مَاتِيُ 2
2
غَرٛلْ اَنْدَنْٻٜ کٛودٜ
1غَطَ يٜىٰسُ دَݧَامَ اٜ غَرِيرِ بَيْتَلَامِ ندٜرْ لٜيْدِ يَحُودِيَ، ندٜرْ شَرٜلْ نغٜلْ حِرُدُسْ لَامٛتٛ، وٛٻّٜ اَنْدَنْٻٜ کٛودٜ دَغَ فُونَ ٻٜ نغَرِ اُرُشَلِيمَ، 2اٜ ٻٜ پَمَ، «تٛيٜ اٛنْ طٛنْ دَݧَاطٛ لَامِيطٛ يَحُودَنْکٛعٜنْ؟ نغَمْ مِنْ نغِعِ حٛودٜرٜ مَاکٛ دَغَ فُونَ، مِنْ نغَرِي مِنْ مَوْنِنَمٛ؞»
3ندٜ حِرُدُسْ لَامِيطٛ نَنِ نٛنْ، اٛ وَنِّ، کَنْکٛ اٜ يِمْٻٜ اُرُشَلِيمَ طُطْٻٜ؞ 4سٜيْ اٛ نٛدِّ مَوْٻٜ اَرْدِيٻٜ دِينَ اٜ مٛودِٻّٜ اَتَّوْرَ، اٛ پَمِٻٜ، «تٛيٜ اَلْمَسِيحُ دَݧٜتٜىٰ؟»
5ٻٜ مبِعِمٛ، «ندٜرْ غَرِيرِ بَيْتَلَامِ ندٜرْ لٜيْدِ يَحُودِيَ؞ نغَمْ رَا کٛ اَنَّبِيجٛ وِنْدِ،
6‹اَمَّا، اَنْ، غَرِيٜلْ بَيْتَلَامِ غٛنْغٜلْ ندٜرْ لٜيْدِ يَحُودَ،
اَنْ اَ غَرِيٜلْ غٛودُنغٜلْ تٜدُّنغَلْ ندٜرْ لٜيْدِ ندِنْ،
نغَمْ دَغَ ندٜرْ مَاطَ غٛطّٛ لَامِيطٛ پِوٛيْتَ،
کَنْکٛ وَرْتَتَ غَيْنَاکٛ يِمْٻٜ اَمْ اِسْرَاعِيلَنْکٛعٜنْ؞› »
7سٜيْ حِرُدُسْ نٛدِّ ٻٜنْ طٛنْ اَنْدَنْٻٜ کٛودٜ اٜ سُوطٜ، اٛ پَمِٻٜ شَرٜلْ نغٜلْ ٻٜ نغِعِ حٛودٜرٜ ندٜنْ، ٻٜ مبِعِمٛکَ؞ 8سٜيْ اٛ لِلِٻٜ بَيْتَلَامِ، اٛ وِعِ، «نجَحٜىٰ طَٻِّتٛنْ ٻِنْغٜلْ نغٜلْ بٛطُّمْ؞ تٛ اٛنْ نغِعِينغٜلْ، نغَرٛنْ مبِعٛنْيَمْکَ، نغَمْ مِنْ مَا مِ يَحَ مِ مَوْنِنَنغٜلْ؞»
9-10ندٜ ٻٜ نَنِ کٛ لَامِيطٛ اٛنْ وِعِ، سٜيْ ٻٜ نَنْغِ لَاوٛلْ؞ ندٜ ٻٜ نغِعِ حٛودٜرٜ ندٜنْ، ٻٜ نَنِ بٜلْطُمْ نَاع سٜطَّ؞ حٛودٜرٜ ندٜنْ اَرْدِيٻٜ نَاکِ ندٜ دَرِ دٛوْ تٛ ٻِنْغٜلْ نغٜلْ وٛنِ؞ 11ندٜ ٻٜ نَتِّ وُرٛ نغٛنْ، ٻٜ تَوِ ٻِنْغٜلْ نغٜلْ اٜ مَرْيَامَ مَدُوجٛ مَاغٜلْ؞ ٻٜ ندِشِّ ٻٜ مَوْنِنِنغٜلْ، ندٜنْ ٻٜ ڤِتِّ دٛݝْلٜ مَٻّٜ ٻٜ کٛکِّنغٜلْ شَاحُ جِينَارِ، اٜ اُرْدٜ وٜلْندٜ بِعٜتٜىٰندٜ فِرَنْکِسٜنْ، اٜ نٜبَّمْ اُرٛوجَمْ بِعٜتٜىٰطَمْ مُرْ؞
12ندٜ اَللَّه حَطِيٻٜ ندٜرْ کٛيْطٛلْ تٛع ٻٜ شٛعّٛو تٛ حِرُدُسْ، سٜيْ ٻٜ تٛکِّ لَاوٛلْ فٜىٰرٜ ٻٜ شٛعِّ لٜيْدِ مَٻّٜ؞
دٛغُّکِ يَاکِ لٜيْدِ مَسَرْ
13غَطَ اَنْدَنْٻٜ کٛودٜ ٻٜنْ ندِلِّ، سٜيْ مَلَاعِکَاجٛ جٛومِرَاوٛ وَنْغَنِ يُسُفُ ندٜرْ کٛيْطٛلْ، وِعِمٛ، «اُمَّ کٛشَّا ٻِنْغٜلْ نغٜلْ اٜ مَدُوجٛ مَاغٜلْ ندٛغَّا نجَحَا لٜيْدِ مَسَرْ؞ نجٛوطٜىٰ تٛنْ نَا مِ وِعِيعٛنْ نغَرْتٛنْ، نغَمْ حِرُدُسْ اٜ يِطِ طَٻِّتَ ٻِنْغٜلْ نغٜلْ نغَمْ اٛ وَرَنغٜلْ؞»
