Māa̍ti̍u̍ 3
3
Chɔ᷄ŋ Wānā Yi̍ŋāa̍ dīmi̍ sūɛ̍i̍ Mɛ̄lɛ̄kɛ̍i̍
(Ma̍kī 1:1-8; Lu̍kū 3:1-18; Chɔ᷄ŋ 1:19-28)
1Wɔ̄sīlā ti᷄ŋ hīōūwɔ̄ɔ̍, mi̍ wānā pi᷅lɛ̍ wā wāŋnda̍ sūɛ̍i̍ Mɛ̄lɛ̄kɛ̍i̍ dīmūllo̍ o̍ po̍llo̍ ni᷄ŋ o̍ lɛ̄ŋndē Chūdi̍a̍āle̍ŋ ni᷄ŋ. Dīōlā ndɔ̄la̍ŋ la̍ wa̍ ni̍ āā, Chɔ᷄ŋ Wānā Yi̍ŋāa̍. 2Mbo̍ dīmūl wāŋnda̍ āā, “Lā ma᷄l yɔ̄ŋndā nyāla̍ wɔ̍ɔ̍ŋnda̍ŋ. Kāni̍ fu̍u̍le̍, te̍le̍ŋ Mɛ̄lɛ̄ka̍ chō wā māsāa̍ wāŋnda̍ chōo̍ wo̍ chō ni᷅ŋ kpɛ̍ɛ̍lūŋ.” 3Ndu̍yɛ̍, Chɔ᷄ŋ ndo̍ ho̍ō, mi̍ wāna̍ su̍a̍ā le̍ Mɛ̄lɛ̄ka̍ wo̍ Āīsa̍yā o̍ di̍mī a̍ ndu̍ o̍kɔ̄ɔ̄ sīndɛ̄. Nyɛ̄ Āīsa̍yā di̍mi̍ ko̍ŋ ndo̍ ndu̍ cho̍ ho̍ō ni̍ āā,
“Wāŋndo̍ chō yōndāa̍ o̍ po̍llo̍ ni᷄ŋ. Ō chō dīmīo̍o̍ āā,
‘Lā tōōsi̍a̍a̍ nɛ̍īyo̍ Māsānɔ̄ɔ̍ Mɛ̄lɛ̄ka̍ lāchī.
Lā tōōsi̍a̍a̍ ndu̍ mbō wa̍ nyɛ̄ kɛ̄ndɛ̄ sa̍kpō.’ ”
4Wānɔ᷄ŋ Chɔ᷄ŋ Wānā Yi̍ŋāa̍ wānu̍ŋ ndo̍, nyɛ̄lā ndu̍ o̍o̍ wo̍u̍nūŋ nda̍ŋ a̍ yīīŋīī nyɔ̍mi̍a̍a̍ la̍ wa̍ lā tōōsīāā ni̍. Yāu̍le̍ yāu̍ vīsīo̍o̍ ndu̍ o̍o̍ yi̍i̍nūŋ ni̍. Ndu̍yɛ̍, nyɛ̄ ndɔ̄ di̍a̍a̍ ndu̍ wa̍ so̍o̍nu̍a̍a̍ a̍ līa̍a̍ŋ ni̍. 5A̍ bōōndi̍i̍ Chɔ᷄ŋ wa̍ wāŋnda̍ sūɛ̍i̍ Mɛ̄lɛ̄kɛ̍i̍ dīmūllo̍ ve̍, mi̍ wāŋnda̍ cha᷄ŋ Chūlu̍sɛ̄lɛ̄m, ma̍ cha᷄ŋ o̍ lɛ̄ŋndē Chūdi̍a̍āle̍ŋ ni᷄ŋ kpo̍u̍, a̍ tānda̍ ba̍lu̍ Pīo̍o̍ Chɔ̍ɔ̍dāŋ ndo̍. Ma̍ hūŋ nāa̍ Chɔ᷄ŋ chu̍a̍. 6Mɛ̄ɛ̍ nda̍ chɔ̄ɔ̄mu̍u̍ yɔ̄ŋndā ndāla̍ wɔ̍ɔ̍ŋnda̍ŋ, mbo̍ yīŋ nda̍ yīŋɔ̄ɔ̍ Mɛ̄lɛ̄ka̍a̍ Chɔ̍ɔ̍dāŋ o̍ pēēlo̍.
