Māa̍ti̍u̍ 22
22
Tālo̍o̍ a̍ nyɛ̄ dīāā bɔ̄ŋa᷅ŋ nɔ̄ kɛ̍sīa̍a̍ o̍kɔ̄ɔ̄
(Lu̍kū 14:15-24)
1Mi̍ Chi̍i̍sū pɛ̍ɛ̍kū vɛ̄lɛ̄ wāŋnda̍ o̍ tāle̍la̍ŋ ni᷄ŋ. Mbo̍ dīmī āā, 2“Māsāle̍ Mɛ̄lɛ̄ka̍le̍ŋ lē chō māchūāā mɛ̄ɛ̍ i̍ yɔ̍nu̍ŋ o̍ tālo̍o̍ ho̍ō ni᷄ŋ yɛ̍. Māsā pi᷅lɛ̍ wa̍ ni̍, mi̍ po̍ ndɔ̄ɔ̍ wā la̍nɔ̍ɔ̍ chūa̍a̍. Le̍ he̍ī, mbo̍ tōōsīāā nyɛ̄ dīa̍a̍ ta̍u̍ ta̍u̍. 3Chīīyo̍ nyɛ̄ dīa̍a̍ tōōsīa̍a̍, mbo̍ vīām bu̍ɛ̍i̍yāā ndūa̍a̍ le̍ mā kɔ̍ di̍mūl wānāā o̍ ve̍e̍lu̍ o̍ nyɛ̄ dīa̍a̍ ho̍ō wa̍ le̍ mā kūɛ̄ ni̍ko̍. Kɛ̍, mi̍ wāŋnda̍ ha̍ā kɛ̄ɛ̄ le̍ kɔ̄la̍ŋ. 4Mi̍ māsāa̍ ho̍ō vīām bu̍ɛ̍i̍yāā ndūāā che᷅le̍ŋ a̍ yōōŋgōo̍ āā, ‘Lā kɔ̍ di̍mūl wānāā ya̍ ve̍e̍lu̍ o̍ nyɛ̄ dīa̍a̍ wa̍ māā I̍ di̍ī nāūvāā nīa̍a̍, mi̍ nyɛ̄ o̍ nyɛ̄ chūū bɛ̄ɛ̄ndīāā. Le̍la̍ŋ ā hu᷄ŋ ni̍ko̍ o̍ nyɛ̄ dīāā nɔ̄ kɛ̍sīa̍a̍ ho̍ō.’ 5Kɛ̍, wāŋnda̍ ha̍ā ā ku̍e̍ ve̍e̍lū māsāa̍ ho̍ō le̍. Mi̍ ō pīlɔ̍ɔ̄ kūānu᷄ŋ bɛ̍ɛ̍ o̍ chīɛ̄ī ndūɛ̍i̍ ni᷄ŋ. Mi̍ ho̍ō ndu̍ ku̍a̍nu᷄ŋ na̍a̍ ndūāā pi̍sīa̍a̍. 6Mi̍ ā tūa̍a̍ mūli᷄ŋ ma̍ bīī bu̍ɛ̍i̍yāā māsāa̍ ho̍ō ma̍ tōsā sɔ̄ɔ̍ŋ dɛ̍nɛ̍ wɔ̄ɔ̍ŋndo̍ŋ a̍ nda̍, o̍ ko̍ŋ kɔ̍ɔ̍lī, ma̍ dīū nda̍. 7O̍ ko̍ŋ, mi̍ māsāa̍ ho̍ō dūāūnu᷄ŋ tu̍mbe̍ ta̍u̍ ta̍u̍. Mbo̍ lō o̍ ko̍ŋ, mbo̍ vīām so̍vɛ̄i̍ya̍a̍ ndūa̍a̍ ma̍ kɔ̍ di̍ū wānāa̍ di̍u̍ ka̍ŋ bu̍ɛ̍i̍yāā ndūa̍a̍ wa̍. O̍ ko̍ŋ kɔ̍ɔ̍lī, mi̍ so̍vɛ̄i̍ya̍ māl chi̍e̍e̍ ndā ko̍ŋ o̍ yīŋ ma̍ lūām ndu̍. 