Māla̍kāī 3
3
1Mɛ̄lɛ̄ka̍ Ya̍a̍wɛ̄ɛ̍ nɔ̍ kpāāyāa̍ kpo̍u̍ wo̍ di̍mī āā, “I̍ cho̍ bu̍ɛ̍ī nūu̍ vīōmɔ̄ɔ̄ mbō bɛ̄ɛ̄ndi̍a̍a̍ nɛ̄īyo̍ ya̍ lāchī. Ndu̍yɛ̍ mī Ma̍sānɔ̍ nya̍ chō sōōlūūwo̍ wo̍ ō hīŋ o̍ lēpīlɛ̍ ni᷄ŋ kpe̍ o̍ chīɛ̄ī nūu̍ ni᷄ŋ. Bu̍ɛ̍ī ni̍ nya̍ chō a̍ yēēmɛ̍i̍ bɛ̍ndūe̍i̍ le̍ ndu̍ chɔ̄ɔ̍ wo̍, ō chō hūnɔ̄ɔ̄ mbō hu᷄ŋ di̍mūl nya̍ a̍ kpe̍ma̍ nūu̍ o̍kɔ̄ɔ̄.
2“Kɛ̍, ō nɛ̄ɛ̍nɛ̍ bi̍u̍nūŋ yɛ̍ ni̍ŋ chu᷅mndo̍ le̍ pāa̍le̍ o̍ cho̍ hūnɔ̄ɔ̄ le̍ŋ? Ndu̍yɛ̍ tē ō hīŋ pɛ̍, ō nɛ̄ɛ̍nɛ̍ nɔ̍lā yɛ̍ ni̍ŋ mbo̍ si̍m?
“Kāni̍ fo̍ndōle̍, hūnɔ̄ɔ̄ o̍ cho̍ wo̍, wānā cha᷅ŋ ni̍ŋ ko̍ mɛ̄ɛ̍ sɛ̍ɛ̍ di̍ndī ho̍ō nyɔ̄ɔ̍ fo̍fo̍ wo̍ ō chō nu̍a̍ā yɛ̍. Ɔ̄ɔ̄ wānā cha̍ŋ ni̍ŋ ko̍ mɛ̄ɛ̍ yīŋnde̍ di̍ndī le᷅ŋ chīli̍ŋnde̍ le̍ŋ lē chō nu̍a̍ā yɛ̍. 3Ō chō hūnɔ̄ɔ̄ mbō kɔ̄ɔ̄sa̍ a̍ wāŋnda̍ mɛ̄ɛ̍ nda̍ tēēŋgīāā nu̍a̍ā ka̍ni̍i̍ hu̍mbūe̍i̍ mā dīndi̍ ndi̍ fo̍ fo̍ yɛ̍. Ndu̍yɛ̍ ō chō pūa̍a̍ Līva̍īya̍ dīndī mɛ̄ɛ̍ nda̍ dīndī nu̍a̍ā ko̍o̍līi̍ye̍ ndu̍yɛ̍ a̍ ka̍ni̍i̍ hu̍mbūe̍i̍ yɛ̍. O̍ ko̍ŋ, mā hīŋ a̍ kēla̍ bɛ̍nda̍ la̍ŋ o̍ Mɛ̄lɛ̄ka̍ Ya̍a̍wɛ̄ɛ̄ lo̍. 4O̍ ko̍ŋ, mi̍ Mɛ̄lɛ̄ka̍ Ya̍a̍wɛ̄ɛ̄ o̍ hi̍ni̍ kɔ̄l a̍ kēlā wāŋnda̍ Chu̍dā a̍ wāŋnda̍ Chūlu̍sɛ̄lɛ̄m a̍ chō ndu̍ chūū la̍ŋ, mɛ̄ɛ̍ i̍ wa̍ o̍ sīndɔ̄ɔ̍ ni᷄ŋ yɛ̍.”
