Mattá 10
10
Issáay dwázdahén hásén kásed
(Markás 3:16–19; 6:8–11; Luká 6:14–16; 9:3–5; 10:4–12)
1Randá Issáyá wati dwázdahén hásén kásed lóthetant o jennáni dar kanag o har dhawlén nádráh o nezórén mardománi dráh kanagay wák o ehtiári dátant. 2Á dwázdahén kásedáni nám esh ant: pésará, Shamun ke Petros ham gwashaga bit o áiay brát Andriás, randá Zebdiay chokk, Ákub o áiay brát Yuhanná, 3Pilipos, Bartulumá, Tumá o máliátgirén Mattá, Halpiay chokk Ákub, Taddá, 4sarmachárén Shamun#10:4 Bázéné gomána kanant ke sarmacháray máná esh ent: Shamun Yahudiáni yakk dini syási párthiéay básk bezán ozw butag ke Rumiáni démá óshtátag. o Yahudá Eskaryuti, hamá ke randá Issái dróhagi#10:4 Dróhag, bezán hamráhdári nakanag, helápá rawag. Arabi o Pársiá “khiánat”. o dozhmenáni dastá dayagi at.
5Issáyá wati é dwázdahén kásed rawán dát, kaddhan kort o gwashtant: “Darkawmáni gwará marawét, á shahrán ham marawét ke ódá Sámeri jahmenend ant, 6bale Bani Esráiliáni kerrá berawét ke á gárén mésháni dhawlá ant.” 7Gwashti: “Har jáh ke rawét, é mestágá sar bekanét ke ásmáni bádsháhi nazzikk ent. 8Nádráhán dráh, mordagán zendag, garrián pák o sallah bekanét o cha mardomán jennán dar bekanét. Shomárá moptá rasetag, moptá ham bedayét. 9Wati lánkbandáni tahá sohr o nograh o ród mán makanét. 10Pa wati sát o sapará turag#10:10 Turag, bezán pélek, lót, pélag. o pélek#10:10 Pélek, bezán turag, lót, pélag. mazurét o na do jámag, na chawath o swás o na asá o dazlatth, chéá ke kár kanók wati mozzay hakdár ent. 11Wahdé shahr yá métagéá rawét, gorhá anchén mardomé shóház bekanét ke shomay mehmán kanagay láhek bebit o tán roksata nabét hamáiay kerrá bedárét. 12Wahdé lógéá rawét, drót o drahbát begwashét o pa á lógá sohl o émeni belóthét. 13Agan á lóga karzit, gorhá shomay émeniay wáhag pa áiá rasit o agan nakarzit, shomay é wáhag padá pa shomá pera tarrit. 14Agan kasé shomárá wasshátka nakant yá shomay habarán gósha nadárit, á lóg yá shahrá bellét o yalah kanagay wahdá, wati pádáni danz o hákán hamódá bechandhét o betakénét. 15Shomárá rásténa gwashán, jost o porsay róchá, Sodum o Gomurahay mardománi sezá cha á shahray mardománi sezá o azábá ásánter o kamtera bit.
Á ke sakkiána saggit, rakkit
(Markás 13:11–13; Luká 21:12–17)
16Gósh dárét! Man shomárá rawána kanán, bale shomá anchosha bét ke gorkáni nyámá pas. Paméshká máráni dhawlá hozzhár o kapódaráni dhawlá sádah bebét. 17Cha mardomán hozzhár bét, á shomárá geráénant o hakdiwánána barant, wati kanisaháni tahá shomárá shallák o hayzarána janant. 18Pa manigi hákem o bádsháháni démá pésh kanaga bét, gorhá shomárá sharrén móhé rasit ke áyáni o darkawmáni démá pa man gwáhi bedayét. 19Á wahdán ke shomá ódá baraga bét, delá paréshán mabét ke ‘ché begwashén’ yá ‘chón passaw bedayén,’ chéá ke harché ódá shomárá gwashagia bit, hamá wahdá shomárá rasit. 20Á wahdá habar kanók shomá nabét, shomay ásmáni Petay Ruh shomay zobáná habara kant.
