Injil 1: Moti 3
3
Hozrot Isae ḳam shuru ḳorla (3:1-4:25)
Hozrot Ehia (a:)or toblig
1Ou shomoy Ehudia zilar morubumit aia Ehia nobie toblig korla, 2“Touba ḳoro, duniar maze behesti bashshai salu oite ar beshi deri nae.” 3Ou Ehia nobir befare-u Ishaya nobie age bataisla,
Morubumir maze eḳzon manshe
zure zure elan ḳorra,
‘Tumra malikor fot sohi koro,
tan solar rasta oḳol shida ḳoro.’
4Ehia nobie to uṭor rumor ḳafoṛ findita ar ḳomro samṛar belṭ bandita. Tain faṛia mou ar foring kaita. 5Tan toblig hunar lagi asta Ehudia zila, Zeruzalem ṭaun ar Zordan gangor sairobae taki bout manush tan gese aila. 6Aia zarzir guna shikar ḳorla, bade tain erare Zordan gango toubar gusol ḳoraila.
7Tain deḳla, toubar gusol ḳorar lagi bout Forishi ar Siddekia mozobor manush-o tan gese aira. Ou tain ḳoila, “O hafor baichchain, asmani gozob aior dekia zan basanir fot tumrare ḳegie batai dilo? 8Tumra zudi hasaror touba ḳoria taḳo, te er fol-o deḳao. 9Mone mone ḳoio na, tumra Ibrahimor aolad. Huno, ami koiram, Allae saile to ou fattor oḳol taki-u Ibrahimor aolad banaita farba. 10Gasor guṛit to kuṛal lagail-u ase. Ze gaso bala fol dore na, i gas ḳaṭia agunit falail oibo.
11“Touba ḳorso gotike ami tumrare fanidi gusol ḳorailam, oile amar bade aro eḳzon aira, ein ama tone-o himmot-ala, tan faor zuta boar laḳ-o ami nae. Tain aia tumrare Pak Ruhu ar aguindi gusol ḳoraiba. 12Tan kula to tan ato-u ase, ikan dia tain dan uaia ugaro tulba, ar susare ou agunit falaia zalaiba, ze aguin kunu shomoy nibto nae.”
Hozrot Isar pak gusol
13Ou shomoy Galil zila taki Hozrot Isa-o pak gusol ḳorar lagi, Zordan gango Ehia nobir gese aila. 14Oile Ehiae tanre oḳan ḳoia na ḳorla, “Afne aisoin ni amar gese, amar-u zorur asil afnar gese gia gusol ḳora!” 15Isae zuaf dila, “Aichcha, oḳon ola-u ouk, karon amrar usit oilo Allar morzi furon ḳora.” Ikan hunia Ehia razi oigela.
16Pak gusol ḳoria fani taki uṭte-u Isae deḳla, asman dui bag oigese, ar Allar Ruhu faror surot doria tan ufre lamia aira. 17Ou shomoy asman tone gaibi aoaz oilo, “Ein-u amar ḳas mayar zon Ibnulla, en ufre ami kub kushi.”
Currently Selected:
Injil 1: Moti 3: sylL
Highlight
Share
Copy
Want to have your highlights saved across all your devices? Sign up or sign in
© Ahle Kitab Society. All rights reserved.