Mattá 13
13
Tohm chandhagay mesál
(Markás 4:1–9; Luká 8:4–8)
1Hamá róchá, Issá cha lógá dar átk o mazangwarmay kerrá shot o nesht. 2Mardománi anchén mazanén rombé átk o áiay kerrá mocch but ke á bójigéá swár but o nesht. Sajjahén mardom gwarmay lambá óshtátagatant. 3Gorhá áiá mardománá gón darwar#13:3 Darwar, bezán matth, mesál, paym, dhawl. o mesálán bázén dars o sabakké dát. Gwashti: “Dehkáné tohmay chandhagá shot. 4Tohmáni chandhagay wahdá kammé tohm ráhay sará retk, báli morg átkant o chet o wártantesh. 5Kammé tohm dhal o dhókáni tahá retk ke ódá hák kamm at. Zutt rostant, chéá ke hák tanakk at. 6Bale cha róchay trondén garmiá gimmort#13:6 Gimmorag, bezán hoshk tarrag, napasgir bayag. o hoshk butant, chéá ke áyáni risshag o wandhál#13:6 Wandhál, bezán hondhál, risshag o rótag. johl nashotagatant. 7Kammé tohm cherekk o dhangaráni tahá ham retk, cherekk rostant o tohmesh rodagá naeshtant. 8É dega tohm sharrén zeminá retkant, rostant o hóshag o baresh dát, jáhé sad sari#13:8 Sad sari, bezán sad barábar., jáhé shast sari o jáhé si sari. 9Harkasá gósh per, beshkont.”
Hodáay bádsháhiay ráz
(Markás 4:10–12; Luká 8:9–10)
10Morid áiay kerrá átkant o jostesh kort: “Taw chéá gón mardomán pa darwar o mesál habara kanay?” 11Áyáni passawá gwashti: “Parchá ke Hodáyá é zánt shomárá dátag ke ásmáni bádsháhiay rázán sarpad bebét, bale áyáná nadátagi. 12Hamáiá ke chizzé hast, áiá géshter dayaga bit, tánke áiá báz bebit, bale kaséá ke nést, hamá ke hastenti ham, pach geraga bit. 13Man paméshká pa darwar o mesál gón áyán habara kanán ke á chárant bale nagendant, góshesh pach ant bale naeshkonant o sarpad ham nabant. 14Eshayá nabiay péshgói é mardománi bárawá rást o sarjam bayagá ent ke gwashit:
Shomá eshkonét, bale sarpada nabét,
chárét, bale nagendét.
15 Chéá ke é kawmay del seng tarretag,
góshesh grán ant,
wati chammesh bastagant.
Agan esháni chammán bedistén o
góshán beshkotén,
agan esháni delá bezántén o
sarpad buténant o dém pa man byátkénant,
man dráh kortagatant. # 13:15 Eshayá Nabiay Ketáb 6:9–10.
16Bale bahtáwar ant shomay chamm ke gendant o shomay gósh ke eshkonant. 17Shomárá rásténa gwashán, bázén paygambar o pahrézkáréá lóthetag ke harché shomá gendagá ét, má ham bedistén bale nadistesh o harché shomá eshkonagá ét, má ham beshkotén bale naeshkotesh.
