YOHANES 3
3
Yésus ngan Nikodemus
1La'ah pu'un jah kelunan ngaran néh Nikodemus, éh pengeja'au irah Yahudi, lakei' inah kivu adet Parisi. 2Sioo' jah merem tai éh tavin Yésus ngan bara' ngan Néh, O Guru, kejam mé' Ka'au jah guru éh senohoo' Allah, uban bé' pu'un jah usah péh éh omok maneu' kekat telana' éh ja'au barei' éh neu' Ko' nah hun Allah bé' pu'un ngan néh, ha' néh.
3Ka' ha' Yésus mipa éh, Akeu' bara' mu'un ngan ko', hun kelunan bé' murip maréng kepéh, bé' Allah omok Pengeja'au néh ngan mihau éh, ha' Néh.
4Ka' ha' Nikodemus ngan Néh kepéh, Kineu', omok kelunan éh lepah ja'au usah paléu anak bala kepéh da'? Kineu', omok éh masek lem boré tinen néh ngan pelohoo' maréng kepéh, ha' néh.
5Ka' ha' Yésus mipa éh, Akeu' bara' mu'un ngan ko', séé'-séé' éh bé' murip maréng kepéh neu' baa' ngan neu' Sahéé', bé' éh omok tai lem nihau Allah. 6Kekat anak pu'un urip néh jin tinen néh, bang Sahéé' Ni'ai Iah awah éh omok mena' urip maréng lem kenin kelunan. 7Mai ke' béé kenin menéng ha' Ké' éh bara', Tekep keh alaa' urip maréng kepéh, 8pu'un kepu palit kemah-kemah ketai alit néh, uleu' menéng ha' leveng néh awah, bang bé' uleu' jam jin semah savéé' néh ngan kemah éh tai kepéh. Kenat péh tong siget usah éh murip maréng kepéh neu' Sahéé', ha' Yésus ngan néh.
9Ka' ha' Nikodemus ngan Néh kepéh, Oo' kei? kineu' ida', ha' néh.
10La'ah ka' ha' Yésus mipa éh, Kineu', ka'au' néh éh guru ja'au tong irah Yahudi, bang bé' ke' jam iteu' kei? 11Akeu' bara' mu'un ngan ko', pu'un mé' bara' tong éh kejam mé', ngan bara' tong éh ta'an mé', bang bé' ka'ah keloo' ngelan éh benara' mé'. 12Hun keh bé' ngelan ha' Ké' bara' tong éh pu'un tong tana' iteu', kineu' keh omok ngelan hun Ké' bara' tong éh pu'un tong seruga? 13Bé' pu'un jah usah éh lepah mukat tai seruga bang Anak Kelunan éh pu'un tuai jin seruga, ha' Néh.
14 Ka' ha' Yésus kepéh, Barei' Musa metéé' torok temagaa' tong kayeu' hun néh pu'un tong tana' pegawa sahau rai, kenat péh tekep Anak Kelunan netéé' réh kepéh, 15dokoo' séé'-séé' péh éh ngelan tong Anak Kelunan, omok éh alaa' urip pelinguh. 16Uban ja'au penika Allah ngan kekat kelunan tong tana' iteu', inah Iah mena' Anak Néh éh jah de' ke' inah, dokoo' séé'-séé' éh ngelan tong Anak Néh, bé' éh matai bang néh omok alaa' urip pelinguh. 17Uban bé' Allah nyohoo' Anak Néh tuai tong tana' iteu' ke' Néh ngukum kelunan tong tana' iteu', bang Iah nyohoo' Éh tuai ke' Néh purip kelunan tong tana' iteu'.
