fai mai, “Ko muna masei a ia ki te Atua! Se a te aoga e toe fia maua ei ne molimau? Ko oti ne lagona ne koutou ana muna ma'sei ki te Atua! 66Se a la te otou taofi?” Ne tali mai latou, “Ko sala a ia, ka ko 'tau foki eiloa o mate.”
67 #
Isa 50.6
Ne puapuaki latou ki ona mata kae kini a ia; kae laupapa foki ne nisi tino, 68kae fai mai, “Te Keliso, mate mai ake, me ko oi ne kini ne ia koe?”
Ko Fakafiti ne Petelu a Iesu
(Male 14.66-72; Luka 22.56-62; Ioa 18.15-18,25-27)
69Ka koi sagasaga Petelu i tua i te lotoa, ne fanatu ki a ia se tavini tamafine a te Faitaulaga Pule, kae fai atu, “Ko koe foki tena te sua tagata ne fakatasi mo Iesu te Kalilaia.” 70Ne fakafiti Petelu i mua o latou katoa, ana muna, “E se iloa ne au a te mea tena e fai mai ei koe.” 71Ne fanatu foki a ia ki te mataloa o te lotoa, lavea ei a ia ne te sua tavini tamafine, kae fai atu ki tino ne 'tu pili mai i kona. “A te tagata nei ne olo tasi eiloa mo Iesu te Nasaleta.” 72Ne toe fakafiti Petelu, kae tauto, “E se iloa ne au a te tagata tena!” 73Fakamuli ifo, ne olo ake a tino kola ne 'tu i kona, kae fai atu ki a Petelu, “E tonu eiloa, ko koe foki te sua tino o latou, me e iloa gofie eiloa i tau 'gana.” 74Ka ko Petelu ne toe tauto mai, “E se iloa ne au a te tagata tena!” I kona foki eiloa, kae tagi mo te moa, 75masaua ei ne Petelu te faipatiga a Iesu, “Ka koi tuai o tagi a te moa, e fakafiti fakatolu mai koe ki a au.” Ne fanatu ei Petelu ki tua o tagi mautuutu i ei.
Currently Selected:
MATAIO 26: Tusi Tapu
Highlight
Share
Copy
Want to have your highlights saved across all your devices? Sign up or sign in
Tuvalu Revised Bible © Bible Society in the South Pacific