5Mɛ̄lɛ̄ka̍ Ya̍a̍wɛ̄ɛ̍ nɔ̍ kpāāyāa̍ kpo̍u̍ wo̍ dīmi̍ āā, “I̍ cho̍ hūnɔ̄ɔ̄ nya̍ īkɛ̄i̍ kpɛ̍ɛ̍lūŋ mī hu̍ŋ kɔ̍ɔ̍sā a̍ wānāa̍ cho̍ yāwāla̍ŋ vīōmɔ̄ɔ̍ wa̍, a̍ wānāa̍ su̍u̍ndā a̍ wānāā nda̍ cho᷄ o̍ lānɔ̄ ni̍ŋ te̍ wa̍, a̍ wānāa̍ cho̍ wāŋnda̍ se̍īlē lēka̍fāle̍ŋ tɛ̄ndāllo̍ wa̍, a̍ wānāa̍ to̍sāl wānāā wa̍lla̍ ka̍fāla̍ŋ o̍ nda̍ pāāwāa̍ ni᷄ŋ nda̍, a̍ wānāa̍ to̍sa̍l vi̍i̍ya̍a̍ nɔ̍ lɛ̍ ŋ̄pīāāndū le̍ wa̍, a̍ vīi̍ya̍a̍ nɔ̍ lɛ̍ ŋ̄fi̍nyā le̍ wa̍, ndu̍yɛ̍ a̍ wānāā lēkāa̍wa̍ ka̍fāla̍ŋ nda̍, ndu̍yɛ̍ a̍ wānāa̍ ke᷅ ya̍ lēbɛ̄ɛ̄ le̍ wa̍.”
A̍ kēlā lēbōlta̍ŋ yɔ̄ŋgōo̍ o̍kɔ̄ɔ̄
6“Ya̍ cho̍ Mɛ̄lɛ̄ka̍ Ya̍a̍wɛ̄ɛ̄ ni̍, Mɛ̄lɛ̄ka̍ nɔ̍ kpāāyāa̍ kpo̍u̍ wo̍, Mɛ̄lɛ̄ka̍ fe̍ŋāŋ o̍ dīōm ndɔ̄ɔ̍ chōo̍ le̍ wo̍. Le̍ he̍ī, nya̍ wānāa̍ fu̍la̍ o̍ pūlāle̍ Che̍kɔ̍pūle̍ŋ chōo̍ wa̍, I̍ chi̍i̍ yɔ̍ nya̍ tɛ̄ɛ̄mbūū kpo̍u̍ le̍. 7Mɛ̄ɛ̍ fi̍nyāā nyāā ma̍māa̍ ā kɛ̄ɛ̍ ya̍ yɛ̍, le̍nde̍ ko̍ni̍ nya̍ bɛ̍ɛ̍ nya̍ fāŋa̍ŋ o̍ sāwāla̍ nīla̍ŋ chōo̍ ni̍, mi̍ lā kɛ̄ɛ̍ le̍ la̍ŋ chūa̍a̍. Lā mīīŋgu̍ ya̍ o̍ ībūŋ, ndu̍yɛ̍ mī ya̍ bɛ̍ɛ̍ mi̍i̍ŋgu̍ nya̍ o̍ ībūŋ. Kɛ̍ mi̍ lā nyūnā māā, vɛ̄ɛ̍nɛ̍ na̍a̍ ŋ̄ mīīŋgū yɛ̍ nu̍m o̍ ībūŋ? 8I̍ nyu̍nā wɔ̍ nya̍. Bāā wāŋndo̍ ō chīīmbūūwo̍ Mɛ̄lɛ̄ka̍? Kɛ̍ nya̍ nya̍ lā chō ya̍ chīīmbūūwo̍. Kɛ̍ mi̍ lā nyūnā dɔ̍ɔ̍ māā, vɛ̄ɛ̍nɛ̍ na̍a̍ ŋ̄ chō yɛ̄ nu̍m chīīmbūūwo̍? Lā chō ya̍ chīīmbūūwo̍ o̍ kēlā nyāla̍ŋ ni᷄ŋ, a̍ o̍ kēlā lēbōlta̍ŋ yɔ̄ŋgōo̍ ni᷄ŋ. 9Sēndi̍o̍o̍ chō le̍ nya̍ a̍ lɛ̄ŋndē nyāle̍ŋ kpo̍u̍, kāni̍ fo̍ndōle̍, le̍ mɛ̄ɛ̍ nya̍ lɛ̄ŋnde̍ŋ kpo̍u̍ lā chō ya̍ chīīmbūūwo̍ yɛ̍. 10Lā hu̍ŋ a̍ kēlā nyāla̍ lēbōlta̍ŋ kpo̍u̍ o̍ fo̍ndā kɛ̄sīāā nyɛ̄ dīa̍a̍ o̍ chīɛ̍i̍ nūu̍, o̍ ko̍ŋ, mī nyɛ̄ dīa̍a̍ ō wa̍ o̍ chīɛ̄ī nūu̍ cha᷅po̍. Lā tɔ̄ɔ̄nda̍ŋ ndɔ̍ ya̍ mī lā chē, tē i̍ ku̍mbī ni̍ŋ wu̍ndɛ̄i̍la̍ŋ o̍ fo̍ndāŋ nūu̍ chōo̍ cho̍o̍, mī I̍ dɔ̍ū nya̍ sa̍lā, mī I̍ ke̍ nya̍ nyɛ̄ dīa̍a̍ ta̍u̍ ta̍u̍ mbō hīōū mɛ̄ɛ̍ nya̍ yēēma̍ yɛ̍ le̍. 11Ndu̍yɛ̍, mī to̍sa̍ dɛ̄lūa̍a̍ tɛ̍ɛ̍mbūū lɛ̍ tɔ̍lɔ̄ɔ̄lā nyāla̍ŋ te̍. Kīle̍pīi̍ma̍ nyāa̍ŋ mā wā ni̍ŋ ko̍mɔ̄ɔ̍ lɔ̍pī lɔ̍pī. Ya̍ Mɛ̄lɛ̄ka̍ Ya̍a̍wɛ̄ɛ̍ nɔ̍ kpāāyāa̍ kpo̍u̍ wo̍, ya̍ so̍ō ni̍. 12O̍ ko̍ŋ kɔ̍ɔ̍lī, lɛ̄ŋnde̍ o̍ chi̍e̍ēŋndo̍ ni᷄ŋ kpo̍u̍ ī vēēlū ni̍ŋ nya̍ māā, wānāā Mɛ̄lɛ̄ka̍ ō dɔ̄ū sa̍lāa̍ wa̍. Kāni̍ fo̍ndōle̍, lɛ̄ŋndē nyāle̍ŋ lē wā ni̍ŋ lɛ᷅ŋndē kɛ̄ndɛ̄lē wāŋnda̍ ā yēēmā ni̍ŋ cha̍lle̍ ni᷄ŋ nde̍ŋ.”
Mɛ̄lɛ̄ka̍ chūe̍l wānāā ndūa̍a̍ būŋgɛ̄i̍ le̍ nda̍ nyīɛ̍ɛ̍ye̍ tūīīnɔ᷄ŋndo̍
13Mɛ̄lɛ̄ka̍ Ya̍a̍wɛ̄ɛ̄ di̍mi̍ āā, “Lā sōō bɔ̄ɔ̍ di̍ōmndā wɔ̄ɔ̍ŋnda̍ŋ a̍ ya̍ o̍kɔ̄ɔ̄. Kɛ̍ mi̍ lā nyūnā āā, ‘Dīōmndā wɔ̄ɔ̍ŋndā yɛ̄ɛ̍nɛ̍ na̍a̍ ŋ̄ dīmi̍ yɛ̍ a̍ nūm o̍kɔ̄ɔ̄?’ 14Lā bīī mi̍ lā dīmī māā, Mɛ̄lɛ̄ka̍ sāāŋgīāllo̍ nyɛ̄ fo̍ndō fu̍u̍ o̍ cho̍ ni̍. Sāwāla̍ Mɛ̄lɛ̄ka̍ la̍ŋ chūa̍a̍ ni̍, nyɛ̄ o̍ di̍mu̍l na̍a̍ wo̍ tōsāa̍ ni̍, a̍ mɔ̍nɛ̍i̍ bīyɔ̄ɔ̍ le̍ yɔ̄ŋndā wɔ̄ɔ̍ŋndā na̍a̍ ŋ̄ tōsa̍ a̍ Mɛ̄lɛ̄ka̍ Ya̍a̍wɛ̄ɛ̍ nɔ̍ kpāāyāa̍ kpo̍u̍ wo̍ la̍ŋ, ɔ̍ɔ̄ tɔ̄nɔ̍ na̍a̍ ŋ̄ sɔ̄lā le̍ni̍ŋ ndo̍? 