7O̍ ko̍ŋ kɔ̍ɔ̍lī, mi̍ ku̍ndā Fālīsi̍īya̍ a̍ ku̍ndā Sādūsi̍īya̍ ā hūŋ cha̍po̍ nāa̍ Chɔ᷄ŋ chu̍a̍ le̍ mbō yīŋ nda̍ yīŋɔ̄ɔ̍ Mɛ̄lɛ̄ka̍a̍. Mɛ̄ɛ̍ Chɔ᷄ŋ che᷅ nda̍, mbo̍ lō lo̍ŋ mbo̍ dīmūl nda̍ āā, “Lā wɔ̄u̍. Lā chō kɛ̄ūwāā bɛ̄ndū. Nɛ̄ɛ̍nɛ̍ di̍mu̍l lɛ̄ nya̍ māā nyɛ̄ pālāā Mɛ̄lɛ̄ka̍ tūsī ni̍ŋ ndo̍ chō nya̍ bīōndɔ̄ɔ̄? 8Lā tōsa̍ wɔ̍ fɛ̍lɛ̍ŋ ka̍ālā chɔ᷅m māā lā ma᷄l yɔ̄ŋndā nyāla̍ wɔ̍ɔ̍ŋnda̍ŋ nda̍ŋ. 9Lā yi̍ya᷄ŋ kpo̍so̍ŋ o̍ kɔ̄ltā nyāla̍ŋ ni᷄ŋ mī lā dīmi̍ āā, ‘Na̍a̍ na̍a̍ chūāūwāā E̍bīlāha᷅mnda̍ na̍a̍ ŋ̄ chō ni̍, le̍la̍ŋ nu̍a̍ā ni̍’ le̍. Mī I̍ di̍mu̍l nya̍, pōūta̍ŋ nda᷅ŋ bɛ̍ɛ̍ Mɛ̄lɛ̄ka̍ nɔ̄lā mbō sīīŋgu̍u̍ la̍ŋ chūāūwa̍ le̍ E̍bīlāha᷅m.” 10Mi̍ Chɔ᷄ŋ lo᷅ o̍ ko̍ŋ mbo̍ dīmūl nda̍ o̍ lētāle̍ ni᷄ŋ āā, “Yɔ̄m o̍ yɔ᷄m ku̍m ko̍mɔ̄ɔ̄ kɛ̄ndɛ̄ le̍, ā chō ndu̍ kīo̍ŋ. Chūe̍i̍ chō ni᷅ŋ ī hēēlāā le̍ ndi̍ kīo̍ŋndo̍. Ā kēŋ pɛ̍, ā dɔ̄ū o̍ yīŋ.” 11Mi̍ Chɔ᷄ŋ di̍mī āā, “Ya̍ ya̍ I̍ cho̍ nya̍ yīŋɔ̄ɔ̄ yīŋɔ̄ɔ̍ Mɛ̄lɛ̄ka̍a̍ o̍ mɛ̄ŋnda̍ŋ ni᷄ŋ, le̍ chɔ̄mndo̍ māā lā ma᷄l yɔ̄ŋndā nyāla̍ wɔ̍ɔ̍ŋnda̍ŋ. Kɛ̍ ndu̍yɛ̍, tē I̍ fa̍ŋa̍ŋ pɛ̍, wānā cho̍ hūnɔ̄ɔ̄ ya̍ kɔ̄ɔ̄lī ō hīōū ya̍ po̍lo̍ŋ. I̍ cho̍ o̍ sɔ᷅vɛ̍ mī wa̍ bɛ̍ɛ̍ wa᷅na̍ ndɔ̄ bi̍yāā lā kɔ̄ɔ̄vɛ̄i̍ le̍. Wānā ko̍ŋ, ndu̍ cho̍ nya̍ hūnɔ̄ɔ̄ pūlɔ̄ɔ̄ a̍ Nyi̍na̍ Mɛ̄lɛ̄ka̍a̍ ni̍ a̍ yīŋnde̍ŋ. 12Ō chō hūnɔ̄ɔ̄ wānāā wɔ̄ɔ̍ŋnda̍ sōlī wānāā kɛ̄ndīa̍a̍ tɛ̄ɛ̄ŋ. Ō chō ni᷅ŋ bɛ̍ɛ̍ o̍ bɛ̍ɛ̍ndīa̍ŋ le̍ he̍ī tōsāa̍. Ndu̍yɛ̍, ī chō yɔ̄nɔ᷄ŋ mɛ̄ɛ̍ wāŋndo̍ tōsā nu̍a̍ā a̍ tɔ̄lɔ̄ɔ̍ yɛ̍. Tē ō nɛ̄i̍ pɛ̍, ō hɛ̄i̍. Tɔ̄lɔ̄ɔ̍ kpe̍e̍kpe̍i̍yo̍ ndu̍, ō hēēlu̍ o̍ kāā. Tɛ̄fɛ̍la̍ŋ ki̍nɛ̍i̍ a̍ fu̍e̍ēŋnde̍, ō chu̍a̍ ō lōm. Le̍nde̍ i̍ cho̍ hūnɔ̄ɔ̄ yɔ̄nɔ᷄ŋ a̍ wānāā wɔ̄ɔ̍ŋnda̍ o̍ yīŋnde̍ nyu᷅m kpo̍so̍ŋ te̍ le̍ŋ ni᷄ŋ ni̍.”
