JUAN 19
19
1Jich te jPilatoe la yakꞌ bael te Jesuse sok la yakꞌ ta majel. 2Te soltaroetike la xotik chꞌix la yaꞌbeyik skoronain ta sjol te Jesuse, y la slapbeyik jlik mam najtꞌil tsajal kamixal. 3Te nax a la stsob sbaik tal ta stojol, sok lijk yalbeyik:
—¡Viva te rey yuꞌun te juriyoetike! —xchiik ta yikꞌtinel. Y la smajbeyik te yelawe.
4Chaꞌlokꞌ xan tal te jPilatoe, y la yaltalanbe:
—Ila awilik, ya jlokꞌes tal te winike. Ya me anaꞌik a te ni maꞌyuk a jtabe smule —xchi.
5Jicha lok xan tal te Jesuse. Skoronainej tal te xotbil chꞌix ta sjole y slapoj tal te mam najtꞌil tsajal kamixale. Te jPilatoe la yal:
—¡Awilik te winik to! —xchi.
6Kꞌalal la yilik te stataletik yuꞌun te saserdoteetike sok te polisiaetike, lijk yawutayik:
—¡Mila ta krus! ¡Mila ta krus! —xchiik.
Te jPilatoe la yaltalanbe:
—Ikꞌaik bal abi, ban milaik ta krus atukelik. Porke te joꞌone ni maꞌyuk a jtabe smul —xchi.
7Te juriyoetike la sjakꞌtalanik:
—Te joꞌotike ay mantaliletik kuꞌuntik te ya yal a te tut ya yichꞌ milele, porke ya yal sba te jaꞌ xNichꞌan Dios ta skꞌope —xchiik.
8Kꞌalal la yaꞌi te jPilatoe, lijk xiꞌuk xan yuꞌun. 9Chaꞌoch xan bael te ba spalasioe. Jicha kꞌo sjojkꞌobe xan te Jesuse:
—¿Ba talemat? —xyut.
Pero te Jesuse ni jpꞌaluk a sjakꞌbe.
10Te jPilatoe la yalbe:
—¿Tut yuꞌun te ma xꞌajakꞌbon te jkꞌope? ¿Me yuꞌun maꞌ anaꞌojuk te kichꞌoj kaꞌtel te ya xjuꞌ ya kakꞌat ta milel ta krus, sok te ya xjuꞌ ya jkolesat bale? —xchi.
11Jich te Jesuse la sjakꞌbe:
—Maꞌyuk awaꞌtel kuꞌun te manchuk yakꞌojbeyat awaꞌtel te Diose. Jaꞌ yuꞌun te machꞌa la yakꞌon entregale, jaꞌ mas ay smul stukel ke te jaꞌate —xchi.
12Mismo tiempo a te jPilatoe lijk snop tut ya yut ya skoles bael te Jesuse. Pero te juriyoetike la yawutayik:
—Teme ya akoles bale, yuꞌun nanix maꞌ awamigouk a te César te mukꞌul rey ta Romae. Te machꞌa ya skuy sba ta reye, jaꞌ skontra te César te mukꞌul rey ta Romae —xchiik.
13Kꞌalal la yaꞌi te jPilatoe, la yakꞌ mantal te ya xlokꞌesot tal te Jesuse. Y te nax a ba snajkan sba te ba ya xchapawane, te Gabata sbiil ta hebreo-kꞌop, te “Limbil Pejchel Tonetik”, xchi kꞌoem. 14Nopolix ol kꞌaal a, te tut kꞌaalil ya xchap sbaik yuꞌun te kꞌin Pascuae. Te jPilato la yalbe te juriyoetike:
—¡Awilik te Rey awuꞌunike! —xchi.
15Pero te juriyoetike lijkik ta aw:
—¡Bajtuk ta milel! ¡Bajtuk ta milel ta krus! —xchiik.
Te jPilato la sjojkꞌolanbe:
—¿Me ya wan spas ya kakꞌ ta milel ta krus te rey awuꞌunike? —xchi.
