Mark 3
3
Yesu, Oroto urana kebekebena ivi yawahani
(Mat 12:9-14; Luk 6:6-11)
1Mara gheha au Sabate, Yesu i naeme pari au numana ma oroto urana kebekebena i inanai; kampa i tughutughura. 2Ma Pharisee ghehauhi hi ghohei da Yesu hitavi wavui. Yamna aubaina tauhi hi inana taghotaghonaiyei da hita inanai; apo au Sabate orotona itavi yawahani bo eꞌegha. 3Ma Yesu, orotona urana kebekebena i riwei, “Ma neꞌi au naona ma mahiri.” 4Ma Yesu, rava i rau-bayadehi ipa, “Sabate au marana, metauna kauwana i ahi: ahi bo apoapoe, tanavi yawahana bo tanavi hiraghena?”
Tauhi anatapuhi hi genuwana. 5Yesu ana amoghaighaina i inana viravira. Au baina tauhi, koyahi i bagibagi ma tauna horana i boya kauwei. Yesu, oroto urana kebekebena i riwei ipa, “Uram mavi yoyoi.” Tauna urana ivi yoyoi ma urana i yawahana. 6Ma Pharisee hi nae Herod ana rava auwarihi,#3:6 Herod ana rava anona yamna mai Jew ahi boru, tauhi aiyavoꞌi Rome gabemanina hevovo hagui. Tauhi ahi bada guyau Herod Antipas. Mai Jew maghamaghauhi ma mai Pharisee maiteni, hi notai da Herod ana rava tauhi tauvi benabenam ahi rava ohohina auwarihi. ma ahi oga hi tarai da Yesu me hitavi hiraghenanei.
Patara ghaeghaena, Yesu hivo taghotaghoi
7-8Yesu ana tauvotaghotagho maiteni hita vainameyehi ma hi nae Galili topana au gerahana. Ma rava maghamaghauhi, Yesu aiwaꞌi i kaukauweiya tuyeghana hi nonori aubaina mai: Judiya, Jerusalem, Idumea ma dobu ghehauhi, Jordan wairana au babagehauna, Tyre ma Sidon; anatapuhi, tauna awarina hi neꞌi. 9-10Yesu, rava maghamaghauhi ivi yawahanihi. Ma yamna aubaina da doridoriahi hivi am-dududu nae; tauna vodadanana aubaina. Tauna egha ita ghohei da hina gariuꞌumi. Aubaina da ana tauvotaghotagho i riwehi da waga hivo kaukauwei. 11Maranaina, aruwa-apoapoehi rava au horahi, Yesu hi inainanai. Tauhi, tauna au naona hi peꞌupeꞌu ma hi garagarara, “Tam God Natuna.”
12Ma Yesu i rau-gamopotahi da havena tauhi hitavi hegha da tauna aiyaꞌi.
Yesu, ana Apostle 12 i vinehi
(Mat 10:1-4; Luk 6:12-16)
13Yesu ana tauvotaghotagho maitehi au oya hi ghae ma kampa oroꞌoroto ana ghohanei i ghorehi ma hi nae awarina. 14Oroto 12 i vinehi ma ivi wavahi Apostle.#3:14 Apasolanona Greek ponanei paritawanai. Ma ipa, “A vinemi da maiteꞌu tana maꞌae ma muriyai ana paritawanemi rauguguya aubaina.” 15Ma God ana rewapanei aruwa-apoapoehi rava au horahi onavi hopunihi.
16Tauhi 12 i vinevinehi ahi wava yamna,
Simon ivi wavai Peter,#3:16 Peter anona “Ghaꞌima”
17ma Zebedi natunatuna James ma ana tevera John, ivi wavahi Boanerges, anona waiparara natunatuna,
18Andrew,
Philip,
Bartholomew,
Matthew,
Thomas,
James, Alphaeus natuna,
Thaddaeus,
Simon tauna Zealot,#3:18 Zealot anona yamna mai Jew ma tauhi Roman hevivi am paripariyehi.
19ma Judas Iscariot tauna, Yesu tau-vibenabename ina.
Rava hipa, Aruwa-apoapoena, Yesu evivi badei.
(Mat 12:22-32; Luk 11:14-23; 12:10)
20Yesu ana tauvotaghotagho maitehi hi naeme au numa. Ma patara upumahi hi riyehi da tauhi egha tagotagogina da hita am. 21Ma Yesu ana ghughuni tauna, tuyeghana hi nonori ma hipa, “Tauna i buꞌuwa.” Yamna aubaina ana ghughuni hi neꞌi da tauna hita taravaini.
22 Raugagayo Tauviharaharamanahi ghehauhi, Jerusalemei hi nei ma hipa, “Aruwa-apoapoehi ahi bada Beꞌelzebub, Yesu au horana i rui. Ma yamnei aruwa-apoapoehi evivi hopunihi.”
23Yamna aubaina Yesu, Raugagayo tau-viharaharamanahi i ghorehi ma i awanaꞌi, ipa, “Menanaꞌarena ma Satan, aineyana inavi hopuna meyei? 24Mepa da dobu ravahi hinavi kahakaha ma hinavi ghaviya vivira, yamna dobuna ina peꞌu. 25Ma nanaꞌarena ghughuni hinavi kahakaha ma hinavi ghaviya vivira; nai ghughuni ina peꞌu. 26Inapa Satan ana dam hinavi kahakaha ma hinavi ghaviya vivira, apo hina peꞌu. 27Taudanene egha tagotagogina da oroto virewapanana ana au numa ina rui ma ana purapura ina danenei. Au naona orotona ghuravei ina raghiraghihi ma muriyai ina danene. 28Riwa vaimahiei a ririwemi, God, ami ghohaꞌapoapoe ma ami terevaidegha anatapuhi ina nota tawaneꞌi. 29Ma aiyaꞌi ravana, Aruwa Vivivireina e tereterevaideghei; God apo egha na ravana ina rupeni. Tauna, yamna ghohaꞌapoapoe maemae vavahaghana i ghohai.” 30Yesu wenanaꞌarena i babani, aubaina tauna, Aruwa Vivivireinei aruwa-apoapoehi ivivi hopunihi ma rava hipa “Tauna, aruwa-apoapoena i ruini.”#3:30 Raugagayo tau viharaharamanihi Yesu hi tereterevaideghehi da *Aruwa Vivivireina ana bagibagi yamna baravu da parauma. God egha ami ghohaꞌapoapoei ina nota-tawanei ina pa ona terevaidegha hi ghirighiri.
Yesu ana ghughuni ohohina
(Mat 12:46-50; Luk 8:19-21)
31Yesu ayona ma varevarehina hi nei da au dowa hi mahimahiri ma riwa hi pari-tawaneꞌi da tauna ita nei tauhi auwarihi. 32Ma patara, tauna hi tughura kwaviviroi ma tauhi, Yesu hi riwei hipa, “U nonori! Ayom ma varevarehim au dowa ma he ghoheghohem.”
33Yesu i pari-beyehi ipa, “Aiyaꞌi ayoꞌu ma varevarehiu?” 34Anina ma Yesu, tauhi hi tughutughura i inanahi ma ipa, “Ona inana! We tauhi ayoꞌu ma varevarehiu! 35Aiyaꞌi God ana ghohana e kaukauweiya tauna, ayoꞌu, novuꞌu ma varehiu.”
Currently Selected:
Mark 3: WEDT
Highlight
Share
Copy
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved