MATAIO 22
22
Ko te Tala Fakatusa ki te 'Kaiga o te Fakaipoipoga
(Luka 14.15-24)
1Ne toe faipati atu a Iesu ki a latou i tala fakatusa: 2“A te Malo o te lagi e fakatusa ki te tupu ne fakatoka te 'kaiga o te fakaipoipoga a tena tama. 3Ne uga ne ia ana tavini ke olo o fai ki tino kola ne ami ke o'mai ki te 'kaiga, kae ne se fia o'mai. 4Ne toe uga atu ne ia a nisi tavini ke olo atu o fai tena fekau ki tino ami: ‘Fakailoa atu ki tino ami, “Ko toka nei taku 'kaiga, ko oti foki ne ta aku pulumakau 'lasi mo tamā pulumakau putaputa. Tela la, ke na o'mai koutou ki te 'kaiga me ko toka a mea katoa.”’ 5Ka ko tino ne ami, ne seki 'saga mai ki ei, kae ne olo eiloa o fai olotou galuega. A te sua tino ne fano o galue i tena manafa, ka ko te sua tino ne fano o galue i tena sitoa. 6Ka ko nisi ne puke ne latou ana tavini o 'kini kae tamate foki. 7Ko oko eiloa i te ita o te tupu, uga atu ei ne ia ana sotia o tamate a tino kona, kae 'sunu te lotou fa'kai. 8Ne kalaga atu a ia ki nisi ana tavini, ana muna, ‘Ko toka taku 'kaiga o te fakaipoipoga ka ko se aoga nei mō latou kola ne ami muamua. 9Olo nei eiloa ki auala katoa o te fa'kai, o ami mai so se tino e fetaui mo koutou ke vau ki te 'kaiga.’ 10Tela, olo ei tavini konei i auala katoa o te fa'kai o ami mai so se tino e fetaui latou, ko tino 'lei mo tino ma'sei. Ko i takitaki eiloa te fale i tino ami.
11“I te fanatuga a te tupu o kilo ki tino ne ami kola ne o'mai ki te 'kaiga, ne lavea ne ia a te tagata e tokotasi e se pei ki gatu e fakaaoga i 'kaiga o fakaipoipoga. 12Ne fesili atu a te tupu ki a ia, ‘Toku taugasoa, ne vau pefea koe ki loto i konei, kae e se fai tou gatu e 'tau mo 'kaiga o fakaipoipoga?’ E seai sena tali ne fai ki te tupu. 13#Mata 8.12; 25.30; Luka 13.28 Tela, fai atu ei a te tupu ki ana tavini, ‘Saisai ona vae mo ona lima kae apa ki tua i te pouliga, i te koga tela e iai te fakatau'tagiga mo te gaii o nifo i ei.”’ 14Kae ne fakapalele a pati a Iesu penei, “E tokouke a tino e kalagagina, kae ne mu tino fua e filifiligina.”
Ko te Fesili e Uiga ki te 'Togiga o Lafoga
(Male 12.13-17; Luka 20.20-26)
15Ne olo a Falesaio o fai'pati ki se faifaiga ka fakatogafiti ei ne latou a Iesu ki olotou fesili. 16Ne uga mai ei ne latou a nisi o olotou soko fakatasi mo nisi o te kau a Helota ki a Iesu, ke fai mai ki a ia, “Te Faiakoga, e iloa ne matou ia koe se tino fakamaoni. E akoako atu ne koe a te mea tonu e uiga mō te loto o te Atua ki tino, kae se saga eiloa koe ki manatu o tino, me ia koe e se fakailoga tino. 17Fakaasi mai nei ki a matou a tou taofi. E tapu i te Tulafono o 'togi lafoga ki a Kaisala me ikai?” 18Ko iloa ne Iesu olotou togafiti ma'sei, tela muna atu ei a ia ki a latou, “A koutou ne tino 'loi! Ai a e fesili tofotofo mai ei koutou ki a au? 19Fakaasi mai se tupe e tasi.” Aumai ei ne latou a te tupe. 20Ne fesili atu a Iesu ki a latou, “E oi te ata mo te igoa tenei?” 21Ne tali mai latou, “E o Kaisala.” Tela, muna atu ei a Iesu ki a latou, “Ko 'lei la, e tau mo koutou o fai te otou tiute ki te Malo, pela foki mo otou tiute ki te Atua.” 22I te lagonaga ne latou a pati konei, ko oko eiloa i te lotou ofo. Tuku ei ne latou a Iesu kae olo keatea.