Te stataletik yuꞌun te saserdoteetike la sjakꞌbeyik:
—Te joꞌotike maꞌyuk yan rey kuꞌuntik, jaꞌ nax te César te ay ta Romae —xchiik.
16Jich te jPilatoe la yakꞌ entregal te Jesuse yuꞌun ya xba milek ta krus, y jich a yikꞌik bael.
Jojkꞌanot ta krus te Jesuse
17Te Jesuse xkuchoj lokꞌel te skruse. Bajt te ba ay te Bakeljolol sbiil te luware, te Gólgota sbiil ta hebreo-kꞌope. 18Teꞌ sjojkꞌanik ta krus a. Sok ay chaꞌtul te jojkꞌanot ta krus soke, juju-tul ta juju-jejch. 19Te jPilato la yal mantal te ya xba kꞌojbek jilel jun letrero ta sjol te kruse te jich ya yale: “Jesus yuꞌun Nazaret, Rey yuꞌun te juriyoetike”, xchi te letreroe. 20Bayal juriyoetik la skꞌoponik tut xyal te letreroe, porke te luwar te ba laj sjojkꞌanike serka ay sok te jtejklume. Te letreroe tsꞌibabil ta oxkaj kꞌop: ta hebreo sok ta latin sok ta griego. 21Jaꞌ yuꞌun te statal-saserdoteetik yuꞌun te juriyoetike ba yalbeyik te jPilatoe:
—¿Tuꞌun te la atsꞌibay: “Te Rey yuꞌun te juriyoetike”? Jaꞌ lek te lauk atsꞌibay: “Jaꞌ te machꞌa la skuy sba ta rey yuꞌun te juriyoetike”, te xchiuke —xchiik.
22Pero te jPilatoe la sjakꞌtalanbe:
—Te tuti jtsꞌibaye, jaꞌ nax abi —xchi.
23Kꞌalal jokꞌolix ta kruz yuꞌunik te Jesuse, te soltaroetik la stambeyik te skꞌuꞌ-spakꞌe. Chantul yajwal a lokꞌ yuꞌunik a, juju-xejtꞌ te juju-tul soltaroe. Sok la yichꞌbeyik te smam najtꞌil kamixe te ma tsꞌisbiluk te jalbil ta spojkꞌol naxe. 24Te soltaroetik la yalbe sbaik:
—Makꞌ ya jchꞌiꞌtik. Ya kiltik machꞌa ay suerte ya sta bael —xchiik.
Jicha kꞌot ta pasel te tut tsꞌibabil jilel ta Sjun te Diose: “La spuk sbaik a te jkꞌuꞌ-jpakꞌe, y la yilik machꞌa ay suerte yuꞌun te ya sta bael te jman najtꞌil kamixe”, te xchie. Jich a spasik te soltaroetike.
25Te ba yanil skrus te Jesuse teꞌ tekꞌel a te smeꞌe, sok te yijtsꞌin smeꞌe, sok te xMaria te yinam Cleofase, sok te xMaria Magdalenae. 26Te Jesuse la yil te smeꞌ te teꞌ tekꞌel sok a te jnopojel te ben kꞌux a yaꞌi sba soke. La yalbe te smeꞌe:
—Jmeꞌ, jaꞌ me awal ya xkꞌot te ya awile —xchi.
27Te nax a la yalbe te jnopojele:
—Jaꞌ me ameꞌ ya xkꞌot te ya awile —xyut. Mismo tiempo a te jnopojele la yikꞌ ta sna.
Jicha cham te Jesuse
28Te Jesuse snaꞌoj te spisil a juꞌix yuꞌun ta pasele. Yuꞌun jich ya xkꞌot ta pasel a te tut tsꞌibabil jile, la yal:
—Takin koꞌtan —xchi.
