Māa̍ti̍u̍ 20
20
Mɛ̄ɛ̍ Mɛ̄lɛ̄ka̍ pāāwā ni̍ŋ wa̍nāā wa̍lla̍ o̍ māsāle̍ ndɔ̄le̍ŋ ni᷄ŋ yɛ̍
1O̍ ko̍ŋ kɔ̍ɔ̍lī, mi̍ Chi̍i̍sū hi̍a̍ū lāchī a̍ sūɛ̍i̍. Mbo̍ dīmī āā, “Māsāle̍ Mɛ̄lɛ̄ka̍le̍ŋ lē chō māchūāā mɛ̄ɛ̍ i̍ yɔ̍nu̍ŋ o̍ tālo̍o̍ ho̍ō ni᷄ŋ yɛ̍. Po̍ pi᷅lɛ̍ wa̍ mbo̍ nɔ̄ kpe̍le̍ yɔ̄mīī kūāmāa̍. Īdīi̍ pīlɛ̍ pu̍u̍ŋ mbo̍ kūā wānāā wa̍lla̍ nūūvīa̍a̍ le̍ wa̍llo̍ o̍ kpe̍le̍ ndɔ̄ɔ̍ ni᷄ŋ. 2Nda̍ wāŋnda̍ ma̍ chɛ̄la᷅ŋ le̍ mī ndu̍ o̍o̍ pa̍a̍wa̍ nda̍ mɛ̄ɛ̍ wāŋnda̍ pāāwā le̍ pāa̍le̍ŋ yɛ̍. Mbo̍ yɔ̄ŋ nda̍ le̍ wa̍llo̍ o̍ kpe̍le̍ ndɔ̄ ko̍ŋ ni᷄ŋ. 3O̍ ko̍ŋ kɔ̍ɔ̍lī, mbo̍ kūā vɛ̄lɛ̄ o̍ lɔ̍ɔ̍ ni᷄ŋ a̍ te̍le̍ŋ yɛ̄ɛ̄ŋnde̍ŋ. Mɛ̄ɛ̍ o̍ ku̍ɛ̄, mbo̍ kōmāl pūa̍a̍ ā pūm. Ā wa̍ īsīsi̍ nyɛ̄ bɛ̍ɛ̍ ā ve̍ to̍sā le̍. 4O̍ ko̍ŋ, mbo̍ dīmūl nda̍ āā, ‘Nya̍ bɛ̍ɛ̍ lā kɔ̍ to̍sā wa̍llo̍ o̍ kpe̍le̍ nūu̍ ni᷄ŋ. I̍ cho̍ nya̍ pāāwā nyɛ̄ kɛ̄ndɛ̍ī.’ 5Ma̍ kūā. Mɛ̄ɛ̍ pāa̍le̍ŋ lē si᷄m o̍ bōlle̍ŋ chōo̍, mbo̍ chūā vɛ̄lɛ̄ ā ti᷄ŋ mbo̍ yɔ̄ŋ nda̍ wa̍llo̍ o̍ kpe̍lo̍o̍ ho̍ō ni᷄ŋ. A̍ te̍le̍ŋ pɛ̄ŋgī lāwa̍li̍ ki̍nɛ̍i̍, mbo̍ yɔ̄ŋ vɛ̄lɛ̄ ā chēle̍ŋ. 6Mɛ̄ɛ̍ pāa̍le̍ŋ lē wa̍ le̍ dēlɔ̄ɔ̍, mbo̍ kūā vɛ̄lɛ̄ o̍ lɔ̍ɔ̍ ni᷄ŋ. Mbo̍ sāālu᷄ŋ vɛ̍lɛ̄ pūa̍a̍ che̍le̍ŋ ā wānu̍ŋ i̍si̍si̍. Mbo̍ nyūnā nda̍ āā, ‘Lā vɛ᷅ pāa̍le̍ŋ nde᷅ŋ tɛ̄ɛ̄mbūūwo̍ kpɛ᷅ŋ lā to̍sā nyɛ᷅ o̍ nyɛ̄ le̍?’ 7Ma̍ mūlī āā, ‘Ŋ̄ sɔ̄la̍ wa᷅na̍ chu̍ā na̍a̍ le̍ wa̍li̍ le̍?’ Mi̍ wāna̍ kpe̍lo̍o̍ ho̍ō dīmūl nda̍ āā, ‘Mɛ̄ɛ̍ nya̍ bɛ̍ɛ̍ lā kɔ̍ o̍ kpe̍le̍ nūu̍ ni᷄ŋ mī lā kɔ̍ to̍sā wa̍llo̍.’ Ma̍ kūā.
8“Mɛ̄ɛ̍ pāa̍le̍ŋ lē de᷄l do̍ŋ, mi̍ wāna̍ nɔ̍ kpe̍lo̍o̍ wo̍ dīmūl wāna̍ wa̍ wānāā wa̍lla̍ bōlle̍ŋ ndo̍ āā, ‘Ve̍e̍lu̍ wa̍nāā wa̍lla̍ mā pa̍a̍wa̍ nda̍. Wānāā ya̍ mɛ̍ɛ̍lu̍ chūā wa̍ nda̍ fɛ̍ɛ̍ŋ ŋ̄ pāāwā, mā mɛ̍ɛ̍lu̍ ni᷅ŋ wānāā tāsi̍a̍a̍ pāāwā.’ 9Mbo̍ pāāwā wānāā o̍ chu̍a̍ a̍ te̍le̍ŋ pāa̍le̍ de̍lāāle̍ŋ nda̍ mɛ̄ɛ̍ wāŋnda̍ pāāwā le̍ pāa̍le̍ŋ yɛ̍. 10Mɛ̄ɛ̍ wānāā tāsi̍a̍a̍ o̍ chu̍a̍ wa̍ hīŋ le̍ pāāwā ndāa̍ chūa̍a̍, ma̍ wā yīya᷄ŋndo̍ māā nda̍ hi̍a̍ū ni̍ŋ nyɛ̍ sɔ̄lāa̍ sɔ̄lā. Kɛ̍, nda̍ bɛ̍ɛ̍ mɛ̄ɛ̍ nda̍ pāāwā le̍ pāa̍le̍ŋ yɛ̍ ko̍ni̍ o̍ ke̍ nda̍ ni̍. 11Ma̍ bīī ka̍ni̍ŋ nda᷄ŋ. Kɛ̍ ndu̍yɛ̍, ma̍ sāā ŋɔ̄ɔ̄chīa̍ŋnda̍ŋ a̍ nyɛ̄ wāna̍ kpe̍lo̍o̍ tōsa̍ wo̍. 12Ma̍ dīmī āā, ‘Wānāā ŋ̄ mɛ̄ɛ̄lu̍ chūā wa̍ le̍ bōōndi̍i̍ bi̍ŋgī ko̍ni̍ nda̍ tōsa̍ wa̍llo̍ ni̍. Kɛ̍, o̍ ko̍ŋ ni̍ŋ kpo̍u̍, ma̍ pāāwā nda̍ nyɛ̄ pīlɛ̍ a̍ na̍a̍ ŋ̍ ni̍i̍lu̍ fāfa̍la̍a̍ kpɛ᷅ŋ o̍ pāa̍le̍ŋ nda̍.’
13“Mi̍ wāna̍ kpe̍lo̍o̍ dīmūl ō pīlɔ̍ɔ̄ āā, ‘Pōo̍, ya̍ŋ ya̍ nīla̍ŋ. I̍ to̍sa̍l nu̍m sūɛ̍i̍ wɔ̍ɔ̍ŋ te̍. Na̍a̍ nya̍ā chɛ̄la᷅ŋ nāa̍ wa̍ ni̍ māā tē lā tōsa̍ pɛ̍ wa̍llo̍ le̍ pāa̍le̍ŋ kpɛ᷅ŋ, I̍ pa̍a̍wa̍ nya̍ mɛ̄ɛ̍ wāŋnda̍ pāāwā le̍ pāa̍le̍ŋ yɛ̍. 14Le̍la̍ŋ, bi̍i̍ ka̍ni̍i̍ nu̍mnde̍ mā kūɛ̄ o̍ nūmndo̍. I̍ kɛ̍ɛ̍si̍a̍a̍ le̍ mī ke̍ wānāā ya̍ mɛ̍ɛ̍lu̍ chūā wa̍ mɛ̄ɛ̍ ya̍ I̍ ke̍ nya̍ yɛ̍. 15I̍ nɔ̍ di̍ mī to̍sa̍ a̍ nyɛ̄ nī sɔ̍lāa̍ mɛ̄ɛ̍ ya̍ I̍ hɛ̍na̍ŋ yɛ̍. Bāā mī lā chu̍a̍ nɛ̄īyɔ᷄ŋndo̍ le̍ sūɛ̍i̍ kɛ̍ndɛ̄ī ya̍ I̍ to̍sa̍l nda̍ ve̍?’ ”
16O̍ ko̍ŋ kɔ̍ɔ̍lī mi̍ Chi̍i̍sū di̍mī āā, “Le̍la̍ŋ, wāna̍ cho̍ ō pɔ̄mbu̍ɛ̍i̍na̍a̍ mbo̍ hīāū wāŋnda̍ kpo̍u̍ wo̍, ō chō hūnɔ̄ɔ̄ wā ō bɛ̄ndū mbō hīōū wāŋnda̍ kpo̍u̍.”
