Luuka 11
11
Yeesso saggi liiweesti ꞌdooꞌd abcha
(Mattaayo 6:9-13, 7:7-11)
1Maantoo Yeesso intoo ka a weesta. Inkoo us weysi massiche ka etoo abattitiise wihi us iyidah, “Kamur saggi liiweesti nah abi iꞌdi goorat Yoohana laka abattitiis iabchuu.”
2Yeesso la wihi us icho iyidah, “Geedda atin weysattaan waha daha,
“ ‘Aabbahaanyaaw,#11:2 Aabbahaanyaaw. Chiirnaanne gaasoo mehe tadeeh ya, “Aabbaheenyoki serey jiro.”
magahaahki munyee a liinkaanyito, #11:2 Chiirnaanne gaasoo mehe kakhayte ya, “Harrata ka in at ꞌdoonto a layeelo, saggi goobaah ka in at ꞌdoonto liiyeeluu.”
at ba enenyet tuumman dakhatta.
3Gololeenyoki maan dakkhan nah sii.
4Uskeeleenyo nah ikakut,
iꞌdi nah laka ꞌdooꞌdi uskeel nah iyeele uskeel ikakunnuu.#11:4 ꞌDooꞌdi uskeel nah iyeele uskeel ikakunnuu. Afi Giriig ka Chiirnaanka mehe yadeeh ya, “ꞌDooꞌdi mog nah kakhabo mog ikakunnuu.”
Toro la kajmeti uskeel nah kaluguꞌddo nah kajeyi.’ ”#11:4 Chiirnaanne gaasoo mehe kakhayte ya, “Seytaanki uskeel leh nah karib.”
5Wihi us icho iyidah, “Eemba etiinkoo maanta minki aaliiskoo naanokho irayye, ‘Aalaaw, etoo aaleeyenye sulhaal isohti toolla minkeey yimiyye, 6gololi an siicho la ma khabo, makaate seyyahtoo an siicho isii,’ iyidah?
7“Eemba eti min goya kijiro, ‘Nyaam, sina iikawaarinne, afaf a hidayyihiine, ani ichoow nyaakhuteey ba a uꞌdurra, sag an isookaho an walah kisiicho mele,’ kiyidah. 8Wihi an atin icheeko, chirri eta isookahine jeenteti us aaliis iyahuu golol isiin laka, jeenteti us kansi isiinne us daah ikaꞌharin u, a geeddi us sookaho wihi us ꞌdoono siicho.
9“ꞌDeerka wihi an atin iadeeh, Waakh wihi at ꞌdoonto daddaahe, a kisiicho. Wihi at ꞌdoonto Waakh kayoyyowo, a kaꞌhessaa. Waakh arit ifah idahe, ulla a kifaho. 10Iꞌdi tahe eti tuummane walah daahe, Waakh wihi us daahe a siicha, ki walah yowti la, Waakh a kaꞌhela, ki ifaha yidah la, Waakh arit a ifaha.
11“Atinhi ooyenyee, etiinkoh chirri weeliis bahag daahe toof siicha? #11:11 Chiirnaanne gaasoo inta ka mehe kakhayte ya, “Weeliis makaate daahe, dagah siicha.” 12Ommos chirri weeliis ukkah daahe arraar siicha? 13Chirri atinhi uskeel leh ba nyaakhutiin siinti haaggan siissaan, Aabbahiinki serey jiro la geeddoo meheenye ꞌdooꞌdi usu Rubeyti Munyee daahe siicha!”
Yeesso ichoow Seytaanki Beelsebuul lakawaho
(Mattaayo 12:22-30, Marko 3:20-27)
14Yeesso maantoo etoo ginnatoo af tirto, iche kabahche. Chirri ginna et kabahte ka, et yeyyeede urur la girmeeste. 15Iꞌdaasenyi gaasichokoo mehe yidaaheen ya, “Miigti Beelsebuulhi karnati ginnayyootenye enenyet ginna kabahcha.” 16Gaasoo wohoo miigti Waakh tuso goobi Waakh kayimiyye icho daaheen ka ichohi Yeesso angey geesso ꞌdoonaan.