15Mɛ̄ɛ̍ na̍a̍ ŋ̄ chē bɛ̍ɛ̍ yɛ̍, wānāā yōŋgāa̍ nda̍ Mɛ̄lɛ̄ka̍ dūāū sa̍lā ni̍. Wānāā dɛ̍nɛ̍ wɔ̍ɔ̍ŋnda̍, ō cho̍ wɔ̍ dɛ̍nɛ̍ kɛ̍ndɛ̄ nda̍ sɔ̄lā wo̍ le̍, kɛ̍ mā tɔ̄ɔ̄nda̍ŋ bɛ̍ɛ̍ Mɛ̍lɛ̄ka̍, ndu̍yɛ̍ mā fūla᷄ŋ le̍ni̍ŋ”
16O̍ ko̍ŋ kɔ̍ɔ̍lī, wānāa̍ nɔ̍ sīōōŋīi̍ Mɛ̄lɛ̄ka̍ Ya̍a̍wɛ̄ɛ̄ ve̍ wa̍, ma̍ sūūki̍āŋ nda̍ pi̍la̍ tɛ̄ɛ̄ŋ, ndu̍yɛ̍ mi̍ Mɛ̄lɛ̄ka̍ Ya̍a̍wɛ̄ɛ̄ o̍ ya᷅ŋ nda̍ lānī o̍ nyɛ̄ nda̍ dīmī wo̍. Ndu̍ o̍ hɔ̄l, ma̍ pōōnyīāā wānāa̍ nda̍ a̍a̍ nɔ̍ sīōōŋīi̍ Mɛ̄lɛ̄ka̍ Ya̍a̍wɛ̄ɛ̄ ve̍, ndu̍yɛ̍ ma̍ nɔ̄ bɛ̄ɛ̄le̍ŋ ndɔ̄le̍ŋ nda̍ dīōla̍ŋ o̍ yāu̍wo̍ chōo̍, le̍ lōōnɔ᷄ŋndo̍ a̍ nda̍. 17Mi̍ Mɛ̄lɛ̄ka̍ Ya̍a̍wɛ̄ɛ̄ di̍mī āā, “Wānāā nīa̍a̍ nda̍ chō ni̍. Wānāa̍ cho̍ ā hɛ̄līāā le̍ mī hu̍ŋ tu̍i̍i̍nu᷄ŋ nda̍ īnyīɛ̍ɛ̍ o̍ pāa̍le̍ ya̍ I̍ du̍a̍ūnūŋ ni̍ŋ tu̍mbo̍o̍ le̍ŋ chōo̍ wa̍ nda̍ chō ni̍. Ndu̍yɛ̍ I̍ cho̍ nda̍ ba̍ŋa̍ mɛ̄ɛ̍ wāŋndo̍ ō bāŋā nu̍a̍ā po̍ ndɔ̍ wa᷅ ndu̍ wa̍llo̍ o̍ bā bɛ̄ŋgu̍ wo̍ yɛ̍. 18Wānāā nīa̍a̍ chō vɛ̄lɛ̄ yɛ̍ yi̍ɔ̍ɔ̍ chɔ̄ wānāa̍ cho̍ sa̍kpō wa̍ tɛ̄ɛ̄ŋ, a̍ wānāā dɛ̍nɛ̍ wɔ̍ɔ̍ŋnda̍, ndu̍yɛ̍ mā chē vɛ̄lɛ̄ yɛ̍ yi̍ɔ̍ɔ̍ wānāa̍ sa̍a̍ŋgīāl la̍ wa̍ tɛ̄ɛ̄ŋ, a̍ wānāa̍ sa̍a̍ŋgīāl la̍ le̍ wa̍.”
Currently Selected:
Māla̍kāī 3: YM
Highlight
Share
Copy
Want to have your highlights saved across all your devices? Sign up or sign in
Kisi Bible © Bible Society in Liberia, 2015.