8Mi̍ māsāa̍ ho̍ō vēēlū bu̍ɛ̍i̍yāā ndūa̍a̍ ā pīli̍a̍a̍. Mbo̍ dīmūl nda̍ āā, ‘Nyɛ̄ dīāā bɔ̄ŋa᷅ŋ nɔ̄ɔ̍ chūū tōōsīāā. Kɛ̍ ndu̍yɛ̍, wānāā ya̍ ve̍e̍lu̍ wa̍ ki̍nɛ̍i̍ nda̍ a̍a̍ bɛ̍nda̍ le̍ mā sɔ̄la̍ vēēlū le̍. 9Le̍la̍ŋ, lā kɔ̍ o̍ bɛ̍ɛ̄la̍ŋ mī lā vēēlu̍ wānā o̍ wāna̍ nya̍ sāālu̍ŋ mā hīŋ.’ 10Mi̍ bu̍ɛ̍i̍yāā kāŋ cha᷄ŋ ma̍ kūā o̍ bɛ̍ɛ̄la̍ŋ ma̍ chūūŋgīāā wānā o̍ wānā nda̍ sāālu̍ŋ, ā kɛ̄ndīa̍a̍ ni̍, ā wɔ̄ɔ̍ŋnda̍ ni̍ kpo̍u̍. Mi̍ chīɛ̄ī nda̍ wa̍ nɔ̄ɔ̍ kɛ̄sīo̍o̍ wo̍ pīā ki̍ŋ a̍ wāŋnda̍ chīe̍e̍ya̍.
11“Mi̍ māsāa̍ ho̍ō lō o̍ ko̍ŋ mbo̍ kūā le̍ mīālāa̍ hi᷅ŋ nda̍ yīlɔ̄ɔ̍. Mɛ̄ɛ̍ o̍ lu̍ɛ̍ī, mbo̍ sāālu᷄ŋ po̍ pi᷅lɛ̍ nda̍ tɛ̄ɛ̄ŋ ndu̍ o̍o̍ nɔ̍ nyɛ̍lā bɔ̄ŋa᷅ŋ nɔ̄ kɛ̍sīāā lēkɔ̄ɔ̍ le̍. Mbo̍ nyūnā ndu̍ āā, 12‘Pōo̍, a̍ do̍vi̍ŋ do̍vi᷄ŋ bɔ̄ŋa᷅ŋ nɔ̄ kɛ̍sīāā le̍. Vɛ̄ɛ̍nɛ̍ ŋ̄ lōōku̍ yɛ̄ lūɛ̄īyɔ̄ɔ̄ na̍nu᷄ŋ?’ Kɛ̍, pōo̍ nɔ̄la̍ mbō sōō nyɛ̄ o̍ nyɛ̄ le̍. 13Mi̍ māsāa̍ lō lo̍ŋ mbo̍ dīmūl bu̍ɛ̍i̍yāa̍ cho̍ ndu̍ o̍ bā chīɛ̄ī ni̍ŋ nda̍ āā, ‘Lā yīi̍ ndu̍ bāla̍ŋ a̍ pēlo᷄ŋ mī lā vīōū ndu̍ o̍ fo̍ndāŋ nyɛ̄ pālāa̍. Lo̍ŋ o̍ cho̍ wā kōŋu̍llo̍ ni̍ mbō sūām chi᷅ŋndo̍ŋ a̍ nyɛ̄ nɛ̄īyāa̍.’ ”
14Mi̍ Chi̍i̍sū di̍mī o̍ mɛ̄ɛ̄lu̍la̍ŋ āā, “Wāŋnda̍ ta̍u̍ a̍ sɔ̍la̍ vēēlōo̍ ni̍, kɛ̍, ā ti᷄ŋ ko̍ni̍ nda̍ chu̍a̍ ni̍.”