17Yeesso wihi icho kamassaan garte wihi us icho iyidah, “Yaafbaaw seley goote isdihto, a baabaata, minki seley gowe isdiho a baaba. 18Chirri Seytaan seley goggowe isinokhte dakhiis saggoh orey ikasohta? Jeenteti an iꞌda iadeeh, a jeenteti atin an miig Beelsebuule ginnayyo kabahcha ielattaan. 19Chirri maanta an miig Beelsebuul ka ginnayyo enenyet kabahcho, ꞌdooꞌdi atin raaho la miig eyya ginnayyo kabahcha? Icho ꞌdeerka atin hukkuma. 20Iꞌdaasenyi chirri an farri Waakh ka ginnayyo bahcho, waha saggi dakhi Waakh goytiin iyimiyye tusaan.”
21“Chirri etoo miige birtiis dakkhan khaatte minkiis toorribo, meehiis et ꞌdaaro mele. 22Iꞌdaasenyi chirri etoo usú kamiige usu dihe usu kahataate la, etaas usú kamiige birti eti min leh kakhuufo ichoow meehiis a khaata, ꞌdooꞌd gisa.
23“Eti tuummane ani ileejirin, a itirrima. Eti igargaarine walah ileesooholin a ileefida.
Soonokhanti ginna enenyet isoonokhatti
(Mattaayo 12:43-45)
24“Maanti ginna etoo goya kabahte, ginnata a iratta, ili daarenye bicche laa dah kagoossa. Fur yowatta, iꞌdaasenyi fur ma ꞌhesso. ꞌDeerka wihi iche tadeeh, ‘Fureeyki an kasootabe inokhda.’ 25Maanti iche tamiit furi harane lamujjummooche ꞌhessa. 26Ginnataas ꞌdeerka a iratta, ginna teeba addane iche laka kasuuje sookhaatta etaas goya gelaane, fur yeessaan. Etaas la jirotiis, ti goorat oraat a kaꞌdarsatta.”
27Yeesso yeyyeedaayi, makhaabassoo urur goyaka sooyeedde wihi iche Yeesso itidah, “Waakh rumanka abarti kidesse toro kinuugsatte a imaale!”
28Yeesso wihi us ilaabe, “ꞌDooꞌdi rumanka Waakh imaalo, a ki Yeedi Waakh daago toro la raaho.”
ꞌDooꞌd wihi weeli enenyet yeelin iubaaꞌdan marma
(Mattaayo 12:38-42)
29Geedda urur buuraati Yeesso wihi us yidah, “ꞌDooꞌdi iꞌdee a ꞌdooꞌdi uskeel leh! Icho wahanyeyyohi miigti Waakh tuso daahaan. Iꞌdaasenyi wihi goorat Waakh Yoona ka enenyet tuse on menye, walah addane lasiicho mele. 30A mehe Yoona goorat ilkerengeetti Ninaawi ka saggi Waakh isooergate iche ꞌdooꞌd tuse. Iꞌdaasu la Ínam Aadam laka wihi isoobaho saggi Waakh usu isooerge iche ꞌdooꞌdi iꞌdee tusaan. 31Ibeenki Waakh ꞌdooꞌd hukkumo la makhaabassi karnatenye ili Cheeba a kahta ꞌdooꞌdi iꞌdee uskeel igoossa. A mehe iche goorat harra ginꞌdohicheeda katimiyye kharati karnati Soolomon layadeeh khabe dagansatte, toolla la etoo Soolomon laka kaween kallaay. 32Ibeenki Waakh ꞌdooꞌd hukkumo, ꞌdooꞌdi ili Ninaawi a tolossata ꞌdooꞌdi iꞌdee cheekta. Iꞌdi tahe icho maanti Yoona Yeedi Waakh icheeke, uskeelicho a kasoonokhteene, toro la etoo Yoona kaween kalla atin leejira.
Yeesso wihi us ꞌdooꞌd abcho banay iokkanaacha
(Mattaayo 5:15, 6:22-23)
33“Et taa bolkhicho inti lakadagcho ommos baakhuul iliis gesso mele. Taa a labolkhicha kombor lakorcha, ꞌdee ꞌdooꞌdi min soogelo il kaarga. 34Issaah iꞌdi taa u sartaah banaye ikeenta. Chirri indohaah haagganyahiin, sartaah tuumman laka banaye buuha. Iꞌdaasenyi chirri indohaah suujyahiin, sartaah tuumman a mugꞌdi. 35Tab giꞌde banayhi at khabto uus icho mugꞌdi itaahan. 36Maantaka chirri sartaah tuumman banay buuhaane intoo rucchul laka mugꞌdi ikajirin, sartaah dakkhan a bildiikhta gon, iꞌdi chirra banayhi taa kabolkhaan u.”
