Luuka 4
4
Seytaan Yeesso kaja
(Mattaayo 4:1-11, Marko 1:12-13)
1Yeesso usuhi Rubeyti Munyee buuhisse hawti Yoordane ꞌdusso kasoonokhte, Rubeyti Munyee la woyte hidaad geesse. 2Seytaan la hidaad ka ibeen tomon affar Yeesso kajmeti uskeel kaluguꞌddo ikeene, ulla ibeennetaas tuumman ma golossanne, ꞌdaꞌddaboka ankaye.
3Seytaan la wihi us Yeesso iyidah, “Chirri at Weeli Waakh tahe, daakka leeyeede makaate a yitaahe.”
4Yeesso wihi us ilaabe, “Chiirnaanneti Waakh wihi kachiiran, ‘Weeli enenyet golol kalday mee kanoolyahe!’ ”#4:4 Deewutoronomi 8:3.
5Seytaan toro Yeesso intoo deer iwoye, koloo kalday on yaafohi harra tuumman tuse. 6Seytaan la wihi us Yeesso iyidah, “Anto ichoow kamurroonki yaafoha tuumman a kisiicha. Iꞌdi tahe ani liisiiche, eti an siin ꞌdoono la ani on siicha. 7ꞌDeerka chirri at iwahatte waha tuumman wahaahha yateehiin.”
8Yeesso wihi us ilaabe “Wihi chiiran, ‘Kamuri Waakkhaahe waho, toro la usu kalday on ihil!’#4:8 Deewutoronomi 6:13. ”
9Seytaan toro Yeesso ilkerengeetti weene Yeerusaleem iwoye, minki Waakhe buure guutiis korche, wihi us iyidah, “Chirri at Weeli Waakh tahe, inta kanyaam. 10Iꞌdi tahe Chiirnaanneti Waakh wihi kachiiran,
“ ‘Waakh hertiis amure ibahcha,
iche la mujjum kiyaakhissa.
11Iche la dahanohiche ka serey kiokkhissa,
uus ꞌdee luhtaah dagah guꞌddine.’ ”#4:11 Sabuur 91:1, 12.
12Yeesso wihi us ilaabe, “Chiirnaanneti Waakh mehe tadeeh ya, ‘Kamuri Waakkhaahe kajme agelin.’ ”#4:12 Deewutoronomi 6:16. 13Inkoo Seytaan Yeesso kajmeta uskeel kaluguꞌddo tuumman kakaje ka, katabe ibeenki leemujjume leesuge.
Yeesso boroofenhi Gaalilaaya ka hiliis sooumha
(Mattaayo 4:12-17, Marko 1:14-15)
14Yeesso miigti Rubeyti Munyee siisse khabaayi, boroofenhi Gaalilaaya inokhte. Wor Yeesso la harrataas tuumman kataaꞌhe. 15Ulla minassi weysiite Yaꞌhuud ka ꞌdooꞌd wori Waakh abche, ꞌdooꞌdi daage tuumman la Yeesso saaꞌde.
Yeesso ilkerengeetti us kasooweynaate ka laꞌdiiꞌda
(Mattaayo 13:53-58, Marko 6:1-6)
16Yeesso ilkerengeetti Naasarete lakasooweynaache inokhte. Seeri Lanaso ka iꞌdi orrangateet u minki weysiite Yaꞌhuud irte. Ulla tolossate Yeedi Waakhe ꞌdooꞌd isoomaa. 17Khadaaboo yuubane etoo Waákh íyeyyeedo Isaaya layadeeh chiire liidiibe. Ulla khadaab furfure, inti waha kachiiranyahiin ꞌhele.
18“Rubeyti Kamur a ileejirta,
iꞌdi tahe usu a isubhe
ꞌdee Wori Haaggan miskiino icheeka.
Kamur a isooergate, ꞌdee ꞌdooꞌdi uskeel hide saggi Kamur isoofuro icheeka,
ꞌdooꞌdi indo laa la Kamur indo a fura,
ꞌdooꞌdi sina lakawaaricho la Kamur sina a kabahcha.
19A isooergate ꞌdee guꞌhi Kamur haaggiis ꞌdooꞌd tuso icheeka.”#4:19 Isaaya 61:1-2.
20Yeesso ꞌdeerka inkoo us waha soome ka, khadaab yuube, ilbooyi minki weysiit idiibe, orronte. ꞌDooꞌdi minki weysiit goya kajire tuumman la Yeesso indo katoolliche. 21Yeesso la wihi us ꞌdooꞌd iyidah, “Chiirnaanneta Waakhe toolla an soome atin daagteen maalinka a labuuhiche.”
22ꞌDooꞌd tuumman haaggiis kaayyeede toro yeeda haaggane afiis kasoobahe kagirmeeste, wihi icho isworsateen, “Waha inam Yuussuf menya?”
