Matayo EMANYISA
EMANYISA
Emboosi Ndai ya Yesu Kristo, koti lu Matayo yaandiika. Matayo atuboolera ati Yesu niye Omuwonia wasubiswa, yi Nasaae yabitiramo ohwooseresa abweene ebiindu byoosi bi Nasaae yali yasuubisa abaandu bae mu Ndagaano Hale. Emboosi Ndai chino, haba sichali ech'ohuba ech'Abayudaaya ba Yesu yebulwamo haandi bayamenya nabo boong'ene daawe, nae chali ech'ohuba ech'abaandu boosi.
Emboosi Ndai chino, Matayo yachandiika n'achitekeha bulai muno mu sitabo sino. Esitabo sino sichaaka neende ohwandiika ebidiira hu hwiibulwa hwa Yesu, haandi ni syemao siloondiaho ohubatiisibwa hwae, neende ohuteemwa hwae, nisyeemao syemeeda mu moni ohulomaloma hu mulimo ku yahola naali mu Galilaaya okwohuyaalira abaandu Emboosi ya Nasaae neende ohusomesa abaandu amakesi alala neende ohubawonia amalwaae kali nikabachuuna. Ebyo nibimalire ohuwa, ni Matayo amala yandiika Emboosi Ndai chino, n'alomaloma hu lukeendo lwa Yesu ohutula Galilaaya ohwiicha mu Yerusalemu, alala neende ebiindu byoosi ebyeeholeha mu juma yamaliirihayo mu bulamu bwa Yesu hu syaalo. Ejuma eyo niyo eyalimo ohusaandisibwa hwae huhiramo obubi, neende ohwiitwa hwae naabaambwa hu musalabba, haandi neende ohusiihwa hwae, neende ohusyuuha hwae.
Emboosi Ndai chino Matayo yachandiika, niyeekesa koti lu Yesu ali Omweekesa Muhunuufu oli neende obunyala bw'ohutotola bulai muno Amalako ka Nasaae haandi neende ohusomesa ebidiira hu Bwaami bwa Nasaae. Enjekesa ya Yesu mu huyirira alala, yichia niyitotola buli siindu bulai bweene. Enjekesa yino yoosi yinyala ohukabulwamo ebituundu bihuluundu bitaanu koti bino:
(1) Ohuyaala hwohu Sigulu hwali nihudiira hu biima, ebiindu bihoyera ohuholwa, ebiindu bilai bichia ohunyoolwa, haandi neende enjakamo y'abaandu bomu bwaami bwo Muukulu (Matayo 5—7).
(2) Enjekesa chidiira hu hutumwa hw'Abeeki ehumi neende babiri (Mat 10).
(3) Engaado cheekesa ebidiira hu bwaami bwo Muukulu (Mat l3).
(4) Enjekesa yidiira hu mahuluundu k'omuundu ohuba Omweeki wa Kristo (Mat l8).
(5) Enjekesa yidiira hu njakamo y'obulamu buliwo buno, neende ebidiira hu hwiicha hw'Obwaami bwo Muukulu (Mat 24—25).
Ebiri mu sitabo sino mu bwiimbikiti
l. Olunyaali neende ohwiibulwa hwa Yesu Kristo 1:1—2:23.
2. Omulimo kwa Yowaana Omubaatiisi 3:1-l2.
3. Ohubatiiswa neende ohuteemwa hwa Yesu 3:13—4:11.
4. Emirimo ki Yesu yahola mu Galilaaya mu lwichuule 4:12—18:35.
5. Ohutula Galilaaya ohuchia Yerusalemu 19:1—20:34.
6. Ejuma yimaliirihayo ya Yesu ohuba mu Yerusalemu neende ebituundu biindi bisyebodohaanie 21:1—27:66.
7. Ohusyuuha hwa Yesu neende ohweyekesa hwae eyiri abaandu naamalire ohufwa neende ohusyuuha 28:1-20.
Currently Selected:
Matayo EMANYISA: SAMIA
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen-GB.png&w=128&q=75)
Want to have your highlights saved across all your devices? Sign up or sign in
©Bible Society of Kenya, 2019
©Bible Society of Uganda, 2019