Tohm chandhagay mesálay maksad
(Markás 4:13–20; Luká 8:11–15)
18Nun dehkánay mesálay mánáyá gósh bedárét. 19Wahdé kasé Hodáay bádsháhiay habará eshkont bale sarpada nabit, gorhá Shaytána kayt o harché ke áiay delá keshag butag, áyán dara kant o bárt. Esh at ráhay sará retkagén tohmáni mesálay máná. 20Á tohm ke dhal o dhókáni tahá retkant, hamá mardomay mesál ent ke Hodáay habará eshkont o hamá damáná pa gal o shádeha mannit, 21bale é sawabá ke risshag o wandháli najatag, Hodáay habar áiay delá tán dérá namánit. Wahdé Hodáay habaray sawabá sakki o sóriána kapit yá ázáré rasiti, hamá damáná cha ráhá thagalit o kapit. 22Á tohm ke cherekk o dhangaráni tahá retkant, hamá mardomay mesál ent ke Hodáay habará eshkont, bale donyái parésháni o mál o zarray delkasshi o préb áiá rada dayant o naylant ke Hodáay habar besabzit o bar o samar bedant. 23Bale á tohm ke sharrén zeminá retkant, hamá mardomay mesál ent ke Hodáay habará gósha dárit o sarpada bit o bar o samara dant, bázéné sad sari, bázéné shast sari o bázéné si sari.”
Zahrichkay mesál
24Issáyá áyáná dega mesálé dát. Gwashti: “Ásmáni bádsháhi, hamá mardomay paymá ent ke wati dhagárá sharrén tohmi keshtagat, 25bale wahdé mardom wáb atant, dozhmené átk o gandománi tahá zahrichkay#13:25 Zahrichk káhé ke zahri mán. tohmi rétk o shot. 26Wahdé gandom rostant o hóshagesh áwort, zahrichk ham rost o mazan butant. 27Nun nawkar átkant o gón wati wájahá gwashtesh: ‘Oo wájah! Taw wati dhagárá sharrén tohm nakeshtagat? Gorhá é zahrichk cha kojá átkant?’ 28Gwashti: ‘Dozhmenéá é kár kortag.’ Nawkarán jost kort: ‘Taw lóthay ke má berawén o áyán begwajén?’ 29Passawi dát: ‘Na, chó mabit ke zahrichkáni gwajagay wahdá shomá gandomán ham begwajét. 30Tán ronagay wahdá belli hórigá rodant, ronagay wahdá gón ronókána gwashán: “Pésará zahrichkán begwajét o pa sóchagá grámband bekanét, randá gandomán byárét o mani ambárá ér kanét.”’”
Kasterén tohmay mesál
(Markás 4:30–32; Luká 13:18–19)
31Issáyá áyáná dega mesálé dát. Gwashti: “Ásmáni bádsháhi, thélkáhay tohmay dhawlá ent ke kaséá zort o wati dhagárá kesht. 32Chónáhá áiay tohm cha é dega tohmán kaster ent, bale wahdé rodit, cha é dega sabzagán#13:32 Sabzag, bezán káh. borzter, drachkéay kaddá bit o báli morg áiay ták o tháláni#13:32 Thál, bezán sháharh, sháhal. sará kodóha bandant.”
Homiray mesál
(Luká 13:20–21)
33Issáyá áyáná dega yakk mesálé dát. Gwashti: “Ásmáni bádsháhi hamá homiray paymá ent ke janénéá zort o gón bázén ártéá#13:33 Asligén Yunáni nebeshtánka gwashit: “say sátá”, bezán 15 kiluá gésh. hawár kort o kamm kammá sajjahén árt gwát gept.”
34Issáyá gón mardománi mocchiá é sajjahén habar gón darwar o mesálán kortant, bé mesálá gón áyán hecchi nagwasht. 35É dhawlá nabiay kortagén é habar rást o sarjam but:
“Man gón darwar o mesálán wati dapá pacha kanán o
anchén habara kanán
ke cha donyáay pédáeshá beger tán annun
chér o andém butagant.” # 13:35 Zabur 78:2.