Ā nyūna̍ Chi̍i̍su̍ nyūnā kāŋgālāa̍
(Ma̍kī 12:13-17; Lu̍kū 20:20-26)
15O̍ ko̍ŋ kɔ̍ɔ̍lī, mi̍ ku̍ndā Fālīsi̍īya̍ kūā, ma̍ kɔ̍ kɛ̍ɛ̍sīāā le̍ Chi̍i̍su̍ yāŋɔ̄ɔ̄le̍ŋ yēŋndo̍ a̍ nyūūnīāāla̍ŋ. 16Ma̍ vīām bu̍ɛ̍i̍yāā ndāa̍ a̍ wāŋnda̍ ā pūm o̍ ku̍nda̍ Hɛ̍lɔ̄ɔ̄ wo̍ chōo̍. Ma̍ hūŋ nāa̍ Chi̍i̍sū chu̍a̍. Mɛ̄ɛ̍ nda̍ hīŋ, ma̍ dīmūl Chi̍i̍su̍ āā, “Ti̍chā, ŋ̄ sīnā māā ā chō sa̍kpō. Ndu̍yɛ̍, ā chō wāŋnda̍ pɛ̄ɛ̄kōo̍ a̍ tōnya̍ kpe̍e̍kpe̍i̍ a̍ mɛ̄ɛ̍ Mɛ̄lɛ̄ka̍ yēēma̍ wāŋnda̍ le̍ mā wa̍ yɛ̍. A̍ nɔ̍ si̍o̍o̍ŋīī wānā o̍ wānā le̍ ndu̍ tōnya̍ dīmūl te̍. Kāni̍ fu̍u̍le̍, a̍ bu̍u̍la̍ŋ le̍ wānā bɛ̍ndūyɛ̍ī wānā le̍. 17Kɛ̍ ndu̍yɛ̍, chɔ̍m ndɔ̍ na̍a̍ nyɛ̄ ŋ̄ yīya̍ŋ o̍ sūɛ̍i̍ he̍ī ni᷄ŋ ndo̍. Vɛ̄ɛ̍nɛ̍ sa̍wāla̍ Mɛ̄lɛ̄ka̍la̍ŋ lā dīmi̍ yɛ̄? Bāā ŋ̄ nɔ̄ mī ŋ̄ ma᷄l pāāwāa̍ māsā bɛ̍ndōo̍ o̍ bā, o̍ cho̍ māsāa̍ kpe̍de̍ bo᷅lle̍ŋ o̍ lɛ̄ŋīī Lu̍o̍ma᷅ŋnde̍ ni᷄ŋ ndo̍, bāā ŋ̄ nɔ̍ mī ŋ̄ ma᷄l te̍?”
18Kɛ̍, mi̍ Chi̍i̍sū si̍nā kɛ̄ɛ̄sīāā wɔ̄ɔ̍ŋ nda̍ kɛ̄ɛ̄si̍a̍a̍ wo̍. Mbo̍ lō lo̍ŋ mbo̍ dīmūl nda̍ āā, “Wānāā sōndō yēēlɛ̍i̍ya̍a̍ bɛ̍ndū nya̍ chō ni̍. Yāŋɔ̄ɔ̄le̍ŋ nya̍ chō ya̍ yēŋndo̍ ni̍. 19La̍ chūu̍ ya̍ ka̍ni̍ŋ nda̍ māl pa̍a̍wāa̍ wo̍ŋ ī pīlɛ̍.”
Ma̍ chūū ndu̍ ka̍ni̍e̍i̍. 20Mi̍ Chi̍i̍sū lo᷅ o̍ ko̍ŋ mbo̍ nyūnā nda̍ āā, “Ō nɛ̄ɛ̍nɛ̍ cho̍ yɛ̄ ō tūūlāā o̍ ka̍ni̍e̍i̍ he̍ī? Dīōla̍ nɛ̄ɛ̍nɛ̍ la̍ cho̍ yɛ̄ la᷅ŋ lā dūāūwāā lo̍ŋ?”
21Ma̍ mūlūl ndu̍ āā, “Māsā bɛ̍ndōo̍, o̍ cho̍ māsāa̍ kpe̍de̍ bo᷅lle̍ŋ o̍ lɛ̄ŋīī Lu̍o̍ma᷅ŋnde̍ ni᷄ŋ ndo̍, ndu̍ cho̍ ō tūūlāā lēchōo̍ ni̍.”
Mi̍ Chi̍i̍sū di̍mūl nda̍ āā, “Mɛ̄ɛ̍ lā pāāwa̍ ma̍sā bɛ̍ndōo̍ nyɛ᷄m cho̍ le̍ ndu̍ wo̍ŋ, ndu̍yɛ̍, mī lā pāāwa̍ Mɛ̄lɛ̄ka̍ nyɛ᷄m cho̍ le̍ Mɛ̄lɛ̄ka̍ wo̍ŋ.”
22Mɛ̄ɛ̍ nda̍ tūēī mɛ̄ɛ̍ o̍ mu̍li̍ yɛ̍, mi̍ kɔ̄ndɔ̄fi̍llo̍ bīī nda̍ ta̍u̍. O̍ ko̍ŋ kɔ̍ɔ̍lī, ma̍ kūānu᷄ŋ.
Ā nyūna̍ Chi̍i̍sū a̍ mīīŋgōo̍ yōōmū o̍kɔ̄ɔ̄
(Ma̍kī 12:18-27; Lu̍kū 20:27-40)
23O̍ pāa̍le̍ pi᷅lɛ̍ lē lēŋ chōo̍ kpe̍, mi̍ ku̍ndā Sādūsi̍īya̍ a̍ di̍mi̍ māā tē wānā vi᷅ pɛ̍ a̍ mi̍i̍ŋgū yo̍o̍mū le̍ wa̍ ā pūm ā hūŋ nāa̍ Chi̍i̍sū chu̍a̍ a̍ nyūnāa̍. 24Ma̍ dīmī āā, “Ti̍chā, sāwāla̍ Mɛ̄lɛ̄ka̍ ke̍ Mūu̍sē le̍ na̍a̍ la̍ŋ lā pɛ̄ɛ̄ku̍ wānāā nāa̍ māā tē wāŋndo̍ nɔ̄ la̍nɔ̍ɔ̍ pɛ̍ mbō lo̍ o̍ ko̍ŋ mbō vī ō vi̍lū ŋ̍chu̍a̍u̍ a̍ chūā kōŋ te̍, mɛ̄ɛ̍ pɔ̄mbɔ̄ ndɔ̄ nɔ̍ mbō chu̍a̍ chūā kōŋ, ndu̍yɛ̍, mbō vēlū chūāūwa̍ a̍ ndu̍ le̍ bɛ̄ ndɔ̄. 25Kɛ̍ ndu̍yɛ̍, tē ō wa̍ yɛ̄ mī pūa̍a̍ ā wa̍ na̍a̍ tɛ̄ɛ̄ŋ ā ŋɔ᷄mmɛ̍ū, ndu̍yɛ̍, ndi̍a̍ā pi᷄lla̍. O̍ ko̍ŋ kɔ̍ɔ̍lī, mī o̍ cho̍ wānā ba̍nāa̍ nda̍ chōo̍ kpo̍u̍ wo̍, ō chu̍a̍ la̍nɔ̍ɔ̍. Kɛ̍ ndu̍yɛ̍, mbō lo̍ o̍ ko̍ŋ mbō vī ō vi̍lū nda̍ chūā kōŋ te̍. O̍ ko̍ŋ kɔ̍ɔ̍lī, mī pɔ̄mbɔ̄ ndɔ̄ɔ̍ pīlɔ̍ɔ̄ lo̍ o̍ ko̍ŋ mbō chu̍a̍ chūa̍a̍ ho̍ō. 26Kɛ̍ ndu̍ bɛ̍ɛ̍, ā vi̍lū nda̍ nda̍ ndu̍ le̍ mbō lo̍ o̍ ko̍ŋ mbo̍ vī. Ŋgāa̍ ndɔ̄ɔ̍ bɛ̍ɛ̍, mī ī yɔ̄nu̍ŋ le̍nde̍, mbō lo̍ o̍ ko̍ŋ ha̍a̍a̍ pūa̍a̍ ŋɔ̍mmɛ̍ūwa̍ ha̍ā kpo̍u̍ mī chūa̍a̍ ho̍ō kēēkū nda̍ o̍ bā. Kɛ̍, nda̍ kpo̍u̍ mā vī le̍nde̍ ō pīlɛ̍ bɛ̍ɛ̍ vi̍lū a̍ ndu̍ le̍. 27O̍ mɛ̄ɛ̄lu̍la̍ŋ kpɔ̍ŋ, mī chūa̍a̍ ho̍ō bɛ̍ɛ̍ o̍ vi᷅. 28Tē ō wa̍ mī wānāā vīlɛ̍i̍ya̍ hu᷄ŋ mi̍i̍ŋgū yōōmū pɛ̍, pūa̍a̍ ŋɔ̍mmɛ̍ūwa̍ ha̍ā, ɔ̍ɔ̄ wāna̍ chūa̍a̍ ho̍ō wā ni̍ŋ la̍a̍ ndɔ̄ wo̍? Kāni̍, nda̍ fa̍ū ō kēēku̍ nda̍ o̍ bā o̍ nɔ̄ɔ̍ ni᷄ŋ.”
29Mi̍ Chi̍i̍sū lo᷅ o̍ ko̍ŋ mbo̍ dīmūl nda̍ āā, “Lā bēndū bɔ̍ɔ̍ nɛ̍īyo̍. Nyɛ̍ to̍sa̍ mi̍ lā bīāndū nɛ̄īyo̍ wo̍ cho̍ ni̍ māā lā si̍nā nyɛ᷅ Yāu̍ Mɛ̄lɛ̄ka̍a̍ dīmi̍ wo̍ pɛ̄ŋgu̍ le̍. Ndu̍yɛ̍, lā si̍nā kpa̍āya̍ Mɛ̄lɛ̄ka̍ nɔ̄ wo̍ pɛ̄ŋgu̍ le̍. 30Tē wānāa̍ vi᷅ wa̍ ā hu᷄ŋ mi̍i̍ŋgū yōōmū pɛ̍, ā chu̍ē lɛ̍ ŋ̄lāāndū kɛ̄lɛ̄ŋgāā ŋ̄pīāāndū le̍. Mɛ̄ɛ̍ ki̍i̍la̍a̍ Mɛ̄lɛ̄ka̍a̍ chō yɛ̍, le̍nde̍ ko̍ni̍ nda̍ wā ni̍ŋ ni̍. 31I̍ mi̍ŋgī wɔ̍ sōndō a̍ mīīŋgōo̍ yōōmū o̍kɔ̄ɔ̄. Nya̍ pi̍la̍ lā chō dīōmndā Mɛ̄lɛ̄ka̍ sōō la᷅ŋ o̍ yāu̍ ndɔ̄ɔ̍ ni᷄ŋ nda̍ŋ tōfāa̍. Mi̍ Mɛ̄lɛ̄ka̍ dīmūl nya̍ lo̍ŋ āā, 32‘Ya̍ cho̍ Mɛ̄lɛ̄ka̍ E̍bīlāha᷅m, a̍ Āa̍se̍, a̍ Che̍kɔ̍pū a̍ pi̍ɛ̍ī yo̍ ni̍. Le̍la̍ŋ, Mɛ̄lɛ̄ka̍ ō cho̍ Mɛ̍lɛ̄ka̍ ŋ̄wāŋ vīlɛ̍i̍ le̍. Wānāa̍ cho̍ yōōmū wa̍, Mɛ̄lɛ̄ka̍ ndāa̍ o̍ cho̍ ni̍.’ ”
33Mɛ̄ɛ̍ fāŋgāa̍ tūēī nyɛ̄ Chi̍i̍sū pɛ̍ɛ̍ku̍ wāŋnda̍ wo̍ mi̍ kɔ̄ndɔ̄fi̍llo̍ bīī nda̍.
Sāwa̍ hi̍o̍ū sāwāla̍ŋ kpo̍u̍ wo̍
(Ma̍kī 12:28-34; Lu̍kū 10:25-28)
34O̍ ko̍ŋ kɔ̍ɔ̍lī, mi̍ ku̍ndā Fālīsi̍īya̍ tūɛ̄ī māā mɛ̄ɛ̍ Chi̍i̍sū mu̍li̍ nyūnā Sādūsi̍īya̍ nyūna̍ ndu̍ wo̍, ba̍kō bɛ̍ɛ̍ ā nɔ̄la̍ lɛ̍ mā sōō nyɛ̄ o̍ nyɛ̄ nāa̍ ndu̍ chu̍a̍ le̍. Tūēīyɔ̄ɔ̍ le̍nde̍, mi̍ Fālīsi̍īya̍ ha̍ā ā pūm ā lō o̍ ko̍ŋ ma̍ chūūŋgi̍āŋ na̍a̍ pi᷅lɛ̍. 35Ō pīlɛ̍ wa̍ nda̍ tɛ̄ɛ̄ŋ, nda̍ wa̍ wānāa̍ pɛ̍ɛ̍kū wa᷅ŋnda̍ sāwāla̍ Mɛ̄lɛ̄ka̍la̍ŋ nda̍ ni̍. Mbo̍ kīndī le̍ Chi̍i̍su̍ yāŋɔ̄ɔ̄le̍ŋ yēŋndo̍ a̍ nyūnāa̍. 36Mbo̍ nyūnā Chi̍i̍sū āā, “Ti̍chā, o̍ sāwāla̍ Mɛ̄lɛ̄ka̍la̍ŋ ni᷄ŋ ki̍nɛ̍i̍, ɔ̍ɔ̄ sāwa̍ hi̍o̍ū kpo̍u̍ wo̍?”
37Mi̍ Chi̍i̍sū di̍mūl ndu̍ āā, “Sāwa̍ hi̍o̍ū kpo̍u̍ wo̍ cho̍ ni̍ āā, ‘Ka̍a̍la̍ Ma̍sānɔ̄ɔ̍ o̍ cho̍ Mɛ̄lɛ̄ka̍ ŋ̄ pīɛ̄īyo̍ wo̍ nyɛ̄ kɛ̄ndɛ̄ kɛ̍ndɛ̍ī. Ka̍a̍la̍ ndu̍ a̍ kɔ̄l nūmndo̍ kpo̍u̍, ndu̍yɛ̍, mā wa̍ yīya᷄ŋndo̍ a̍ ndu̍ o̍kɔ̄ɔ̄ te̍le̍ŋ o̍ te̍le̍ŋ fe̍e̍.’ 38Sāwa̍ tāso̍o̍ o̍ hi̍o̍ū la᷅ŋ kpe̍de̍ wo̍ ndu̍ cho̍ ko̍ŋ ni̍. 39Sāwāa̍ dīi̍ŋ ndɔ̄ɔ̍ chō māchūāā mɛ̄ɛ̍ ō tāso̍o̍ chō yɛ̍. Ndu̍ cho̍ ni̍ māā lā kāāla̍ wa̍nāā nya̍ chīɛ̄ɛ̄li̍āŋ nda̍ mɛ̄ɛ̍ nya̍ kāāla̍ nya̍ pi̍la̍ yɛ̍. 40Sāwāla̍ Mɛ̄lɛ̄ka̍ ke̍ Mūu̍sē la̍ŋ kpo̍u̍, a̍ sɔ̄ɔ̍ŋ wānāa̍ su̍a̍ā le̍ Mɛ̄lɛ̄ka̍ wa̍ ā dīmu̍l wāŋnda̍ wo̍ŋ, o̍ sāwāla̍ ti̍ɔ̍ɔ̍ŋnda̍ŋ nda᷅ŋ ni᷄ŋ la̍ fūla̍ ni̍.”
