ꠀꠍꠝꠣꠘꠤ ꠇꠤꠔꠣꠛ: ꠞꠥꠔ 4
4
ꠢꠎꠞꠔ ꠛꠥꠀꠎꠞ ꠟꠉꠦ ꠛꠤꠛꠤ ꠞꠥꠔꠞ ꠡꠣꠖꠤ
1ꠛꠤꠀꠘꠦ ꠃꠑꠤꠀ ꠛꠥꠀꠎ ꠉꠣꠃꠞ ꠙꠣꠁꠘ꠆ꠌꠣꠁꠔꠤ ꠛꠂꠑꠇ ꠈꠣꠘꠣꠔ ꠀꠁꠀ ꠛꠁꠞꠁꠟꠣ, ꠝꠘꠦ ꠝꠘꠦ, ꠢꠃ ꠇꠥꠐꠥꠝꠞ ꠛꠣꠞ ꠌꠣꠁꠞꠣ ꠎꠣꠞ ꠇꠕꠣ ꠔꠣꠁꠘ ꠇꠁꠍꠟꠣ। ꠀꠈꠔꠣꠃ ꠖꠦꠈꠟꠣ, ꠢꠃ ꠝꠣꠘꠥꠡ ꠙꠕꠦꠖꠤ ꠀꠐꠤꠀ ꠎꠣꠁꠞꠣ, ꠖꠦꠈꠤꠀ ꠔꠣꠁꠘ ꠄꠘꠞꠦ ꠒꠣꠇ ꠖꠤꠀ ꠇꠁꠟꠣ, “ꠅ ꠜꠣꠁ ꠍꠣꠛ, ꠅꠛꠣꠄ ꠕꠥꠠꠣ ꠢꠥꠘꠤ ꠎꠣꠅ।” ꠔꠦꠃ ꠢꠦꠁꠘ ꠀꠁꠟꠣ, 2ꠀꠞ ꠛꠥꠀꠎꠦ ꠉꠣꠃꠞ ꠛꠥꠎꠖꠣꠞ ꠝꠄ-ꠝꠥꠞꠛ꠆ꠛꠤ ꠖꠡ ꠎꠘꠞꠦ ꠀꠘꠤꠀ ꠛꠅꠀꠁꠟꠣ। 3ꠛꠁꠀ ꠢꠣꠞꠟꠦ ꠛꠥꠀꠎꠦ ꠢꠇꠟꠞ ꠍꠣꠝꠘꠦ ꠢꠃ ꠎꠘꠞꠦ ꠇꠁꠟꠣ, “ꠘꠄꠅꠝꠤ ꠛꠦꠐꠤꠄ ꠝꠥꠀꠛ ꠖꠦꠡ ꠕꠣꠇꠤ ꠚꠤꠞꠤꠀ ꠀꠁꠀ ꠅꠈꠘ ꠀꠝꠞꠣꠞ ꠇꠥꠐꠥꠝ ꠀꠟꠤ ꠝꠣꠟꠤꠇꠞ ꠎꠣꠉꠣ-ꠎꠝꠤꠘ ꠅꠔꠣ ꠛꠦꠌꠤꠟꠣꠁꠔꠣ ꠌꠣꠁꠞꠣ। 4ꠀꠝꠤ ꠢꠇꠟꠞꠦ ꠄꠇꠟꠉꠦ ꠖꠟꠣ ꠇꠞꠍꠤ, ꠔꠦ ꠔꠥꠝꠤ ꠅꠁꠟꠣꠄ ꠔꠣꠘ ꠇꠞꠤꠛ ꠝꠣꠘꠥꠡ, ꠄꠞꠟꠣꠉꠤ ꠅꠃ ꠝꠥꠞꠛ꠆ꠛꠤ ꠅꠇꠟ ꠀꠞ ꠉꠥꠡ꠆ꠐꠤꠞ ꠢꠇꠟꠞ ꠍꠣꠝꠘꠦ ꠅꠈꠘꠣꠁꠘꠔꠣ ꠈꠣꠟꠣꠍ ꠇꠞꠣꠞ ꠟꠣꠉꠤ ꠔꠥꠝꠤ ꠟꠁꠟꠣꠅ। ꠀꠞ ꠔꠥꠝꠤ ꠎꠥꠖꠤ ꠘꠣ ꠘꠦꠅ, ꠔꠦ ꠀꠝꠣꠞꠦ ꠇꠅ, ꠀꠝꠤ ꠘꠤꠝꠥ। ꠁ ꠙꠞꠤꠛꠣꠞꠞ ꠟꠣꠉꠤ ꠔꠥꠝꠤꠃ ꠛꠠ ꠇꠞꠤꠛ, ꠄꠞꠛꠣꠖꠦ ꠅꠁꠟꠣꠝ ꠀꠝꠤ।” ꠁꠈꠣꠘ ꠢꠥꠘꠤꠀ ꠢꠦꠁꠘ ꠇꠁꠟꠣ, “ꠀꠁꠌ꠆ꠍꠣ, ꠀꠝꠤ ꠟꠁꠝꠥꠘꠦ।”
5ꠔꠦꠃ ꠛꠥꠀꠎꠦ ꠃꠑꠤꠀ ꠇꠁꠟꠣ, “ꠔꠦ ꠔꠥꠝꠤ ꠀꠞꠅ ꠄꠇꠈꠣꠘ ꠇꠣꠝ ꠇꠞꠔꠦ ꠅꠁꠛ, ꠔꠥꠝꠤ ꠘꠄꠅꠝꠤ ꠛꠦꠐꠤꠞ ꠎꠝꠤꠘꠞ ꠟꠉꠦ ꠇꠞꠤ ꠝꠞꠣꠞ ꠈꠣꠘ꠆ꠖꠣꠘꠈꠣꠘ ꠇꠣꠁꠝ ꠞꠣꠈꠣꠞ ꠟꠣꠉꠤ, ꠔꠣꠞ ꠠꠣꠠꠤ ꠛꠃ ꠝꠥꠀꠛ ꠖꠦꠡꠞ ꠞꠥꠔꠞꠦꠅ ꠡꠣꠖꠤ ꠇꠞꠣ ꠟꠣꠉꠛ।” 6ꠔꠦꠃ ꠢꠦꠁꠘ ꠎꠥꠀꠙ ꠖꠤꠟꠣ, “ꠘꠣ, ꠔꠦ ꠀꠝꠤ ꠙꠣꠞꠔꠣꠝ ꠘꠣꠄ। ꠀꠞꠘꠣꠄ ꠀꠝꠣꠞ ꠘꠤꠎꠞꠔꠣ ꠟꠁꠀꠃ ꠜꠦꠎꠣꠟ ꠟꠣꠉꠤꠎꠤꠛ। ꠀꠞ ꠀꠝꠤ ꠎꠦꠛꠟꠣ ꠙꠣꠞꠤꠀꠞ ꠘꠣ, ꠔꠦ ꠀꠙꠘꠦꠃ ꠁꠔꠣ ꠉꠍꠤꠟꠣꠃꠇ꠆ꠇꠣ।” 7-8ꠅꠈꠣꠘ ꠇꠁꠀ ꠢꠣꠞꠤ ꠢꠤ ꠀꠝꠟꠞ ꠡꠞꠤꠅꠔꠞ ꠀꠁꠘ, ꠀꠞ ꠁꠍꠞꠣꠁꠟ ꠡꠝꠣꠎꠞ ꠇꠥꠐꠝꠞ ꠎꠣꠉꠣ-ꠎꠝꠤꠘ ꠈꠞꠤꠖ-ꠛꠤꠇꠤꠞ ꠞꠦꠅꠀꠎ ꠝꠣꠚꠤꠇ ꠢꠦꠁꠘ ꠔꠣꠘ ꠙꠣꠅꠞ ꠎꠥꠔꠣ ꠈꠥꠟꠤꠀ ꠛꠥꠀꠎꠞꠦ ꠖꠤꠟꠣꠁꠟꠣ, ꠀꠞ ꠇꠁꠟꠣ, “ꠀꠙꠘꠦꠃ ꠁꠔꠣ ꠟꠁꠟꠣꠃꠇ꠆ꠇꠣ।” 