18Séé'-séé' éh ngelan tong Anak iteu', bé' iah teneng ukum, bang kelunan éh bé' ngelan, kenukum Néh tenéh réh, uban réh bé' ngelan tong Anak Allah éh jah de' ke' inah. 19Jalan keh jam éh kenat, inah éh, uban rema lepah tuai tong tana' iteu', bang kelunan pelapah keloo' murip tong merem jin réh keloo' murip tong rema uban kekat penganeu' réh sa'at awah éh. 20Kekat kelunan éh maneu' sa'at leko éh tong rema, ngan bé' éh keloo' tai tong rema, dai kekat penyuai néh poléng. 21Bang séé'-séé' éh kivu pengeloo' Allah, keloo' réh tai tong rema, dokoo' rema inah omok pepoléng kekat penyuai néh pu'un éh pekua' pengeloo' Allah, ha' Yésus ngan réh.
Yésus ngan Yohanes Batis
22La'o inah lakau Yésus ngan irah bakéh Néh tai tana' Yudea. Mokoo' Éh sinah pemung ngan réh ke' Néh ngebatis kelunan. 23Tovoo' inah Yohanes pu'un mebatis kelunan tong baa' Ainon déhéé' Salim, uban ja'au baa' sitai. Pinaa' kelunan tavin éh ke' néh mebatis réh. 24 Tovoo' inah bé' jak Yohanes kenamit réh lem lamin tutup.
25La'ah jelua irah bakéh Yésus paneu' ngan jah kelunan Yahudi tong adet réh peti'ai. 26Boh réh tavin Yohanes ke' réh bara' ka' ngan néh, O guru, kelunan éh pu'un pemung ngan ko' hun ko' mokoo' saa' dipa baa' Yordan éh benara' ko' ngan mé' rai, pu'un Éh ngebatis réh hun iteu', pinaa' kelunan tavin Éh, ha' réh.
27Ka' ha' Yohanes mipa réh, Bé' pu'un jah usah péh éh omok alaa' ineu'-ineu' hun Allah bé' mena' éh ngan néh. 28 Ka'ah péh lepah menéng ha' ké' bara' ka', Bé' éh akeu' éh Kristus bang akeu' saa' tenah jin Iah. 29Tong kelunan kawin, lakei' éh alaa' redo, inah éh kelunan éh kawin, ngan bakéh néh murung kenin réh menéng ha' lakei' kawin inah, ngan murung kenin ké' hun iteu'. 30Adang tekep Yésus éh ja'au ngan akeu' éh si'ik awah, ha' néh.
Iah éh tuai jin seruga
31La'ah ka' ha' Yohanes kepéh, Iah éh tuai jin seruga Iah pelapah ja'au jin kekat kelunan. La'ah iah éh tuai jin tana' iteu', pohoo' néh jin tana' iteu' awah, ngan pu'un éh tosok tong kekat éh pu'un tong tana' iteu' awah. Iah éh tuai jin seruga, pu'un Éh bau kekat ineu'-ineu' péh, 32ngan pu'un Éh bara' tong kekat Éh ta'an Néh ngan éh nenéng Néh, bang bé' pu'un kelunan alaa' ha' éh benara' Néh nah. 33Bang hun kelunan pu'un alaa' ha' tebaraa' Néh, iah pepoléng adang Allah pu'un teneng. 34Kelunan éh tuai sohoo' Allah pu'un éh bara' kekat ha' Allah, uban Allah pepenoo' kenin néh neu' Sahéé' Ni'ai. 35 La'ah Tamen Néh murung Anak Néh ngan pu'un Éh mena' kekat ineu'-ineu' lem nihau Anak Néh. 36Séé'-séé' éh ngelan tong Anak Néh inah, iah pu'un urip pelinguh, bang séé'-séé' éh bé' ngelan tong Anak Néh inah, bé' éh omok alaa' urip, bang rek Allah ngan ukum neu' Allah teneng tong néh, ha' Yohanes.
Currently Selected:
YOHANES 3: PNT
Highlight
Share
Copy
Want to have your highlights saved across all your devices? Sign up or sign in
Irah éh suai © 2009, Pengepemung irah éh suai Surat Tahun tong Malaysia (The Bible Society of Malaysia) Copyright © 2009 The Bible Society of Malaysia
Éh Keruwah koléé senuai © 2011 Pengepemung irah éh suai Surat Tahun tong Malaysia (The Bible Society of Malaysia) Copyright 2011 The Bible society of Malaysia