Marko 12
12
Mammahti ꞌdooꞌdi sussuujenye gos kireeste
(Mattaayo 21:33-46, Luuka 20:9-19)
1Yeesso ꞌdeerka makhaaballetaas mammah ka wihi us iyidah, “Etoo geeyohi sabiibe gosiis goyaka il gesse. Gos ootti dagaheet kamarche, lunki gurnaanki sabiib lakayabti khute. Koondihi deere eti gos yaakhicho fiddiyo, laka dise. ꞌDeerka gosiis lakireeste, ulla iloo deer sulhaal kiirte. 2Maanti gurnaan lagurti ka, eti gos leh ilbooyiiskoo ꞌdooꞌdi gos kireeste iergate, gisi gurnaankiiski sabiib yowte. 3Iꞌdaasenyi ꞌdooꞌdi gos kireeste, ilbooy a khabte one, jahe, dahano marah sooꞌdiiche. 4Toro ilbooyoo addan icho iergate. Kan matah guꞌddeene, lakhaanyo kadoween. 5Koo addan ergate, kaas yigaaseen. Too addane ittaawe laka ergate, icho la gaasoo jaheene, gaasoo laka yigaaseen.
6“Etoo kaldaye us ergati ꞌhade, a inankoo, ki us weyti ꞌdoone. ꞌDaꞌddaboka inankiis ergate. ‘ꞌDee inankeey a inkaanyitta one,’ iche essa.
7“Iꞌdaasenyi ꞌdooꞌdi gos kireeste mehe isiyidah ya, ‘Ki dahal leh kalla. Kaaleya a nigaase ꞌdee dahalhiis weheen a yitaaheen.’ 8ꞌDeerka khabteene, yigaaseene, gosi sabiib khariis iseyeen.
9“Kamalda bal, eti gosi sabiib leh ꞌdeerka mehe yeela? A yamiite ꞌdooꞌdaas yagiise, ꞌdee gos ꞌdooꞌdoo addan gessa. 10Atin injire waha Chiirnaanneti Waakh ka ma soomin a?
“ ‘Daakki ꞌdooꞌdi minan diso ꞌdiiꞌde,
iche tirrinki dagaheete min tiiro yitah.
11Kamure waha yeele,
indoheen ka la weyti haagganyahiin!’ ”#12:11 Sabuur 118:22-23.
12ꞌDeerka weynaanti Yaꞌhuud jiti iche Yeesso kakhabatti yowatte, a mehe saggi us mammahtaas ka woricho ikaayyeede iche garteen. Iꞌdaasenyi urure karooraane, ꞌdeerka katabte iratte.
Farissaayo Yeesso kooddi Kaaysar a igunna worsatta
(Mattaayo 22:15-22, Luuka 20:20-26)
13Farissaayotoo ichoow ꞌdooꞌd ꞌHerood koo Yeesso iergateen angeye gelin ꞌdoonta yeediis ka. 14ꞌDooꞌd Yeesso iyimiyye, wihi us iyidah, “Eti ween, nah saggi at rum ikanokhan a garanna. At et at ibaasso mele, weyneetteey ichoow kuus ka ba. Iꞌdaasenyi jiti Waakhe at enenyet abisso ichoow runti Waakh a israahaan. Kaaysarhi weene kooddi liiguto a mujjum a bal mujjum mee? 15A igunna bal ma igunno?”
Iꞌdaasenyi Yeesso saggi icho isikaayyeelaan garte, wihi us worsate, “Atin a iꞌdoh ani angey igelin iꞌdoontaan? Bal chilinkoo Rooma ikeena, a argo.” 16Chilinkoo liikeene. Chirraakka wihi uꞌ worsate, “Foola ichoow magaha kachiiran, a keyya?”
Wihi icho ilaabeen, “A koo Kaaysar.”
17Yeesso chirraakka iiyeyye, “Kaaysar, wihi wihiise iguta, Waakh la wihi wihiise iguta.”
ꞌDooꞌd usu weyti kagirmeeste.
Sadukaayo wori omootti lakasookaho worsatta
(Mattaayo 22:23-33, Luuka 20:27-40)
18ꞌDeerka ꞌdooꞌdoo Sadukaayo Yeesso iyimiyye wohoo worsate. ꞌDooꞌda la ꞌdooꞌdi tuume berri ma sookaho iche essa. 19“Eti ween, Muusa goorat mehe inno ichiire ya, ‘Chiꞌ etoo walaaliis yumuyye, makhaabál katabe iꞌdaasenyi nyaakhut ikhabin, etaas makhaabassaas a disti, walaaliis nyaakhut a idelo.’ 20Reeroo teebeenye isleedesse a jire. Ki ween min diste nyaakhut ma ꞌheline, buje. 21Ki lammaatteet muunkhotaas diste, iꞌdaasenyi nyaakhut ma ꞌheline, buje. Ki seyyahnaatteet laka iꞌdaas on eheneet. 22Teebaccho ba, koo nyaakhut katabe mele. ꞌDaꞌddaboka makhaabale laka tumuy. 23Maanti ꞌdooꞌdi tuume lasookahcho, etichekoh makhaabassiis tateeh teebaccho la a disteenee?”
