Yoana 1
1
Musagu Musoga Wasanzilue na Yoana. Yesu Klisto eli Kalaga.
Ebelo 1:2-13.
1Mukulinga muabezaga Idagi, nu Idagi abezaga na Kalaga, nu Idagi abezaga Kalaga. 2We mukulinga abezaga na Kalaga. 3Binsania biakitilue nage; nu takuli kena kakitilue katakitile. 4Mueli muabezaga kalamo; nu kalamo kako kabezaga kiengi kia bantu. 5Kiengi kiasanine mu kapilo; tondo kapilo takakikindile.
Yesu nu Yoana Mubatizi.
Mat. 3:1-17; Mk. 1:1-11; Lk. 3:1-23.
6Muntu avule, musingua wa Kalaga, izina liage Yoana. 7Wono avule ku bulongeki, buno alongekele kikio kiengi, buno bansania bakatizie mueli. 8Wono ntabezaga kikio kiengi, tondo avule buno alongekele kikio kiengi. 9Kiengi kia bulili kiabezaga, kiavule ku kisi, kisanie bantu bansania. 10Wono abezaga mu kisi, nu kisi kiakitilue nage, tondo kisi takiamumenyinine. 11Avule ku bage, tondo bage tabamusekede. 12Tondo bansania bamusekeide, abakasile buangato kuba bana ba Kalaga, ubabo bakatizizie izina liage: 13babutilue ta ku mikila, aba ta ku lutundo lua mubili, aba ta ku lutundo lua wamulume, tondo lua Kalaga.
Idagi Akitilue Mubili wa Bantu.
Mat. 1:18-23; Lk. 1:30-35.
14Nu Idagi akitilue mubili, nu eikalile munkatini muetu (nu tuamonine ku lutanuno luage, luabezaga anga Muana wa ngomo watukile kulsi), eiyala na mponga nu bulili. 15Yoana amulongekede, nu alalukile neiyuki, atendile bune, Uwozo unamubulaga buno, Ekuvua kumbusa kuane eseli luabusio luane; kubuno alingaga kuba luabusio luane. 16Kubuno mu kuzindilizia kuage isue bansania tuakitilue mponga nunse. 17Mulembe wakasilue ku Mose, tondo mponga nu bulili biavule na Yesu Klisto. 18Takuli muntu wamonine ku Kalaga; tugu Muana umozi wa ngomo eli ku bukuba bulsi we uwamulolesia.
Yoana Mubatizi Ekubula Bantu Kitondo Kia Yesu.
Mat. 3:1-17; Mk. 1:1-11; Lk. 3:1-18.
19Nu bubuno ubulongeki bua Yoana, baYuda bamusingide basankoga nu baLewi kutuka ku Yelusalema buno bamubuzizie bune, Uwe unazi? 20Nuwe eitabizizie, nu ntatunine, nu eitabizizie bune, Nne nsili Klisto. 21Bamubuzizie bune, Uli nazi? ndi uwe u Eliya? Nu atendile bune, Nsili wozo. Bamubuzizie lingo bune, Ndi uli wozo mulengania? Nu akuide bune, Kilo. 22Bamubuzizie bune, Uli nazi? buno tuasambalile batusingile. Buni bukuibula? 23Atendile bune, Nne nili iyuki lia muntu ukulalukaga mu kalula bune, Isiazi matingilo ma Mukota, anga buatendile mulengania Yesaya.#Yesaya 40:3. 24Nubo basingagua na baFalese. 25Bamubuzizie bune, Ndi ntuli Klisto aba Eliya, aba mulengania wono, buni bukubatizia? 26Yoana abatendile bune, Nkubatizia na mazi; munkatini muenyu muemanuka umutakumenya, 27avue kumbusa kuane, nsiatananina kukandula mizigi za bisalapata biage. 28Bubo buakitilue mu Betania lisilia lia Yadene, muabatizagia Y oana.
29Gakede busi amonine ku Yesu ekuvua kueli, nu atendile bune, Lolazi Muana wa Mukoko wa Kalaga, ukueka buagi bua bantu ba kisi. 30Uwono unamubulaga bune, Avue kumbusa kuane eseli luabusio luane kubuno alingaga kuba luabusio luane. 31Nne nsiamumenyine; tondo navule kubatizia na mazi buno amoneke ku balsalele. 32Nu Yoana alongekile bune, Namona ku Muuza Wasililila ekugela muigulu anga nkulimba; nu zemene gantata gage. 33Nsiamumenyine, tondo ansingile kubatizia na mazi ambuide bune, Muntu uwamonage Muuza ekumugelela, nu kuikala gantata gage, we ukubatizia na Muuza Wasililila. 34Namonine ku bubo nu nalongekede bantu bune, Wono eli Muana wa Kalaga.
Yesu Ekulinga Mukambo Wage, Bango Bantu Bekumukatizia.
35Gakede busi lingo, Yoana abezaga emana na beigisibua bage babili; 36nu alolile Yesu kisozi, ekuenda, nu atendile bune, Lolazi, Muana wa Mukoko wa Kalaga! 37Nu beigisibua bongule kuatendaga bayangile Yesu. 38Nu Yesu akebetukile, abamonine bekumuyanga, ababuzizie bune, Kikizi kimukulonda? Nu bamu buide bune, Labi (buisulilua buabo Musozi), kuni kukuikalaga? 39Nu ababuide bune, Vuazi mumone. Bendile nu bamonine kuikalilaga; nubo beikeide nage kindi kikio; zabezaga zakuka nkungu ikumi. 40Andele, muto wa Simona Petelo abezaga umozi wa kubabo babili bonguaga kuatendaga Yoana, nu kuyanga Yesu. 41Nu alingile kubasa kuko kuabezaga iselenzi Simona, amubuide bune, Tuamona ku Masiya (buisulilua buabo Klisto). 42Avule nage ku Yesu. Yesu amulolile kisozi, amubuide bune, Uli Simona, muana wa Yoana: bakakumana Kefa (buisulilua bualio Petelo, aba Ikozi).
43Gakede busi, atundile kuenda mu kisi kia Galela, nu asangile Filipo, nu Yesu amubuide bune, Nyange. 44Filipo abezaga wa ku Betesaida, mu muino wa Andele nu Petelo, 45Filipo asangile Natanaele, amubuide bune, Tuamona ku wozo wasanzilue na Mose mu mulembe, nu balengania, Yesu wa ku Nazaleta, Muana wa Yosefu. 46Nu Natanaele amubuzizie bune, Munatuka kisoga mu Nazaleta? Filipo amubuide bune, Vua umone. 47Yesu alolile Natanaele ekuvua kueli, nu atendile bune, Lolazi mulsalele lebelebe, nteli na buengelezi mueli. 48Natanaele amutendile bune, Buni buwamenya? Yesu amubuide bune, Gabezaga Filipo ntekumana, wabezaga gansi na muti wa figi nakumonineko. 49Natanaele amubuide bune, Labi, uwe uli Muana wa Kalaga nunse, nu uli Mukota wa Isalele, 50Yesu amutendile bune, Ndi wakatizia kubuno nakubula buno nakumonineko gansi na muti wa figi? Wamone ku bungo buatinga bubuno. 51Nu amubuide bune, Lebelebe mukamona igulu liakandulua nu migenzi za Kalaga zikubakama nu zikugela ku Muana wa muntu.
Currently Selected:
Yoana 1: NTKI57
Highlight
Share
Copy
Want to have your highlights saved across all your devices? Sign up or sign in
Nouveau Testament en Kilega © Bible Society of the Democratic Republic of Congo, 1957.