9ꠔꠦꠃ ꠛꠥꠀꠎꠦ ꠇꠁꠟꠣ, “ꠔꠦ ꠀꠝꠤ ꠝꠄ-ꠝꠥꠞꠛ꠆ꠛꠤ ꠀꠞ ꠛꠣꠇꠤ ꠢꠇꠟꠞꠦ ꠡꠣꠇ꠆ꠇꠤ ꠞꠣꠈꠤꠀ ꠇꠁꠀꠞ, ꠀꠝꠤ ꠘꠄꠅꠝꠤ ꠛꠦꠐꠤꠞ ꠉꠦꠍ ꠕꠘꠦ ꠀꠟꠤ ꠝꠣꠟꠤꠇꠞ ꠢꠇ꠆ꠇꠟꠔꠣ ꠀꠞ ꠔꠣꠘ ꠖꠥꠁ ꠙꠥꠀ ꠝꠢꠟꠥꠘ ꠀꠞ ꠇꠤꠟꠤꠅꠘꠞ ꠢꠇ꠆ꠇꠟꠔꠣꠅ ꠟꠁꠟꠤꠟꠣꠝ। 10ꠀꠞ ꠝꠞꠣ ꠝꠣꠘꠡꠞ ꠘꠣꠝ ꠎꠤꠘ꠆ꠖꠣ ꠞꠣꠈꠣꠞ ꠟꠣꠉꠤ, ꠔꠣꠞ ꠗꠘ-ꠍꠣꠝꠣꠘꠣ ꠀꠞ ꠎꠝꠤ-ꠝꠤꠞꠣꠡ ꠛꠣꠌꠣꠘꠤꠞ ꠟꠣꠉꠤ ꠀꠝꠤ ꠝꠢꠟꠥꠘꠞ ꠠꠣꠠꠤ ꠛꠃ ꠝꠥꠀꠛ ꠖꠦꠡꠞ ꠞꠥꠔꠞꠦꠅ ꠇꠛꠥꠟ ꠇꠞꠤꠟ꠆ꠟꠣꠝ, ꠎꠣꠔꠦ ꠁ ꠉꠣꠃ ꠀꠞ ꠉꠥꠡ꠆ꠐꠤꠞ ꠝꠣꠎꠦ ꠝꠞꠣꠞ ꠘꠣꠝꠈꠣꠘ ꠇꠣꠁꠝ ꠞꠄ। ꠀꠁꠎ ꠀꠙꠘꠣꠞꠣ ꠁꠔꠣ ꠢꠇ꠆ꠇꠟꠔꠣꠞ ꠡꠣꠇ꠆ꠇꠤ ꠞꠁꠟꠣ।”
11ꠔꠦꠃ ꠝꠎꠟꠤꠍꠞ ꠢꠇꠟꠦ ꠇꠁꠟꠣ, “ꠅꠄ, ꠀꠝꠞꠣ ꠁꠔꠣꠞ ꠡꠣꠇ꠆ꠇꠤ ꠞꠁꠟꠣꠝ।” ꠅꠈꠣꠘ ꠇꠁꠀꠃ ꠔꠣꠞꠣ ꠖꠥꠀ ꠇꠞꠟꠣ, “ꠅꠃ ꠎꠦ ꠇꠁꠘꠣꠞꠦ ꠀꠙꠘꠦ ꠇꠛꠥꠟ ꠇꠞꠟꠣ, ꠝꠣꠛꠥꠖꠦ ꠁꠀꠇꠥꠛ ꠘꠛꠤꠞ ꠖꠥꠁ ꠛꠤꠛꠤ ꠞꠣꠢꠦꠟꠣ ꠀꠞ ꠟꠦꠀ, ꠎꠦ ꠖꠥꠁꠎꠘꠦ ꠀꠡ꠆ꠔꠣ ꠛꠘꠤ ꠁꠍꠞꠣꠁꠟ ꠎꠣꠔꠤꠞꠦ ꠉꠠꠤꠀ ꠔꠥꠟꠍꠦ, ꠄꠞꠣꠞ ꠟꠣꠈꠣꠘꠃ ꠁ ꠇꠁꠘꠣꠞꠦ ꠃꠎꠤꠟꠣ ꠇꠞꠃꠇ꠆ꠇꠣ। ꠀꠡ꠆ꠔꠣ ꠛꠦꠕꠦꠟꠢꠣꠝ ꠉꠣꠃꠔ ꠀꠙꠘꠣꠞ ꠡꠥꠘꠣꠝ ꠛꠣꠠꠃꠇ, ꠁꠚ꠆ꠞꠣꠕꠣ ꠉꠥꠡ꠆ꠐꠤꠞ ꠝꠣꠎꠦ ꠀꠟ꠆ꠟꠣꠄ ꠀꠙꠘꠣꠞꠦ ꠗꠘꠤ-ꠍꠣꠝꠘꠤ ꠛꠣꠘꠣꠃꠇ। 