2 Macabeos 12
12
Judiokunata watej qhatiykachanku
1Kay tratota ruwaytawan, Lisiasqa kuraj kamachejpaman kutiporqa. Judiokunarí jallp'ankupi watej tarporqanku. 2Jinapis, soldadokunata kamachejkunamanta wakinkuna manapuni judiokunata allinpi kawsakojta saqerqankuchu. Chay soldadokunata kamachejkunaj sutinkoqa kaymin karqa: Timoteo, Geneoj wawan Apolonio, Jerónimo, Demofón, Chiprepi kamachej Nicanor ima.
3Chay jawa, Jope llajtayojkunapis kay millayta ruwallarqankutaj: Paykuna chaypi tiyakoj judiokunata warminnintinta, wawankunatawan ima wajyarqanku wakichisqanku barcokunaman wicharinankupaj. Jope llajtayojkunaqa chayta ruwarqanku judiokunaj kawsaqenkunapis kankuman jina. 4Judiokunataj Jope llajtayojkunawan allinpi kawsakuyta munaspa, nisqankuta kasullarqanku. Chayrayku chay barcokunaman wicharillarqanku. Chaywanpis mama qocha chawpipi kashajtinku, Jopemanta runakuna barcota p'ultiykucherqanku. Chaypitaj yaqha 200 jina judiokunata wañucherqanku.
5Maypachachus Judas Macabeo llajta masinkukuna chay jina sonqo nanayta wañuchisqa kasqankuta yacharqa chaypacha, payqa chaymanta soldadonkunaman yachayta qorqa. 6Chantá Judas, soldadonkunawan ima justiciata ruwaj Dios yanapananta mañakuspa, wawqenkunata wañuchejkunata mask'aj kachaykukorqanku. Ch'isiyaytataj barco chayananku cheqata, chantá tukuy barcokunata ima ruphaykucherqanku. Jinallataj, chaypi tukuy pakakojkunata wañuracherqanku. 7Chay llajtaj punkunkuna wisq'asqa kasqanrayku, mana llajtaman yaykuyta atispa, ripullarqanku. Chaywanpis Judas watej kutiyta yuyasharqa Jope llajtapi tukuy tiyakojkunata wañuchinanpaj. 8Jinapi Judas uyarerqa Jabnia llajtayojkunapis chaypi tiyakoj judiokunawan kikillantataj ruwayta munashasqankuta. 9Chayrayku tutallan Jabnia llajtata jap'ej kachaykukorqa. Chayaspataj, barco chayananku cheqata, barconkunantinta ruphaykucherqa. Jinapi chay ninaj k'anchasqanqa Jerusalén llajtamantapacha rikukorqa, yaqha tawa chunka kinsayoj kilometromanta jina.
Arabekunawan maqanakunku
(1 Mac 5.9-68)
10Judas, soldadonkunawan ima Timoteoj contranta maqanakoj rishajtinku, Jabniamanta uj kilómetro khuskanniyojta jamusqanku. Jinapi ujllata paykunaj contrankupi arabekunamanta 5.000 jina soldadokuna, caballopi lloq'asqa 500 maqanakojkuna ima rikhurimorqanku. 11May sinch'ita maqanakorqanku judiokunawan arabekunawan. Chaywanpis Judaswan, soldadonkunawan ima Tukuyta Kamachej Diospa yanapayninwan arabekunata atiparqanku. Arabekunataj atipachikuspa, Judaswan allinyakapunankuta nerqanku, jinallataj uywakunata qonankuta, chantá tukuy imapi yanapanankuta ima. 12Judastaj repararqa chay arabekuna imallapipis yanapayta atinankuta. Chayrayku, paykunawan allinyakaporqa, arabekunataj jarankuman riporqanku.
13Chaymanta, Judasqa soldadonkunawan khuska, Caspín llajtamanñataj maqanakoj kachaykukorqa. Chay llajta sumaj perqawan muyuykuchisqa karqa, chaypi tiyakojkunataj waj suyukunamanta karqanku. 14Chay llajtapi tiyakojkuna mana ni jayk'aj llajtankoj perqankuna urmarachisqa kananta yuyarqankuchu, jinallataj ashkha mikhunankupis mana tukukapunanta. Chayrayku, Judasmanta, soldadonkunamanta ima alqochakorqanku. Diospajpis millayta rimarqanku. 15Chantá Judas, soldadonkunawan ima Tukuyta Kamachej Diosman qhaparikorqanku, imaraykuchus yuyarikorqanku Diosqa Josuéj tiemponpi Jericó llajtata ni ima armallawan phirita ruwasqanta. Chaymantataj sinch'i phiñasqa, monte animal jina perqa pataman phawaykorqanku.#Jos 6.1-20. 16Ajinata Dios munasqanrayku paykuna chay llajtata jap'erqanku. Chay p'unchaypi llajtaman yaykuspataj, may chhikata wañucherqanku. Chaynejpi uj qocha karqa ujnin kantunmantapacha ujnin kantunkama 360 metroyoj. Chay qochataj yawarwan junt'a karqa.
