Yoana 3
3
Yesu Ekuigisia Nikodemo Kubutua Lingo.
1Kuabezaga muntu umozi wa baFalese, izina liage Nikodemo, abezaga muangati wa baYuda: 2amuvuilide mu kindi, nu amubuide bune, Labi, tukumenya buno uli musozi watukile kua Kalaga; kubuno takuli muntu unavuama kukita migeleko zeno ziukukita, ndi Kalaga nteli nage. 3Yesu amuakuide bune, Lebelebe, lebelebe, nkukubula buno ndi muntu ntabutua lingo, ntanavuama kumona ku bukota bua Kalaga. 4Nikodemo amubuide bune, Buni bunabutua lingo muntu nu ese mukungu? Ndi aningila lingo munda za nina nu kubutua lingo? 5Yesu akuide bune, Lebelebe, lebelebe, nkukubula buno, ndi muntu ntabutua ku mazi nu ku Muuza, ntanavuama kuingila mu bukota bua Kalaga. 6Kiabutua ku mubili nti mubili; nu kiabutua ku Muuza nti kia muuza. 7Ntunangama kuiyuki linakubula buno, buamutunganana kubutua lingo. 8Lumpumpu lukupupa kulukutunda, nu muzumio walo gukungubua, tondo ntukumenya kulukutuka, nu kulukuenda: muntu unsania wabutilue ku Muuza eli bubo. 9Nikodemo atendile bune, Buni bunavuama bubuno? 10Yesu atendile bune, Uli musozi wa balsalele nu ntukumenyinina bubuno? 11Lebelebe, lebelebe, nkukubula buno, bubo butukumenya ubutukutenda, nu bubo butukumonako ubutukulongeka; tondo tamuitabizia bulongeki bueitu. 12Ndi nkumubula bua ga kisi, nu tamukubukatizia, nu buni bumunakatizia ndi namubula bua muigulu? 13Nu takuli muntu wabakamine kuigulu, tondo wozo watukile kuigulu, u Muana wa muntu uli muigulu. 14Nu anga buasakikile Mose nzoka mu kalula, bubo Muana wa muntu atunganana kusakikua. 15Nu muntu unsania wamukatizia abe na kalamo katanakuzinda. 16Kubuno Kalaga eitide nunse kutunda ba ga kisi, akasene Muana wage wa ngomo, buno muntu unsania wamukatizia ntazimine, tondo abe na kalamo katanakuzinda. 17Kubuno Kalaga ntasingile Muana wage ku kisi kukisungia, tondo kisi kionibue mueli. 18Wamukatizia ntasungibue; gutamukatizia asila kusungibua; kubuno ntakatizizie izina lia Muana wa ngomo wa Kalaga. 19Nu luluno luli lusungio buno, kiengi kiavule ku kisi, tondo bantu belamine kapilo kutinga kiengi; kubuno misako zabo zabezaga mibi. 20Kubuno muntu unsania ukukita mibi ekusomba kiengi, nu ntekuvua ku kiengi buno misako zage zinazugilua. 21Tondo muntu unsania ukukita misako za bulili ekuvua ku kiengi, buno misako zage zimonekeko kubuno zikukitua mu Kalaga.
Yoana Mubatizi Ekubula Bantu bua Yesu Lingo.
22Kusila kua bubo, Yesu nu beigisibua bage bavule mu lulenge lua Yudaya; ezizizie kuko nu abatizizieko. 23Nu Yoana nuwe abatizagia ku Ainona buigi na Salima, kubuno kuko kuabezaga mazi meingi: nu bantu bavule, nu babatizizibue. 24Kubuno Yoana abezaga ntekandua. 25Beigisibua ba Yoana babezaga na miango na muYuda umozi ku kitondo kia kuengibua. 26Nu bavule ku Yoana, nu bamubuide bune, Labi, guwabezaga nage lisilia lia Yadene, uguwalongekelaga, we ekubatizia, nu bantu bansania bekuenda kueli. 27Yoana abakuide bune, Muntu ntanamona buampa, ndi ntakasuabo muigulu. 28Inyue benyene mukundongekela buno natendile bune, Nsili Klisto, tondo nalinge kusingua luabusio luage. 29Uli na mukikulu nti u musongi: tondo muida wa musongi ekuimana nage, ekunguilila iyuki liage, ekuba na mbogimbogi kuiyuki lia musongi: mbogimbogi zane zasililila. 30Atunganana kukutibua, nunne nisigulizibue.
31Watuka muigulu nti atinga bansania: wa ga kisi eli wa kisi, nu nti ekutenda bia ga kisi: nu watuka muigulu nti atinga bansania. 32Bubo buamonineko nu bunguleko, ububo buekulongeka; nu takuli ukuitabizia bulongeki buage. 33Wetabizia bulongeki buage nti abikua kamenyikilo buno, Kalaga eli bulili. 34Kubuno wasingilue na Kalaga ekutendaga moki ma Kalaga: kubuno Kalaga ekukasanaga Muuza ntagulindika. 35Isi atunda Muana, nuwe amukasa binsania mu maboko mage. 36Walatizia Muana eli na kalamo katanakuzinda; tondo utakatizia Muana ntakamona kalamo, tondo bongua bua Kalaga buamuikalila.
Currently Selected:
Yoana 3: NTKI57
Highlight
Share
Copy
Want to have your highlights saved across all your devices? Sign up or sign in
Nouveau Testament en Kilega © Bible Society of the Democratic Republic of Congo, 1957.