12ꠞꠥꠔꠞ ꠙꠦꠐꠅ ꠕꠣꠇꠤ ꠀꠟ꠆ꠟꠣꠄ ꠀꠙꠘꠣꠞꠦ ꠎꠔ ꠀꠅꠟꠣꠖ ꠖꠤꠛꠣ, ꠄꠞꠣ ꠎꠣꠘꠥ ꠔꠣꠝꠣꠞ ꠀꠞ ꠄꠢꠥꠖꠣꠞ ꠙꠥꠔ ꠚꠤꠞꠥꠎꠞ ꠈꠣꠘ꠆ꠖꠣꠘꠞ ꠟꠣꠈꠣꠘ ꠅꠁꠘ।”
13ꠛꠥꠀꠎꠦ ꠛꠤꠛꠤ ꠞꠥꠔꠞꠦ ꠡꠣꠖꠤ ꠇꠞꠤꠀ ꠔꠣꠘ ꠛꠣꠠꠤꠔ ꠟꠁꠀ ꠉꠦꠟꠣ, ꠔꠣꠞꠣ ꠖꠥꠁꠅꠎꠘꠦ ꠊꠞ-ꠡꠋꠡꠣꠞ ꠇꠞꠟꠣ, ꠛꠣꠖꠦ ꠝꠣꠛꠥꠖꠞ ꠞꠢꠝꠔꠦ ꠔꠣꠞꠣꠞ ꠄꠇ ꠙꠥꠀ ꠅꠁꠟ। 14ꠔꠦꠃ ꠀꠞꠤ-ꠚꠞꠤꠞ ꠛꠦꠐꠤꠘ꠆ꠔꠦ ꠀꠁꠀ ꠢꠥꠞꠥꠔ꠆ꠔꠣ ꠖꠦꠈꠤꠀ ꠘꠄꠅꠝꠤꠞꠦ ꠇꠁꠟꠣ, “ꠀꠟꠢꠣꠝꠖꠥꠟꠤꠟ꠆ꠟꠣ, ꠔꠥꠝꠣꠞꠦ ꠉ ꠡꠥꠘꠣ, ꠀꠟ꠆ꠟꠣꠄ ꠀꠁꠎ ꠀꠎꠣꠖ ꠇꠞꠣꠞ ꠟꠣꠉꠤ ꠄꠇ ꠘꠄꠀ ꠎꠣꠝꠣꠁ ꠖꠤꠍꠂꠘ। ꠀꠡ꠆ꠔꠣ ꠁꠍꠞꠣꠁꠟ ꠖꠦꠡ ꠎꠥꠠꠤ ꠄꠘ ꠡꠥꠘꠣꠝ ꠅꠃꠇ। 15ꠄꠁꠘ ꠔꠥꠝꠣꠞꠦ ꠛꠥꠠꠣ ꠇꠣꠟꠅ ꠚꠥꠞꠚꠥꠞꠣ ꠇꠞꠤ ꠔꠥꠟꠃꠇ꠆ꠇꠣ, ꠛꠥꠠꠤꠞ ꠈꠦꠎꠝꠔ ꠇꠞꠃꠇ꠆ꠇꠣ। ꠔꠥꠝꠣꠞ ꠙꠥꠔꠞ ꠅꠃ ꠛꠃ ꠔ ꠔꠥꠝꠣꠞ ꠟꠣꠉꠤ ꠡꠣꠔ ꠙꠥꠀ ꠕꠣꠇꠤꠅ ꠖꠣꠝꠤ, ꠔꠣꠁ ꠔꠥꠝꠣꠞꠦ ꠖꠤꠟꠦ-ꠎꠣꠘꠦ ꠝꠣꠄꠀ ꠇꠞꠦ, ꠅꠃ ꠛꠃꠞ ꠙꠦꠐ ꠕꠘꠦꠃ ꠁ ꠀꠅꠟꠣꠖꠞ ꠎꠘꠝ ꠅꠁꠍꠦ।” 