Ageo 1
1
1Kat ikadwa na ngayti nga taꞌun it pagꞌadiꞌ ni Dario, iyan uꞌnang aldaw it ikaꞌnem nga bulan, miyabut i ampang it AMPUꞌANG DIYUS duꞌun it prupitaꞌ nga si Ageo. Piyapaꞌaduꞌun ya it anak ni Sealtiel nga si Zorobabel, nga gubirnadur it Juda, baw duꞌun gasiꞌ it anak ni Josadac nga si Josue,#1:1 Ituy esang panggetaꞌ it ki Jesua. nga Piyakamataꞌas nga Sasirduti. 2Magꞌaat i ipiyasugid it AMPUꞌANG DIYUS nga ampang ya, “Ituy ampang it AMPUꞌANG DIYUS nga landaw nga gunaan, ‘Pirmi nga ligwatan it itu nga bangsa, maat, ega paꞌ timpu nga ipatindeg sit sumaꞌup i Templo.’”
3Bawnga itu siꞌ i inaat it AMPUꞌANG DIYUS nga ipiyasugid ya it prupitaꞌ ngayti nga si Ageo, 4“Unuka atkaytu nga magagayen baw eman nga eman i kababalayan mit imyu temed piyabayaꞌan mi lamang nga ranggaꞌ i aken nga balay? 5Aypaꞌ, kayti, aku nga AMPUꞌANG DIYUS nga landaw nga gunaan i magꞌaat nga kaꞌilangan panawun it pikiran mi i kabetangan mi, kabetangan nga biyaraꞌan it ipagpadaꞌeg mi ngayan it kaꞌirgan ku i sadili mi nga kaꞌirgan. 6Dadakulaꞌ na nga ipagluwak mi, temed dekeyeꞌ i magkapatbasan. May pagkaꞌnen mi nga matuud, temed pagkurangen kamu naga, atnaga i pagꞌimnun. May pakayan mi na, temed pagꞌesben naga it ramig. Matuud nga may magkapanulusan it mga manigbuwat, temed magkapanulusan nira ngaytu, subung na lamang it lusut nga baꞌay i pagrugdan.
7Aku nga AMPUꞌANG DIYUS nga landaw nga gunaan i magsugid kaytu, magayen, pikiren mi in unuka talaga magꞌabut it imyu i atkaytu ngaytu. 8Sigi, mangurtiꞌ kamu na it kayu duꞌun it bukid, ka buwaten mi na i ranggaꞌ ngayan nga Templo, isaꞌun duꞌun siꞌ bantugun aku it katataawan. Sikayan makasagya aku siꞌ yan. 9Talagang pagꞌiꞌinawaren mi nga dakulay mapatbasan mi, arit yanagayang dekeyeꞌ. Baw in idawaꞌ mi na, subung it pagꞌeypan ku nga ipagperad. Ta, unuka magꞌabut tu it imyu i atkaytu? Sabap it imyu lamang nga mga balay i pagpaꞌresan mi nga pagpagayenen, temed aken, piyabayaꞌan mi lamang nga ranggaꞌ i Templo nga papagsambaang balay ku. 10Aypaꞌ ka ipagpapanaw ku nga maski tugpuꞌ, ega magpanugpuꞌ i asan it imyu, baw ega gasiꞌ magkaꞌgen i ipagluwak mi.”
Currently Selected:
Ageo 1: TBWONT
Highlight
Share
Copy
Want to have your highlights saved across all your devices? Sign up or sign in
© 1992, Wycliffe Bible Translators, Inc. All rights reserved.