Matayo 8
8
Boto wa Baɛndi
1Ayäkä Yesu se ndoyasokwa nda löngo, bikuku bifi ya bato lotut’Inde. 2Futuku, boto wa baɛndi loya ende Inde, inde lokwa bakulusembe oso wande’inde mbo— Ngɛnɛ, bolɛmbɛ, aɛ kokɔkɔlɔ ndotanesa’mi. 3Yesu lonanola bosamba, Inde lomat’inde, Inde mbo— Ilɛmbi nde ongoma, tanesomoko to. Lisasaya baɛndi lotanesomo. 4Yesu loonga lande mbo— Tɛnɛkɛ, okambesëke oto angɔmwitoto, nde kɛndɛkɛ okatamba bindo yaɛ ende kanga, faefaka Mungu lifaefi kwa ataka Mose ekela kwa ndembe ende bato.
Liuwesomu lia Bɔkɔwa wa Komanda
5Aɔtɔkɔ Inde nda Kafenauma, Komanda wa basilikani loya oyalɔmbɔkɔl’Inde, 6inde mbo— Ngɛnɛ, bɔkɔwa wami aingali se nda ndakɔ la loo loa bɔlɛmbɛtɛ la bomusi finɛ. 7Yesu loonga lande mbo— Itoya ndoyasäsola inde. 8Komanda lomutola mbo— Ngɛnɛ, itiengane mbo ɔɔtɛkɛ ose ya bɔtɔndɔ wami, nde waonga ngo ko lioi kongo, limɔ bɔkɔwa wami kosäsolomo; 9eoka imi angɛnɛ yende oto wolitesa isosha la yende imɔ la basilikani ose yami, la yeonga la ɔmɔi mbo— Kɛndɛkɛ, limɔ atɔkɛ; la ende wasi mbo— Yauku, inde atoya; la ende bɔkɔwa wami mbo— Kelaka lona, limɔ atokela loao. 10Okaka Yesu baoi-ba, Inde lomwaala, Inde loonga lau ebatutaka mbo— Ikoshi kɔni liimeli lifi ongoma ango ende bato ba Isalaele angɛnɛ. 11Isoonga lanu ongoma wewe la mbo wike besokwaka fangi ya batɛmwɛlɔ ba bonyanya la fangi ya litele ndoyayalaka se nda bieka amamwito la Abalayama la Yisaka la Yakobo nda Bɔkɔta wa Use, 12nde bana ba Bɔkɔta belaumbolomoko nda lilima lousa, olo elayalaka bileli la ngɛlɛtɛ ya bainyo. 13Limɔ Yesu loonga la Komanda mbo— Kɛndɛkɛ to; kwani asoimel’aɛ, loao lokelomoko ko ongoma end’aɛ, la bɔkɔwa wande losäsolomo ko la mbile-ao.
14Ɔtɔkɔ Yesu nda ndakɔ ya Petelo, Inde loosha boïli wa Petelo nda efima la loo loa etao. 15Yesu lomata bosamba wande limɔ etao losokwa end’otomali, inde loemala ndokasung’inde.
16La likɔlɔse, iyo loesel’Inde bato wike ebaaka la belimo ebe lamao Inde lokusola belimo ko la lioi, la Inde losäsola batotina eba kambo, 17mbo lioi eliaongomökö la Yesaya Bɔtɔndɔli likɔchɔmɔkɔ mbo—
Inde angɛnɛ aɔlɔkɔ bɛlɛmbu yasu,
Atolaka imɔ ngwo yasu.
18Ɛnɛkɛ Yesu biindi bifi bisolingel’Inde, Inde loonga lau mbo balekeke nda boili wasi, 19nde Botikasa ɔmɔi loyaonga lande mbo— Boekesi itutek’Aɛ l’olo atɔkɛ laɛ. 20Yesu loonga lande mbo— Bɛlɛndɛ bile la baondo la nɔli bile la bikalingo, nde Wana wa Boto ati ango la elela yoingesa botö wande se. 21Boeki wasi loonga lande mbo— Tamachaka’mi mbo ikɛkɛ okaomba sango wami. 22Nde Yesu loonga lande mbo— Tutaka’mi, la machaka ebasowa baombakeke ebawi lau.
Yesu lɔɔngɛsɛ lomba nda Eliya
23Akwaka Yesu nda watɔ, baeki bande lotut’Inde, 24Futuku lomba lofi loya se nda eliya la ongoma watɔ bosiki olia la batutu, nde Yesu loingalaka ilɔ; 25Baeki loyasisɔl’Inde, iyo mbo— Ngɛnɛ, uwes’iso, tososɛɛsɛlɛ. 26Yesu loonga lau mbo— Owängiki moni? Ino ba boeno wa lilendelu. Lamao Inde loemala, Inde loima lofofo la balia, la eliya lotemba tembelele. 27Nde bato lomwaala, iyo mbo— Boni bɔfɔnɔ wa boto-yo, eoka la lomba la balia ba eliya kolitesa lioi liande.
Boto wa Bolimo Bobe
28Iyaka Yesu nda boili wasi, boko yese ya BaKelesene, bato bambale ebayalaka la belimo ebe loyatowana lande. Bakuswaka nda fowa biko sai oyatowana lande, la eoka ya bolengi finɛ angwɛnɛ boto wokɔkɔlɔ ndoeta la mboka ena. 29Futuku iyo loamama mbo— Iso laɛ twende la loni loasɔ, Aɛ Wana wa Mungu? Oyi nde eyamaya ndoyokes’iso biäle oso wa lisho liasu? 30Esika lau liasa lia ndɛi yaläkä bieka. 31Belimo ebe losombol’Inde mbo— Bokusol’iso, kɛsɛkɛ to iso nda liasa lia ndɛi. Inde loonga lau mbo— Kɛndɛkɛ. 32Akuswäkä iyo, iyo lɔɔtɛlɛ ndɛi limɔ liasa litotina lokwa mangu konda löngo konda eliya la yao lowa nda balia. 33Betingani ya ndɛi lofata mangu konda bokenge, iyo lokambesa bato bitotina loasɔ loa bato ana ebayalaka la belimo ebe. 34Lisasaya batotina ba bokenge lokuswakuswaka oyatowana la Yesu; ɛnɛk’iyo wɛnɛ Inde, iyo losombola Inde mbo asekweke nda yese yau.
Currently Selected:
Matayo 8: NTKE58
Highlight
Share
Copy
Want to have your highlights saved across all your devices? Sign up or sign in
Le Nouveau Testament in Kele (Lokele) © British and Foreign Bible Society, 1958, 2019.