Chi̍i̍sū di̍mi̍ o̍ yāa̍ ndɔ̄ɔ̍ māā ā chō ndu̍ dīyɔ̄ɔ̄
(Ma̍kī 10:32-34; Lu̍kū 18:31-34)
17Mɛ̄ɛ̍ Chi̍i̍sū nda̍ bu̍ɛ̍i̍yāā ndūāā tɔ̍ a̍ ā ŋīɔ̍ɔ̍ŋnda̍ ā wa̍ kɔ̄la̍ŋ o̍ nɛ̄ī le̍ hēlɔ̄ɔ̍ Chūlu̍sɛ̄lɛ̄m chi̍e̍e̍, mbo̍ sēī a̍ nda̍ o̍ nɛ̄īyo̍ chōo̍. Ā wa̍ kɔ̄la̍ŋ mbo̍ sūāā nāa̍ nda̍ chūā nda̍ kpe̍e̍le̍. 18Mbo̍ dīmūl nda̍ āā, “Ŋ̄ chō la̍ŋ Chūlu̍sɛ̄lɛ̄m. Lo̍ŋ nda̍ chō wāna̍ nda̍ vēēlū āā Po̍ Wānā Pɔ̍nɔ̍ɔ̍ wo̍ mālɔ̄ɔ̄ wānāā bɛ̄ndūa̍a̍ sōlīāā lāsa̍lāa̍ o̍ bā nda̍ wānāa̍ pɛ̍ɛ̍kū wa᷅ŋnda̍ sāwāla̍ Mɛ̄lɛ̄ka̍la̍ŋ nda̍ ni̍. Ndu̍yɛ̍ o̍ ko̍ŋ kɔ̍ɔ̍lī, ā chō ndu̍ yāmɛ̍i̍ kīlūl le̍ mā dīī ndu̍. 19O̍ ko̍ŋ kɔ̍ɔ̍lī, ā chō ndu̍ mālɔ̄ɔ̄ wānāa̍ cho̍ a̍ Chu̍ū le̍ wa̍ o̍ bā le̍ mā ma᷄m ndu̍, mā lɔ̄ɔ̄ ndu̍ mā ba᷄ŋ ndu̍ o̍ yɔ̄m sīŋgāfīlāa̍ chōo̍ mā dīī ndu̍. Kɛ̍ ndu̍yɛ̍, tē pālɛ̍i̍ ī hīōū ī yāa̍ pɛ̍, Mɛ̄lɛ̄ka̍ mīŋgi̍ ndu̍ yōōmū.”
Chēmi̍si̍ nda̍ Chɔ᷄ŋ kālā nda̍ hīŋ nāa̍ Chi̍i̍sū chu̍a̍
(Ma̍kī 10:35-45)
20O̍ ko̍ŋ kɔ̍ɔ̍lī, mi̍ la̍nɔ̍ɔ̍ Sɛ̍bɛ̍dīī hu᷅ŋ nāa̍ Chi̍i̍sū chu̍a̍ nda̍ pūa̍a̍ ndūa̍a̍. Mɛ̄ɛ̍ o̍ hi᷅ŋ, mbo̍ tūndu᷄ŋ Chi̍i̍sū o̍ lābɛ̄ŋgu̍ ni̍ŋ. Mbo̍ nyɔ̄ɔ̄lū ndu̍ le̍ mī Chi̍i̍sū to̍sa̍l ndu̍ sūɛ̍i̍ pu̍m.