14يُسُفُ اُمِّي حٛشِّ ٻِنْغٜلْ نغٜلْ اٜ مَدُوجٛ مَاغٜلْ شَکَ جٜمَّ، اٛ دِلِّ لٜيْدِ مَسَرْ؞ 15تٛنْ ٻٜ نجٛوطِ نَاکِ حِرُدُسْ مَايِ؞ نٛنْ وَطِي نغَمْ طُمْ حٜبِّنَ کٛ جٛومِرَاوٛ وِعِ دَغَ حٛنْدُکٛ اَنَّبِيجٛ مَاکٛ وِيکِ، «دَغَ لٜيْدِ مَسَرْ مِ نٛدِّ ٻِطّٛ اَمْ؞»
ٻِکّٛيْ ڤَمَرٛيْ مبَرَامَ
16ندٜ حِرُدُسْ فَامِ اَنْدَنْٻٜ کٛودٜ ٻٜنْ پٛيْرِيمٛ، سٜيْ ٻٜرْندٜ مَاکٛ مٜتِّ نَاع سٜطَّ؞ اٛ وِعِ طُمْ وَرَ ٻِکّٛيْ ڤَمَرٛيْ فُو نغٛرٛيْ نغٛودُکٛيْ دُوٻِ طِطِ يَاکِ لٜيْ نغٛنْکٛيْ ندٜرْ غَرِيٜلْ بَيْتَلَامِ اٜ حَادٜ غَرِيٜلْ نغٜلْ؞ اٛ وَطُ نٛنْ نغَمْ اَنْدَنْٻٜ کٛودٜ ٻٜنْ مبِعِمٛ اَرَنْدٜ حٛودٜرٜ ندٜنْ وَنْغَنِيٻٜ دُوٻِ طِطِ پَٻِّيطِ؞
17نٛنْ حٜبِّنِ کٛ اَللَّه وِعِ دَغَ حٛنْدُکٛ اَنَّبِ اِرْمِيَ وِيکِ،
18«طُمْ نَنِ حٛنٛنْدٜ ندٜرْ غَرِيرِ رَامَ،
بٛجِّ نَوْطِ؞
طُمْ رَحِيلَ وٛيَنْتَ ٻِٻّٜ مَاکٛ،
اٛ وَݧِ اٛ وَلْتِنَنٜىٰ ٻٜرْندٜ،
نغَمْ ٻِٻّٜ مَاکٛ مَايِ؞»
وَرْتٛيْکِ دَغَ لٜيْدِ مَسَرْ
19غَطَ حِرُدُسْ مَايِ، سٜيْ مَلَاعِکَاجٛ جٛومِرَاوٛ وَنْغَنِ يُسُفُ ندٜرْ کٛيْطٛلْ اٜ مَسَرْ، وِعِ، 20«اُمَّ کٛشَّا ٻِنْغٜلْ نغٜلْ اٜ مَدُوجٛ مَاغٜلْ شٛعّٛطَا لٜيْدِ اِسْرَاعِيلَ، نغَمْ ٻٜنْ طٛنْ طَٻُّتُٻٜ مبَرَ ٻِنْغٜلْ نغٜلْ ٻٜ مَايِ؞» 21سٜيْ يُسُفُ اُمِّي، حٛشِّ ٻِنْغٜلْ نغٜلْ اٜ مَدُوجٛ مَاغٜلْ، ٻٜ شٛعِّي لٜيْدِ اِسْرَاعِيلَ؞
22اَمَّا ندٜ اٛ نَنِ اَرْکِلَيُسْ رٛنِي جٛوطٛرْغَلْ لَامُ ݧَاکٛ مُوطُمْ حِرُدُسْ اٜ مٛ لَامٛ لٜيْدِ يَحُودِيَ، سٜيْ اٛ حُلِ يَاکِ تٛنْ؞ اَمَّا ندٜ طُمْ وَغِّنِمٛ ندٜرْ کٛيْطٛلْ، سٜيْ اٛ سٛعِّ اٛ يَحِ لٜيْدِ غَلِيلِ؞ 23اٛ يَحِ اٛ جٛوطِي ندٜرْ وٛنْدِ غَرِيرِ بِعٜتٜىٰندِ نَجَرَتْ، نغَمْ طُمْ حٜبِّنَ کٛ اَللَّه وِعِ دَغَ کٛنْدُطٜ اَنَّبٛعٜنْ وِيکِ، «طُمْ نٛدَّيْمٛ نَجَرَنْکٜىٰجٛ؞»
Currently Selected:
مَاتِيُ 2: fuv
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen-GB.png&w=128&q=75)
Want to have your highlights saved across all your devices? Sign up or sign in
© 2011, Bible League, All rights reserved.