Mattá 3
3
Pákshódókén Yahyáay kolaw
(Markás 1:1–8; Luká 3:1–17)
1Á róchán, pákshódókén Yahyá átk o Yahudiahay gyábáná jári perrént: 2“Cha wati gonáhán pashómán bebét o tawbah bekanét, chéá ke ásmáni bádsháhi nazzikk ent.” 3Yahyá hamá ent ke Eshayá nabi áiay bárawá gwashit:
Gyábáná, kasé gwánka jant:
Hodáwanday ráhá tayár o,
áiay keshká rást o tachk bekanét. # 3:3 Eshayá Nabiay Ketáb 40:3.
4Yahyáyá cha oshteray pothán gwaptagén póshák gwará at o póstén kamarbandé lánká bastagat. Áiay ward o warák, madag o gyábáni bénag#3:4 Bénag, bezán asal. at. 5Urshalimay nendók, Yahudiahay sajjahén damagay mardom o Ordonay kawray kerr o gwaray jahmenend áiay kerrá shotant. 6Wati gonáháni pashómániesh záher kort o Yahyáyá Ordonay kawrá pákshódi dátant.#3:6 É Yahyá at ke pákshódia dáti.
7Wahdé Yahyáyá dist ke Parisi o Saduki rombay bázén mardom pákshódi geragá áiay kerrá áyagá ant, gón áyán gwashti: “Oo syahmárzádagán! Kayá shomárá dháh dátag ke cha Hodáay áyókén kahr o gazabá rakketa kanét?! 8Anchén kár bekanét cha áyán paddar bebit ke shomá pa del cha wati gonáhán pashómán butagét. 9Cha wati delá é habará dar bekanét ke ‘má Ebráhémay nasl o óbádag én.’ Man shomárá gwashán ke Hodá cha é seng o dhókán ham, pa Ebráhémá chokk o óbádag pédá korta kant. 10Nun tapar tayár ent ke drachkán cha boná begoddhit o har drachké ke sharrén bara nayárit, goddhag o ásá dawr dayaga bit.
11Man pa shomay gonáháni pashómániá, shomárá gón ápá pákshódia dayán, bale hamá ke cha man o rand áyagi ent, cha man zórmandter ent o man áiay kawsháni dast geragay láhek ham naán. Á shomárá gón Pákén Ruh o ásá pákshódia dant. 12Áiá cha bucch o pogán dánay jetá kanag o gisshénagá, hanshóné#3:12 Hanshón dáré ke pa dán o pogáni jetá kanagá kármarza bit. dastá ent. Jóháná#3:12 Jóhán, bezán kesháráni moshag o dánáni mocch kanagay jágah. pák o sallaha kant o dánán ambárá éra kant, bale pog o palárán anchosha sóchit ke ásesh hechbara namerit.”
Issáay pákshódi
(Markás 1:9–11; Luká 3:21–22; Yuhanná 1:31–34)
13Gorhá Issá cha Jalilay damagá dar átk o Yahyáay dastá pákshódi geragá Ordonay kawrá shot. 14Bale Yahyáyá johd kort áiá pa é kárá maylit o gwashti: “Báyad man cha tai dastá pákshódi begerán, taw chón mani gwará káay?” 15Issáyá gwasht: “Annun bell ke anchosh bebit, é paymá Hodáay razáyá sarjama kanén.” Gorhá áiá mannet o Issái pákshódi dát. 16Wahdé Issáyá pákshódi gept o cha ápá dar átk, anágat ásmánay dap pach but o Hodáay Pákén Ruhi dist ke kapótéay dróshomá#3:16 Dróshom, bezán shekl. átk o áiay sará ér nesht. 17Cha ásmáná tawáré átk: “É mani dóstén Bacch ent o man cha eshiá báz wassh o razá án.”
Currently Selected:
Mattá 3: HPKB
Highlight
Share
Copy
Want to have your highlights saved across all your devices? Sign up or sign in
© 2015-2022, Wycliffe Bible Translators, Inc. and the Balochi Bible Translation Team. All rights reserved.