21Mi̍ Chi̍i̍sū nyu̍nā ndu̍ āā, “Ō yɛ̄ɛ̍nɛ̍ ŋ̄ yēēma̍ yɛ̄?”
Mbo̍ mūlī āā, “Tē a̍ hu̍ŋ si̍mnu᷄ŋ ma̍sāa̍ pɛ̍, to̍sa̍ mī pūa̍a̍ nīāā ŋi̍ɔ̍ɔ̍ŋnda̍ ha̍ā ā hu᷄ŋ cha᷅l o̍ fo̍ndāŋndā lēbɛ̄ɛ̄la̍ŋ nu̍m īkɛ̄i̍. Tē ho̍ō cha᷄l pɛ̍ o̍ bā nūm kɛ̍ndɔ̄ɔ̍ chōo̍, ō pīlɔ̍ɔ̄ cha᷄l o̍ bā nūm mi̍āllo̍ chōo̍.”
22Mi̍ Chi̍i̍sū mu̍lūl nda̍ āā, “Lā si̍nā nyɛ᷅ nya̍ chō ho̍ō dīmīo̍o̍ wo̍ pɛ̄ŋgu̍ le̍.” Mbo̍ nyūnā nda̍ o̍ lētāle̍ ni᷄ŋ āā, “Lā nɔ̄lā mī lā ko᷄l o̍ tāāla̍ nyɛ̄ pālāā ya̍ cho̍ ho̍ō hūnɔ̄ɔ̄ kōlɔ̄ɔ̄ wo̍ ni᷄ŋ?”
Ma̍ chɛ̄l āā, “E̍ī, ŋ̄ nɔ̄lā.”
23Mi̍ Chi̍i̍sū di̍mūl nda̍ āā, “Tōnya̍, lā kōl ni̍ŋ o̍ tāāla̍ nūu̍ ho̍ō ni᷄ŋ. Kɛ̍ ndu̍yɛ̍, tē ō wa̍ le̍ cha᷄lle̍ o̍ bā nī kɛ̍ndɔ̄ɔ̍ chōo̍ a̍ o̍ bā nī mi̍āllo̍ chōo̍ pɛ̍, ō cho̍ ya̍ le̍ chu̍ā wa̍nāā kāŋ te̍. Fo̍ndāŋndā lāŋ lā chō māchūāā le̍ wānāā Fi̍nyā nūu̍ ō bɛ̄ɛ̄ndi̍a̍a̍ la̍ŋ nda̍.”
24Mɛ̄ɛ̍ bu̍ɛ̍i̍yāā ŋ̄wāŋ tɔ̍ wa̍ ā tūēī a̍ ndi̍ o̍kɔ̄ɔ̄, ma̍ dūāūnu᷄ŋ tu̍mbe̍ a̍ pūa̍a̍ ŋi̍ɔ̍ɔ̍ŋnda̍ ha̍ā. 25O̍ ko̍ŋ kɔ̍ɔ̍lī, mi̍ Chi̍i̍sū ve̍e̍lū nda̍ kpo̍u̍ na̍a̍ pi᷅lɛ̍, mbo̍ dīmūl nda̍ āā, “Lā sīnā māā wānāa̍ cho̍ a̍ Chu̍ū le̍ wa̍ māsāa̍ ndāa̍ nda̍ nda̍, kīndīlāa̍ pi̍la̍ nda̍ kīndīlā wa̍nāā nda̍ chō chōo̍ wa̍ ni̍. Ndu̍yɛ̍, wānāā bɛ̄ndūa̍a̍ ha̍ā ā kūūmba᷄ŋ nda̍ chōo̍ kpu̍lu̍ nda̍ chō ni̍. 26Kɛ̍ nya̍ nya̍, ī wāā le̍nde̍ ī nɔ̍ mī ī yɔ̄nu̍ŋ nya̍ tɛ̄ɛ̄ŋ te̍. Wāna̍ wa̍ nya̍ tɛ̄ɛ̄ŋ pɛ̍ mbō yēēma̍ le̍ wāa̍ wānā bɛ̍ndū pɛ̍, mɛ̄ɛ̍ mī wānā ko̍ŋ ō wa̍ bu̍ɛ̍īyo̍ le̍ ha̍ā kpo̍u̍. 27Ndu̍yɛ̍, wāna̍ ye̍e̍ma̍ le̍ wāa̍ wāna̍ tāso̍o̍ pɛ̍, mɛ̄ɛ̍ mā wa̍ māā chɛ̄ le̍ ā tūa̍a̍ kpo̍u̍, 28mɛ̄ɛ̍ wāna̍ nda̍ vēēlū āā, Po̍ Wānā Pɔ̍nɔ̍ɔ̍ wo̍ chō yɛ̍. Ō hi᷄ŋ le̍ mī wānā sa̍a̍ŋgi̍a̍l ndu̍ le̍, kɛ̍ le̍ mbō sāāŋgi̍a̍l wāŋnda̍, o̍ ko̍ŋ kɔ̍ɔ̍lī, mbō yɔ̄ŋgu̍ yōōmū ndɔ̄ɔ̍ le̍ wānāā fāŋgā fa̍ŋgā bāŋāa̍.”