Zahrichkay mesálay máná
36Nun Issáyá mardom roksat kortant o lógay tahá shot. Ódá morid áiay gwará átkant o gwashtesh: “Márá dhagáray zahrichkay mesálay mánáyá sarpad kan.” 37Gwashti: “Hamá ke sharrén tohma keshit, Ensánay Chokk ent. 38Dhagár donyá ent. Sharrén tohm ásmáni bádsháhiay chokk ant o zahrichkay tohm Shaytánay chokk ant. 39Hamá dozhmen ke zahrichkay tohmi dhagárá rétkant, Shaytán ent. Kesháray rónay wahd áheratay róch ent o kesháray ronók#13:39 Ronók, bezán hamá ke keshárá borrit o moccha kant. préshtag ant. 40Anchosh ke zahrichk mocch kanag o ásá sóchaga bant, áheratay róchá ham hamé dhawlá bit. 41Ensánay Chokk wati préshtagán ráha dant tánke sajjahén radkárán o hamáyán ke degarán dém pa gonáhá barant, yakjáh bekanant o cha áiay bádsháhiá dar bekanant. 42Áyán ásay kurahá#13:42 Kurah, mazanén chollé ke ódá ásay tahá kunzag, matth o dega chizza pachant. dawra dayant ke ódá gréwag o peryát o zária bit. 43Á wahdá pahrézkár wati Petay bádsháhiá róchay paymá drapshant.#13:43 Drapshag, bezán shahm janag, jalashkag. Harkasá gósh per, beshkont.”
Ásmáni bádsháhiay dega say mesál
44“Ásmáni bádsháhi ganjéay paymá ent ke dhagáréá chér dayag butagat. Wahdé kaséá dar gétk, gal but o padá chéri dát o shot o harché ke áiá hastat, bahái kortant o hamá dhagári pa bahá zort.
45Hamé dhawlá, ásmáni bádsháhi sawdágeréay paymá ent ke dhawldárén morwáredáni shóházá at. 46Wahdé áiá gránkimatén morwáredé dast kapt, shot o harché ke áiá hastat bahái kortant o hamá morwáredi gept.
47Hamé dhawlá ásmáni bádsháhi hamá dám o máhóréay dhawlá ent ke gwarmá dawresh dát o dámá har paymén máhig gept. 48Wahdé dám cha máhigá porr but, cha gwarmá daresh kort. Padá neshtant o sharrén máhigesh dar chetant o saptán#13:48 Sapt, bezán sabad, mazanén challi, sáchi. kortant o harábénesh dawr dátant. 49Áheratay róchá ham anchosha bit. Préshtaga káyant o badkárán cha pahrézkárán jetá kanant. 50Badkárán ásay kurahá dawra dayant ke ódá gréwag o peryát o zária bit. 51Shomá é sajjahén habarán sarpad butét?” Áyán passaw dát: “Ji haw.” 52Gón áyán gwashti: “Paméshká Sharyatay har zánóger ke ásmáni bádsháhiay moridé bit, hamá lógwáhonday dhawlá ent ke cha wati ganj o hazánagá har paymén nók o kwahnén chizza kasshit o kárit.”
Issá padá Náserahá pera tarrit
(Markás 6:1–6; Luká 4:16–30)
53Wahdé Issáyá é mesál halás kortant, cha ódá dar kapt. 54Wati jenday shahrá átk o óday kanisahá mardomán tálim dayagá lagget. Mardomán pa hayráni gwasht: “Eshiá é dánái o mójezah kanagay wák o twán cha kojá rasetag?” 55É hamá dártráshay chokk naent? Eshiay mát Maryam ent o brát Ákub o Issop o Shamun o Yahudá ant. 56Eshiay sajjahén gohár hamedá may kerrá jahmenend ant. Gorhá é sajjahén chizzi cha kojá áwortagant? 57Mardom Issáay sará nawassh butant. Issáyá gwasht: “Nabiá har jágah ezzata rasit, bale wati métag o lógá ezzatia narasit.” 58Gorhá áyáni bébáwariay sawabá ódá bázén mójezahé péshi nadásht.
Currently Selected:
Mattá 13: HPKB
Highlight
Share
Copy
Want to have your highlights saved across all your devices? Sign up or sign in
© 2015-2022, Wycliffe Bible Translators, Inc. and the Balochi Bible Translation Team. All rights reserved.