MATAIO 21
21
Ko Ulu atu Iesu mo te Manumalo ki Ielusalema
(Male 11.1-11; Luka 19.28-40; Ioa 12.12-19)
1Ka ko pili atu latou ki Ielusalema, oko atu ei latou ki Petefake i te mauga o Olive. Tela, uga atu ei ne Iesu ona soko e tokolua ke 'mua, 2kae fai atu ki a laua: “Olo ki te fa'kai tena mai mua. E lavea ne koulua i ei se asini e tukau, mo tena tama foki e tu i ona tafa. 'Tala o aumai ki a au. 3Kafai la e isi se tino e fesili atu ki a koulua, fai la ki ei, ‘E manako ki ei te Aliki,’ ko te mea eiloa ko tuku atu ne ia.”
4Ne tupu a te mea tenei, ko te mea ke fakataunu ei a te pati a te pelofeta ne fai:
5 #
Saka 9.9
“Fai atu ki te fa'kai o Siona:
Kiloke, a tou tupu ko vau ki a koe,
E loto malalo a ia, kae sopo i te asini,
E sopo foki i te tama asini, ko te tama a te asini.”
6Tela, muamua atu ei a soko konei e tokolua, kae ne fai katoa ne laua a mea ne fakatonu atu ne Iesu ke fai. 7Ne aumai ne laua a te asini mo tena tama, fakatoka ei ne latou olotou gatu ki tua o asini, sopo ake ei a Iesu. 8E tokouke a tino ne 'fola olotou gatu i te auala, ka ko nisi tino ne 'fati ne latou a kaula mō 'fola te auala. 9#Sala 118.25,26A te vaitino kola ne sasale i mua mo tua o Iesu, ne ka'laga penei, “Ke vikia te Tama a Tavita! Ke manuia a ia tela e vau i te igoa o te Aliki! Ke vikia te Atua!”
10I te okoatuga a Iesu ki Ielusalema, ne ua'te mo tino o te fa'kai katoa, kae fakatau ka'laga penei: “Ko oi te tino tenei?” 11Ne tali mai a tino kola ne o'mai mo Iesu, “Ko Iesu tenei, ko te pelofeta mai Nasaleta i Kalilaia.”
Ko Fano a Iesu ki te Fale Tapu
(Male 11.15-19; Luka 19.45-48; Ioa 2.13-22)
12Ne ulu atu a Iesu ki loto i te Fale Tapu, kae ne afuli ne ia ki tua a tino katoa kola ne fakatau mea i ei. Ne 'tule foki ne ia a laulau a tino faka'liu tupe, pela foki mo nofoaga o tino fakatau lupe. 13#Isa 56.7; Iele 7.11 Ne muna atu a ia ki a latou: “Ko oti ne tusi i te Tusi, i te Atua ne muna mai penei, ‘E taku toku fale ko te fale 'talo.’ Ka ko fai nei ne koutou ke fai mo ana o tino kaisoa!”
14A tino 'kivi mo tino 'pili ne olo atu ki a ia i te Fale Tapu, fai ei ne ia latou ke 'lei. 15Ne ita a faitaulaga sili mo faiakoga o te Tulafono i te laveaga ne latou ana galuega fakaofoofogina ne fai. Ne ka'laga foki a tama'liki i loto i te Fale Tapu, kae fai ake olotou pati penei, “Ke vikia te Tama a Tavita!” 16#Sala 8.2 Tela, fai mai ei latou ki a Iesu, “E lagona ne koe olotou pati ne fai?” Ne tali atu a Iesu, “Ao, e lagona ne au. Kae e seki faitau eiloa koutou i muna kola ne tusi i tusi, ‘Ko oti ne akoako ne koe a tamaliki mo pepe ke tuku atu ne latou a vikiga tonu ki a koe’?” 17Ne tuku ne Iesu a latou kae fano ki tua o te fa'kai, oko atu ei ki Petania, moe ei i kona i te po.
Ko Fetu ne Iesu a te Mati
(Male 11.12-14,20-24)
18Ne lagona ne Iesu a te likiliki i te taeao pogipogi, i tena fokiatuga ki te fa'kai. 19Ne lavea ne ia a te mati i tafa o te auala, fanatu ei a ia ki ei. Matea ake ei ne ia i te mati e se fua, kae ne lau fua e ola mai. Tela, muna atu ei a ia penei ki te lakau, “Ke se toe fua mai eiloa koe” I kona foki eiloa, magemage ei mo te mati. 20Ne lavea ne soko a te mea tenei kae ne ofo latou. Ne fesili atu latou ki a Iesu, “Ai a ne magemage fakavave ei a te mati?” 21#Mata 17.20; 1Koli 13.2 Ne tali atu a Iesu penei, “Masaua a te mea tenei! Kafai e fakatuanaki koutou e aunoa mo se fakalotolotolua, e mafai ne koutou o fai a te mea ko oti ne fai ne au ki te mati. E se gata fua i te mea nei, kae e mafai foki ne koutou o muna atu ki te mauga tenei, ‘Masiki koe o tu i te tai,’ e fai eiloa pena. 22Kafai e fakatuanaki koutou, e maua ne koutou so se mea e fakatagi koutou ki ei i te 'talo.”