21Brát wati brátá dróhit o kóshárénit o pet wati chokká, chokk cha wati pet o mátá yágia bant o áyána kóshárénant. 22Sajjahén mardom, pa mani námay sawabá cha shomá naprata kanant. Bale hamá ke tán áherá sakkiána saggit, á rakkit. 23Wahdé shomárá yakk shahréá ázára rasénant gorhá betachét o dega shahréá berawét. Shomárá rásténa gwashán, tánke shomá Esráilay sajjahén shahrán sar bebét, man ke Ensánay Chokk án, pésará káyán.
24Na shágerd cha wati ostádá mastera bit o na golám cha wati hodábondá.#10:24 Hodábond, bezán wájah, wáhond, málek, sáheb. 25Shágerdá haminchok bass ent ke wati ostáday paymá bebit o golám wati hodábonday paymá. Wahdé lógay hodábondesh Belzabul#10:25 Belzabul, bezán jennáni bádsháh. gwashtag, gorhá lógay é dega mardomán allam badterén nám pera bandant.
Rásti chér dayaga nabit
(Luká 12:2–9)
26Shomá cha á mardomán matorsét, chéá ke hecch choshén chérén chizzé nést ke záher o paddar mabit o hecch choshén rázé nést ke áshkár o démdará mabit. 27Hamá habarán ke man gón shomá shapay taháriá gwashán, shomá á habarán róchay rozhnáiá begwashét, hamá habar ke halwatá shomay góshán gwashaga bant, á habarán lóg o bánáni sará begwashét o jár janét. 28Cha áyán matorsét ke jesm o jáná koshta kanant, bale sáh o arwáhá koshta nakanant, cha hamáiá betorsét ke jesm o ján o sáh o arwáh, doénán dózhá dawr dát o bérán korta kant. 29Do jenjeshk pa yakk paysahá#10:29 Asligén Yunáni nebeshtánk gwashit: do “asariun.” Asariun, á zamánagay kasterén zarr at. bahá nabit? Bale angat cha áyán yakké ham bé shomay ásmáni Petay zánagá zeminá nakapit. 30Hodáyá shomay saray mudáni hesáb ham gón ent. 31Paméshká matorsét, shomay kadr o arzesh cha sajjahén jenjeshkán#10:31 Asligén Yunáni nebeshtánk gwashit: “bázén jenjeshkán”. géshter ent. 32Harkas mardománi démá maná bemannit, man ham wati ásmáni Petay démá áiá mannán, 33bale harkas mardománi démá maná mamannit, man ham wati ásmáni Petay démá áiá namannán.
Hakk o náhakkay gisshénagá átkagán
(Luká 12:51–53; 14:26–27; 17:33)
34Gomán makanét ke man donyáyá tepáki o sohlay áragá átkagán, pa sohl o tepákiá nayátkagán, gón zahméá átkagán. 35Chéá ke man átkagán tán pet o chokkay nyámá, mát o jenekkay nyámá, neshár o wassigay nyámá nátepáki byárán, 36bezán harkasay dozhmen áiay wati mardoma bant. 37Kaséá ke wati pet o mát cha man dósttera bant, á maná nakarzit o kaséá ke wati bachakk o jenekk cha man dósttera bant, á ham maná nakarzit. 38Kasé ke wati salibá baddhá makant o mani hamráh mabit, á ham maná nakarzit. 39Chéá ke, agan kasé wati sáhay dáragay johdá bekant, áiá báhénit,#10:39 Báhénag, bezán gár dayag, cha dast dayag. bale kasé ke pa manigi wati sáhá báhénit, áiá rakkénit.
40Harkas shomárá wasshátk begwashit o sharap bedant, maná sharapa dant o hamá ke maná sharapa dant, á hamáiá sharapa dant ke maná ráhi dátag. 41Agan kasé paygambaréá paméshká wasshátka kant o sharapa dant ke á Hodáay ráh dátagén ent, áiá paygambaréay mozza rasit. Hamé dhawlá, kasé ke pahrézkár o rástén mardoméá pa áiay pahrézkáriá sharap bedant, áiá ham pahrézkárén mardoméay mozza rasit. 42Agan kasé cha é kasánokén moridán yakkéá paméshká tásé ápa dant ke mani morid ent, allam bezánét ke áiá wati mozza rasit.”
Currently Selected:
Mattá 10: HPKB
Highlight
Share
Copy
Want to have your highlights saved across all your devices? Sign up or sign in
© 2015-2022, Wycliffe Bible Translators, Inc. and the Balochi Bible Translation Team. All rights reserved.