16ꠔꠦꠃ ꠛꠤꠛꠤ ꠘꠄꠅꠝꠤꠄ ꠁ ꠘꠣꠔꠤꠞꠦ ꠃꠞꠅ ꠟꠁꠀ ꠔꠣꠞ ꠎꠄ-ꠎꠔꠘ ꠇꠞꠟꠣ। 17ꠀꠞ ꠀꠞꠤ-ꠚꠞꠤꠞ ꠛꠦꠐꠤꠘ꠆ꠔꠦ ꠒꠋ ꠇꠞꠤ ꠇꠁꠔꠞꠣ, “ꠅꠈꠘ ꠘꠄꠅꠝꠤꠄ ꠄꠇ ꠘꠄꠀ ꠢꠣꠁ ꠙꠣꠁꠍꠦ।” ꠇꠁꠀ ꠔꠣꠞꠣ ꠁ ꠉꠦꠖꠣ ꠛꠣꠁꠌ꠆ꠌꠣꠞ ꠘꠣꠝ ꠞꠣꠈꠟꠣ ꠃꠛꠣꠄꠖ। ꠃꠛꠣꠄꠖꠞ ꠙꠥꠀꠞ ꠘꠣꠝ ꠁꠀꠍ, ꠀꠞ ꠁꠀꠍꠞ ꠙꠥꠀꠞ ꠘꠣꠝ ꠢꠎꠞꠔ ꠖꠣꠃꠖ।
ꠛꠤꠛꠤ ꠞꠥꠔꠞ ꠙꠘ꠆ꠔꠤ ꠢꠎꠞꠔ ꠖꠣꠃꠖ (ꠀ꠩)
18ꠅꠃ ꠅꠁꠟ ꠁꠀꠇꠥꠛꠞ ꠘꠣꠔꠤ ꠚꠤꠞꠥꠎꠞ ꠈꠣꠘ꠆ꠖꠣꠘ-ꠘꠣꠝꠣ। ꠚꠤꠞꠥꠎꠞ ꠙꠥꠀꠞ ꠘꠣꠝ ꠢꠣꠍꠤꠞ, 19ꠢꠣꠍꠤꠞꠞ ꠙꠥꠀ ꠞꠣꠄꠀꠝ, ꠞꠣꠄꠀꠝꠞ ꠙꠥꠀ ꠀꠝꠤꠘꠣꠖꠣꠛ, 20ꠀꠝꠤꠘꠣꠖꠣꠛꠞ ꠙꠥꠀ ꠘꠣꠢꠤꠡ, ꠘꠣꠢꠤꠡꠞ ꠙꠥꠀ ꠍꠦꠟꠤꠝ, 21ꠍꠦꠟꠤꠝꠞ ꠙꠥꠀ ꠛꠥꠀꠎ, ꠛꠥꠀꠎꠞ ꠙꠥꠀ ꠃꠛꠣꠄꠖ, 22ꠃꠛꠣꠄꠖꠞ ꠙꠥꠀ ꠁꠀꠍ, ꠁꠀꠍꠞ ꠙꠥꠀ ꠢꠎꠞꠔ ꠖꠣꠃꠖ॥
Currently Selected:
ꠀꠍꠝꠣꠘꠤ ꠇꠤꠔꠣꠛ: ꠞꠥꠔ 4: sylN
Highlight
Share
Copy
Want to have your highlights saved across all your devices? Sign up or sign in
© Ahle Kitab Society. All rights reserved.