Ā yīŋɔ̄ɔ̍ Chi̍i̍sōo̍ o̍kɔ̄ɔ̄
(Ma̍kī 1:9-11; Lu̍kū 3:21-22)
13O̍ ko̍ŋ kɔ̍ɔ̍lī, mi̍ Chi̍i̍sū cha̍ŋ lɛ᷅ŋndē Kāli̍līle̍ŋ mbo̍ hūŋ Chɔ̍ɔ̍dāŋ nāa̍ Chɔ᷄ŋ chu̍a̍ le̍ mī yīŋ ndu̍ yīŋɔ̄ɔ̍ Mɛ̄lɛ̄ka̍a̍. 14Kɛ̍, mɛ̄ɛ̍ o̍ hi᷅ŋ, mi̍ Chɔ᷄ŋ wa᷅ kīɔ̍ɔ̍ le̍ ndu̍ pūlɔ̄ɔ̍. Mi̍ Chɔ᷄ŋ di̍mūl ndu̍ āā, “Nu᷄m nɔ̍ mā yīŋ ya̍ wo̍, ā mīī hūnɔ̄ɔ̄ nāa̍ ya̍ chu̍a̍ le̍ yīŋɔ̄ɔ̍?”
15Mi̍ Chi̍i̍sū mu̍lī āā, “Ī yɔ̄nu̍ŋ ni̍ko̍ mɛ̄ɛ̍ ya̍ I̍ di̍mi̍ yɛ̍. Kāni̍ fo̍ndōle̍, tē ī yɔ̄nu̍ŋ le̍nde̍ pɛ̍, mɛ̄ɛ̍ ya̍ ni̍, nūm ni̍, mɛ̄ɛ̍ nyɛ̄ Mɛ̄lɛ̄ka̍ hɛ̄na̍ŋ na̍a̍ mī ŋ̄ tōsa̍ wo̍, mɛ̄ɛ̍ ndu̍ kpe̍e̍kpe̍i̍ na̍a̍ ŋ̄ chō ko̍ŋ to̍sāa̍ ni̍.”
O̍ ko̍ŋ kɔ̍ɔ̍lī, mi̍ Chɔ᷄ŋ chɛ᷅l le̍ ndu̍ yīŋɔ̄ɔ̍.
16Mɛ̄ɛ̍ Chɔ᷄ŋ pu̍lū Chi̍i̍sū, dīmīo̍o̍ nu̍a̍ā āā Chi̍i̍sū fu̍la̍ o̍ mɛ̄ŋnda̍ŋ ni᷄ŋ mbo̍ hēl o̍ kɔ̄ŋgɔ̍, mi̍ ha̍la̍a̍ kūmbi᷄ŋ. Mi̍ Chi̍i̍sū cha᷅ mi̍ Nyi̍na̍ Mɛ̄lɛ̄ka̍a̍ tūāl o̍ īka᷅ŋgbo̍. 17Mi̍ dīōmndo̍ sūāā o̍ fo̍nda᷄ŋ Mɛ̄lɛ̄ka̍a̍ āā, “Po̍ nūu̍ cho̍ ho̍ō ni̍. I̍ ka̍a̍la̍ ndu̍. Ndu̍yɛ̍, I̍ hi̍ni̍ kɔ̄l a̍ ndu̍.”
Currently Selected:
Māa̍ti̍u̍ 3: YM
Highlight
Share
Copy
Want to have your highlights saved across all your devices? Sign up or sign in
Kisi Bible © Bible Society in Liberia, 2015.