Chi̍i̍sū si̍ŋgi̍ wānāā sūmɛ̍i̍ya̍ ā ŋīɔ̍ɔ̍ŋ
(Ma̍kī 10:46-52; Lu̍kū 18:35-43)
29Mɛ̄ɛ̍ Chi̍i̍sū wa̍ fāŋa᷄ŋndo̍ Chɛ̄lu̍i̍kō chi̍e̍e̍ nda̍ bu̍ɛ̍i̍yāā ndūa̍a̍, mi̍ fāŋgā bɛ̍ndōo̍ tūāl nda̍ kɔ̄ɔ̄lī. 30Wānāā sūmɛ̍i̍ya̍ ā wa̍ īchāli̍ o̍ nɛ̄īyo̍ da̍ŋga̍la̍ nda̍ ŋi̍ɔ̍ɔ̍ŋ. Mɛ̄ɛ̍ nda̍ tūēī māā Chi̍i̍sū cho̍ hīōūwɔ̄ɔ̍, ma̍ dīmī chōo̍ cho̍o̍ kpe̍le̍ŋ āā, “Nūm Po̍ Māsāa̍ Dēēvi̍o̍o̍, tūīīnu̍ŋ na̍a̍ īnyīɛ̍ɛ̍ fɔ̍.”
31Mi̍ wāŋnda̍ o̍ fāŋgāa̍ ho̍ō tɛ̍ɛ̄ŋ a̍ kpa̍ā nda̍ āā, “Lā pɛ̄ŋgi̍ bɔ̍ɔ̍lūūwo̍.” Kɛ̍, ma̍ chɔ̄ɔ̄lū dēŋī āā, “Nūm Po̍ Māsāa̍ Dēēvi̍o̍o̍, yāndi̍i̍ tūīīnu̍ŋ na̍a̍ īnyīɛ̍ɛ̍ fɔ̍.”
32Mi̍ Chi̍i̍sū si᷅m mbo̍ vēēlu̍ nda̍. Mbo̍ nyūnā nda̍ āā, “Ō yɛ̄ɛ̍nɛ̍ nya̍ hɛ̄na̍ŋ yɛ̍ mī to̍sa̍l nya̍?”
33Ma̍ dīmūl ndu̍ āā, “Fāllo̍, ŋ̄ hɛ̄na̍ŋ nu̍m mā to̍sa̍ mī ŋ̄ chē.”
34Mi̍ Chi̍i̍sū tu̍i̍i̍nu᷄ŋ nda̍ īnyīɛ̍ɛ̍. Mbo̍ pīla᷄ŋ nda̍ hɔ̄lta̍ŋ. O̍ le̍ pīlɛ̍ ni᷄ŋ kpe̍, ma̍ chā wa̍la̍ŋ. Ndu̍yɛ̍ o̍ ko̍ŋ kɔ̍ɔ̍lī, ma̍ tūāl ndu̍ kɔ̄ɔ̄lī.
Currently Selected:
Māa̍ti̍u̍ 20: YM
Highlight
Share
Copy
Want to have your highlights saved across all your devices? Sign up or sign in
Kisi Bible © Bible Society in Liberia, 2015.