Matayo 2
2
Abakeni ohutula ebukwe
1Yesu niyamala ohwibulirwa mu Bbetilehemu sya Yudea mu ndaalo ch'Omutuki Herode, abasomi baandi, abeeka muno ebidiira hu ng'ining'ini batula Ebukwe beecha boola mu Yerusalemu nibateebaanga bati, 2“Omwaana wibuulwe ohuba omutuki w'Abayudaaya ali yena? Hubweene eng'ining'ini yae niyitulire Ebukwe, sakira hwiichire ohumwiinamira.”
3Omutuki Herode niyawulira atyo, yeyendeherera muno alala neende abaandu bomu Yerusalemu bosi. 4Herode yabuusa alala abalaamisi bahuluundu boosi, alala neende abeekesa b'Amalako boosi, mani yabateeba ati, “Mbwe Kristo achia ohwibulirwa yeena?”
5Nabo bamukobolamo bati, “Mu siko sya Bbetilehemu mu Yudea. Olwohuba nilwo lu nabbi yandiika ati:
6 #
Mik 5:2. ‘Ewe Bbetilehemu oli mu syaalo sya Yuda,
siniiwe ohiramo obudiidi mu biko bihunuufu muno mu syaalo sya Yuda daawe;
mani sakira mu ewe nimwo omuchia ohutula omweemeresi
ochia ohutuka Yisiraeli, abaandu baange.’ ”
7Mani Herode yalaanga abakeni abo mungiso yemeeda ohubeteebaho ebiha byeene bi ng'ining'ini yali niyibaboneheeremo. 8Yamala yaabatuma Bbetilehemu n'abalagira ati, “Muchie muteeberese bulai ebidiira hu mwaana oyo, mwiiche muunjekese, mani syesi njie mwiinamire.” 9Mani nibawulira batyo bachiiririra neende olukeendo lwaabwe olwo; nibali nibakeenda, haandi babona eng'ining'ini yira yi bali babweene Ebukwe; mani yabeemirira ohwoola lu yeduungeeresera abuundu yi mwaana oyo yali.
10Nibabona batyo basangaala beehoya muno! 11Nibeengira mu nyuumba eyo babona omwaana neende ng'ina Maria, basigama bamwiinamira. Baboolola emikaangi kyaabwe baamuberesa ebiyaanwa by'esaabbu, obubbaani neende amafuta k'esing'aari siingi neende “miira.” 12Nasaae yabalabulira mu silooto obutakaluhira eyiri Herode ohutusaho badiire engira yiindi eyibakalusa ewaabwe.
Ohwiiruhira Misiri
13Mani nibamala ohuwaao, Malaika w'Omwaami yabonehera Yosefu mu silooto yaamuboolera ati, “Siingira obukule omwaana neende ng'ina mwiiruhire Misiri, mube eyo ohwoola lu mweene ndahababoolere endaalo ch'ohukoboleramo: Olwohuba manyire endi Herode yeecha ohukiiya omwaana oyo naadaha ohumwiita.”
14Yosefu yabukula omwaana neende ng'ina beeruhira Misiri mu siro syeene esyo, 15#Hos 11:1.yibamala baamenya ohwoola lu Herode yafwiira. Kano kali katyo, hu mboosi yi Omwaami yalomalomera mu nabbi yoolerere yiti, “Ndahalaange omwaana waange ohutula mu Misiri.”
Ohwiitwa hw'abaana badoto
16Herode niyafumbula ati abasaacha bakesi abo bali bamuheengeere amakesi k'ohumweyibaho, yanyoolera muno, yatusa elako ly'ohwiita abaana basyaani boosi mu Bbetilehemu alala neende ebyaalo byoosi bisibiraane nasyo, ohuchaakira hu myaaka kibiri ohwiiha aasi, naaloondakana hu biha bi basaacha bakesi bala bali baboneeremo eng'ining'ini. 17Mani nilwo lu mboosi chi nabbi Yeremia yalomaloma choolererera abweene chiti, 18#Yer 31:15.“Ekono lyawuliiriha mu Rama, ohulira hw'esasaakisi liingi, Rakeeli naacherenjesa amasika hulw'abaana bae, nibihaya ohumulemya omwooyo olwohuba abaana bae boosi bali bamuweereho.”
Ohukaluha ohutula Misiri
19Herode niyamala ohufwa, malaika w'Omwaami yabonehera Yosefu mu silooto Misiri, 20yaamuboolera ati, “Siingira obukule omwaana neende ng'ina mukobole mu syaalo sya Yisiraeli olwohuba abo abali nibakiiya ohwiita omwaana bamalire ohufwa.” 21Yosefu yasiingira yaabukula omwaana neende ng'ina baakobola mu syaalo sya Yisiraeli. 22Nae Yosefu niyawulira ati Akelausi niye owakaluha hu sisaala sya Herode laatang'ene ohuba omutuki wa Yudea, yaatya muno ohukaluhayo. Nae Nasaae yaamukerakira mu silooto, mani yeseenda yachia embeka cha Galilaaya, 23#Mrk 1:24; Luk 2:39; Yow 1:45. nae niyoola eyo, yamenya mu siko silaangwa siti, Nasareeti. Ao nilwo lu bi banabbi balomaloma byoolerera biti, “Yahalaangwe Omunasareti.”
Currently Selected:
Matayo 2: SAMIA
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen-GB.png&w=128&q=75)
Want to have your highlights saved across all your devices? Sign up or sign in
©Bible Society of Kenya, 2019
©Bible Society of Uganda, 2019