Sailm 34
34
1Iehòbhah beannaicheam gu h-àrd,
gach aimsir is gach tràth:
A chliù ’s a mholadh ann am bheul
gu h-iomraiteach a-ghnàth.
2Is anns an Tighearna ro-threun
nì m’anam uaill is glòir:
Na daoine sèimh’, tràth chluinneas siud,
nì gàirdeachas gu mòr.
3Ardaichibh leamsa Dia nam feart,
molamaid ainm le chèil’:
4Dh’iarr mise Dia, chual’ e, is bhuin
mi as gach gàbhadh geur.
5Dh’amhairc iad air, is dhealraich iad;
gun nàire air an gruaidh.
6Do ghlaodh am bochd, is dh’èisd ris Dia,
is dh’fhuasgail as gach truaigh’.
7Tha aingeal Dhè a’ campachadh
mun dream don eagal e,
Gam fuasgladh is gan teasairginn
on trioblaidibh gu lèir.
8O blaisibh agus faicibh seo,
gur math ’s gur milis Dia:
Am fear sin ’s beannaicht’ e gu beachd
a dh’earbas as an Triath.
9Fìor eagal Dhè, biodh oirbh, a naoimh;
oir uireasbhaidh no dìth
Cha bhi air a luchd eagail-san,
fìor-chràbhadh dha a nì.
10Bidh easbhaidh air na leòmhnaibh òg’,
is acras orr’ air leth;
Ach air an dream a dh’iarras Dia
cha cheilear aon nì math.
11Thigibh, a chlann, is èisdibh rium:
dhuibh nochdam eagal Dhè.
12Cò ’m fear lem b’àill bhith fada beò,
chum math gum faiceadh e?
13Coimhead do theanga fhèin on olc,
’s o labhairt ceilg’ do bheul.
14Seachain an t-olc, is dèan am math:
iarr sìochaint, ’s lean gu geur.
15Tha sùilean Dhè air fìreanaibh,
’s a chluas rin glaodh gu fìor.
16Tha gnùis Dhè ’n aghaidh daoi, a-chum
an cuimhne sgrios à tìr.
17Do ghlaodh na fìreanan ri Dia,
is dh’èisd e riu gu grad;
Thug furtachd agus fuasgladh dhaibh
on àmhgharaibh air fad.
18Don mhuinntir ga bheil cridhe brùit’
is dlùth dhaibh Dia gun cheist:
Nì esan furtachd fòs don dream
ga bheil an spiorad brist’.
19Is lìonmhor trioblaid agus teinn
thig air an fhìrean chòir;
Ach asd’ air fad nì Dia nan gràs
a theasairginn fa-dheòidh.
20A chnàmhan uile coimhdidh e:
chan eil a h-aon dhiubh brist’.
21Ach marbhaidh olc an duine daoi,
is claoidhear e gun cheist:
Is luchd an fharmaid, a bheir fuath
do dhaoinibh còir is ceart,
Mòr-chiontach fàgar iad nan lochd,
dì-mhilltear iad gu beachd.
22Anam a sheirbhiseach gu lèir
saor-fhuasglaidh Dia gach àm;
Cha mhillear idir neach dhiubh siud
chuireas an dòchas ann.
Currently Selected:
Sailm 34: SD1826
Highlight
Share
Copy
Want to have your highlights saved across all your devices? Sign up or sign in
Sailm Dhaibhidh 1826 (le litreachadh ùr 2000)
© Comann Bhìoball na h-Alba (Scottish Bible Society) 2000