HAGGAI 2
2
Dvrwqbo Namlog Yuudynam
1Pool bar kvn urag camnyi leq lookin aalho, At Swg gomcwrv nyiqry kaanbo Haggai alaqho haanum. 2“Judag nyiit rad, Siltiyal ko tuup Jerubbabelnvn, hoo nyub but, Jehojadakg ko tuup Josuanvn hoo boumnam nyi mwlwngam sija agam goonv, hoo bedo, 3‘Wleqnam tulu, soq nam soqg otuq hoq yuunam mam nulug pengko hoqgv kaanbo yv? Sija nulv sam hoggub kaadku? Soq si noqg vnyiq kaagaho hog hvvtw kuma i? 4Hvbsujaqkam Jerubbabela ator to, At Sw bibwqdo. Nyub but, Jehojadak ko tuup Josuanga, ator to. At Sw bedo, nyookwg nyi mwlwngv ator to. Nyiit At Sw bedo, bonam nyito, hoggab ngo nulug lvgab doodwn, 5hwdlo nulv Ijipt hoqgv leng yikho ngoqg nulug lvgab pvvb birnam hvbjaq nyidwn. Bos maabv. Ngoqg yalv nulug pengko ho doodwn. 6Hoggab soq sib nyiit At Sw bedo: Hvbsujaqkam lokta, oyu maadab, doangam, hoo swcwngam hoo sa-svlongam hoo pwtw bo kedam, ngo hwqdin tayin 7Hoo ngo nyob nyi mwlwngam hwqdin tayin, ho nyob nyi mwlwg gumn uddumv urab haatayin, hoo ngo soq nam sam yuunam lvgab bwwr mvtayin, nyiit At Sw bedo. 8Rupv ngoqgv, hoo hunv ngoqgv, nyiit At Sw bedo. 9Kokwngam soq nam soqg yuudynamv otuqg ham koi yaatayin, nyiit At Sw bedo. Hoo soq nyook so ngo swrsongam jitayin, nyiit At Sw bibwqdo.’”
Nyiburnam Nyi ak Gab Lvqc tulu
10Vnyw nywnyi gola pool kiyag camnyi leq loopy aal gob Darius swwdul dooi yikho, At Swg gomcwrv nyiqry kaanbo Haggainvn haanum. 11“Soq sib nyiit At Sw bedo: Nyub tulungam pvvb pagoqkam taka do: 12‘Nyi akgon mwwg vj jekap ho dvrwqbo vdinam baqab nyiloqkam hoo tiqnam wtw ho xoomnu nam ho opo ho kuty ho dvs gotwq bol mvlyaq bvnyilo hv dvrwq tan yv?’” Nyub tulungv birwql benum, “Ma.” 13Hoo Haggai benum, “Hiyv nyi akgon kac tvl svmangam gvbw bvnyiloqkam, hoqhv kac dvn yv?” Nyub tulungv birwql hoo benum, “Hoqhv kac dvn.” 14Hoo Haggai birwql hoo benum, “Hoq hvbkalam soq nyi tulug lvgab, hoo ngoqg aga soq nyoodo nyi lvgab, hoo bulug alaq lvgab hog luuxy bonam nyinamv kac dvn, At Sw bedo. Hoo hoggv bulv jidwn hvvkam kac dvn. 15Hoo sija soq aal soqgv jaq mwwka to. At Swg dvrwqbo namlo gab wlw aoho wlw pwg tvp maatab, 16hoggub no hiqtkun? Hwdlo nyi ak camnyi go paal apnam mam xitaab haanum, hvbmabde hoqho camg dootwqnam. Hwdlo nyi ak camng opo pwcw hoqgv suqtab haanum, hvbmabde hoqho camnyi go dootwqnam. 17Ngo nam jwwtabnum hoo noqg hentwr henl vly-axeq mwlwngam swwm dvb duqnam mam ngo dooi lvgab hoo tapin puunam hoo nyodo taa lvgab mvnam, hvbsujaqkam no ngoqg dookub hookur maanam, At Sw bibwqdo. 18Soq aal soqgv jaq mwwka to, pool kiyag camnyi leq loopy aal soqgv. At Swg dvrwqbo namlo gwwlam diirab yuk aal jaq hoqgv mwwka to: 19Vly liisv noosu ho doodwn? Vv, roo ngv, taoq svvnv, annar aaxiv hoo olib svvnv hog akkam aaxy xeekma. Hvbmabde soq aal soqgv ngo nulam lvqc citayin.”
Jerubbabelnvn Morx-Lvqc Akub Xuqnam
20Poolwg camnyi leq loopy aalho At Swg gomcwrv Haggainvn lwnyi dvb haanum, 21“Judag nyiit rad, Jerubbabelnvn hvl beto, ngo doangam la swcw sam hwqdin tandwn, 22hoo lvpw tulug pwqlw dootam mam mvpaq tan. Ngo nyob nyi tulug lvpw atoram twrm tadwn, hoo ceriot ngamla bulam wgbo tulungam mvpaq tan. Hoo svpur tulungv la bulam wgbo tulungv yuupaq tan, nyi vxiv mwwg borwg lyoqr orioq hoqgv mengmin sutayin. 23Nyiit At Sw bibwqdo, hoq aalam, ngo nam naatayin, Siltiyalwg ko tuup ngam kanam tanbo Jerubbabela, At Sw bibwqdo, hoo nam ngo lvqcwg lvqc ak hvb mvpwn, hoggab ngo nam xuqpa kun, nyiit At Sw bibwqdo.”
Currently Selected:
HAGGAI 2: NYISBSI
Highlight
Share
Copy
Want to have your highlights saved across all your devices? Sign up or sign in
Nyishi Bible - DVRWQ PVVB
Copyright © 2015 by The Bible Society of India
Used by permission. All rights reserved worldwide.