24Yeesso wihi us ilaabe, “Atin wihi Chiirnaanneti Waakh enenyet abisso ichoow miigti Waakh ma garattaan. Jeenteta menya jiti baabule ikijirtaan? 25Maanti ꞌdooꞌdi tuume sookaho, min ma distaane ommos mindischo ka ma ladiibo. Icho tuumman iꞌdi herti Waakhe goobi Waakh kijirto yateehiin. 26Atin wori ꞌdooꞌdi tuume omoot lakasookahcho miinsan ma soomin a? Rumanka buuggi Muusa chiire ka wori geeyi hidaad goyaka bolkho a agarteen. Wihi Waakh iyidah, ‘Ani a Waakh Aburaaham, a Waakh Isakh, a Waakh Yaakoobo.’ 27Usu Waakkhi ꞌdooꞌdi tuume mee, iꞌdaasenyi a Waakkhi ꞌdooꞌdi jiro. Atin weyti khufteen, atinhi ꞌdooꞌdi tuume kol us toro isookahin koogtihiin.”
Amuri amurre tuumman kussan
(Mattaayo 22:34-40, Luuka 10:25-28)
28Etoo la a tagaanki amurre yimiyye wihi icho kahawwoochaan daage. Saggi Yeesso yeed ieysiiche arge, wihi us Yeesso worsate, “Amurreti Waakh tuumman goyaka, koh weyti khumman?”
29“Ki wihi addan tuumman kuto a kan,” Yeesso iyidah, “ ‘Daaga, yaafohi Issiraayeloow! Kamureenki Waakhe a Kamuroo kalday on. 30Kamuri Waakkhaahe uuraah tuumman ka ichoow rubeytaah tuumman ka ichoow malaah tuumman ka ichoow miigtaah tuumman ka ꞌdoon.’ 31Ki lammaatteet la a kan, ‘Ollokkaah geeddi at isꞌdoonto ꞌdoon.’ #12:31 Laawi 19:18. Amuri amurreta kussan, ma jiro.”
32Et wihi us soolaabe, “Eti weenoow a eysiisse. Wihi at tidah ka at a eysiisse, Waakkheen a koo kalday one, koo addan ma jiro, usu on menye. 33Kamuri Waakkhaahe uuraah tuumman ka ichoow garanti at walah garatti tuumman ka ichoow miigtaah tuumman ka ꞌdoon. Ichoow ollokkaah geeddi at isꞌdoonto, ꞌdoon. ꞌDooninta naffi tuum Waakh liigubo ichoow soorriyo tuumman a kutta.”
34Yeesso saggi makhaabal yeedi khara isoolaabe arge, wihi us iyidah, “At dakhi Waakh kadeeraan mele.” Uus maantaas la et usu wohoo addan worsan iggo mele.
Ki Lasubhe a hiiy Dawuudhi karnat eheneet a?
(Mattaayo 22:41-46, Luuka 20:41-44)
35Geedda Yeesso uranti minki Waakhe buure ka Yeedi Waakh enenyet abcho, wihi us worsate, “A iꞌdoh tagaammeti amurre, Ki Lasubhe a hiiy Dawuud ielatta? 36Dawuud rubeytiis Rubeyti Munyee ka yeyyeedaayi mehe yidah ya,
“ ‘Waakkhi Kamure wihi us Kamureey iyidah,
Dabankeeyki miigeete antoot orrommo,
ichoowka chiiytaah tuum dahanohaah a soogesso.’#12:36 Sabuur 110:1.
37Dawuud rubeytiis usu Kamure kawaha, saggoh ꞌdeerka Ki Lasubhe hiiy Dawuud iyahe?”
Urur tuumman hamaadi buure ka dagansate.
Yeesso ꞌdooꞌd tagaammeti amurre yuubsada iyadeeh
38Yeesso urur walah abchaayi wihi us iyidah, “Tagaammeti amurre yuubsada! Wihi icho weyti ꞌdoonaan a ichohi darfohi hahhaaggane derdeer leesohti, toro la sokkoyyo ka weyti inkaanyit ka labariiticho. 39Toro la chiꞌ minki weysiite Yaꞌhuud ommos sukuukuyyo lagele, wihi icho weyti ꞌdoonaan a ichohi meessi weyti lakiinkaanyito orronti. 40ꞌDooꞌda muunkhoyyo ekkeesta, hoolahicho kakhaataan. Chiꞌiche weysatti la, enenyeti haaggane iskaayyeessa, weysi derdeeraassa. ꞌDooꞌda Waakh sinati weyti kutto igoocha.”
Sadakhati makhaabassoo muunkhee bihisse
(Luuka 21:1-4)
41Yeesso minki Waakhe buure ka inti sadakha lakachibo hagga orronte, enenyeti chilimme saanduukhi chilimme lakalugꞌdo kichibo ꞌdeyꞌdooche. ꞌDooꞌdi ittaawenye kamurree, chilimmeti buure meel kichibe. 42Iꞌdaasenyi makhaabassoo muunkheenye miskiine timiyye, chilim lamma wohoo rucchul laka ibihin meel kaluguꞌdde.
43Yeesso abattitiis isiwahe, wihi us iyidah, “Rume atin icheeka, muunkhota miskiine, iche saanduukhi chilimme lakachibo, ꞌdooꞌdi addan ꞌdirihiis wihi buure kaluguꞌdde. 44Kamurre tuumman kamurroonkiche ka sadakhatoore bihisse, iꞌdaasenyi iche miskiinkiche ka wihi iche kanoossahe tuummane bihisse.”
Currently Selected:
Marko 12: rel
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.