Marko 13
13
Yeesso saggi minki Waakhe buure liisuujaacho cheeka
(Mattaayo 24:1-2, Luuka 21:5-6)
1Chirra us minki Waakhe buure kabaho, abattitiis koo wihi us yidah, “Eti ween, haaggi minassa ichoow daddaabohi burbuurenye lakadise, yey!”
2Yeesso wihi us ilaabe, “Minassa tuummane burbuure yeya! Berri daddaabtoo kaldaye ti addan fuusso lakatabo mele. Icho tuumman a lasookhuba.”
Wahanyeyyohi miigti Waakh tuso ibeenneti ꞌdaꞌddaboot tuso
(Mattaayo 24:3-14, Luuka 21:7-19)
3Chirra Yeesso Hali Geeyohi Oolife minki Waakhe buure yeyo koorronte ka Beetero ichoow Yaakoobo ichoow Yoohana ichoow Andereeya la iyimaateene dagsi ka usu wohoo worsateen, 4“Nah isoocheek wahanyeyyoha maantoh yateehiin? Toro mehe yateehe ꞌdee saggi dowwanoha ka waha tuumman liisoobuuhicho tusa?”
5Yeesso la wihi us iyidah, “Yuubsada, uus etoo kalday laka atin ekkeysan! 6ꞌDooꞌdi ittaawenye ani iskaayyeelo yamiite, ‘An a Ki Lasubhe’ essi, a agartaane, ꞌdooꞌdi ittaawenye ekkeestaan la. 7Maanti atin yaafohi isdiho ichoow worassi ibuuhine dihoyyoot daagteen, anahina. Wahanyeyyoha a sooyateehiine, iꞌdaasenyi ibeenki yomboot uliba a ankhanyahe on. 8Sirgaalle a isdihta, karnato laka isdihaan. Ilassi ittaawe ka harra sesseehta, nabhayye laka tamiit. Wahaas a chiis birriissa on.
9“Atin rubeytiin laka yuubsada. Jaldaabohi Yaꞌhuude atin liidiiba, minassi weysiite Yaꞌhuud ka atin lajaha. Jeenteteey u, gaafanayyo ichoow karnatte atin liigeecha atin liicheekta, atin la garti Wori Haaggan tateehiin. 10Wihi Waakh gooche, koloo Wori Haaggane ꞌdooꞌdi harra tuumman liicheeka. 11Maambaaw atin lakhabte dahanohicho atin lagesse, orey on wihi atin sootadeehiin akawaꞌdwaaꞌdina. Wihi chirraas atin lasiiche on daha. A mehe atin mee yeyyeeddaan, iꞌdaasenyi Rubeyti Munyeenye yeyyeedda.
12“Etoo walaaliissa ꞌdub goocha dahanohi nahab gessa ꞌdee layagiis. Ooyo laka weeliis iꞌdaas yeela. Nyaakhut ꞌdooꞌdi dele yeedicho ꞌdiiꞌda, dahanohi ꞌdooꞌdoo addan gessaane ꞌdee layagiis. 13Enenyet tuumman a atin ꞌdiiꞌda jeenteti atin abattiteey itahiin u. Iꞌdaasenyi, eti garrahsate ichoowka sinata ꞌdubiche eleele a lariba.
