Mattá 7
7
Ér janag o irázgiri
(Luká 6:41–42)
1Degarán ér majanét o iráz magerét, tánke shomá ér janag mabét. 2Anchosh ke shomá degarán éra janét, hamé paymá shomá ér janaga bét o gón har kayl o paymánahéá ke bedayét, gón hamá kaylá shomárá dayaga bit. 3Chéá wati brátay chammay pilláshká#7:3 Pilláshk, bezán bucchok, prishk, bákasay dhillay kasterén chondh. genday, bale wati chammay bondhá nagenday? 4Tará ke bondhé chammá ent, chón wati brátá gwashta kanay: ‘Bell ke tai chammay pilláshká dara kanán’? 5Oo dopóstén shatalkár! Pésará wati chammay bondhá dar kan, randá tai chamm pacha bit o wati brátay chammay pilláshká kassheta kanay.
Kochekk o teláhén tawk
6Pák o palgárén chizzán kochekkán madayét o wati morwáredán hukkáni démá maperrénét. Chó mabit ke áyán lagatmál bekanant o per betarrant o shomay jendá derr o drásh bekanant.
Lóthóká rasit
(Luká 11:9–13)
7Belóthét, shomárá dayaga bit. Shóház bekanét, dara géjét. Darwázagá bethokkét, pacha bit. 8Chéá ke harkas belóthit, áiá rasit. Harkas shóház bekant, dara géjit. Harkas darwázagá bethokkit, pa áiá pacha bit. 9Shomay nyámá choshén peté hast ke agan áiay chokk nán belóthit dhóké bedanti? 10Yá agan máhig belóthit máré bedanti? 11Shomá ke radkár ét, angat wati chokkán sharrén chizzáni dayagá zánét. Gorhá shomay ásmáni Pet chinkadar shartera zánt ke wati lóthókén chokkán wasshén chizz bedant.
Teláhén parmán
(Luká 6:31)
12Paméshká, har kárá gón degarán hamá dhawlá néki bekanét ke lóthét á dega ham gón shomá bekanant. Sharyat o nabiáni gapp o habar hamesh ent.
Tankén darwázag
(Luká 13:24)
13Cha tankén darwázagá bepoterét. Chéá ke práhén darwázag o práhén ráh, gári o bégwáhiay némagá bárt o bázéné hamá ráhá zurit. 14Bale tank ent á darwázag o grán ent á ráh ke zenday némagá bárt o é ráhay rawók ham kamm ant.
Drachk o bar
(Luká 6:43–45)
15Cha drógén paygambarán hozzhár bebét. Á, méshay póstá gwará kanant o shomay kerrá káyant bale cha bon o béhá derrókén gork ant. 16Shomá cha áyáni kerdá áyán pajjáha kárét. Cha dhangarán#7:16 Dhangar, bezán bébarén konthagi drachk o dár. angur o cha dhóloká#7:16 Dhólok, bezán gyábáni konthagi jarré. enjir chenaga bit? 17Sharrén drachk, sharrén bar o nibaga kárit o sellén drachk sellén bar o nibaga kárit. 18Sharrén drachk, sellén bar áworta nakant o sellén drachk sharrén bar dáta nakant. 19Drachké ke sharrén bara nayárit, goddhag o sóchaga bit. 20Paméshká áyán cha barán pajjáha kárét.
21Hamá ke maná ‘Hodáwand, Hodáwanda’ gwashant, pa á sajjahénán ásmáni bádsháhiay darwázag pacha nabit, tahná hamá shota kant ke mani ásmáni Petay wáhag o razáay sará kára kant. 22Wahdé á rócha kayt bázéné maná gwashit: ‘Hodáwand, oo Hodáwand! Má gón tai námá paygambari nakortag? Gón tai námá cha mardomán jenn nakasshetagant o gón tai námá bázén ajabén kár pésh nadáshtag?’ 23Gorhá man áyán rásténa gwashán: ‘Oo badkárán! Man hechbar shomárá pajjáh nayáwortag, cha mani démá dur bebét.’
Zántkári o názánti
(Luká 6:47–49)
24Paméshká, harkas ke mani é habarána eshkont o áyáni sará kára kant, hamá zántkár o hóshmandén mardomay paymá ent ke wati lógi taláray#7:24 Talár, bezán mohr o mazanén seng, sengén kóhi thokkor. sará bast. 25Hawr but, hár o hirróp átk, purr o syahgwátán gón á lógá dhikk wárt, bale lóg nakapt, chéá ke áiay bonred#7:25 Bonred, bezán lóg yá diwáléay awali o johlterén red. taláray sará ér kanag butagat. 26Bale kasé ke mani habarán gósha dárit o áyáni sará kára nakant, hamá hórh o kamzántén mardomay dhawlá ent ke wati lógi rékáni sará bast. 27Hawr but, hár o hirróp átk, purr o syahgwátán gón á lógá dhikk wárt, lóg kapt o pahk wayrán but.”
28Wahdé Issáyá é habar halás kortant, mardománi mocchi cha áiay dars o sabakkán hayrán but o bah mantant,#7:28 Bah mánag, bezán sakk hayrán bayag, boh bayag. 29chéá ke áiá Sharyatay zánógeráni paymá darsa nadát, gón wák o ehtiáré tálimia dát.
Currently Selected:
Mattá 7: HPKB
Highlight
Share
Copy
Want to have your highlights saved across all your devices? Sign up or sign in
© 2015-2022, Wycliffe Bible Translators, Inc. and the Balochi Bible Translation Team. All rights reserved.