Matta 8
8
Yesu Woi Ka Anyasan Gna Gbo-gbo
1Shi Yesu ɓo shin zhi n ʼpe, aza mwa begye ɓa vi wo shin zhi. 2Ho gye! Kuturu ɓelo. Wa ya shi wa ga Yesu mwa-mwa, wa gna, “Eza dnagmayi, n ha ye, ho ɓa mi ha kami gna.”
3Yesu wa towo bwa wa gna, “Mi lla ye, gwo kagna.” Nsayi-sayi Ikuturu nyasan fa wo.
4Yesu wa gna wo ge, “To kpe gni ha daɓo n zaho-zahoi yi m, lo ho wu hohin na malami aba, ha lo n nya gai shi, ngye shi Musa, wa da tu naza ɓo n kuturu nyasan ku ɓa fa, ntu seda ɓo naza ɓa gye ho la kagna bwa.”
5-6 Yesu wa lo Kafarnafum, Romayi za-asoja tukwo da, wa ɓe wo aba wa gyi wo wye ge wo ɓe wo puwa wa ka wo ɓi gna n wo shi n nyasan yi, n nayi fi-fiyi.
7Yesu wa gna, “E, miɓa ɓe ma ka wo gna.”
8-9 A soja tukwoda ci ge, “Eza dnagmayi, mi to kunce lo ha ɓe mi puwan, (kwoi to zhin tile nu ha ɓe m.) Mi kpe lo ge n ha bwa ho nya gni ya ha cige, ‘Wo kagna.’ Emi fyenu ɓa bwa lafiya. Ntu ge mihin mi dna n iko sinta nu, aza lo n kpe n mi she. Mi n ikoi lo tu mi a soja tukwo, esa n ma gna eza deye ge lo, wa lo, eza do ɓe, wa ɓe. Ma ci mi fyenu nugbayi zhin deye, wa zhin. Mi kpe lo ho ikoi lo ha gna, wo nyasan ge kwo lo, kwa lo.”
10Yesu wa kpe gni cei wo-wo. Wa igna aza yezhi. “Dna Israila kni vinya, mi to shin gye eza n gaiciya gai la yi m. 11Ma gna fye, abye do n mwa begye (ngye Romayi za ye) ɓa ɓei kun n nanyi laɓa ɓa ɓe Shekwoyi bemi, ɓa sase n Ibrahim yi, n Ishaku yi, n Yakubu yi.” 12Ama aza n obe zhin ɓa nya nyi, a ɓei ku ɓa she ya fi nwyegma, aba nɓa ɓei cibwi ɓai gyi anyikna.
13Yesu wa gna Romayi soja tukwoda ge, “Lo apyi, kwo ku zhin ngye shi ha ga gaiciya.” Dna sahi, eɓi ho, wa kagna.
14Yesu wa lo Bitrus puwa, wa gye Bitrus yezhi nyikwoza da wangye tu n gado, n nayi nagnu yi zagyi. 15Ama Yesu wa to wo bwa nyasan kwa wo fa, wa laka wa zhin ɓa- nyagyi.
16N wyeshe yi aɓe nazafun nukwoyi dayi n Yesu aba, shi Yesu ɓo daɓo kawai azafun nukwoyi ɓa busi, anyasan yi vinya ɓa gwo kagna. 17Deye ɓo ku nu anabi Ishaya ɓo da ge, “Wa la eya nyasan tu wohin.”
Anuwan Kma Ngun Aba-ba
18Shi Yesu ɓo gye aza yezhi ɓai mwa, wa gna wa bara ge ɓa zhin shiri ɓa piya lo kmayi. 19Esa fyewyi a Yahudawayi Malami ho wa ɓe wa gna, “Malam miɓa vi ho abaho-bahoyi ha lo.”
20Ama Yesu a ci ge, A cam-cam nɓa bai lo, alu nɓa ma yi lo, ama Emi, Masihu, to napi lo n mi ɓa dna imihim tukwo m.
21Owo viyi ho wa je ci ge, “Zadnagmayi, pmi mi la mi dada bi kpa.”
22Ama Yesu wa gna wo, “Vi mi n sayiye, Fa aza nɓa fi-fiyi dna n zafun ɓa bi aje.”
23Wa lo dna n ʼya wa ya piya ɓedo n wa bara yi. 24Sa fyewyi ese kwa laka n kala yi n nuwan dokwo yi har to ai gye eya wye m. Ama Yesu ɓei la wangye.
25Abara lo ɓa yi wo ge wo kun agyewyi ɓai nawyi ge, “Dagayi, gni yi! Gye yi ye ya bwi nuwan.”
26Yesu wa ci ɓa ge, efye agaiciya-gai ɓi-ɓiyi da, kniyi nu zhin fyei wo edna? Wa laka wa gnakni ese, n nuwan yi, har ɓa ce pi.
27Ce a wo abara ɓa nya ge, “Nkanu n za deye yi har ese n nuwan yi ɓai wo wo ɓeda?”
28Shi ɓa ɓo si kmayi dna Gadara ʼkni a zafun nukwoyi da ngun aba ɓa shegun ɓa. Oɓa sese ba na vingwo nu, aza to ɓo zhin ɓa mi diya n bwayi m, ntuge ɓa ga aza wahala.
29Ɓa ya aku fi, “Ho ye kniyi n ʼya, O Shekwoyi Nugun? Esa to si n ho ɓa ga yi wahala n cei kpa m.”
30A burutu garke ɓei fyi ɓai gya nyagyi n kpai. 31A zafun nukwoyi a gna Yesu ge, “N ha kun yi ya, ha tnu yi na burutu garke yi.”
32Yesu wa gna ɓage, “To fye kunya lo.” Ɓa knu na zahi ɓa lo fyi na burutu, aburutu vinya ɓa ku bwi nuwan. 33A burutu knayi ɓa busi lo zhimi n nabariyi ɓo kwa zhin. 34Aza vinya knu ɓe ɓa gye Yesu. Ɓa gna wo ge wo lo, wa ɓa kni fa ɓa.
Currently Selected:
Matta 8: GAW
Highlight
Share
Copy
Want to have your highlights saved across all your devices? Sign up or sign in
Alkawali Woiwoyi
(Gbagyi New Testament)
Copyright © 1997 by Biblica, Inc.®
All rights reserved worldwide.