Ko te Fesili e Uiga ki te Pule a Iesu
(Male 11.27-33; Luka 20.1-8)
23Ne toe foki mai a Iesu ki te Fale Tapu. Ka koi tuai o akoako ki tino, kae oko mai a faitaulaga sili mo toeaina Iutaia o fesili mai ki a ia, “E a ai te pule e fai ei ne koe a mea konei? Ko oi foki ne avatu ne ia ki a koe a te pule?” 24Ne tali atu a Iesu ki a latou: “E isi foki saku fesili e fia taku atu ki a koutou, ke tali mai ne koutou. Kafai e taku mai ne koutou te tali, ko fakaasi atu ei ne au a te pule e fai ei ne au a mea konei. 25A te papatisoga a Ioane ne maua mai i te Atua me mai i tino?” Ne kamata eiloa latou o fakakinau ia latou eiloa, olotou muna, “Se a te tali a tatou? Kafai e tali atu tatou penei, ‘Mai i te Atua,’ e fai mai a ia, ‘Se a la te mea ne seki talitonu ei koutou ki a Ioane?’ 26Kae kafai e fai atu tatou, ‘Mai i tino,’ tatou e ma'taku ki tino i te mea e taofi latou ia Ioane se pelofeta.” 27Tela, tali atu ei a latou ki a Iesu, “E se iloa ne matou.” Muna a Iesu ki a latou, “E se fakailoa atu foki ne au ki a koutou a te pule e fai ei ne au a mea konei.”
Ko te Tala Fakatusa ki te Tautaina
28“Se a te otou manatu ki te mea nei? E isi se tagata e tokolua ana tamaliki tagata. Ne fano ki tena tama matua kae fai atu, ‘Toku toe, fano koe o galue i te togavine i te aso nei.’ 29Ne tali mai a ia, ‘Ikai, au e se fano,’ kae fakamuli ifo, ne mafuli tena mafaufau, fano ei o galue i te togavine. 30Ne fano foki ki tena sua tama, e pena foki eiloa ana pati ne fai ki a ia, Ne tali mai a ia, ‘Ko 'lei,’ kae ne seki fano. 31Ko oi la te tino ia laua ne fai ne ia a te loto o te tamana?” Ne tali mai latou, “Ko te tama matua.” Muna a Iesu ki a latou, “Au e muna tonu atu ki a koutou, me muamua a tino ao lafoga mo fafine tali tagata o ulu atu ki te Malo o te Atua i lo koutou. 32#Luka 3.12; 7.29,30Me ia Ioane te Papatiso ne vau o fakaasi atu ki a koutou a te auala tonu e 'tau o sasale i ei koutou, kae ne seki talitonu koutou ki a ia; ka ko tino ao lafoga mo fafine tali tagata ne talitonu ki a ia. Ne 'kilo tonu eiloa otou mata ki ei, kae ne seki salamo koutou, io me talitonu ki a ia.”
Ko te Tala Fakatusa ki Tino Ga'lue i te Togavine
(Male 12.1-12; Luka 20.9-19)
33 #
Isa 5.1,2 Muna a Iesu, “Faka'logo mai ki te sua tala fakatusa tenei. E isi se tagata ne fai tena togavine. Ne 'pui ne ia kae keli ne ia se pu mo tuku te mea e 'tau ei a te sua o te vine. Ne faite foki ne ia se fale leoleo maluga e leoleo ei te togavine. Ne tuku atu tena togavine ki tino ga'lue ke tausi ne latou, kae fai malaga ki te sua fenua. 34I te okoga ki aso o te taukai vine, ne uga atu ne ia ana tavini ke olo ki tino kola e tausi ne latou tena togavine, ke maua mai tena tusaga. 35Ne puke ana tavini ne tino galue. Ne 'kini ne latou te sua tino, kae tamate te sua tino, ka ko te sua tino ne peipei ki fatu. 36Ne toe uga atu ne te tagata tena a nisi tavini. Ko tokouke atu ia latou kola ne muamua. Ne fai foki eiloa pena ne tino galue. 37Fakamuli ake, ne uga atu ne ia tena tama mo tena manatu, ‘E faka'logo latou ki taku tama!’ 38I te laveaga ne tino ga'lue i te togavine a te tama, fai ake ei olotou muna penei: ‘Tenei te sui tonu, o'mai ke na ta ne tatou, ko te mea ka fai mo tatou te togavine!’ 39Tela, puke atu ei latou ki a ia, kae apa ki tua o te togavine, tamate ei ne latou.”
40Ne fesili atu a Iesu, “Kafai la ko vau te tino e o ia te togavine, se a tena mea ka fai ki tino ga'lue i te togavine?” 41Ne tali mai latou, “E tamate eiloa ne ia a tino ma'sei kona, kae tuku atu te togavine ke galue ne nisi tino, tela e maua mai ei sona tusaga i taimi tonu o te taukai vine.” 42#Sala 118.22,23Muna a Iesu, “E seki faitau eiloa koutou ki muna a te Tusi?
‘A te fatu ne tiakina ne tufuga fai fale
Ko fai nei mo fatu tafasili i te aoga.
Ne fai ne te Aliki,
Kae se mea fakaofoofogina ki otou mata!’ ”
43Muna a Iesu, “Au e fai atu ki a koutou, i te Malo o te Atua e ave keatea mai ia koutou, kae tuku atu ki se fenua tela e fakaasi mai i ei ne fua 'lei. 44So se tino e siga ki luga i te fatu tenei, e fatifati valevale; kae kafai e to te fatu tenei ki luga i se tino, e malukuluku likiliki eiloa a ia.”
45Ne lagona ne faitaulaga sili mo Falesaio a tala fakatusa a Iesu; iloa ake ei ne latou ia Iesu e fakasino ana tala fakatusa ki a latou. 46Ne ma'nako latou o puke o tamate a Iesu, kae ne ma'taku i te tokoukega o tino e taofi pela ia Iesu se pelofeta.
Currently Selected:
MATAIO 21: Tusi Tapu
Highlight
Share
Copy
Want to have your highlights saved across all your devices? Sign up or sign in
Tuvalu Revised Bible © Bible Society in the South Pacific