Iyookkoti laꞌdiiꞌdo minki Waakhe buure lagessa
(Mattaayo 24:15-28, Luuka 21:20-24)
14“Maanti atin ‘iyookkoti weyti biꞌdirenye ꞌdooꞌd keehisso’ inti ikamalin katolosso agarteen,#13:14 Daaniyel 9:27, 11:31, 12:11. ꞌdooꞌdi ili Yaꞌhuudiya fiddiyo tuumman halal a ifirdo. Atihi yeeda soonto yeeda a kigelo. 15Eti minkiis sartiis fuulo uus min geline wohoo rucchul laka khaatin. 16Eti gos goya kijiro, uus nokhanne kabuuꞌdiis sookhaatan. 17Ibeennetaas sinati deyyehoti nuugsatti ichoow ti huleesenye nyaamitto iubaaꞌdan sugto enenna a buure. 18Waakh waho, uus maanassaas sinayyoot, maanti il weyti roffo yahe hir ꞌdeyo eheynan. 19A mehe sinati maantaas jirto, ti geeddaase uus uumaccho ka Waakh harra soouume ma laargine, ichoow uliba. Toro wihi iꞌdicheenye lasooargo ba ma jiraan, jirtuu tuumman. 20Chiꞌ Kamur ibeennetaas igaabin, etoo kalday laka ma sooꞌhado. Iꞌdaasenyi iroonoti ꞌdooꞌdiiski us soobahsatuu, ibeennetaas a gaabiche. 21Maantaas chiꞌ etoo, ‘Yeya, Ki Lasubhe kalla,’ ommos, ‘Yeya Kuulla!’ kiyidah, arummeysan. 22A mehe ꞌdooꞌdoo Ki Lasubhe iskaayyeelo ichoow ꞌdooꞌdi ꞌdooꞌdi Waákh íyeyyeedo iskaayyeelo a soobaha. Icho la wahanyeyyohi ittaawenye nane miigti Waakh tuso ichoow girmo yeelaane, ꞌdee chiꞌiche tateeh ꞌdooꞌdi Waakh soobahsate ekkeestaan. 23Isyaakhicha giꞌde! Walah dakkhan geeddi il ankhayyahe a atin isoocheekee.
Soonokhan Ínam Aadam
(Mattaayo 24:29-31, Luuka 21:25-28)
24“Iꞌdaasenyi maanassaas sinayyohaas buure kuteen,
“ ‘orrahe a daayatta,
yeyyah la banayhiis ma soobahcho,
25yiyyihimo serey a kasookhubtaane,
miigti saraat la lakorkokicha.’#13:25 Isaaya 13:10, 34:4.
26“Maantaas Ínam Aadam usuhi mirso goyaka yamiite, miig ichoow antohi buure khabo weeli enenyet tuumman a arga. 27Herti Waakh harra ꞌdollohiche affarcho ierga, ꞌdooꞌdi Waakh soobahsate harra ꞌdubiche ichoow sereyta daayan ꞌdubiche kasoobaayissa.
Wihi geeyi fiig soonokhan Kiriisto inno abcho
(Mattaayo 24:32-35, Luuka 21:29-33)
28“Taba geeyi fiig yeeda kaabda. Uuꞌ liikhimohiis ulhawtaane seeb bahchaan, saggi ꞌdaato isoodowwaatte a garattaan. 29Saggaas on u maanti atin wahanyeyyoha ibeenki ꞌdaꞌddaboot tuso agarteen, saggi soonokhantiis isoodowwaatte kola ititah a garattaan! 30Rume atin icheeka, ꞌdooꞌdi iꞌdee ma tuumo ichoowka wahanyeyyoha tuumman yateehiin. 31Sereyta daayan ichoow harra a kutaane, iꞌdaasenyi yeedasseey jirtuu tuumman ma kutaan.
Maan ichoow sahaꞌddi wahanyeyyoha yateehiin ma lagarti
(Mattaayo 24:36-44)
32“Aabbaheey on menye, et maantaas ommos sahaꞌddaas garti mele. Herti Waakhe goobi Waakh fiddiito ommos Ínam Aadam laka ma gartaan. 33Taba isyaakhicha! Toorribda! Ibeenki sahaꞌddaas tateeh ma garattaanee. 34Waha iyookkoka, a iꞌdi etoo sulhaal irti. Minkiis katabo, bowꞌdayyohiis anto siicho, kooba hili us haaggicho ikatabo, eti arit fiddiyo la amuri us meel yaakhicho ibahcho.
35“Maantaka toorribda, a mehe sahaꞌddi ooyohi goob leh soonokhti ma garattaanee. Usu geleb ommos naanokho ommos geeddi lukki kariiro ommos baryo yamiit ma garattaan. 36Chuꞌus dog laan yamiit, uus atinhi uꞌdurtaan atin ꞌhelin. 37Wihi ani atin iadeeh an enenyet tuummane iadeehe, ‘Taba isyaakhicha!’”
Currently Selected:
Marko 13: rel
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.