Marko 16
16
Yeesso omoot lakasookahcha
(Mattaayo 28:1-8, Luuka 24:1-12, Yoohana 20:1-10)
1Inkoo Seeri Lanaso kute ka Maariyati ilkerengeetti Magdaala ichoow Maariyati abar Yaakoobee ichoow Saloome miricchihoo weyti uyuuge soogateen, sar Yeesso kasubhaanee. 2Ibeenki oraate teebataas ka, uus orrahe sookorte kaheene, goꞌddi Yeesso lakahawwaale ibaheen. 3“Ayyo ꞌdee daddaabti goꞌd af lakorche inno iꞌdembeleeliya?” iche isworsateen.
4Iꞌdaasenyi chiꞌicho serey yeyeen ka, daddaabti laꞌdembeleeliye argeen chiꞌiche buurtahe laka. 5Chiꞌicho goꞌd geleen ka, eti nugule anki miigeet fiddiyo darfohi daddakhan khabo argeene, naheen.
6Ulla wihi us iyidah, “Anahina! Yeessohi Naasarete goorat massalaaba lakakaahe iche yowattaan. Omoot a kasookahe, inta ma kijiro! Meessi icho kareecheen yeya. 7Iꞌdaasenyi nyaama, abattitiis ichoow Beetero mehe itadeehiin ya, ‘Yeesso ortiinna ili Gaalilaaya irta. Iꞌdi goorat us atin iyidah u, intaakka a agartaan.’ ”
8Oboorri hamar kayimiyye girmeeste, goꞌd kabahe, firde. Etoo kalday laka ma icheekin, a mehe roorro khabeen.
Chiirnaanneti Yeedi Waakhe uumacchee Marko 16:9-20 ma khabto.
Yeesso Maariya Magdaala isoobaha
(Mattaayo 28:9-10, Yoohana 20:11-18)
9Ibeenki oraate teebataase us omoot kasookahe ka, kolooraat Maariyati ilkerengeetti Magdaala goorat us ginna teeba kabahche isoobahe. 10Iche la iratte, ꞌdooꞌdi goorat Yeesso leejire icheekte. Icho la a wihi uuwwicho ooyo. 11Chirri icho saggi Yeesso inoolyahe ichoow saggi iche iagarte daageen ka, rummeysawwaayeen.
Yeesso ꞌdooꞌdoo lammeenye usu raaho isoobaha
(Luuka 24:13-35)
12Waha ꞌdubicho ka, Yeesso uummankoo yeere ka ꞌdooꞌdoo lammeenye ilkerengeet khariis raaho isoobahe. 13Chiꞌiche eti us yahe kasse ka, nokhatte, ti addan icheekte, iꞌdaasenyi iche laka ma rummeysan.
Yeesso abattiti tomon ichoow koowe isoobaha
(Mattaayo 28:16-20, Luuka 24:36-49, Yoohana 20:19-23)
14Yomboka golossataani Yeesso ichehi tomon ichoow koowe isoobahe. Jeenteti icho kakhuufnaanki icho usu kakhuufaan ikhabin ichoow matahmiigti icho wori ꞌdooꞌdi inkoo us omoot kasookahe arge irummeysan u, leejaakhe.
15Wihi us icho iyidah, “Nyaama harra tuumman taba, Wori Haaggan la ꞌdooꞌdi Waakh soouume tuumman icheeka. 16Eti rummeesti toro labaattissiyo, a lariba. Iꞌdaasenyi eti irummeysan Waakh uskeel a igoocha. 17ꞌDooꞌdi rummeesti wahanyeyyoha miigti Waakh tuso a yeela. Antohi magaheey ka ginna enenyet a kabahcha, afi us idaagin laka kayeyyeeda. 18Toof laka dahan a kakhabta, toro chuꞌus hadaadohi uskul yabhuub laka ma gaameeraan iꞌdaaru laka. ꞌDooꞌdi khakkhannan dahano on korcha, ꞌdooꞌd samaata.”
Yeesso serey liikahcha
(Luuka 24:50-53)
19Inkoo Yeessohi Kamure icho leeyeede ka goobi Waakh liikorche, Waakh anki dahantiisti miigeet orronte. 20Abatti ꞌdeerka bahte Wori Haaggan meel tuumman ka cheekte. Kamur la icho hil leehaaggiche, yeedicho ichoow wahanyeyyohi miigti Waakh tuso sooraahe ka, yeedi icho cheekeen rummaache.
Currently Selected:
Marko 16: rel
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.