Yeesso Farissaayo ichoow tagaammeti amurre cheekta
(Mattaayo 23:1-6, Marko 12:38-40)
37Chirri Yeesso yeed massiche ka etoo Farissaayee minkiis ka golol iwahe. Yeesso ꞌdeerka min gele komborti ballaaddane lakagolossati garabiche ka dikkil kareeye. 38Iꞌdaasenyi eti Farissaayo chirri us Yeessohi geeddi us igolossan dahano idikhan arge ka weyti girmeeste.
39Kamur ꞌdeerka wihi us iyidah, “Atinha Farissaayo, kokkoob ichoow baakhuul khariissa dikhtaane, iꞌdaasenyi uuriin goya ꞌdamaam ichoow suujoone buuha. 40ꞌDalammeey! Waakkhi sartiinti addan haaggiche on menya goya laka haaggiche? 41Iꞌdaasenyi gololi baakhuul goya kijiro miskiin siicha ꞌdee walah tuumman ka biꞌdir a bahtaanee.
42“Atinhi Farissaayee sinati atin sugto eenna a buure! A mehe atin geeyohi golol haaggicho iꞌdi maanta nyaayka ichoow imboogayyohi fil ittaawe ka Kamur gisi tomonnaatteet a ibihissaan. Iꞌdaasenyi ꞌdooꞌdi jiti fissan ka lahukkumo ichoow ꞌdooninti Waakh a ꞌdiisseen. Wihi atin lakaꞌdoono a atinhi Kamur gisi tomonnaatteet ibihissaan, iꞌdaasenyi wahanyeyyohi weyti khumman aꞌdiinna.
43“Atinhi Farissaayee, sinati atin sugto eenna a buure. A mehe minassi weysiite Yaꞌhuud ka komborohi weynaaneete ꞌdoontaane, toro la atinhi sokkoyyo ka inkaanyit ka atin labariiticho ꞌdoontaan.
44“Sinati atin sugto eenna a buure. A mehe atin a iꞌdi hawwaalohi dagah ikhabine, enenyet igaranne sarchooda on yabti.”
45Tagaankoo amurree wihi us Yeesso ilaabe, “Eti ween, chirri at waha elatti at nah laka a nah leeabaarranta alah!”
46Yeesso wihi us ilaabe, “Atinhi tagaammeti amurree, sinati atin sugto eenna a buure! Atin huleesi enenyet iubaaꞌdane enenyet karartaane, atin rubeytiin la far ma okkhissaane enenyet ma leekhabattaan.
47“Sinati atin sugto eenna a buure, a mehe atine goꞌddassi enenyet lakahawwaalo ꞌdooꞌdi Waákh íyeyyeedo idissaan, aacchinyetiinna la ꞌdooꞌdi Waákh íyeyyeedo bakkisse. 48Atin ꞌdeerka aacchinyetiin wihi iche yeesse a ayyissaane gar a laabtaan. Icho ꞌdooꞌdi Waákh íyeyyeedo a bakkicheene, atin la hawwaalohicho disseen. 49Jeentetaas u wihi Waakh kharatiis ka essi kallaayo, ‘ꞌDooꞌdi Waákh íyeyyeedo ichoow ergaano a ierga, icho la gaasoo a yagiisiin, gaasoo laka sina omhichaan.’ 50Maantaka Waakh ꞌdooꞌdi iꞌdee a hukkuma jeenteti diiggi ꞌdooꞌdi Waákh íyeyyeedo uꞌ goorat Waakh harra soouume lakhubuu. 51Uus ogoos Aabel kasookhabatti ichoowka ogoos Sakkariiyahi chalagti hoola lakasoorriyoocho ichoow minki Waakhe buure dahcho lakayigis eleessa. ꞌDooꞌdi iꞌdee la wahaas tuummane lakahukkuma.
52“Atinhi tagaammeti amurree, sinati atin sugto eenna a buure! Atin ꞌdooꞌd jiti us Waakh kaabti a kadagisseen. Atin rubeytiin jitaas ma raahtaane, ꞌdooꞌdi addan la usuhi jitaas tabo a jeyisseen.”
53Inkoo Yeesso intaas katabe ka tagaammeti amurre ichoow Farissaayo ba Yeesso weyti tirrimeene toro bolokh ka Yeesso wihi buure worsateen. 54Icho la saggoo icho Yeesso yeed ka iꞌhelaane icho ikhabtaane ꞌholaan.
Currently Selected:
Luuka 11: rel
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.