29Ay waxal jun xaru teꞌa, nojel ta chꞌaal bino. La smulik ta chꞌaal bino te esponjae, sok la slujtanik ta sniꞌ teꞌ, te isopo sbiile. La slutik moel sok la yaꞌbeyik ta stiꞌ te Jesuse. 30Te Jesuse la spas prewa te chꞌaal binoe, y la yal:
—Spisil a juꞌix ta pasel —xchi. Te nax a la stsꞌinan ta koel te sjole y lokꞌ xchꞌulel.
Jtul soltaro la slowbe ta lansa skostiya te Jesuse
31Te tutꞌil skꞌaalelix a te ya xchap sbaik yuꞌun te kꞌin Pascuae, jich te juriyoetike ma skꞌanik te teꞌ jokꞌol ta krus te stiꞌbalul te winketike ta skꞌaalel te kuxo-oꞌtane, yuꞌun ben tulan skꞌoplal te skꞌaalel kuxo-oꞌtan to. Jaꞌ yuꞌun la skꞌambeyik te jPilato te yauk yal mantal ta kꞌajtalanel te yokike sok te yauk xkoesbot ta ora te stiꞌbalulike. 32Jicha bajt te soltaroetike y ba skꞌajbe yok te primero aye sok te jtul xane te pajal jokꞌol sok ta krus te Jesuse. 33Pero kꞌalal tijilajik bael te ba ay te Jesuse, chamenix a yilik. Jich ma skꞌajbeyikix a te yok stukele. 34Pero te jtul soltaroe la slowbe ta lansa te skostiyae, y ora nax a lokꞌ tal chꞌichꞌ sok tojol jaꞌ. 35Te machꞌa la yil te jicha kꞌot ta pasele jaꞌ testigo yuꞌun. Ma slotuk te tut ya yale. Sok snaꞌoj te batsꞌi jich te tut ya yale, yuꞌun jich me ya achꞌuunik a te jaꞌexe. 36Porke spisil te tuti kꞌot ta pasele, yuꞌun me jich tsꞌakal a spas kumplir a te tut tsꞌibabil jilel ta Sjun te Diose te jich ya yale: “Ni jchꞌixuk sbakel ya yichꞌ kꞌajel stukel”, xchi me. 37Sok ay xan yan te jich tsꞌibabil jilel ta Sjun te Diose te jich ya yale: “Ya me yil ta sitik te machꞌa la slowike”, xchi me.
La yichꞌ mukel te Jesuse
38Ay jtul winik Jose sbiil, te talem ta chꞌin jtejklum Arimatea, te ay ta jnopojel yuꞌun Jesus. Pero mukul nax ay, yuꞌun ya xiꞌ te statal juriyoetike. Te Josee ba skꞌanbe permiso te jPilatoe te yauk yichꞌbe bael stiꞌbalul te Jesuse. Te jPilatoe la yakꞌ permiso, y te Josee ba yichꞌbe bael stiꞌbalul te Jesuse. 39Sjoyinej euk te jNicodemoe, te xtaluk skꞌopon ta ajkꞌubal te Jesuse. Yichꞌoj kꞌoel treinta kilo wan perpume te kapbil ta mirra sok loe. 40Jich te Josee sok te jNicodemoe la yichꞌbeyik bael stiꞌbalul te Jesuse. La xpixik bael ta sakil pakꞌ y la xpoxtabeyik ta mirra sok loe te ben bujtsꞌan yikꞌe. Jich ay te skostumbre juriyoetik te ya smuk sbaike. 41Ay jun huerta te ba luwar ba jojkꞌanot ta krus te Jesuse. Te ba yolil te huertae ay pasbil jun xchꞌenal jchamel te ma to ayuk machꞌa mujkem ae. 42Teꞌ ba yaꞌbeyik jil a te stiꞌbalul Jesuse, yuꞌun tijil nax ay a. Porke nopolix a te skꞌaalel kuxo-oꞌtan yuꞌun te juriyoetike.
Currently Selected:
JUAN 19: AMANNT
Highlight
Share
Copy
Want to have your highlights saved across all your devices? Sign up or sign in
Nuevo Testamento Tzeltal de Amatenango © Sociedad Bíblica de México, 2006.