JAKARIYA 9
9
Israelwg Ceebio tulungam Pw-hwwnam
1Hadrakwg gvdangam At Swg gomcwrv
mwwdwq dvb ceekonam
hoo Damaskas nyookv doonu kob nyinam.
Hoggab At Swg vnyiqkv nyia kog aoho,
hoo Israelwg nyob mwlwg aoho kaapa paku,
2hoo hoqg gvda vrrwg Hamat ao hookam,
Taiyar hoo Sidonv bulv mwwlaq sujaqkam.
3Taiyar mwn atv ceetor nan ak pws jaqkam hoo rupam diimwr hvb paaca jaqkam,
hoo albo hunam lamta hoqg suiyu hvb mvsjaqkam.
4Hvbmabde kaato, At Sw mwnwg swwg-geenam mam asaq dvb mvtayin
hoo mwnwg huqlwngam sa-svlob pvqlwq tayin,
hoo mwnwn wmv guiyum tayin,
5Askelonv ham kaatayin, hoo bos tayin;
Gaja ngvkam mwwdwql ho biswr tayin;
Ekron ngvkam hoqg svqgwnam tuluho vbwq kumanum.
Gaja hoqg lvpw atv yuupaq tayin;
Askelon ho nyi doodwb nyikram;
6Asdod ho nyob luucw-luut nyiilungv doogw tayin,
hoo Palistiyag lvrgw nannam ngo mvpaq tayin.
7Ngo agam hoqg uiyam,
hoo exy pengko hoq kacam ngo naapaq tayin;
hoq tuluhv ngulug Pwnbo gab anyo ko boumnam ak gob nyitayin;
hoq hv Juda hog nyob ak hvb nyitayin,
hoo Ekronv Jebus nyi tulu hvb nyitayin.
8Hoo ngoqg nam dookam ngo svmcw gob mvl rao tayin,
ho hiyv kam hoqb wi-wca dvb nyilaram;
nyijab-nyiyiqbov lokta bulug aoho wkram,
hoggab ngoqg atwg vnyiq hoqgv ngo sija kaanam.
Jaiyonwg Lvpw Atv Hoodunam
9Vcjaqb hwnyir-hvmar to, Jaiyonwg nyem koa!
Vcjaqb sogoq to, Jerusalemwg nyem koa!
Kaato, noqg lvpw atv noqgab hoodu do;
mwv jvqtwngam la ywwlinam mam doog do,
yanbanv svdam aob hoodu do,
joobaqbo svdam aoho hoodu do,
10Ngo Iprayim hoqg ceriotam
hoo Jerusalem hoqg nyob panan svpuram mvpaq tayin;
hoo nyob panan illiam pvtwr tayin,
hoo mwv nyob asaqkam swrsob gootayin;
mwwg pvvb bwwl doognamv sa-svlo akwn hoqgv sa-svlo akwn nagub,
hoo Pobu hocw-hot hoqgv swcw nvg ywwtwr nagub.
11Noqgab kam, hoggab noqg lvgab ngoqg birnam uiyv doodwn,
noqg nyuum tulungam iss doomako ung hoqgv ngo toolin tayin.
12Nulug atorb cwwgw kob hookurto, svqgwl doonbo nyuum tulunga;
ngo soolo bibwq dvn ngo nam vbw tukul jikur tayin.
13Hoggab ngo Judangam ngoqg illy gob gwra tukun;
ngo Iprayim mam uppuq gob mvtkun.
Jaiyona, ngo noqg ko tuup tulungam nwqduq tayin,
Gwris nga noqg nyega ko tulungam ceeko mvdwb,
hoo nam nyob panan lyoqr orioq ak hvb nyin mvtayin.
At Sw Mwwg Nyiilungam Ywwlin Tayin
14Hoo At Sw bulug aoho daqlin tayin,
hoo mwwg uppuqkv taiyam bioqnam hvb bioqlin tayin;
Pwnbo At Sw tuuly yalam miqtayin
hoo svkog cwkeq-lemeq dooi lvgab cuml wtayin.
15Nyiit At Sw bulam ceetor tayin,
hoo bulam swwxw-lvqmin wlw hoqgv mviya tayin,
hoo nulv twwtayin, hoo roo ala twwxum bo hvb sogoq tayin,
hoo pukaq hoqgv iss biqnam hvb yugw bviywr hoqgv hijum biqlinam hvb biqlin tayin.
16Mwwg nyiingam sibin-svv acam hvb;
hoq aalam bulug Pwnbo At Sw bulam ywwtayin,
ho hun-rup lvqc cinam hvb
mwwg gvdaho bulv huutayin.
17Hoggab mwwg alnamv hwdgo koido, hoo mwv hwdgo kangam do!
Am-temiv tuudy-yaamy tulungam naleqgo hemp mvtayin,
hoo nit roo ala ho nyem nyijwrv hemp tayin.
Currently Selected:
JAKARIYA 9: NYISBSI
Highlight
Share
Copy
Want to have your highlights saved across all your devices? Sign up or sign in
Nyishi Bible - DVRWQ PVVB
Copyright © 2015 by The Bible Society of India
Used by permission. All rights reserved worldwide.