Gênesis 6
6
Yurabũ Deusũ hãtxa nĩkama txakabui eskai hiwenibukiaki, na hãtxarã
1Yurabu hiwei pai mai anu nati iki taekĩ aĩbuaibu yumei ewaibu 2Deus kẽwaĩbũ Deus kẽwãbumã aĩbu bake uĩkĩ shinãkĩ: “Aĩbuaibu hawẽruabuki”, ikĩ betsa betsapa sharabu katushũ aĩwanibukiaki.
3Hanushũ Senhor Deusũ hatukiri shinãkĩ: “Ẽ yushinẽ hatu merabewapaibia yurabũ ea shinãma txakabukubaĩkĩ hatũ yura besti shinaĩ hiwekanikiki. Haskaibuwẽ taea ana hatishuĩra hunibu hiwetirubumaki. Haskakubainaibu ana 120 bari besti yurabu hiwetã debushãkanikiki”, inikiaki.
4Habiatiãri yurabu keyatapa kushipa ewapahaira hiwerianibukiaki. Habunã, Deus kẽwanikabũ aĩbuaibu habũ Deus kẽwãbuma hatu aĩwãtã txutanameakeakekĩ hatu bake wa bake itxapa kaiã ewatã hanua habu dukũ shenipabui bebũkirihaira shanẽ ibu kushipabu unanepa hirabibũ unãkĩ hatu kẽwaĩbu hiwepaunibukiaki.
5Senhor Deusũ hatu uĩkĩ: “Mai anu yurabu txakabuhairakĩ hatũ shinã txakabu hawa heneabumahairaki. 6Mai anu yurabu ẽ hatu damiwabiani hatũ txakabuwẽ taea ẽ huĩtinĩ ẽ bika tenehairaii”, ishũ ana shinã txãkãma 7yuikĩ: “Yurabu ẽ hatu damiwabiani ea sinatamakanikiki. Yurabu hatu tenãkĩ yamawakĩ habiaskari yuinaka betsa betsapa inũ, maĩ sharaibu inũ, peiyaburi mai anu ẽ hatu damiwani dasibi ẽ habube tenã keyuriashanaii. Ẽ hatu damiwabiani hatukiri ẽ ma shinã betsa hayaki”, inikiaki.
Deusũ Noé yunua shashu nunuti bau keska ewapa wanikiaki, na hãtxarã
8-9Hakia Noé pepa hiwekĩ Deus benimawakubaini eskai hiwekũkainikiaki. Hawenabube hiwea ha besti pepakĩ Noé bestitũ Deus haibuwakĩ hawẽ hãtxa txibaĩ hiwekũkaĩkĩ 10huni bake dabe inũ besti bawashũ hatu kenakĩ: “Sem inũ Cam inũ Jaféki”, anikiaki.
11-13Mai anu hiweabu txakabui detenamei itxakanikai hatũ mae txakabuwapaunibukiaki. Hatũ txakabu uĩkĩ Deusũ Noé yuikĩ: “Yurabũ shinã txakakĩ akaibu uĩtã eska hatukiri ẽ shinãshinaki. Mai anu ibubis txakabuwaibuwẽ taeshũ yurabu dasibi inũ mai anuabu dasibi ẽ hatu tenãkĩ keyushanaii, yamawakinã”, iwanã, 14“Shashu bau keska nunuti ewapa hene hikitiruma wawe, bau itsa dĩtuya wakinã. Hawẽ beshpa tibi buiwẽ buyakĩ pushakĩ keyuwe, petxiuri inũ nashpaurirã”, atã 15ana yuikĩ: “Hatishũ washãwẽ, 135 metro hawẽ txaipa wakĩ inũ, 20 metro hawẽ hashpa wakĩ inũ, 13 metro hawẽ kesha keyatapa wakinã”, iwanã, 16“Hanushũ hawẽ mabe buiwẽ pushakĩ keyutã hawẽ mabeshãwẽ. Haska watã uke merã tapu dabe wakĩ nabe dabeya washãwẽ. Hanushũ hawẽ uĩti shui pishta manaũri meio metro washãwẽ, hanushũ hanu hikiti shui namakis beputiya wakinã. 17Mĩ ma haska wakĩ keyukẽ ẽ hene tueaya yurabu dasibi mai hirabi hiwebaunabu atxi keyua henẽ hasai debui keyushãkanikiki. 18Hakia ẽ mia yubaii. Hawẽ nunuti mĩ shashu merã mĩ aĩ inũ, mĩ bakebu inũ, mĩ babawãbube nunuti merã mĩ hikia mã benuyamanũ ẽ matu mekekubaĩshanaii”, akĩ 19yuitã yuinakaburi hiwemakatsi ikĩ yuikĩ: “Hiwemakĩ bestibu dabe nunuti merã mibe bitxishãwẽ, yushã inũ benerã, mia keskai hau haburi hiwepakeshanũbunã”, atã 20“Piti inũ pitibuma yuinaka betsa betsapa bestibu yushã inũ bene mianu ibubis beaibu ẽ mia hatu mekemashanaii. 21Piti betsa betsapa bikĩ mirimahaira itxawatã arushãwẽ, minabu inũ yuinakabubetã mĩ hatubetã pishanairã”, aka 22haska Deusũ yunua Noẽ dasibi nĩkashĩshũ txibãkĩ akĩ keyunikiaki.
Currently Selected:
Gênesis 6: cbsBR
Highlight
Share
Copy
Want to have your highlights saved across all your devices? Sign up or sign in
NT © 1980-2006, Wycliffe Bible Translators, Inc.
OT portions © 2006, Wycliffe Bible Translators, Inc.