Ko te Fesili e Uiga ki te Toetu
(Male 12.18-27; Luka 20.27-40)
23 #
Galu 23.8
I te aso eiloa tena, e isi ne Satukaio ne o'mai ki a Iesu. Ko latou konei e se talitonu ki te toetu, kae fai mai me e seai se toetu. 24#Teu 25.5 Olotou muna, “Te Faiakoga, e penei te akoakoga a Mose: ‘Kafai e mate se tagata kae se afu, e 'tau mo tena taina o avaga mo tena avaga, ko te mea ke maua ne tamaliki mō sui te tino tela ne mate.’ 25E isi se tautaina e tokofitu. Ne avaga te toekimua kae ne mate se afu, tela tuku atu ei tena avaga ke avaga mo tena taina. 26Ne avaga foki ki ei a te tokolua, te tokotolu ke oko eiloa ki te tokofitu. 27Ka ko te fafine ne mate fakamuli atu. 28Nei la, kafai e oko ki te aso o te toetu, ko oi te tino ia latou e avaga mo ia, me ia latou ne a'vaga katoa ki ei.”
29Kae ne tali atu penei a Iesu ki a latou, “E 'se koutou. E se maina koutou i Tusi io me ko te 'mana o te Atua. 30Me kafai e toe'tu mai a tino e 'pau latou mo agelu i te lagi, e se a'vaga. 31Kae e pela mo te toetu; e seki faitau eiloa ne koutou a muna ko oti ne fai atu ne te Atua ki a koutou? Ne fai mai ana muna, 32#Eso 3.6 ‘Au ko te Atua o Apelaamo, ko te Atua o Isaako mo te Atua o Iakopo.’ Ko tena uiga, a ia ko te Atua o tino ola, kae se se Atua o tino 'mate.” 33I te lagonaga ne tino ana akoakoga, ne ofo latou i ei.
Ko te Tulafono Tafa Sili i te Taua
(Male 12.28-34; Luka 10.25-28)
34Ne maopoopo fakatasi a Falesaio i te lagonaga ne latou i Satukaio ne se mafai o tali a fesili a Iesu. 35E tokotasi o latou, se faiakoga o te Tulafono, ne taumafai o fesili tofotofo ki a Iesu: 36“Te Faiakoga, tefea a te fakatonuga tafasili i te Tulafono?” 37#Teu 6.5 Ne tali atu a Iesu, “‘E 'tau mo koe o alofa ki te Aliki tou Atua mo tou loto katoa, mo tou agaga katoa, mo tou mafaufau katoa.’ 38Tena te tulafono tafasili mo te aoga. 39#Levi 19.18 Ko te lua o tulafono tafasili i te aoga tenei: ‘E 'tau mo koe o alofa ki tou tuakoi e pela eiloa mo koe ki a koe.’ 40#Luka 10.25-28 A te katoatoaga o te Tulafono a Mose mo akoakoga a pelofeta, e fakavae i luga i tulafono konei e lua.”
Ko te Fesili e Uiga ki te Keliso
(Male 12.35-37; Luka 20.41-44)
41I te taimi ne maopoopo ei fakatasi a Falesaio, ne fesili atu a Iesu ki a latou: 42“Se a te otou taofi e uiga ki te Keliso? E oi te gafa ne tupu mai ei a ia?” Ne tali mai latou, “Ko te gafa o Tavita.” 43Ne toe fesili atu foki a Iesu penei, “Ai a la ne fai ei ne te Agaga Tapu a Tavita ke taku ne ia a te Keliso ko tena Aliki? Me e penei a muna a Tavita,
44 #
Sala 110.1
‘A te Aliki ne faipati ki toku Aliki:
Nofo i toku feitu fakaatamai,
Ke oko ki te taimi e fai ei ne au ou fili mo mea e tuku ei ou vae.’ 45Kafai Tavita ne taku ne ia a te Keliso ko tena Aliki, e mafai la pefea o fai mai koutou i te Aliki ne tupu mai i te gafa o Tavita?” 46E seai eiloa se tino ne mafai ne ia o tali atu ki a Iesu. Ne fakagata mai foki eiloa i te aso tena a te lotou fia fesili ki a Iesu.
Currently Selected:
MATAIO 22: Tusi Tapu
Highlight
Share
Copy
Want to have your highlights saved across all your devices? Sign up or sign in
Tuvalu Revised Bible © Bible Society in the South Pacific