17Judas, soldadonkunawan ima Caspín llajtamanta riporqanku, chaymantataj Cárax llajtaman rerqanku. Chay llajtaqa Tubi chaynejpi karqa, Caspinmanta 135 kilometroyoj jina. 18Chayman chayaspataj, soldadokunata kamachej Timoteota mana tarerqankuchu, imaraykuchus chaypi tiyakoj judiokunata mana imanaytapis atispa, pay chay cheqamanta ripusqa. Jinapis, chaynejman ashkha soldadota churarqa. 19Chaymantataj, Macabeoj soldadonkunata kamachejkuna Dositeowan, Sosipatrowan ima kachaykukorqanku chay pukaraman, maypichus Timoteoj soldadonkuna kasharqanku, chayman. Chayaspataj, chaypi 10.000 soldadokunata jina wañucherqanku. 20Macabeotaj soldadonkunata t'aqa t'aqapi wakicherqa Timoteoj soldadonkunawan maqanakunankupaj. Sapa t'aqataj kamachejniyoj karqa. Timoteotajrí ripusqaña 120.000 chakipi purej soldadonkunawan, 2.500 caballopi rej soldadonkunawan ima.
21Timoteoqa Judas paywan maqanakoj qayllamushasqanta yachaspa, ñawpajta warmikunata, wawakunata ima kacharqa, tukuy q'epinkutawan ima, Carnáin nisqa cheqaman. Chay cheqaqa mana chayana jinachu karqa, ñankuna may k'ullku, qaqallataj kasqanrayku. 22Chantá Judaspa ñawpaj kaj tropan rikhurimojtinpacha, awqakunaqa sinch'i manchachikuywan jap'ichikuspa, kharkatitiyta qallarerqanku, imaraykuchus tukuy imata rikoj Dios paykunaman rikhurerqa. Chayrayku awqa soldadokunaqa kayman jaqayman ayqespa, tukuynejman ch'eqerarqanku. Ajinamanta paykunapura kikin espadankuwan t'ojsinakuspa k'irinakorqanku. 23Judastajrí mana sayk'uspa chay runa wañuchi awqakunata qhatiykorqa, chaypachataj 30.000 soldadokunata wañucherqa. 24Kikin Timoteopis Dositeoj, chantá Sosipatroj soldadonkunaj makinkupi urmarqa. Timoteotaj sumaj yuyaywan parlaspa, mañakorqa ripojta saqenallankuta. Nillarqataj sichus payta mana ripojta saqenkumanchu chayqa, paykunaj tatankuta, wawqenkuta ima, pikunachus makinpi karqanku, chaykunata mana khuyaspa wañurparichinanta. 25Chantapis mayta parlaspa, paykunata nerqa sichus ripunanta saqenkuman chayqa, jap'isqa kaj judiokunata kacharipunanta. Chayrayku Judaspa soldadonkuna Timoteota kacharipullarqanku, ayllunkukunata qhespichiyta munaspa.
26Chaymanta Judasqa Carnáin llajtaman rispa, diosa Atargatispa templonman yaykorqa. Chaypitaj 25.000 runakunaj umankuta qholuracherqa. 27Chaykunata atipaspa wañuchisqanmantataj, Judasqa soldadonkunawan pukara Efronmanñataj rerqa. Chay llajtapi Lisias, jinataj waj llajtayoj runakunapis tiyakorqanku. Chaypi, pukara perqanejpi kallpayoj waynakuna sayasharqanku, paykunataj tukuy sonqowan maqanakuspa, llajtata jark'arqanku. Chay pukara ukhupipis imaymana maquinakuna, ch'anqanapaj may chhika rumikunapis kallarqataj.
28Judasrí, soldadonkunawan ima Tukuyta Kamachej Diosmanta mañakorqanku jatun atiyninwan awqankoj kallpankuta phirinanta. Diosmanta mañakuytawantaj, paykuna llajtata jap'erqanku, chaypitaj 25.000 jina soldadokunata wañucherqanku. 29Chaymantataj Escitópolis llajtapi tiyakojkunawan maqanakoj rillarqankutaj. Chay llajtaqa Jerusalén llajtamanta 108 jina kilometropi karqa. 30Chaywanpis Escitópolis llajtapi tiyakoj judiokuna Judasman willarqanku Escitópolis llajtayojkuna paykunawan may k'acha kasqankuta, jinataj paykunata llakiykuna qhatirejtinpis yanapaykusqankuta ima. 31Chayrayku Judas, soldadonkunawan khuska chay runakunata pachis nerqanku. Chantá nillarqankutaj k'achallatapuni judiokunawan kawsakunankuta. Chay llajtamanta ripuspataj, Jerusalenman kuterqanku, pisi p'unchayllaña Semana#12.31 Semana raymi nisqa: Kay sutiyoj imaraykuchus kay raymeqa Pascua raymimanta qanchis semanamanraj ruwakoj karqa. Jinallataj chay raymeqa Pentecostés sutiyojwan rejsisqa karqa. Ex 34.22; Lv 23.15-21; Dt 16.9-11. nisqa raymipaj kashajtin.