23Yeesso la wihi us ꞌdooꞌd ilaabe, “Rumanka mammahta a isoocheektaan, ‘Ilkitarri issamaay! Wihi weeli enenyet yeelin iubaaꞌdane nah daagne at ilkerengeetti Kafarnaaꞌhum ka yeesse, ilkerengeettiin ka yeel.’ ”
24Wihi addane us yidah “Rume atin icheeka, et Waákh íyeyyeedo goobicho ka lakhaatti mele. 25Rumanka maanti eti Waakh íyeyyeedo Eliiya layadeeh jire, muunkhoyyohi ittaawe ili Issiraayel a kijireen. Maanassaas guꞌh seyyah ichoow nyuus tuumman hir ili Issiraayel ma ꞌdeyine, abaarti uskul harra tuumman gesse. 26Waakh Eliiya icho ma iergine, iꞌdaasenyi makhaabassoo muunkheenye ilkerengeetti Sarefaate boroofenhi Siidon kijirto taal iche ierge. 27Maanti goorat eti Waákh íyeyyeedo Eliicha layadeeh jire laka, ꞌdooꞌdi ittaawenye ili Issiraayel ka buꞌdá sar kakhabo a jire. Iꞌdaasenyi Waakh kichekoo kaldach laka ma samaanne, eti kaldache us samaache, a etoo ili Siiriya kayimiyye magahiis Naaman layadeeh.”
28ꞌDooꞌdi kootte minki weysiit goya kajiro tuumman chirri us waha daage ka, weyti hollowe. 29Kaheene, Yeesso jiiteene, hali ilkerengeete kadisantahe tahariis geecheen, usu ankhar gaataanee. 30Iꞌdaasenyi urur goya iskaguꞌdde katabe.
Yeesso etoo ginna dakhatti ginna kabahcha
(Marko 1:21-28)
31Yeesso ꞌdeerka ilkerengeetti Kafarnaaꞌhume boroofenhi Gaalilaaya kajirto ikhubte, Seeri Lanaso ka enenyet Yeedi Waakh abin sookhabte. 32Icho la saggi us ꞌdooꞌd walah iabcho kagirmeesteen. A mehe woriis anto khaba. 33Etoo ginnatoo uskul dakhatti la chirraas minki weysiite Yaꞌhuude goya kijira. Ulla weyti riire, 34“Wooy! Yeessohi Naasaret, nah katab!” yidah. “Nahe nah massin timiy? Ani alah eti at tahe a garda, at a Ki Munyeenye Waakh kayimiy,” yidah.
35Yeesso ginna leejaakhe, “Gammadiche etaas goya kasoobah!” iyidah. Ginna ꞌdeerka ꞌdooꞌd tuumman ortiis ka et lagaꞌdde, iꞌd addane iche tidah mele, et kasoobahte.
36ꞌDooꞌd tuumman girmeeste wihi us isiyidah, “Ayta weyti a girma. A yeedi anto ichoow miig khabo, a mehe ginnayyo amur on ibahcha, icho la soobahaan.” 37Wori usu miinsan la ilassaas soodow tuumman kataaꞌhe.
Yeesso ꞌdooꞌdi buure samaacha
(Mattaayo 8:14-17, Marko 1:29-34)
38Yeesso minki weysiit kabahe min Siimon irte. Seyyoh Siimon la sare weyti kululaatta, Yeesso gargaar daaheen. 39Ulla kagulguubsate, sarti kululaatti leejaakhe lakabukkhe. Chirraas on sookahte, icho goollin sookhabatte.
40Chirra orrahe dihto, ꞌdooꞌdi khakkhannane sugeerreti yeerare khabo tuumman Yeesso liikeene. Yeesso la kooba dahano korche samaache. 41Ginnayyo ꞌdooꞌdi ittaawe goya kabaheen ichohi riiro, “Ati Weeli Waakhe” essi. Iꞌdaasenyi Yeesso ginnayyo leejaakhe, amuri icho kaayyeedaan la tirte. Iꞌdi tahe saggi us Ki Lasubhe iyahe a gartaan.
Yeesso Yeedi Waakh minassi weysiit ka cheeka
(Marko 1:35-39)
42Baryo ka Yeesso inti enenyet ikajirin irte. ꞌDooꞌd la usu yowta, chirri icho inti us kijiro yimaateen ka, usuhi icho katabo tirteen. 43Iꞌdaasenyi wihi us ꞌdooꞌd iyidah, “Wihi Waakh gooche, an a irda ilkerengeetohi addan ka laka Wori Haaggane dakhi Waakh miinsan ꞌdooꞌd icheeka. Iꞌdi tahe wahaase ani liisooergate.” 44Ulla ili Yaꞌhuud ka minassi weysiite Yaꞌhuud ka Yeedi Waakh cheeke.
Currently Selected:
Luuka 4: rel
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.