MATAIO 14
14
Ko te Mate o Ioane te Papatiso
(Male 6.14-29; Luka 9.7-9)
1I aso eiloa kona, a Helota te pule o Kalilaia ko logo i tala o Iesu. 2Ne fai atu ei ki ana ofisa, “Ko Ioane te Papatiso tenei ko toetu mai te mate. Tena te pogai e 'mana ei ana galuega.”
3 #
Luka 3.19,20 Ne fai a te fakatonuga a Helota ke puke a Ioane o saisai o pei ki te fale puipui. Ne fai ne ia te mea tena o fakamalie a te loto o Helotia te avaga a tena taina ko Filipo. 4#Levi 18.16; 20.21Me i a Ioane ne fai ana pati konei ki a Helota, “E tapu a koe ma avaga ki a Helotia!” 5Ne fia tamate a Helota ki a Ioane, kae ne mataku i tino, me ne manatu latou i a Ioane ko te pelofeta.
6I te aso fanau o Helota, ne saka te tama fafine a Helotia i mua o tino ami katoa. Ko oko eiloa i te fiafia o Helota ki ei, 7tela, tauto ei Helota ki a ia, “Au e tauto me e tuku atu ne au ki a koe so se mea e manako koe ki ei!” 8Ona ko te loto o tena matua ne fai atu ei a ia ki a Helota, “Aumai nei eiloa ki a au a te ulu o Ioane te Papatiso i se tisi!” 9Ne fanoanoa te tupu i te lagonaga ne ia a te mea nei, ka ko faigata i tena muna ko to ki mua o tino ami, tela fai atu ei tena muna me ko talia tena manakoga. 10Ne 'kati te ua o Ioane i te fale puipui, 11aumai ei tena ulu i te tisi kae tuku atu ki te tamafine, ka ko te tamafine tena ne tuku atu ne ia ki tena matua. 12Ne o'mai a soko o Ioane o puke tena foitino ke ave o tanu, palele olo ei latou o taku atu ki a Iesu.
Ko Fagai ne Iesu a te Lima Afe
(Male 6.30-44; Luka 9.10-17; Ioa 6.1-14)
13I te logoga a Iesu i te tala i a Ioane, fano ei a Iesu i te poti ki te koga lavaki, o nofo i ei tokotasi. I te lagonaga ne tino i a Iesu ko fano i te poti, tiaki olotou fa'kai, kae 'tele i gauta o te kaugutu namo o fakafetaui ki a Iesu. 14I te fanatuga a Iesu mai te poti, ne lavea ne ia te vaitino ko itakitaki, tupu ake ei mo tena loto alofa ki tino, fai ei ne ia olotou masaki ke 'lei.
15Ne o'mai ona soko ki a ia i te afiafi, kae fai mai, “A te koga tenei se koga lavaki, ko pili nei o po; uga atu a tino ke olo ki fa'kai o 'togi ne meakai ma latou.” 16Ne tali atu a Iesu, “E se 'tau latou o olo keatea; tuku atu ne koutou ne meakai ma latou.” 17Ne tali mai latou ki a ia, “E lima faeloa omotou falaoa konei mo ika e luagamata.” 18Ne tali atu a Iesu, “Aumai ki a au a mea kona.” 19Ne fakatonu ne ia a te vaitino ke 'nofo ki lalo i mouku, puke ake ei a ia ki falaoa e lima mo ika e lua, ne kilo ake ki te lagi o fakafetai ki te Atua. Ne tofitofi ne ia falaoa, kae tuku atu ki ona soko ke tufatufa atu ki tino. 20Ne 'kai katoa, ko ma'kona; 'fao ake ei ne latou a tapola e sefulu lua, ko fonu i toega meakai. 21A tino ne 'kai e lima afe tagata, kae e se faitau a fafine mo tamaliki.
Ko Sasale a Iesu i Luga o te Vai
(Male 6.45-52; Ioa 6.15-21)
22Ne fai atu a Iesu ki ona soko ke 'sopo ki te poti, o 'mua atu i a ia ki te sua feitu o te namo, ke uga mua ne ia a tino ke olo. 23I te otiga ne uga ne ia a tino ke olo, ne fanake ei a ia ki te mauga o 'talo. Kae ne nofo i kona ke oko eiloa ki te afiafi. 24I te taimi tena, a te poti ko 'mao atu eiloa ki loto o te namo; ka ko logofiofio eiloa te poti ne tuki ne peau, i te matagi ko tutonu mai eiloa i te taumua. 25Kae i te vaveao, ne sasale atu a Iesu ki a latou i luga o te vai. 26I te laveaga ne ona soko a te tino e sasale i luga o te vai, ne pole'pole i te ma'taku, olotou muna, “A te mea nei se aitu.” Tela, paka'laga ei latou i te ma'taku. 27I kona foki eiloa, faipati atu ei a Iesu ki a latou, “Ke loto ma'losi koutou, sa ma'taku, me ko au eiloa tenei.” 28Kae ne tali mai a Petelu ki a ia, “Te Aliki, kafai ko koe eiloa tena, fai mai sau fakatonuga ke fanatu au ki a koe i luga o te vai.” 29Ne tali atu a Iesu, “Vau”. Tena sopo ifo ei Petelu mai luga o te poti o sasale ki a Iesu i luga o te vai. 30I te iloaga ne Petelu i te matagi ko agi malosi, tupu ake ei mo tena mataku, kamata eiloa o apulu ki lalo, kae kalaga atu penei, “Te Aliki, fakaola mai au.” 31Tela, 'kapa atu ei a te lima o Iesu o puke ki a ia, kae fai atu, “A tou fakatuanaki, ko oko eiloa i te foliki. Ai a ne fakalotolotolua ei koe?” 32Kae i te la okoga ki te poti, malū ei te matagi. 33Ka ko soko kola ne i te poti, ne tapuaki atu ki a Iesu, olotou muna, “E tonu eiloa ia koe ko te Tama a te Atua.”
Ko Fakaola ne Iesu a Tino Ma'saki i Kenesaleta
(Male 6.53-56)
34Ne olo latou ki te sua feitu o te namo, oko atu ei ki te fenua ko Kenesaleta, 35ko te koga tela e iloa 'lei eiloa ne tino a Iesu. Tela, fekau atu ei latou ki tino ma'saki i so se koga o te fenua tena, ke aumai ki a Iesu. 36Ne fakamolemole atu a tino o te fenua tena ki a ia, me e a mana tuku a tino ma'saki ke fakapa'tele ki kapakapa o tena gatu. Tela la, ko tino katoa ne fakapa'tele ki ei ne 'lei katoa olotou masaki.
Currently Selected:
MATAIO 14: Tusi Tapu
Highlight
Share
Copy
Want to have your highlights saved across all your devices? Sign up or sign in
Tuvalu Revised Bible © Bible Society in the South Pacific