Nyūnāa̍ a̍ Ki̍li̍tī o̍kɔ̄ɔ̄
(Ma̍kī 12:35-37; Lu̍kū 20:41-44)
41Mɛ̄ɛ̍ ku̍ndā Fālīsi̍īya̍ ā pūm ā chūūŋgi̍āŋ, mi̍ Chi̍i̍sū nyu̍nā nda̍ āā, 42“O̍ yīya᷄ŋ nyāa̍ ni᷄ŋ, o̍ pūlāle̍ nɛ̄ɛ̍nɛ̍ cho̍o̍ Ki̍li̍tī, wāna̍ Mɛ̄lɛ̄ka̍ chu̍a̍ būŋgɛ̄i̍ māā ō chō vīōmɔ̄ɔ̄ le̍ wāŋnda̍ pīŋīo̍o̍ wo̍, ō fūla̍ yɛ̄?”
Ma̍ mūlī āā, “O̍ pūlāle̍ Māsāa̍ De̍e̍ve̍le̍ŋ chōo̍ o̍ fu̍la̍ ni̍.”
43Mbo̍ nyūnā nda̍ āā, “Kɛ̍, vɛ᷅ ni᷅ŋ mɛ̄ɛ̍ Nyi̍na̍ Mɛ̄lɛ̄ka̍a̍ tōl Dēēve̍ kɔ̄ɔ̄lī mbo̍ vēēlū ndu̍ māā, Māsānɔ̄ɔ̍ Mɛ̄lɛ̄ka̍?” Mi̍ Dēēve̍ di̍mī āā,
44“Māsānɔ̄ɔ̍ Mɛ̄lɛ̄ka̍ dīmu̍l Māsānɔ̍ nūu̍ āā,
Cha̍l na̍nu᷄ŋ o̍ fo̍ndāŋ lēbīɔ̍ɔ̍ o̍ bā nī kɛ̍ndɔ̄ɔ̍ chōo̍,
mbō lo̍ o̍ ko̍ŋ mī to̍sa̍ mā nɛ̍i̍ ya̍a̍mɔ̍ɔ̍wa̍a̍ nu̍mnda̍ a̍ bɛ̄ŋgu̍.
45Tē Dēēve̍ pi̍la̍ ve̍e̍lu̍ pɛ̍ wa᷅ŋndo̍ ho̍ō āā, Māsānɔ̄ɔ̍, vɛ̄ɛ̍nɛ̍ wānā ko̍ŋ ō sīmnūŋ yɛ̍ vɛ̄lɛ̄ po̍ Dēēvi̍o̍o̍?”
46Kɛ̍, wānā bɛ̍ɛ̍ nɔ̍la̍ mbō mūlu̍l ndu̍ ba̍kō le̍. Ndu̍yɛ̍, chɔ̍ŋ a̍ bōōndi̍i̍ ke̍ŋ, wānā o̍ wānā o̍ nyu̍na̍ lɛ̍ ndu̍ nyūnā o̍ nyūnā chēle̍ŋ te̍.
Currently Selected:
Māa̍ti̍u̍ 22: YM
Highlight
Share
Copy
Want to have your highlights saved across all your devices? Sign up or sign in
Kisi Bible © Bible Society in Liberia, 2015.