32Semana raymi pasajtinkama, Judaswan soldadonkunawan ima Gorgiaspa contrantañataj maqanakoj rerqanku. Payqa Idumeamanta soldadokunaj kuraj kamachejnin karqa. 33Chay kutipi Gorgiasqa 3.000 chakipi purej soldadokunawan, 400 caballopi rej soldadokunawan ima maqanakoj rerqa. 34Chaypitaj iskaynin tropa sinch'ita maqanakorqanku, wakin judiokunataj wañorqanku. 35Jinapi Dositeo sutiyoj runa, pichus caballopi rej may wapu soldado, tubiano judío karqa, chay soldado millayta ruwaj Gorgiasta p'achanmanta jap'ispa, qhatatasharqa, kawsashajta jap'iyta munaspa. Chaywanpis Tracia llajtayoj uj soldado caballonpi rikhurimuspa, espadanwan Dositeoj makinta qholurparerqa. Ajinamanta Gorgiasqa Maresá llajtaman ayqerqa.
36Azariaspa soldadonkuna unaytaña maqanakusqankurayku, sayk'usqa kasharqanku. Jinapi Judasqa Tukuyta Kamachej Diosmanta mañakorqa paykunata yanapananta, chantá paykunaj kamachejnin kananta ima. 37Chaymantataj Judasqa kikin parlayninpi maqanakupaj qhaparerqa, Diosta yupaychananpajtaj takerqa ima. Chayta ruwaspataj, kaymanta jinalla Gorgiaspa soldadonkunawan maqanakoj yaykorqa. Chantá paykunata ayqecherqa.
38Chaymantataj, Judasqa tukuy soldadonkunata tantaykuspa, Adulán llajtaman rerqa. Semana tukukushajtintaj, tukuyninku Diospa ñawpaqenpi llimphuchakorqanku yachasqa kasqankuman jina. Chayllapitaj samarina p'unchaypi samarikunankupaj qhepakorqanku. 39Q'ayantintaj, Judaspa soldadonkunaqa llajta masinkoj ayankuta oqharej rerqanku, aya p'ampanaman p'ampanankupaj. 40Jinapi wañojkunaj p'achanku ukhupi Jabniamanta dioskunaj lantinkukunata tarerqanku. Judiokunaqa Diospa kamachisqanman jina chay lantikunata mana jap'ikuyta aterqankuchu. Ajinamanta sut'inchakorqa imajtinchus chaykuna wañuchisqa kasqankuta. 41Chaymantataj tukuyninku cheqan kajta ruwaj Tukuyta Kamachej Diosta yupaycharqanku, imaraykuchus paymin pakasqa kajta sut'iman orqhon. 42Jinallataj, Diosmanta mañakorqanku chay runakunaj juchankuta pampachasqata pampachananta. Chantá wapu Judasqa runakunata mayta nerqa mana juchallispa kawsanankuta, imaraykuchus paykuna kikin ñawinkuwan rikusqanku juchankurayku urmajkunata imachus pasasqanta. 43Chantaqa, 2.000 jina qolqeta tantaspa, Jerusalenman apacherqa, chaypi juchankurayku uywa ñak'asqata q'olachispa Diosman jaywanankupaj. Judas ajinata ruwaspa, k'achata allintataj ruwarqa, wañojkuna watej kawsarinankupi yuyaspa. 44Sichus Judas wañusqa soldadokuna watej kawsarinankuta mana creenmanchu karqa chayqa, wañusqakunarayku Diosmanta mañakunaqa qhasilla kanman karqa. 45Chaywanpis pay yacharqa jatun t'inka wakichisqa kasqanta Diosta qhatispa wañojkunapaj. Chayrayku Judaspa yuyasqanqa sumaj allin karqa. 46Chayrayku chay jaywanakunata ruwanankuta munarqa, wañojkunaj juchankurayku, ajinamanta Dios paykunaj juchankuta pampachananpaj.
Currently Selected:
2 Macabeos 12: DQDC
Highlight
Share
Copy
Want to have your highlights saved across all your devices? Sign up or sign in
Revisión Biblia Quechua Boliviano © Sociedad Bíblica Boliviana, 2017.